ᤛᤐᤏᤩᤠᤜ 2 - LIFOTNT

ᤗᤠᤕᤥᤗᤠᤶ ᤜᤡᤶᤔᤠ ᤐᤣᤗᤡ

¹ ᤁᤢᤛᤡᤖᤡᤱᤔᤔᤠ ᤁᤧᤜᤥᤵᤐᤠ ᤔᤧᤴᤇᤠᤶ ᤛᤢᤘᤠᤱᤛᤣ. ᤂᤡᤏᤡ᤹ ᤛᤥᤖᤡᤰ ᤆᤢᤵᤛᤧᤶᤔᤧ᤹ᤀᤥ. ᤂᤡᤏᤡ᤹ ᤛᤥᤖᤡᤰ ᤆᤢᤵᤛᤧᤶᤔᤧ᤹ᤀᤥ.

² ᤗᤠᤕᤥᤗᤠᤶ ᤜᤡᤶᤔᤠ ᤕᤧᤴᤏᤡᤴ ᤆᤠᤛᤡᤵ ᤜᤧᤰᤁᤣ ᤑᤧᤔᤠ ᤋᤣ᤹ᤔᤠᤏᤢ᤺ᤸᤗᤧ ᤋᤃᤡ ᤂᤠᤛᤧᤴ ᤐᤥᤱᤔᤠ ᤜᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤕᤜᤘᤣ ᤍᤠᤱᤒᤧᤸᤗᤧ ᤁᤧᤍᤡ᤺ᤵᤐᤠ ᤁᤢᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤆᤢᤰᤔᤠᤏᤢ᤺ᤸᤗᤧ ᤋᤃᤡ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤢᤛᤡᤰ ᤐᤥ᤺ᤰᤔᤠ ᤕᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤌᤠᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤡᤏᤡ᤹ ᤛᤥᤖᤡᤰ ᤆᤢᤵᤛᤧᤶᤔᤧ᤹ᤀᤥ॥

³ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤴ ᤗᤠᤈᤣ᤹ᤀᤥᤒᤠ ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠᤛᤣ. ᤂᤡᤏᤡ᤹ ᤂᤢᤏᤧ᤹ ᤁᤥ᤺ᤳᤋᤧᤶ ᤜᤰᤛᤧᤶᤔᤧ᤹ᤀᤥ॥ ᤛᤠᤶᤕᤥᤏᤡᤔᤠᤴ ᤂᤡᤏᤡ᤹ ᤁᤥ᤺ᤳᤋᤧᤶᤔᤧ᤹ᤀᤥ. ᤆᤢᤱᤈᤡᤃᤧᤴ ᤏ᤺ᤶᤏ᤺ᤶᤒᤠ ᤐᤠ᤺ᤴᤜᤠ᤹ ᤜᤰᤛᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤰᤁᤧᤴ ᤐᤥ᤺ᤰᤔᤠ ᤕᤧᤴᤏᤥ ᤜᤠᤃ ᤂᤡᤏᤡ᤹ ᤛᤧ᤺ᤵᤛᤡᤱᤔᤠᤍᤧᤴ ᤁᤧᤄᤥᤛᤢᤶᤒᤡᤖᤥ॥

ᤐᤗᤡᤛ᤻ᤋᤡᤜᤠ᤹ᤖᤧ ᤋᤰᤗᤧᤱᤘᤠᤀᤥ

⁴ ᤃᤠᤈᤠ ᤕᤧᤰᤕᤰᤁᤡᤴ ᤆᤡᤈᤡ ᤂᤰᤂᤰ ᤐᤥᤱᤗᤥ. ᤀᤛ᤻ᤁᤗᤥᤏᤧᤴ ᤔᤢᤖᤧᤰ ᤂᤠᤖᤧᤰ ᤐᤥᤱᤅᤠᤱ ᤔᤧᤗᤧᤖᤢᤖᤥ॥ ᤗᤧᤴᤈᤥ᤺ᤸᤗᤧ ᤀᤛ᤻ᤍᤥᤍᤧᤴ ᤁᤢᤄᤠᤗᤧᤶ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤀᤣᤁᤪᤥᤏᤧᤴ ᤜᤠ᤹ᤕᤠᤰ ᤔᤧᤀᤠ᤺ᤰᤂᤢᤖᤥ॥

⁵ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤁᤖᤣᤋᤡ ᤛᤢᤘᤠᤱᤛᤣ. ᤂᤡᤏᤡ᤹ ᤁᤧᤈᤡ᤺ᤳᤋᤧ ᤁᤧᤛᤩᤧ᤹ᤀᤡᤖᤥ᥄ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤁᤏᤠᤏᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤁᤧᤍᤰᤗᤧᤱᤘᤠᤀᤥ ᤘᤠ᤹ᤖᤥ॥ ᤂᤢᤏᤧ᤹ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤔᤧᤱᤏᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ᤀᤥ ᤀᤠᤳᤋᤡᤴᤏᤠᤱ ᤔᤧᤕᤢᤱᤏᤧᤴᤗᤥ॥”

⁶ ᤁᤖᤣᤋᤡᤜᤠ᤹ ᤔᤧᤕᤢᤱᤒᤠ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤗᤠᤈᤣᤴ. ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤘᤠ᤹ᤔᤠᤍᤧᤴ ᤐᤥᤱᤗᤥ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ᤖᤧ ᤗᤠᤃᤡ ᤆᤠᤖᤠᤶᤔᤠᤍᤧᤴ ᤐᤥᤱᤗᤥ॥

⁷ ᤂᤧᤴ ᤕᤜᤢᤍᤠ ᤜᤡᤶᤛᤕᤱᤒᤠ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤧ ᤗᤠᤃᤡ ᤐᤥᤱᤗᤥ. ᤂᤧᤵᤔᤥ ᤂᤧᤱᤜᤠ᤹ᤖᤧ ᤔᤧᤸᤗᤢᤰ ᤆᤠᤖᤠᤶᤍᤧᤴ ᤔᤧᤄᤥᤛᤢᤖᤥ॥ ᤕᤢ᤺ᤴᤇᤡᤰ ᤂᤧᤱᤜᤠ᤹ ᤀᤛ᤻ᤁᤗᤥᤏᤒᤠ ᤜᤡᤶᤜᤠ᤹ᤀᤥ ᤔᤧᤀᤡᤶᤗᤥ॥ ᤕᤜᤘᤣ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤀᤥᤔᤧᤳᤋᤢᤛᤡ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ ᤂᤢᤏᤧ᤹ ᤂᤧᤱᤜᤠ᤹ ᤏᤢ᤹ᤔᤠᤍᤠᤔᤧᤴ ᤕᤠᤶᤔᤥ ᤏᤢ᤺ᤰᤋᤢ ᤐᤡᤖᤢᤛᤡᤖᤥ॥

ᤔᤥᤀᤠᤒ ᤏᤢ ᤀᤶᤔᤥᤏ

⁸ “ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤘᤖᤧ᤹ ᤐᤠ᤺ᤴᤏᤡᤴ ᤏᤢ ᤀᤠᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤂᤧᤵᤛᤢᤱᤅᤠᤱ ᤘᤠ᤹ᤖᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤈᤣᤴ ᤋᤣ᤹ᤔᤠᤖᤧ ᤗᤠᤃᤡ ᤕᤱᤔᤠ ᤔᤧᤛᤧᤖᤢᤛᤡᤀᤠᤱ ᤘᤠ᤹ᤖᤥ॥”

⁹ ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ. ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤢᤘᤠ ᤆᤥᤃᤢᤖᤥ. “ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤛᤧᤰᤂᤠᤀᤣ ᤔᤥᤀᤠᤒᤧᤴ ᤛᤍᤥᤔ ᤜᤧᤰᤋᤱᤒᤠ ᤐᤥᤱᤗᤥ ᤀᤶᤔᤥᤏᤡᤜᤠ᤹ ᤃᤔᤥᤖᤠᤴ ᤜᤧᤰᤁᤣ ᤋᤠᤶᤓᤢᤱ ᤕᤠ᤺ᤴᤛᤢᤱ ᤏᤢ ᤕᤢᤶ ᤁᤧᤕᤠᤰᤐᤠ ᤐᤠᤰᤗᤢᤶᤗᤢᤶᤒᤠᤍᤧᤴ ᤐᤥᤱᤗᤥ. ᤜᤧᤰᤁᤩᤠᤱ ᤛᤍᤠᤍᤡᤱᤗᤧ ᤗᤠᤃᤡ ᤆᤠ ᤔᤧᤴᤏᤢ᤹ᤔᤏᤠᤒᤠ ᤗᤠᤈᤣ᤹ ᤐᤥᤱᤗᤥ॥ ᤁᤧᤘᤠ᤹ᤒᤠ ᤁᤧᤕᤠ᤺ᤰᤐᤠ ᤀᤠᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠᤵᤋᤢᤛᤡᤖᤥ. ᤂᤧᤒᤩᤠᤱ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤀᤠᤱᤃᤠ᤹ ᤀᤠᤛᤢᤘᤠᤱᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤔᤧᤕᤢᤰᤋᤢᤖᤥ॥”

¹⁰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤜᤠᤒᤠ ᤁᤴ ᤐᤠ᤺ᤴᤏᤡᤴ ᤔᤧᤍᤢᤔᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤜᤠ᤹ ᤁᤢᤏᤠᤔᤧᤴᤇᤠ᤹ ᤏᤢ ᤛᤡᤍᤠᤵ ᤘᤖᤧ᤹ ᤔᤧᤔᤧᤳᤋᤢᤛᤡᤀᤠᤱ ᤘᤕᤧᤖᤥ॥

¹¹ ᤀᤠᤸᤗ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤡᤵᤔᤠ ᤁᤧᤄᤢᤒᤠ ᤐᤥᤱᤗᤥ ᤂᤧᤒᤩᤠᤱ ᤂᤢᤏᤧ᤹ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤠᤱᤜᤠ᤹ ᤀᤡᤖᤧᤶᤛᤢᤛᤡᤖᤥ. ᤁᤧᤖᤧᤰ ᤁᤢᤕᤠ ᤁᤢᤕᤠᤀᤥᤒᤠ. ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ ᤌᤰᤔᤠ ᤂᤢᤏᤧ᤹ ᤔᤠᤱᤛᤧᤘᤠ ᤔᤧᤔᤧᤳᤋᤢᤖᤥ॥

ᤁᤢᤛ ᤏᤢ ᤀᤛ᤻ᤛᤢᤖ

¹² “ᤁᤢᤛᤡᤛᤣ. ᤂᤡᤏᤡ᤹ᤀᤠᤱ ᤀᤠᤍᤠᤓᤣ᤺ᤸᤗᤧ ᤁᤧᤈᤩᤧᤵᤋᤡ ᤁᤧᤛᤧᤖᤡᤖᤥ.” ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ

¹³ ᤂᤢᤏᤧ᤹ ᤌᤠᤱᤃᤧᤳ ᤐᤡᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤢᤜᤢᤰᤁᤡᤴ ᤛᤴᤇᤢᤀᤠᤱ ᤀᤛ᤻ᤛᤢᤖᤧᤴ ᤔᤧᤰᤂᤢᤖᤥ॥ ᤂᤢᤏᤧ᤹ ᤏᤡᤏᤒᤣᤴ ᤘᤖᤧᤱᤗᤧᤱ ᤆᤡᤈᤡ ᤂᤰᤂᤰ ᤏᤢ ᤔᤢᤖᤧ᤺ᤰ ᤂᤧᤖᤧ᤺ᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤜᤧᤰᤋᤱᤒᤠ ᤁᤢᤛᤧᤱᤃᤪᤠ ᤆᤥᤃᤢᤖᤥ॥

¹⁴ ᤌᤰᤛᤠᤗᤢᤵ ᤏᤢ ᤌᤰᤛᤠ ᤛᤢᤶ. ᤁᤧᤖᤧᤰ ᤁᤢᤛᤰᤔᤠ ᤁᤧᤕᤠᤰᤐᤠ ᤐᤖᤡᤰ ᤐᤖᤡᤰᤐᤠᤜᤠ᤹ ᤂᤧᤵᤔᤥ ᤔᤧᤏᤧ ᤔᤧᤀᤡᤶᤗᤥ॥ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤒᤠ ᤑᤰᤌᤡ᤺ᤶᤒᤠ ᤏᤢ ᤁᤧᤀ᤺ᤰᤐᤠ ᤑᤰᤌᤡ᤺ᤶᤒᤧᤸᤗᤧ ᤂᤧᤵᤔᤥᤒᤠ ᤛᤡᤳᤗᤠᤱᤅᤥ ᤜᤠᤵ ᤆᤥᤃᤢᤖᤥ॥ ᤂᤧᤱᤜᤠ᤹ ᤔᤧᤀ᤺ᤰᤐᤠ ᤀᤡᤰᤗᤠ᤺ᤸᤗᤧ ᤐᤣᤎᤠ᤺ᤵᤜᤠ᤹ᤀᤥᤗᤠᤶ ᤗᤥ᤺ᤰᤂᤢᤖᤥ. ᤗᤠᤶᤎᤠ᤺ᤳᤜᤠ᤹ᤀᤥ ᤗᤢᤱᤈᤡᤃᤣ᤺ᤰᤜᤠ᤹ ᤏᤢ ᤗᤢᤱᤄᤧᤸᤗᤧᤰᤜᤠ᤹ ᤏᤧᤖᤥ. ᤐᤧᤖᤧᤶᤒᤠ ᤛᤠᤶᤔᤠᤱᤛᤡᤱ ᤁᤢᤍᤠ᤹ᤔᤠᤜᤠ᤹ ᤕ᤺ᤰᤐᤧᤳ ᤏᤡᤎᤠ᤺ᤵᤗᤥ॥

¹⁵ ᤁᤱᤃ ᤀᤠᤶᤓᤠ ᤂᤧᤵᤔᤥ ᤁᤢᤔᤡᤱ ᤁᤧᤀᤡᤱᤒᤠᤀᤠᤱ ᤁᤧᤏᤧᤒᤠ ᤕᤧᤰᤕᤰᤁᤡᤴᤗᤥ ᤂᤧᤸᤗᤧ ᤁᤢᤏᤡᤱᤘᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤘᤕᤧᤖᤥ. “ᤀᤠᤱᤃᤠ᤹ ᤐᤕᤶ ᤕᤶᤒᤠ. ᤀᤠᤱᤃᤠ᤹ᤏᤢ᤺ᤸᤗᤧ ᤘᤣ᤹ ᤜᤠ᤺ᤳᤋᤠᤱ ᤜᤥᤵᤗᤥ॥” ᤂᤧᤴ ᤀᤠᤰᤋᤱᤒᤠ ᤆᤡᤈᤡ ᤂᤰᤂᤰᤐᤠᤍᤧᤴ ᤐᤥ᤺ᤰᤂᤧᤒᤣ. ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤱᤑᤢᤰᤁᤢ ᤐᤥ᤺ᤰᤂᤧᤖᤥ॥ ᤂᤧᤳᤏᤠᤗᤠᤶ ᤁᤧᤒᤥᤱᤒᤠᤀᤠᤱ ᤁᤧᤒᤣ᤺ᤰᤐᤠ ᤁᤧᤖᤧᤰᤗᤧ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤖ ᤂᤢᤴᤇᤡ᤹ ᤜᤢᤰᤆᤥ᤺ᤰᤁᤡᤸᤗᤧ ᤔᤧᤛᤥ᤺ᤰᤋᤢᤖᤥ॥