ᤛᤐᤏᤩᤠᤜ 3 - LIFOTNT

ᤕᤖᤢᤛᤗᤧᤔ

¹ ᤐᤡᤑᤩᤢᤱ ᤁᤧᤈᤥ᤺ᤰᤐᤠ. ᤀᤠᤛᤢᤳᤌᤥᤒᤠ ᤏᤢ ᤔᤧᤴᤘᤠ᤹ᤔᤏᤠ ᤁᤧᤈᤥ᤺ᤰᤐᤠ ᤕᤧᤰᤕᤰᤁᤡᤴ ᤆᤡ᤺ᤳᤋᤧᤛᤩᤧᤖᤥ᥄

² ᤂᤧᤸᤗᤧ ᤀᤠᤳᤋᤡᤴ ᤀᤡᤱᤈᤠᤱᤅᤡᤴᤏᤠᤱ ᤔᤧᤀᤡ᤺ᤳᤋᤢᤴ ᤔᤧᤏᤠ᤺ᤳᤋᤢᤴᤗᤥ. ᤂᤧᤸᤗᤧ ᤀᤠᤳᤋᤡᤴ ᤜᤧᤴᤌᤡᤶᤔᤡᤴᤏᤠᤱ ᤔᤧᤍᤠ᤺ᤰᤋᤢᤴᤗᤥ॥ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤁᤢᤏᤠᤔᤧᤛᤠ᤹ᤖᤢᤴᤗᤥ. ᤁᤢᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤣᤛᤠᤱ ᤂᤧᤴ ᤔᤧᤍᤠᤏᤧᤴᤗᤥ॥

³ ᤂᤧᤸᤗᤧ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤁᤧᤜᤢ᤺ᤰᤐᤠ ᤂᤡᤖᤡᤱᤒᤠ ᤜᤧᤰᤁᤣ ᤔᤧᤗ᤹ᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤕᤢᤰᤛᤠᤒᤠᤜᤠ᤹ᤃ ᤋᤠᤏᤠᤶ ᤌᤠᤖᤡᤰ ᤂᤢᤴᤇᤡ᤹ ᤛᤠᤏᤠ᤺ᤳᤋᤡᤴ ᤌᤣᤀᤠᤱ ᤔᤧᤴᤏᤶᤔᤏᤠᤒᤠ ᤕᤢ᤺ᤴᤇᤡᤰᤐᤠ ᤐᤖᤠᤒᤠ ᤜᤧᤰᤋᤱᤒᤠ ᤔᤧᤈᤥᤰᤗᤥ॥

⁴ ᤂᤧᤸᤗᤧ ᤁᤢᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤡᤱᤘᤠ᤹ ᤋᤠᤍᤠ ᤐᤠᤴ ᤁᤧᤗᤧᤱᤒᤠ ᤔᤧᤈᤥᤰᤗᤥ. ᤂᤧᤱᤜᤠ᤹ ᤀᤡᤱᤗᤧᤰ ᤁᤧᤈᤥ᤺ᤰᤐᤠ ᤔᤏᤠᤛᤡᤖᤥ॥ ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤛᤣᤛᤣᤍᤧᤴᤏᤡᤴ ᤔᤧᤈᤡ᤺ᤴᤍᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤴ ᤑᤧᤳᤔᤧᤗᤠ᤺ᤴᤍᤢᤖᤥ॥

⁵ ᤂᤧᤸᤗᤧ ᤁᤢᤗᤢᤶᤔᤥ ᤁᤧᤕᤢᤱᤒᤠ ᤕᤜᤘᤣ ᤍᤠᤱᤒᤧᤴ ᤛᤠᤶᤕᤥᤒᤠ ᤆᤥᤰᤗᤥ. ᤂᤢᤏᤧ᤹ ᤌᤧᤔᤠᤀᤠᤱ ᤔᤧᤴᤘᤠ᤹ᤔᤏᤠᤒᤠ ᤔᤧᤈᤥᤃᤢᤴᤗᤥ॥ ᤂᤢᤏᤧ᤹ ᤌᤡᤰᤕᤠ᤺ᤴᤎᤰᤔᤠ ᤂᤢᤏᤧ᤹ ᤋᤠᤏᤠᤶ ᤌᤰᤔᤠ ᤔᤧᤶᤓᤣ᤺ᤴᤏᤣ ᤁᤢᤍᤥ᤺ᤵᤔᤠ ᤂᤠᤛᤧᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤖᤥ. ᤜᤧᤰᤁᤣᤛᤠᤱ ᤗᤠᤕᤥᤒᤠ ᤔᤏᤠᤴ ᤛᤡᤖᤡᤱ ᤔᤧᤔᤏᤧᤴᤗᤥ॥

⁶ “ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤧᤰᤂᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤖᤠᤶᤜᤠ᤹ ᤔᤏᤠ ᤔᤣ᤺ᤴᤏᤣᤒᤠ ᤆᤥᤃᤢᤱᤅᤠᤱ ᤏᤧᤖᤥ. ᤂᤧᤵᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤗᤠᤱᤔᤧᤱᤄᤣ᤺ᤰᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤂᤧᤵᤔᤥ ᤜᤠ᤺ᤳᤋᤠᤱ ᤔᤧᤴᤕᤢᤱᤏᤧᤴᤗᤥ॥

⁷ ᤀᤠᤱᤃᤠ᤹ ᤕᤧᤰᤕᤰᤁᤡᤴ ᤀᤰᤂᤣ ᤔᤧᤳᤋᤢᤱᤗᤥ. ‘ᤛᤧᤰᤂᤠᤛᤠᤱ ᤂᤧᤏᤧ᤹ ᤀᤠᤱᤃᤠ᤹ ᤁᤧᤃᤡᤳᤋᤠᤖ ᤐᤥᤱᤗᤥ. ᤀᤠᤱᤃᤠ᤹ ᤀᤠᤜᤧᤴᤌᤡᤶᤔᤡᤴ ᤁᤧᤍᤠ᤺ᤰᤋᤢᤖ ᤐᤥᤱᤗᤥ॥ ᤂᤧᤒᤩᤠᤱ ᤂᤧᤏᤧ᤹ ᤁᤢᤕᤢᤰᤏᤠᤴ ᤔᤧᤔᤧᤰᤏᤧᤴᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤀᤠᤄᤢᤶᤍᤡᤱᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤔᤧᤈᤢᤰᤏᤧᤴᤗᤥ॥’ ᤁᤖ ᤁᤧᤖᤧᤰ ᤑᤧᤳᤗᤠ᤹ᤔᤠ ᤀᤡᤛᤣ᤺ᤱᤒᤠ ᤕᤠ᤺ᤶᤒᤰᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤀᤠᤸᤗᤛᤠᤱ ᤕᤖᤡᤰ ᤂᤢᤴᤇᤡ᤹ ᤛᤡᤰᤛᤔᤧᤖᤥ॥”

⁸ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤗ᤹ᤖᤡᤰ ᤀᤢᤘᤠ ᤆᤥᤃᤢᤖᤥ. “ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤀᤠᤜᤠᤱᤄᤧᤶᤔᤧ᤹ᤀᤥ ᤌᤡᤰᤕᤠᤴ ᤀᤠᤱᤃᤠ᤹ ᤐᤥ᤺ᤰᤁᤠᤖᤥ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤑᤢᤱᤔᤠᤛᤡ ᤏᤢ ᤜᤠᤱᤈᤢᤶᤜᤠ᤹ ᤛᤢᤶᤔᤠᤛᤡᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤶᤎᤠᤱ ᤔᤡ ᤜᤧᤰᤋᤱᤒᤠ ᤀᤠᤛᤠᤰᤁᤧᤴᤏᤡᤴ ᤌᤠᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤖᤥ. ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤀᤠᤱᤃᤠ᤹ ᤀᤠᤏᤠᤃᤧᤜᤧᤶᤒᤠ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥

⁹ “ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤗᤠᤈᤣ᤹ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤛᤢᤳᤌᤥ ᤆᤥᤃᤢᤱᤗᤥ. ᤂᤧᤒᤩᤠᤱ ᤂᤧᤱᤜᤠ᤹ ᤁᤧᤖᤧᤰᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤐᤣᤗᤡᤃᤧᤴ ᤋᤢᤘᤠ ᤔᤧᤈᤥᤃᤢᤖᤖᤥ ᤜᤧᤰᤁᤩᤠᤱ ᤑᤰᤋᤠᤱ ᤏᤢ ᤑᤰᤋᤠᤱ ᤔᤧᤍᤱᤄᤢᤀᤠᤱ ᤂᤢᤏᤧ᤹ ᤁᤢᤛᤧᤘᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤖᤥ॥

¹⁰ ᤁᤢᤛᤒᤠ ᤘᤜ᤺ᤱᤜᤠ᤹ ᤏᤠᤜᤠᤱᤍᤠᤱᤗᤠᤶ ᤀᤠᤱᤃᤠ᤹ ᤔᤠᤱᤛᤧᤘᤠ ᤁᤧᤔᤧᤵᤐᤠ. ᤑᤢᤳᤇᤡᤱᤈᤩᤠᤱ ᤁᤧᤒᤥᤱᤒᤠ ᤀᤠᤔᤏᤠᤜᤠ᤹ᤖᤧ ᤜᤢᤰᤘᤠ ᤕᤠᤱᤜᤠ᤹ ᤀᤠᤱᤃᤠ᤹ᤀᤥ ᤔᤧᤍᤠᤖᤢᤖᤥ॥

¹¹ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤈᤥᤃᤢᤶᤒᤠ ᤂᤡᤏᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤏᤠᤖᤠ ᤛᤡᤖᤣ᤺ᤵ ᤗ᤹ᤔᤠ ᤔᤧᤒᤥᤱᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤥ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤠᤀᤥ ᤁᤧᤛ᤺ᤵᤐᤠᤜᤠ᤹ ᤀᤠᤱᤃᤠ᤹ ᤁᤴ ᤕᤧᤰᤕᤰ ᤗᤢᤶᤔᤥᤗᤠᤶ ᤗ᤺ᤳᤋᤢᤱᤍᤣᤛᤢᤱᤛᤡᤱᤗᤥ॥ ᤀᤠᤱᤃᤠ᤹ ᤀᤠᤛᤣᤛᤣ ᤁᤥ᤺ᤰᤔᤠᤀᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤡᤏᤡ᤹ ᤕᤠᤶᤔᤥ ᤕᤶᤒᤠ ᤁᤧᤜᤧᤴᤇᤡᤱᤒᤠ ᤁᤧᤶᤒᤥ᤺ᤰᤂᤡᤴᤗᤥ॥

¹² ᤁᤖ ᤂᤡᤏᤡ᤹ ᤗᤢᤶᤔᤥ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤏᤢ ᤕᤠᤱᤃᤧᤛᤠ᤹ᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤗᤧᤖᤢᤱ ᤌᤠᤱᤛᤡᤱᤗᤥ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤏᤡᤱᤘᤠ᤹ ᤔᤧᤕᤢᤰᤂᤢᤖᤥ॥

¹³ ᤀᤡᤛᤪᤠᤀᤡᤗᤒᤠ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤖᤧ ᤌᤧᤔᤠᤀᤠᤱ ᤕᤠ᤺ᤶᤒᤰ ᤔᤧᤶᤓᤣ᤺ᤴᤍᤢᤴᤗᤥ॥ ᤂᤧᤱᤜᤠ᤹ᤖᤧ ᤔᤧᤴᤘᤠ᤹ᤔᤏᤠ ᤐᤠᤴ ᤔᤧᤶᤒᤠ᤺ᤳᤋᤢᤴᤗᤥ. ᤂᤢᤴᤇᤡ᤹ ᤔᤢᤖᤠᤀᤥ ᤀᤡᤱᤗᤧᤰ ᤐᤠ᤺ᤴᤏᤠᤱ ᤂᤥᤔᤧᤍᤧᤳᤏᤧᤴᤗᤥ. ᤂᤧᤱᤜᤠ᤹ᤖᤧ ᤔᤧᤈ ᤔᤧᤎᤢᤀᤠᤱ ᤔᤧᤗᤧᤱᤅᤠᤱ ᤔᤧᤏᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤠ᤺ᤳᤗᤧᤀᤠᤱ ᤕᤱᤔᤠ ᤔᤧᤛᤧᤖᤢᤛᤡᤴᤗᤥ॥”

ᤏᤡᤱᤘᤠ᤹ ᤋᤠᤔᤠ ᤛᤠᤶᤗᤥ

¹⁴ ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛᤠᤶᤗᤥᤖᤧ᤹ᤀᤥ᥄ ᤀᤡᤛᤪᤠᤀᤡᤗᤀᤣ. ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ᤹ᤀᤥ᥄ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛ᤺ᤳᤋᤧ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤛᤡᤰᤗᤢᤱᤔᤧᤸᤗᤧ ᤕᤧᤕᤧ ᤗ᤹ᤖᤧ᤹ᤀᤥ᥄

¹⁵ ᤂᤡᤏᤡ᤹ ᤂᤢᤶᤍᤡᤱᤅᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤳᤋᤢᤀᤠᤱ ᤘᤠ᤹ᤖᤥ. ᤂᤡᤏᤡ᤹ ᤏᤡᤱᤔᤡᤜᤠ᤹ ᤐᤠᤱᤄᤢᤍᤣᤛᤢᤛᤡᤀᤠᤱ ᤘᤠ᤹ᤖᤥ॥ ᤕᤜᤘᤣ ᤍᤠᤱᤒᤠ. ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ. ᤂᤡᤏᤡ᤹ᤏᤢ ᤘᤠ᤹ᤖᤥ. ᤀᤠᤸᤗᤀᤠᤱᤎᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤠᤳᤋᤡᤴ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤥᤀᤠᤱ ᤁᤡᤔᤠ ᤔᤧᤒᤥᤱᤏᤧᤴᤗᤥ॥

¹⁶ ᤂᤧᤴ ᤕᤧᤴᤏᤥ ᤂᤧᤱᤜᤠ᤹ᤖᤧ ᤕᤖᤢᤛᤗᤧ᤺ᤶᤔᤡᤴ ᤀᤰᤂᤣ ᤔᤧᤔᤧᤳᤋᤢᤖᤥ. “ᤛᤡᤕᤥᤏᤀᤣ. ᤂᤧᤏᤧ᤹ ᤔᤧᤃᤡᤛᤧᤴᤏᤧ᤹ᤀᤥ. ᤂᤧᤏᤧ᤹ ᤁᤧᤜᤢᤰᤜᤠ᤹ ᤗᤧᤶᤈᤢᤈᤢᤒᤠ ᤔᤧᤒᤥᤱᤏᤧᤴᤗᤖᤥ॥

¹⁷ ᤕᤜᤘᤣ ᤍᤠᤱᤒᤠ ᤁᤧᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ᤖᤥ. ᤂᤢᤏᤧ᤹ ᤂᤧᤏᤧ᤹ ᤛᤧ᤺ᤵᤔᤠᤖᤧ ᤗᤠᤃᤡ ᤔᤢᤰᤛᤠᤶ ᤁᤳᤋᤢᤖᤥ॥ ᤂᤢᤏᤧ᤹ ᤂᤧᤏᤧ᤹ᤏᤢ ᤛᤠ᤹ᤖᤡᤰ ᤁᤢᤏᤡᤱᤘᤠ᤹ ᤋᤠᤖᤥ. ᤂᤢᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤁᤠᤱ ᤆᤡᤈᤡ ᤕᤧᤶᤕᤧᤶ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤛ᤺ᤳᤋᤠᤱ ᤂᤧᤏᤧ᤹ ᤛᤠᤶᤃᤧᤔᤧᤳᤗᤥ॥

¹⁸ “ᤕᤢᤰᤋᤡᤱ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ᤀᤥ ᤐᤣ᤺ᤰᤔᤠ ᤔᤧᤴᤇᤢᤰᤔᤏᤠᤒᤠᤀᤠᤱ ᤔᤧᤖᤡᤱ ᤁᤧᤎᤰᤐᤠᤜᤠ᤹ ᤀᤠᤱᤃᤠ᤹ ᤑᤢᤰᤂᤢᤱᤛᤡᤱᤗᤥ. ᤀᤠᤸᤗᤀᤠᤱᤎᤥ ᤂᤡᤏᤡ᤹ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤴᤗᤥ॥

¹⁹ ᤀᤥᤔᤧᤳᤋᤧᤶᤔᤧ᤹. ᤂᤧᤴ ᤕᤧᤶᤔᤥ ᤂᤧᤏᤧ᤹ ᤋᤢᤰᤂᤣ ᤁᤧᤈᤠ᤺ᤵᤐᤠᤜᤠ᤹ ᤁᤧᤖᤧᤰ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ. ᤀᤠᤱᤃᤠ᤹ ᤁᤢᤗᤠᤱ ᤁᤧᤛᤰᤐᤠᤜᤠ᤹ ᤏᤠᤅᤢᤱᤛᤡᤱᤗᤥ. ᤜᤧᤰᤁᤩᤠᤱ ᤑᤢᤳᤇᤡᤱᤈᤩᤠᤱ ᤁᤧᤒᤥᤱᤒᤠᤜᤠ᤹ ᤑᤢᤰᤂᤢᤱᤛᤡᤱᤗᤥ॥ ᤛᤡᤖᤡᤱᤔᤛᤧ ᤔᤧᤍᤣ᤹ᤖᤢᤛᤡᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤏᤠᤖᤠᤑᤥᤔᤠ ᤏᤢ ᤔᤡᤱᤛᤥ ᤌᤠᤱᤛᤥ ᤐᤡᤖᤢᤱᤛᤡᤱᤗᤥ॥

²⁰ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤂᤡᤏᤡ᤹ ᤑᤢᤱᤏᤡᤱᤗᤥ. ᤂᤶᤓᤩᤠᤱ ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤜᤡᤶᤔᤥ ᤋᤠ᤺ᤳᤏᤡᤱᤗᤥ॥ ᤀᤠᤸᤗ ᤀᤠᤱᤃᤠ᤹ ᤂᤡᤏᤡ᤹ ᤏᤢ᤹ᤔᤠᤍᤠᤔᤠᤜᤠ᤹ ᤂᤡᤏᤡ᤹ ᤔᤡᤰ ᤋᤃᤡᤀᤣ ᤏᤢ᤺ᤰᤋᤢᤱ ᤋᤠᤖᤢᤱᤗᤥ. ᤂᤧᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤔᤡᤱᤛᤥ ᤌᤠᤱᤛᤥ ᤏᤢ ᤏᤠᤖᤠ ᤑᤥᤛᤢᤱ ᤐᤡᤏᤡᤱᤗᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥