Toine kirjaine korinfalazile 1 - Uuzi Sana

Algusanat

¹ Puavil, Jumalan tahtos Iisusan Hristosan apostolakse pandu, da velli Timofei työtäh tervehytty Korinfas olijale Jumalan kanzukunnale da kaikile jumalanuskojile kogo Ahaijas.

² Armuo da rauhuttu teile Jumalas, meijän Tuataspäi, da Ižändäs Iisusas Hristosaspäi.

Jumal meidy kannattau

³ Ylendetty olgah meijän Ižändän Hristosan Iisusan Jumal da Tuatto, armolline Tuatto, kudai kaikelleh meidy kannattau!

⁴ Häi kannattau meidy kaikis goris, gu sil Hänespäi suavul kannatandal myö voizimmo kannattua toizii, kudamat ollah kaikenjyttymis goris.

⁵ Kui Hristosan gor՚at nostah piäliči rannois meijän elaijas, muga nouzou Hristosan meile annettu kannatusgi.

⁶ Gu myö tirpammo gor՚ua, ga se rodieu teile kannatuksekse da piäzendäkse. Gu myö suammo kannatustu, segi roih teile kannatuksekse da auttau kestiä net samazet gor՚at, kudamat ollah meil.

⁷ Myö lujah uskommo: työ kestättö. Tiijämmö, kui työ suatto oman vuitin tuskis, muga suatto oman vuitin kannatuksesgi.

⁸ Emmo tahto jättiä teidy tiedämättömikse, vellet, mittumis goris myö olimmo Aazies. Puutuimmo moizih piäličimiäräzih da meijän vägilöi suurembih vaigevuksih, ga emmo jo uskonuh, jiämmö hengih.

⁹ Myö tunzimmo iččie jo surmah suudittuloinnu, gu nad՚eijakseh ei omah iččeh, a vai Jumalah, kudai nostattau kuolluziigi.

¹⁰ Häi piästi meidy nengomas pahas surmas, i viegi piästäy. Häneh myö nad՚eičemmokseh, Häi iellehpäigi rubieu piästämäh meidy,

¹¹ gu työgi avvutatto meidy malittuloil. Sit äijät kiitetäh Jumalua hyvyös, kudaman Häi luadii meile, gu vastai äijien malittuloih.

Puavilan matku eistyy

¹² Myö menemmö hyväkse sil, gu kaikkiel muailmas, semmite teijän keskes, myö elimmö kui käsköy Jumal, tovel da puhtahuol. Sen tovestau meijän hengigi. Meidy vedi ei tämän muailman viizahus, a Jumalan hyvys.

¹³ I myö emmo kirjuta teile nimidä muudu, vai sen, midä työ luvetto da ellendättö. Uskon, työ rubietto ellendämäh agjah suate sen,

¹⁴ gu Ižändän Iisusan tulendupäivänny työ voitto mennä hyväkse meis muga kui myö teis. Kuda-midähäi työ jo ellendättö.

¹⁵ Täh uskojen minul oli mieli enzimäi tulla teijän luo, gu työ kaksi kerdua suannuzitto hyvyön.

¹⁶ Kačo, minä tahtoin teijän kauti mennä Makedonieh da siepäi tulla järilleh teijän luo, da sit työ varustannuzitto minuu matkah Juudieh.

¹⁷ Gu nengozet oldih minun mielet, ga olingo sit kebjeimieline? Ruavoingo minä omua iččie myö? Sanongo «Da, da», konzu tahton sanuo «Ei, ei»?

¹⁸ Muga kui Jumal on surematoi, mugai minä en sano teile konzugo «da», konzugo «ei».

¹⁹ Jumalan Poigu Iisus Hristos, kudamah näh minä, Siluan da Timofei sanelimmo teile, ei Häi sih niškoi tulluh, gu olla sego «da» sego «ei». Hänes on vai «da».

²⁰ Mi äijy Jumalan uskalmuo on, kai net ollah Hänes «da». Sendäh myö sanommo Hänen kauti «amin՚» Jumalan kunnivokse.

²¹ A Jumal, kudai lujendau meidy yhtes teijänke uskos Hristossah, Voijeltuh, Häi voideli meidygi;

²² Häi pani meih oman pečatin da andoi oman Hengen meijän sydämih merkikse sit, gu myö olemmo Hänen.

²³ Kučun Jumalua tovestajakse: minä eistin Korinfan matkan vai sendäh, gu žiälöičin teidy.

²⁴ Myö emmo tahto ižändöijä teijän uskuo, myö vai ruammo yhtes teijänke, gu tuvva teile iluo. Uskohäi teil on luja.