MARKUS 13 - Lala NT

Ooko Hit ɓǝɗ Kaa Urshalima wa

¹ Nga Yeso yǝn fiɗ fiɗ hit ɓǝɗ Kaa Urshalima wa, pa fin a ɗaaso emfǝɗkaa ɓǝsa wa yaa nkee me, “Malǝm, A sengge!, Ɓaa marsǝ hito yaɓa ma ɗungate kwang kwang ya!”

² Pa Yeso yaa nkee me, “Ngǝ wǝr nsaad hitsa kwang kwang ɓaa marsǝsa nǝu? Ɗungara kǝra fin a pee a hamɓa a ɗuura ate ra ra, ɓaa kǝ ookǝ a putu nsaad.”

³ Pa Yeso yǝsǝ nɗa a Yol Zaitun ra wa, u ǝn sengesǝ hit ɓǝɗ Kaa Urshalima wa, Pa Bitrus ma Yakubu ma Yohanna ma Andarawus ɓaa taa a nhuukǝra, ɓaa nkee me,

⁴ “Ətǝ nkee, mbu ɓa kǝ tom kamniu? Ən mbu nhiinyanhiinya mbi ka weɗa me mbusǝsa nsaad ɓǝ tomon ngwang ma kunggou?”

⁵ Pa Yeso yǝɓǝ nkee me, “Sǝ nhii nwaa tom atike yǝsǝ nlaa ra.

⁶ Me ɓeta dem kǝ wo a ɗǝnda na, ɓǝn nkee me, ‘Nǝn saase,’ ɗǝm ɓǝkǝ nlaa ɓeta dem.

⁷ Me sǝ kura kisa ma maatamse a ɗuura kisa ra ɓol ɓol, sǝ kong nik senta saa wa ra. Tomon ɗaɗ mbusǝsa a tomo, pa feɗefeɗe wo sundu ra.

⁸ Putu kǝ nik kito ma ate putu ya, ɗǝm kuɓsutu kǝ nik kito ma ate kuɓsutu ya. Ɓaa kǝ tom ɗoora ma nyaa putu wa a hantamse ɓol ɓol. Nsaad susu ǝn ntiiri kongsa wa kweɗ.

⁹ “Pa sǝ sengge yaɓ, me ɓǝ kǝsǝn ko a han kankiita ɓa, ɗǝm ɓǝsǝ hoɓ a hitsa kwau Yahudawa sa.Ɓǝ kǝ sǝ ti sǝ nǝɗ a wii a gwamnamse ni, ma kuɓsa a ɗuura na, me sǝ nkee mara kwalari ra a ɗuura a wii ɓoso.

¹⁰ Pa me mara kwalari ra Yeso tomon ɗat a nkee a put ntaandi wa.

¹¹ Nsaad fer ɓǝ masǝsǝ ɓǝsǝn ko a hit kiita wa, sǝ kong taarǝ mbu kǝsa nkee ɓa ra me sǝ kon. Sǝ nkee nsaad mbu wosǝsǝ a ee ɓa, me sem sase sǝn kansǝ wa ra, ǝn Wis Kaa wa.

¹² “Tii kiya na koɓe ɓaa toɗɗo, ɗǝm paapa kiya na au isi, emba ɓǝkǝ nik senta paapamse ɓose, ɗǝm ɓǝ na ɓaa ɓǝ toɗɗo.

¹³ Ɓeta nsaad ɓǝ kǝsǝ ɓisi me a ɗǝnda na, pa yaa yǝ nǝɗsǝ kwakwa a ko a feɗefeɗe ya, kiyǝ taa kon nkweera wa.”

¹⁴ “Me sǝ wǝr tinima rumta ma, u yǝn wosǝ ma tǝblǝ ra wa, yǝ kǝɗ a ham pam ra ɓa (yaa yǝn kausǝn kau ya, a lee yǝ maa) ɓaa ɓǝsa put ɓaa Yahudiya ɓa ɓǝ mon ɓǝ taa yolo,

¹⁵ a fer siso, a lee ɓaa ɓǝsǝ a put Yahudiya ɓa, ɓǝ mon ɓǝ taa a yola.

¹⁶ Yaa yǝsǝ nyaa nya, yǝ kang ɗuur hana yǝ kana me koyǝ too laulawara ira ra.

¹⁷ Mbu manyamanyato ɓa, a toona ɓaa ma kuti ɓa, ma ɓan na toota ɓa a fer usu.

¹⁸ Sǝ tom kǝnara me fer siso ǝn wo a fer raraa wa ra.

¹⁹ A fer siso ɓaa kǝ tom kongsa dem, u ɓaa pǝta tomo kamǝra ira ra tǝng Kaa marsǝ put ntaandi wa ɓa, a wo nga naa wa, ɗǝm ɓaa ɓaarǝ a tom kamǝra sǝra ra.

²⁰ Me ka sem me ɓaa nɗǝm tǝro mbul ra, kama atike yǝ nɗanyǝ ra, pa me ɓaa tausǝ ɓa, u yǝ tausǝ wa, ǝn siso yǝ nɗǝm tǝro ka wa wa.

²¹ A fer siso me yaake nkee ngǝ me, ‘Sǝ sengge, Almaseho yǝ nwa,’ hana ‘yǝ sengge,’ sǝ na ɓongto ra.

²² Me Almaseho para sa, ma ɓannawanto para ɓa, ɓǝkǝ wo ɓǝ tom mbusa nhiinyanhiinya u weɗara wa, me ɓǝ nlaa ɓeta hana ma ɓet ɓaa tau ɓǝsǝ ɓa, me kǝ tomo.

²³ Me maaso, sǝ sengge! Nǝ nkeesǝ mbusǝsǝ naakǝn si ntii sundura.

²⁴ “Pa a ndiira tǝromse u wee kongsa siso wa, “ ‘kaa kǝ kang tebteb, ofe ɗǝm yǝ too handa ɗekɗek ra,

²⁵ seklǝmeta a liura ta kǝ roo a putu, ɗǝm ɓaa kǝ nyaa mbu kwang kwang a liura ɓa.’

²⁶ “Pa fer siso ɓeta kǝ wǝr Au Ete ya, yǝn hamham a liuta ma kwangto dem ma too.

²⁷ Ɗǝm kǝ yǝ tung ɓantimira ɓisa, ɓǝ kwau ɓet ɓǝsa u yǝ tausǝ ɓa, fiɗaa ɓotira ma kundara, ma seyara ma kwasara u put ntaandi wa nsaad.

²⁸ “Sǝ fǝɗkǝ mbuka a ɓot sata ɓa. Me sǝ wǝr ɓǝn ntii tom nwaama nwa, sǝ maa me raara kanan ngwang.

²⁹ Pa maaso ɗǝm me sǝ wǝr mbu ɓan nsaad, sǝ maa me tomon ngwang, yǝ kǝk ma inntii.

³⁰ Nǝn nkeesǝ ɓongtǝra, ɓaa kaareyase ɓa, a talǝra ndub me mbu ɓa nsaad wo tomon.

³¹ Liura ma put ntaandi wa, kǝ talǝ pa mara na a pǝta talo ra.

Yaake sem kǝn yǝ masǝ kaa Yeso kiya wo ɓa ra

³² “Pa yaake sem kǝn yǝ maasǝ fersiso ma kaa ɓisa wa ra, hana ɓantimira a liura ɓa, hanan Au kaya ra, pa ǝn Paapa fin maɗ.

³³ Sǝ sengge! Sǝ kaɗ ma waro! Me sǝ ma kaa kiya wo ɓa ra.

³⁴ Yǝ nga ete yaa kiyǝ tom siko ya, me yǝ nii sikon, yǝn lee ɗuur usu a nema hoota ita nii, hana yamni ma mbu kiya tom ɓa, ɗǝm yǝ nkee an war taanda ya me, yǝ kaɗ ma waro.

³⁵ “Me maaso, sǝ tom a waroo, me sǝ maa a kaa antaanda ya kiya kang wara. Me kiya nkaa ya wo hana a pǝrta hana a ɗenda hana osa ɓee hana ɗikira.

³⁶ Pa me yǝ wo maa semra sǝ yau wo yǝsǝ taa saa mundara.

³⁷ Mbu nǝn nkeesǝ ɓa, nǝn nkee hana yamni, sǝ kaɗ ma ‘Waro!’ ”