ᤈᤁᤖᤡᤕᤠ 9 - LIFOTNT

ᤀᤡᤛᤪᤠᤀᤡᤗᤖᤧ ᤁᤢᤏᤡᤱᤔᤡᤜᤠ᤹ᤖᤧᤴ ᤂᤠᤛᤧᤴ

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ ᤀᤰᤋᤱᤒᤠ ᤘᤠ᤹ᤖᤥ— “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤠᤛᤧᤴᤏᤡᤴ ᤜᤍᤪᤠᤁ ᤗᤠᤈᤣ᤹ᤀᤥ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤴ ᤍᤔᤛ᤻ᤁᤛ ᤕᤧᤰᤕᤰᤁᤥᤀᤥᤀᤠᤱ ᤆᤢᤰᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤁᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤀᤥ ᤆᤢᤰᤋᤧᤒᤠ ᤜᤧᤰᤁᤣ ᤁᤧᤖᤧᤰ ᤔᤏᤠᤜᤠ᤹ᤀᤥᤀᤠᤱ ᤆᤢᤰᤋᤧᤀᤠᤱ ᤘᤠ᤹ᤖᤥ॥

² ᤍᤔᤛ᤻ᤁᤛᤒᤠ ᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤜᤔᤠᤋᤀᤥᤀᤠᤱ ᤂᤧᤴ ᤌᤠᤖᤥ. ᤜᤧᤰᤁᤩᤠᤱ ᤋᤢᤖᤥᤛ ᤏᤢ ᤛᤡᤍᤥᤏᤀᤥᤒᤠ ᤔᤏᤠᤜᤠ᤹ ᤁᤧᤗᤧᤒᤠ ᤁᤧᤏᤡᤒᤠ ᤔᤧᤈᤥ᤺ᤰᤛᤠᤱ ᤂᤧᤴ ᤌᤠᤖᤥ॥

³ ᤋᤢᤖᤥᤛᤧᤸᤗᤧ ᤀᤠᤒᤠᤅᤣ ᤁᤢᤗᤠᤃᤡ ᤛᤧ᤺ᤵᤛᤡᤱᤔᤠᤍᤧᤴ ᤕᤰ ᤆᤥᤃᤢᤀᤠᤱ ᤏᤧᤖᤥ. ᤂᤧᤸᤗᤧ ᤕᤢᤵᤐᤠᤴ ᤂᤠᤶᤜᤡ᤺ᤰ ᤕᤠᤖᤡᤰ ᤏᤢ ᤛᤠᤶᤔᤩᤠᤱᤅᤡᤴ ᤔᤠᤖᤠᤶᤜᤠ᤹ᤀᤥᤒᤠ ᤗᤧᤰᤘᤠ ᤁᤢᤀᤡᤛᤡᤰ ᤗᤢᤵᤛᤢᤀᤠᤱ ᤕᤢᤱᤗᤥ॥

⁴ ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤴ ᤏᤠᤵᤋᤢᤖᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤘᤖ᤺ᤱᤅᤥ ᤔᤧᤰᤂᤢ ᤐᤡᤖᤢᤖᤥ. ᤂᤧᤒᤩᤠᤱ ᤔᤡ᤺ᤸᤗᤧ ᤂᤧᤴ ᤂᤠᤵᤐᤢᤌᤩ᤺ᤱ ᤐᤥᤱᤗᤥ॥

⁵ “ᤀᤛ᤻ᤁᤗᤥᤏᤖᤧ ᤂᤧᤴ ᤏᤡᤛᤢᤖᤥ ᤜᤧᤰᤁᤩᤠᤱ ᤐᤃᤡ ᤁᤡᤖᤥ. ᤔᤧᤴᤇᤢᤔᤠᤴ ᤛᤠᤍᤢᤱᤅᤡᤸᤗᤧ ᤋᤖᤢᤒᤠ ᤜᤧᤰᤁᤣ ᤃᤠᤈᤠᤴ ᤋᤢᤰᤂᤣ ᤆᤠᤖᤥ॥ ᤀᤣᤁᤪᤥᤏᤧᤴᤏᤠᤱ ᤛᤠ᤹ᤖᤡᤰ ᤋᤢᤰᤂᤣ ᤆᤠᤔᤥ ᤌᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤏᤡᤱᤛᤠᤱ ᤆᤥᤃᤢᤒᤠᤴ ᤏᤢᤵᤗᤥ॥ ᤃᤠᤈᤠᤒᤠ ᤜᤠᤱᤅᤡᤴ ᤂᤠᤵᤐᤢᤌᤩ᤺ᤱ ᤔᤧᤰᤗᤥ. ᤜᤧᤰᤁᤩᤠᤱ ᤀᤛ᤻ᤁᤗᤥᤏᤀᤥ ᤕᤠᤶᤔᤥ ᤜᤠ᤺ᤳᤋᤠᤱ ᤔᤧᤕᤢᤱᤏᤧᤴᤗᤥ॥

⁶ ᤁᤧᤓᤢᤳᤇᤡᤱᤒᤠ ᤛᤢᤘᤠᤱᤜᤠ᤹ᤖᤧ ᤀᤛ᤻ᤍᤥᤍᤧᤴ ᤜᤢᤰᤁᤠᤵ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤀᤠᤱᤍᤡᤱ ᤗ᤹ᤔᤧᤴ ᤔᤧᤰᤂᤢᤱᤗᤥ॥

⁷ ᤁᤖ ᤀᤠᤸᤗ ᤂᤢᤴᤇᤡ᤹ ᤔᤢᤖᤠᤀᤥᤒᤠ ᤔᤠᤰᤂᤡᤴ ᤏᤢ ᤂᤢᤴᤇᤡ᤹ ᤜᤠᤒᤥ᤹ᤒᤠᤜᤠ᤹ᤖᤧ ᤁᤢᤓᤡ᤺ᤵᤔᤥᤒᤠ ᤛᤡᤰᤁᤧᤗᤧ᤺ᤱᤒᤠ ᤐᤠ᤺ᤴᤜᤠ᤹ ᤗ᤺ᤳᤋᤢᤱᤍᤣᤛᤢᤱᤗᤥ॥ ᤂᤢᤴᤇᤡ᤹ ᤁᤧᤏᤶᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤀᤠᤔᤏᤠ ᤔᤧᤒᤥᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤜᤢᤍᤠᤒᤠ ᤌᤠ᤺ᤰ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤂᤧᤒᤩᤠᤱ ᤀᤣᤁᤪᤥᤏᤧᤱᤃ ᤕᤒᤢᤛᤡᤜᤠ᤹ ᤁᤢᤛᤡᤱᤒᤠ ᤐᤥᤱᤗᤥ॥

⁸ ᤌᤱᤅᤥ ᤁᤧᤓᤵᤐᤠᤜᤠ᤹ᤗᤠᤶ ᤀᤠᤜᤡᤶᤔᤡᤴ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤂᤧᤴ ᤁᤧᤖᤧᤰ ᤐᤡᤛᤠᤱ ᤀᤠᤱᤃᤠ᤹ ᤛᤠ᤺ᤱᤃᤠᤜᤡᤶ ᤆᤥᤃᤢᤱᤗᤥ॥ ᤀᤠᤳᤋᤡᤴ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧᤀᤠᤱ ᤀᤠᤔᤏᤠᤜᤠ᤹ ᤕᤠᤶᤔᤥ ᤋᤢᤰᤂᤣ ᤔᤧᤴᤈᤠ᤺ᤳᤋᤢᤛᤡᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤂᤧᤱᤜᤠ᤹ ᤀᤠᤵᤑᤣᤰ ᤁᤥᤛᤢᤱᤛᤡᤱᤗᤥ॥”

ᤋᤠᤕᤧᤶᤔᤥᤒᤠ ᤜᤠᤱ

⁹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤛᤡᤕᤠᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛᤠ᤹ᤖᤡᤰ ᤛ᤺ᤳᤋᤧ᤹ᤀᤥ᥄ ᤕᤖᤢᤛᤗᤧᤔᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤂᤧᤏᤧ᤹ ᤛᤠ᤹ᤖᤡᤰ ᤀ᤺ᤰᤋᤧ᤹ᤀᤥ᥄ ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤜᤠᤱᤅᤡᤴ ᤂᤧᤏᤧ᤹ᤀᤥ ᤋᤠᤖ ᤐᤳᤗᤥ. ᤂᤢᤏᤧ᤹ᤃ ᤛᤧᤴᤗᤵᤍᤠᤱᤒᤠ ᤏᤢ ᤛᤠᤶᤕᤥᤒᤠ ᤆᤥᤰᤗᤥ. ᤂᤢᤏᤧ᤹ ᤏ᤺ᤶᤏ᤺ᤶᤒᤠ ᤆᤥᤰ ᤜᤧᤰᤁᤩᤠᤱ ᤀᤍᤱ ᤛᤶᤎᤠᤱ ᤀᤍᤱᤅᤡᤸᤗᤧ ᤁᤢᤛ᤻ᤛᤠ ᤗᤳᤇᤠ ᤀᤍᤱᤛᤠ᤺ᤳᤋᤡᤴ ᤕᤢᤰᤋᤢᤀᤠᤱ ᤋᤠᤖ ᤐᤳᤗᤥ॥

¹⁰ ᤀᤠᤱᤃᤠ᤹ ᤀᤣᤑᤪᤠᤀᤡᤔᤗᤠᤶ ᤀᤴᤗᤠᤎᤠᤜᤠ᤹ ᤂᤧᤳᤋᤢᤱᤛᤡᤱᤗᤥ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤗᤠᤶ ᤌᤰᤛᤢᤒᤠ ᤀᤴᤜᤠ᤹ ᤋᤣ᤹ᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤌᤱ ᤆᤥ᤺ᤰᤔᤠ ᤗᤡ᤹ᤜᤠ᤹ ᤑᤸᤗᤰ ᤑᤸᤗᤰ ᤀᤧᤰᤗᤥ॥ ᤂᤢᤏᤧ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤏᤢ᤹ᤔᤠᤍᤠᤔᤠᤖᤧᤴ ᤀᤢᤘᤠ ᤆᤥᤃᤢᤖᤥ. ᤂᤢᤏᤧ᤹ ᤁᤢᤜᤠᤱᤈᤢᤶᤔᤡᤴ ᤌᤡᤰ ᤘᤖ᤺ᤱᤅᤥᤗᤠᤶ ᤘᤣ᤹ ᤘᤖ᤺ᤱ ᤌᤠᤖᤡᤰ. ᤂᤶᤓᤩᤠᤱ ᤕᤢᤑᤪᤣᤋᤡᤛ ᤘᤜ᤺ᤱᤅᤥᤗᤠᤶ ᤕᤥ᤹ᤒᤠ᤺ᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤐᤥᤱᤗᤥ॥

¹¹ ᤛᤡᤕᤥᤏᤀᤣ. ᤂᤧᤏᤧ᤹ᤏᤢ ᤜᤢᤵᤋᤢᤱᤒᤠ ᤔᤠᤰᤂᤡ᤹ᤀᤥᤒᤠ ᤔᤠᤱᤜᤢᤵᤐᤡᤸᤗᤧ ᤆᤥᤃᤢᤸᤗᤧ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤠᤱᤃᤠ᤹ ᤆᤫᤠ᤺ᤳ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤗ᤺ᤳᤋᤢᤱᤛᤡᤱᤗᤥ॥

¹² ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤐᤢᤱᤗᤠᤎᤠᤒᤠᤛᤣ. ᤂᤡᤏᤡ᤹ ᤀᤠᤒᤠᤅᤣ ᤛᤧ᤺ᤵᤛᤡᤱᤔᤠᤍᤧᤴᤏᤥ ᤏᤢ᤺ᤰᤂᤧᤶᤔᤧ᤹ᤀᤥ॥ ᤋᤢᤰᤂᤣ ᤁᤧᤈᤩᤧ᤹ᤀᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤗᤧᤱ ᤕᤠᤖᤡᤰ ᤔᤢ᤹ᤀᤡᤛᤠᤶ ᤐᤡᤏᤡᤱ ᤑᤠ᤹ᤀᤠᤱ ᤀᤠᤸᤗ ᤂᤡᤏᤡ᤹ ᤗᤠᤃᤡ ᤀᤢᤘᤠ ᤆᤥᤃᤢᤱᤗ ᤐᤳᤋᤠᤖᤥ॥

¹³ ᤌᤣᤀᤠᤱᤓᤧᤸᤗᤧ ᤕᤜᤢᤍᤠᤴ ᤀᤠᤱᤃᤠ᤹ ᤀᤠᤗᤡ᤹ᤀᤡᤴ ᤜᤧᤰᤁᤣ ᤗᤧ᤹ᤖᤢᤱᤗᤥ. ᤜᤧᤰᤁᤩᤠᤱ ᤂᤧᤵᤔᤥ ᤀᤠᤱᤃᤠ᤹ ᤀᤣᤑᤪᤠᤀᤡᤶᤔᤡᤴ ᤋᤥᤱ ᤜᤧᤰᤁᤣ ᤑᤳᤇᤢᤱᤗᤥ॥ ᤛᤡᤕᤥᤏᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤃᤪᤡᤛᤖᤧ ᤁᤢᤛ᤻ᤛᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤢᤛᤢᤱᤛᤡᤱ ᤐᤰᤂᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤌᤰᤗᤡᤜᤠᤱᤅᤡᤸᤗᤧ ᤁᤢᤍᤠᤓᤣ ᤜᤧᤰᤋᤱᤒᤠ ᤆᤥ᤺ᤰᤏᤧᤖᤥ॥”

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤕᤠᤶᤔᤥ ᤑᤥ᤺ᤰᤂᤢᤛᤡ

¹⁴ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤀᤥ ᤀᤥ᤺ᤴᤎᤠᤰᤛᤡᤱᤗᤥ. ᤂᤢᤏᤧ᤹ ᤁᤢᤍᤥ᤺ᤱᤜᤠ᤹ ᤛᤠ᤺ᤶᤓᤣ ᤁᤢᤀᤡᤛᤡᤰ ᤗᤧᤰᤗᤥ॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤌᤢᤳᤋᤢᤖᤡ᤺ᤵᤐᤠᤴ ᤔᤢ᤺ᤳᤋᤢᤖᤥ. ᤜᤧᤰᤁᤩᤠᤱ ᤕᤥ ᤗᤧᤵᤔᤠᤱᤒᤠ ᤛᤢᤖᤡᤳ ᤁᤣᤈᤱᤅᤥ ᤗᤠᤱᤄᤣ᤺ᤰᤗ ᤐᤣ᤺ᤰᤗᤥ॥

¹⁵ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤋᤠᤱᤛᤧ᤺ᤵᤋᤢᤛᤡᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤔᤡᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡᤖᤥ. ᤜᤧᤰᤁᤩᤠᤱ ᤀᤷᤍᤥᤀᤥᤒᤠ ᤗᤢᤱᤜᤠ᤹ᤖᤧ ᤂᤧᤱᤜᤠ᤹ ᤔᤧᤏᤠ᤺ᤴᤍᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤛᤥᤛᤥᤳᤗᤖᤠᤱᤅᤥ ᤔᤧᤈ ᤔᤧᤎᤢᤅᤢᤖᤥ ᤜᤧᤰᤁᤩᤠᤱ ᤔᤕᤢᤛᤡᤒᤠ ᤁᤢᤀᤡᤛᤡᤰ ᤔᤧᤀ᤺ᤰᤗᤥ॥ ᤂᤧᤱᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤢᤰᤐᤠᤜᤠ᤹ᤀᤥ ᤛᤠᤔᤠᤰᤂᤡ᤹ ᤛᤠᤱᤔᤠ ᤇᤧ᤺ᤱᤃᤩᤠᤴ ᤋᤡᤶᤒᤠ ᤜᤧᤰᤁᤣ ᤔᤠᤰᤂᤡᤸᤗᤧ ᤗᤧ᤺ᤰᤋᤢᤛᤡᤖᤥ॥

¹⁶ ᤂᤧᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤛᤧ᤺ᤵᤋᤢᤛᤡᤖᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤛᤢᤶᤛᤡᤖᤥ ᤋᤡᤆᤀᤥᤒᤠ ᤔᤢᤎᤡᤱᤗᤢᤱ ᤜᤧᤰᤁᤣ ᤂᤧᤱᤜᤠ᤹ ᤂᤢᤏᤧ᤹ ᤁᤢᤗᤠᤈᤣ᤹ᤀᤥ ᤔᤧᤗᤧᤰᤗᤥ॥

¹⁷ ᤂᤧᤱᤜᤠ᤹ ᤛᤠ᤹ᤖᤡᤰ ᤐᤏᤢᤏᤢᤒᤠ ᤏᤢ ᤁᤧᤄᤧᤶᤛᤡᤱᤒᤠ ᤔᤧᤒᤥᤱᤗᤥ᥄ ᤐᤥᤃᤢᤃᤧᤴ ᤁᤢᤈᤠ᤺ᤸᤗᤧ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤁᤧᤄᤧᤶᤛᤡᤱᤒᤠ ᤆᤥᤃᤢᤛᤡᤖᤥ ᤂᤶᤓᤩᤠᤱ ᤁᤢᤒᤥᤰ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤧᤴᤇ᤻ᤕᤠᤜᤠ᤹ ᤁᤧᤘᤧᤶᤔᤠ ᤆᤥᤃᤢᤛᤡᤖᤥ॥