MARKUS 14 - Lala NT

Ɓaa puk yaro Yeso Baitaniya

¹ Nga wa Mbukamsa Tatkoma ma Mbukamsa Nkaadǝng Yisti semra wa pee tǝro raɓ, Pa kuɓsa nek mbusasa ma malǝmma fǝɗkǝta Musa sa ɓǝ kǝr ɗǝɗa kǝɓa ma Yeso a nhuukǝra ra me ɓaa toɗɗo.

² Pa ɓǝ nkee me, “Sem a fer Mbukamsa wa ra, me tom ɓeta ɓǝ nik kito ra.”

³ A fer yǝse a Betanya wa, a ɗuur yaake ǝn yarsǝsǝ me Siman yǝsǝ ma siyo tǝmo ya wa, ɓǝn sesǝ mbusiya se wa, pa toone ke yǝ wo a sanii ma yaro u ma nseera yaɓ wa, a Kǝnɗa ǝn yarsǝ me alabasita ra, u ǝn tirisǝ ma koɓa dem wa. Pa yǝ ookǝ kǝnda sǝra, yǝ baɗ yar ma nseera yaɓ sǝsa a ɗuura Yeso ra.

⁴ Ɓaata ɓet ɓǝsǝ kǝnso ɓa ɓǝ ɗaa dem, ɓǝ nkee ɓaa tǝ mee, “Yǝ tǝblǝ yar wa maaso sal men mbiuu?

⁵ Ai kama pangnga a taa koɓaa dem u kaa nkaa a puu an tinima meera koɓaa isa a na hanhanta kama faɗan!” Pa ɓǝ nkwaakǝ toone kaya dem.

⁶ Pa Yeso yǝ nkee me, “Saa lee mbusa. Sǝn rǝkasǝ meen mbiu? Ai yǝ tom nǝ mbu kwalari ɓa.

⁷ Sǝ ke ma hanhanta nfee, hana kamni kǝsǝ ɓǝ kwasi. Pa nwaano nǝ sem kee ma sase nfee ra.

⁸ Yǝ tom mbu kiya nkaa yǝ tom ɓan. Yǝ puknǝ yar seera yaɓ wa a maabiri yaane me kǝnǝn hok ma siso.

⁹ Ɓongtǝra nǝn nkeesǝ, hana a han naɓa a put ntaandi wa ɓa nsaad, me ɓaa kǝ nkee mara kwalari ra, mbu toone ya yǝ tom nǝsǝ ɓa, ɓaa kǝ nkee kǝn, me a ɗimma sase.”

¹⁰ Pa Yahuda Iskariyoti fin a ɗaaso emfǝɗkaa pu nhaa raɓ sǝɓa, yǝ ko a kuɓsa nek mbusa sa ni.

¹¹ Ɓǝ kurasǝ maaso wa ɓǝ hur kuɗa dem, ɓǝ nkee me tǝ yauwan kǝtǝngǝ na koɓa. Pa Yahuda yǝ ntii kǝr ɗǝɗa kiya tom ya fang Yeso ra.

Yeso yǝ se mbukamsa tadko ɓa ke ma emfǝɗkaa ɓǝsa

¹² A kaa ntiiri u Mbukamsa Nkaadǝng u Yisti semra wa, u ɓan haasǝ nkweera tǝmnkaa Mbukamsa Tadko ma ɓa wa, pa emfǝɗkaa Yeso ɓa ɓaa taa me, “Ngǝn taa me ko tǝngǝ werkǝ ham ngǝ ka se mbuse Mbukamsa Tadko ma nau?”

¹³ Pa yǝ timi emfǝɗkaa ɓǝsa raɓ, yǝɓǝ nkee me, “Sǝ kan a ɗaaso uru wa. Kǝsǝ pam ma ate ke yǝ toosǝ sǝɗa ma mbraa. Sa ɓǝɗǝ.

¹⁴ Nsaad ɗuur yǝ kansǝwa, sǝ nkee An taanda sisi me, ‘Malǝm yǝ taa me, hit waano nau? A ham kǝnǝ se mbuseya Mbukamsa Tadko ma ma emfǝɗkaa ɓǝna ɓau?’

¹⁵ Sase ɗǝm kiyǝsǝ weɗa kuɓ kwang hito ɓoti wa u ɓaa weesǝ werko me Mbukamsa wa. Kǝnso kǝsǝ ndǝn werkǝ mbuseya.”

¹⁶ Pa emfǝɗkaa ka ɓa ɓǝ nii ɓǝ kana ɗaaso uru wa, koɓǝ taa mbu ka ɓa nga Yeso yǝ nkee ɓǝsǝ wa. pa ɓǝ wǝrkǝ Mbukamsa Tadko ma kaɓa.

¹⁷ Pa ɗikra tomsǝ wa, Yeso yǝ wo ma ɓaa pu nhaa raɓ sǝɓa

¹⁸ Pa ɓǝn sesǝ mbuseya wa, Yeso yǝɓǝ nkee me, “Ɓongtǝra nǝn nkeesǝ, fin a ɗaaso waaso kiyǝ nǝ fang nga, ya yǝn sesǝ mbuseya ma niina ya.”

¹⁹ Pa emfǝɗkaa sǝɓa ɓǝ ntii nfiima a ɗaaso ɓoso ɓǝn nkeesǝ fin fin, “Ən nii nau?”

²⁰ Yeso yǝ kak me, “Kǝ tom fin a ɗaaso waso pu nhaa raɓ sǝsa, yaa tǝ fangsǝ nema ke ma sase a nkoo fin ya.

²¹ Au Ete ya kiya ko nga ɓaa nyorsǝ a likarkar Kaa wa wa. Pa ǝn mbu manyamanyato ɓa, a eɗ kaya ni, yaa kiya fang Au Ete ya wa! Kama kaa tom yaɓ, me ka ɓaa haasǝ ra.”

²² Pa ɓǝn sesǝ mbuseyan se wa, Yeso yǝ too nkaadǝng, yǝ na himara, yǝ ɓaa yǝ na emfǝɗkaa ɓisa, yǝ nkee me, “Sǝ kono, ndǝ maabiri yaane.”

²³ Pa yǝ too kofi u mbraa em ngwate inabi ma, ndiira yǝ nasǝ himara a Kaa ni wa, yǝɓǝ na, yǝ nkee me, sǝ nsaad sǝ wee.

²⁴ “Unwa ǝn monmana. Monma kung waawo, ma Ɓaa kǝ tuk me ɓeta dem.”

²⁵ “Nǝn nkeesǝ ɓongtǝra, nǝ fǝta wee mbraa emngwate inabi ma wara, meen fer kǝna wee feera u nfii nfii a kuɓsutu Kaa wa ra.”

²⁶ Pa ɓǝ kǝɗsǝ pina nyoo Kaa sa wa, ɓǝ fiɗ ɓǝ faɗ a yol Zaitun wa.

Bitrus renǝ maa Yeso wa

²⁷ Yeso yǝ nkee emfǝɗkaa ɓǝsa, “Sǝsǝ nsaad wa, sǝkǝ mon sǝni lee, ngaa ɓaa nyorsǝ a Likarkar Kaa wa, yǝ nkee me, ‘Kǝnǝ hoɓ an wanda ya, ɗǝm tǝmnka kǝɓǝ yaasǝ.’

²⁸ Pa ndiira kǝna nii wa, kǝnǝ sǝ nkaa ko a ur Galili wa.”

²⁹ Pa Bitrus ya nkee me, “Hana nsaad ɓǝ mon ɓǝ ngǝ lee, nase, nǝ ngǝ lee ra.”

³⁰ Yeso yaa kak me, “Nǝn nkee ngǝ ɓongtǝra, naso, a pǝrtǝra ra, meen ǝn nkee me kokra ǝn pomo u raɓte ya, kǝngǝ nǝ renǝ a kan taatǝn..”

³¹ Pa Bitrus yǝ ɓaarǝ nkee ma kwakwato me, “Hana kama kǝnǝ woɗ ke ma ngiinga, Nǝ pǝta nkee me nǝ maa ngǝ ra ra.” Ɗǝm ɓaata ɓǝ nkee maaso kǝn nsaad.

Yeso yǝ tom kǝnara a Gatsemani

³² Pa ɓǝ ko a ham ǝn yarsǝ me Gatsemani ɓa, Yeso yǝ nkee emfǝɗkaa ɓǝsa me, “Sǝ kaɗ a hamɓa. Kǝnǝ ko nǝ tom kǝnara.”

³³ Pa yǝ too Bitrus, ma Yakubu, ma Yohanna ma ke ma sase. pa yǝ ntii kura kuɗa tebteb ta ma rǝkata.

³⁴ Pa yǝɓǝ nkee me, “Huurtu nwaano yaa kongsa nga kǝnǝ woɗɗo. Sǝ kaɗ a hamɓa, sǝ tomaa waro.”

³⁵ Yǝ kosǝ ngeek a wiiyo wa, yǝ nwii ma ota ita a putu, yǝ tom kǝnara, yǝ nkee me, me kǝ tomo, a too kongsa ǝn wosǝnwo sa.

³⁶ Ya nkee me, “Abba, Paapa, hana mbi ǝn mbu toma a ngani, Nǝ too kongsa a nani. Nsaad hana maaso, a tom mbu ngǝn yausǝ ɓa, sem mbu nǝn yausǝ ɓa ra.”

³⁷ Pa yǝ kang a emfǝɗkaa ɓisa ni, yǝɓǝ wo ɓaa munda. Yǝ nkee Bitrus me, “Siman,” “Nga mundau? Ngǝ nkaa ngǝ kaɗ a waro u awa fin wa rau?

³⁸ Sǝ kaɗ a waro, saa tom kǝnara, me tom sǝ kan a han pǝtara ɓa ra. Wiso yǝ yauwan, pa maabiri kǝrǝɓ.”

³⁹ Pa yǝ ɓaarǝ yǝ kanga, yǝn tom kǝnara, yǝn ɓaarǝ mbu kakka yǝ nkeesǝ ɓa.

⁴⁰ Pa yǝ kangsǝ wa, wo yǝɓǝ wo ɗǝm ɓaa munda, me nuunwa ɓosa tomon lǝklǝk. Ɓǝ maa mbu kǝɓasa nkee ɓa ra.

⁴¹ Pa yǝ kang u taatente wa, yǝɓǝ nkee me, “Sǝ nding a munda ɗǝm sǝ nwiinwii mbasau? Maan! Sǝ sengge, fer usu kanan, u ɓaa ka fang Au Ete ya wa a nema ɓaa ma tentenato ɓa ni.

⁴² Sǝ nii ndǝ faɗa, yaa yǝ fangnǝsǝ ya, yǝ won!”

Ɓaa ma Yeso

⁴³ Yeso yǝsǝ nding a kanmǝra wa, Yahuda, fin a ɗaaso emfǝɗkaa ɓǝsa pu nhaa raɓ sǝɓa, yǝ wo ke ma ɓeta dem ɓǝ masǝ songgommaa ma kwalangngaa. Ɓetsǝsa ndǝ wiina kuɓsa nek mbusa sa ma malǝma fǝɗkǝta Musa sa, ma wiina ɓeta ɓa.

⁴⁴ Yahuda Iskariyoti ya kiya fang Yeso ya, yǝ wee ɓǝ weɗa mbu kiya tom ɓǝ maa men sase ya, yǝɓǝ nkee me, “Yaa kǝnǝsa maa ma nɗaa ɓaatǝwa ya, ndǝ sase Eɗ kaya, Sa maa yaɓ saa faɗa.”

⁴⁵ Wo Yahuda wa nok, yǝ ko a Yeso ni, yaa nkee me, “Malǝm!” Pa yaa ma, ma nɗaa ɓaatǝwa.

⁴⁶ Pa ɓet kaɓa ɓǝ ma Yeso, ɓaa ma ma kwakwato.

⁴⁷ Pa fin a ɗaaso ɓaa ɓǝ nǝɗsǝ ngwang kǝnso ma Yeso ɓa, yǝ hik songgom usu yaa tiki hoora kuɓ kwang nek mbusa ya, yaa ɗat ngwee.

⁴⁸ Yeso yaa nkee me, “Sǝ fiɗ ma songgomaa ma kwalangaa me sǝnǝ ma nga nǝ nkwii?

⁴⁹ Hana a han nweeya naɓa, nǝ ke ma sase a taanda hit ɓǝɗ Kaa Urshalima wa nǝn tom fǝɗkǝra, ɗǝm sǝ manǝra. Pa mbu ɓaa nyorsǝ Likarkar Kaa wa kǝ kunggu.”

⁵⁰ Pa hanan yamni yaa lee, yaa mon.

⁵¹ Mbee auwe ke kǝn ke ma ɓan ɓǝɗ Yeso ɓa, yǝ sem ma luktu ra, yǝ ma luktu maɗ. Pa ɓeta ɓǝ kweetǝsǝ mee ɓǝkaa ma,

⁵² pa yǝ ɓǝ lee luktu sǝra a nema ɓosa yǝ moon mbomtil.

Yeso a wii ɓan kan kiita ɓa

⁵³ Ɓaa ko ma Yeso a kuɓ kwang nek mbusa ya, pa kuɓsa nek mbusa sa ɓa, ma wiina, ma ɗǝm malǝma fǝɗkǝta Musa sa ɓǝ kwau nsaad a ham fina.

⁵⁴ Pa Bitrus yǝ ɓǝɗ Yeso ndiira mǝbmǝb, yaa ɓǝɗ ɓaa ko a talte taanda kuɓ kwang nek mbusa ya. Kǝnso payǝ kaɗ ke ma ɓan war taanda ɓa, yǝn waa ara.

⁵⁵ Kuɓsa nek mbusa sa ɓa ma wiina ɓan kan mara Yahudawa ɓa ɓǝn kǝr mbu ka ti a toɗ Yeso ɓa, pa ɓǝ taa mbuka ra.

⁵⁶ Ɓeta dem ɓǝ papara a ɗuura ira, pa ee ɓose woo fin da.

⁵⁷ Ndiira usu ɓaataka ɓǝ nii kǝɗ, ɓǝ papara ɗuura Yeso ra ɓǝ nkee me,

⁵⁸ “Tǝ kura yǝ nkee me, kiya ookǝ Hit kaa Urshalima wa u ɓeta marsǝ wa, yǝ mar pera ɓol a tǝro taatǝn, u ǝn maro ete wara wa.”

⁵⁹ Pa nsaad para ɓora wo finda.

⁶⁰ Pa kuɓ kwang nek mbusa ya, yǝ nii kǝɗ a ɗaaso ɓoso, yǝ taa Yeso me, “Ngǝ sem ma mbu ngǝ ka kak ɓa rau? Ən mbi ɓet ɓa ɓǝn nkeesǝ a duura nga masou?”

⁶¹ Pa Yeso yǝ roo nseu, yǝ kaksǝ mbuka ra. Pa kuɓ kwang nek mbusa ya, yǝ ɓaarǝ ya taa ɗǝm, “Ən ngase Almaseho Au Kaa ya, u tǝn nyosǝ wau?”

⁶² Yeso yǝ kak me, “Ən niina. Ɗǝm sǝkǝ wǝr Au Ete ya ɗa a nem seya Yaa Kwang ya, ɗǝm yǝn hamham a liuta.”

⁶³ Pa kuɓ kwang nek mbusa ya yǝ nsaatǝ luktu usu, yaa nkee me, “Ən mbi ndǝn kǝrsǝ a ɗuura ira ɗǝmǝu?”

⁶⁴ “Sǝ kura yǝ pasǝ para a ɗuura Kaa ra wan, Sǝ sen me miniu?” Pa ɓeta nsaad ɓǝ nkee me, tomon ɗaɗ yǝ woɗɗo.

⁶⁵ Ɓaata ɓaa ntii tuu mesa wa, ɓa kaa oota ɓa liki nuuwa, ɓa hoɓɓo, ɓǝn nkeesǝ me, “Tǝ nkee yaa hoɓ ngǝ ni!” Ɓan wara ɗǝm ɓaa too ɓaa hoɓɓo.

Bitrus yǝ renǝ me yǝ maa Yeso ra

⁶⁶ Bitrus yǝsaa putu a taanda kuɓ kwang nek mbusa siya wa, pa fin a ɗaaso hoora emtoona u kuɓ kwang nek mbusa ya yǝ wo kǝnso.

⁶⁷ Yǝ wǝrsǝ Bitrus yǝn waa ara wa, pa ya sengge yaɓ, ya nkee me, “Ngase kǝn ngǝ ke ma Yeso Banazarat.”

⁶⁸ Pa Bitrus yǝ renǝ, ya nkee me, “Niina nǝ maa mbu ngǝn kansǝ a si ɓa ra. Nǝ mara!” Yǝ nkeesǝ maaso wa, pa nii ya faɗ au hito a inntii ya kǝnso kokra yǝ pomo.

⁶⁹ Pa autoone kaya yǝ ɓaarǝ sǝ ya wǝr kǝnso wa, pa yǝ nkee ɓa ɓǝ kǝɗsǝ kǝnso ɓa, “Eɗ ɗa, yǝ fin a ɗaaso ɓoso.”

⁷⁰ Pa Bitrus yǝ ɓaarǝ yǝ renǝ ɗǝm. Ndiira tomsǝ singǝ wa, ɓaa ɓǝ kǝɗsǝ kwang ma Bitrus ɓa, ɓaa nkee me, “Ɓongtǝra ngǝ fin a ɗaaso ɓoso. Ngǝ eɗ Galili ya.”

⁷¹ Pa Bitrus yǝ ntii tom meto ee usu, ɗǝm yǝn kuu kuu a wii ɓoso, yǝn nkee me, “Niina nǝ pǝta maa eɗ sǝn kansǝnkan a ɗuura ira ya ra.”

⁷² Nok kǝnso kokra paasǝ pomra u raɓte wa. Pa Bitrus yǝ ɗim ma mbu Yeso nkee sǝsǝ ɓa me, “Meen nkee me kokra kiya paa pomra u raɓte ya, kǝ ngǝ nǝ renǝ a kan taatǝn” Pa yǝ fiɗ ntaandi yǝ okǝ ma oro.