JAS 4 - Lala NT

Na ɗuura wa a Kaa ni

¹ Mbun kwasǝ kito ma renǝta mbi a ɗaaso waasou? Sem ɗeura ɓolɓol u ǝn sǝukǝsǝ a kuti yaase wa rau?

² Sǝn taa mbuka pa sǝ taa ra. Sǝn toɗɗo ɓeta men rǝmara, pa sǝ taa mbu sǝn taasǝ ɓa ra. Sǝn tom rǝkata, sǝn kongo ɓaatǝ, pa sǝ taa ra, me sǝ kǝna Kaa ra.

³ Ɗǝm me sǝ kǝnan, sǝn taa ra, me sǝ kǝna ma kuɗa fin ɗa, me sǝn taa mbusa u kǝsa tom tinima men kwalo waso wa.

⁴ Saa ɓaa semma ɓongtǝra ra ɓa! Sǝ maa me tom siktǝra ma put ntaadiwa ǝn tom atekerto ma Kaa rau? Hana yamni ya yǝ tausǝ me kiya tom sik put ntaadiwa ya, yǝ kaɗ ateker Kaa yan.

⁵ Wa sǝn wǝr nga salǝu Likarkar Kaa wa nkeesǝ me, “Wis Kaa yǝ tisǝ a kuɗa a nda ni wa yǝma rǝmara kwang rau”?

⁶ Pa yǝn na ndǝ kwasira kwang ya. Ən siso Likarkar yǝ nkeesǝ me, “Kaa yǝn ɓisi an too ɗuura ya pa yǝn tom kwasira yaa yǝn loosǝ ɗuura ira ya.”

⁷ Me maaso sǝ loo ɗuura sa, sǝ na ee waaso nsaad a Kaa ni. Sǝ ɓisi Shetan, sase ɗǝm kiyǝsǝ mono.

⁸ Sau nkwang a Kaa ni, sase kǝn kiya wo nkwang ma sase. Saa ɓan ma tentenato ɓa, sǝ sob neme sǝsa. Saa ɓaa ma senta raɓ ɓa, sǝ sob kuti yaase.

⁹ Sǝ tom ntaayǝma, sǝ tee, sǝ roo kǝlkǝlta. Sǝ lee nhuura saa, a kang oro, hurkuɗa waaso ɗǝm yǝ kang tǝblǝ kuɗa wa.

¹⁰ Sǝ loo ɗuura saa a wii Ankundi wa, sase kǝn kiyǝ sǝ too.

¹¹ Ɓaata ɓǝna, sǝ tǝblǝ ɗǝnda ɓaatǝ ra. Me yaake yǝ sǝrsǝ ate isi hana yǝ kansǝ kiita, yǝn sǝr masaka Kaa wa ɗǝm yǝ weɗa nga yǝ faɗ masaka nin.

¹² Kaa ǝn sase fin yǝn nasǝ masaka ma kankiita wa, ǝn sase fin yǝn nkaasǝ yǝ konnkweera ya ɗǝm yǝ tum nya. Ya me maaso, ngase ngǝn yamni ngǝn kansǝ kiita annɗǝsaatǝre yaangeu?

Wiin ngwee wa a nheura

¹³ Pa sǝ kura, saa sǝn nkeesǝ me, “Naso hana ɗene tǝ ko ham ɓa hana a ur suwa, ko tǝ mee kǝnso tǝ tom faaka ta taa koɓa.”

¹⁴ Si sǝ maa mbuka tom ɗen ɓa ra. Sika ǝn mbi huurtu wa sou? Sǝ nga nkweera yǝn wosǝ a ferko ngeek yǝ faɗ ɗa.

¹⁵ Pamme sǝ nkee me, “Me Ankundi yaande yǝ yawan, kǝtǝ ɗanyǝ tǝ tom mbu maa ɓa ma mbu maa ɓa.”

¹⁶ Pa nga isǝ waso wa, sǝn too ɗuura sǝn nheuwe. Nsaad kamǝra too ɗuura sǝsa ǝn kwanatiro.

¹⁷ Hana yamni yaa yǝ maasǝ mbu pamsǝ yaɓ me ki ya tom ɓa, pa yǝ tom ra ǝn tentenato a sani.