ᤈᤁᤖᤡᤕᤠ 8 - LIFOTNT

ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤁᤢᤛᤱ ᤐᤥᤱ᤹

¹ ᤕᤠᤶᤔᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ॥

² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤛᤡᤕᤥᤏᤖᤧ ᤁᤢᤗᤠᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤏᤠᤃᤧᤜᤧᤶᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤧᤴ ᤏᤠᤜᤧᤳᤋᤢᤱᤒᤠᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤁᤢᤏᤡᤱᤔᤡᤜᤠ᤹ᤏᤢ ᤀᤠᤛᤡᤰ ᤐᤥ᤺ᤰᤔᤧᤸᤗᤧ ᤀᤥ᤹ᤀᤠᤖᤥ॥”

³ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤀᤠᤱᤃᤠ᤹ ᤏᤢ᤺ᤱᤅᤠᤀᤠᤱ ᤛᤡᤕᤥᤏᤀᤥ ᤕᤢᤀᤠ. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤥ ᤕᤢᤱᤅᤠ॥ ᤂᤧᤒᤩᤠᤱ ᤕᤖᤢᤛᤗᤧ᤺ᤶᤔᤡᤴ ‘ᤏᤛᤠ᤺ᤴᤛᤠᤒᤠ ᤕᤧᤰᤕᤰ’ ᤔᤧᤔᤧᤳᤋᤢ᤹. ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤃᤥ᤺ᤰᤔᤠᤴ ‘ᤛᤣᤛᤣ ᤁᤥ᤺ᤰᤔᤠ’ ᤔᤧᤔᤧᤳᤋᤢ᤹॥

⁴ ᤕᤖᤢᤛᤗᤧ᤺ᤶᤒᤠ ᤔᤠᤖᤠᤶᤜᤠ᤹ᤀᤥ ᤕᤠᤶᤔᤥ ᤁᤢᤍᤢᤶᤒᤡᤵᤐᤠ ᤕᤧᤶᤒᤡᤳᤇᤠᤜᤠ᤹ ᤏᤢ ᤔᤧᤴᤇᤢᤔᤠᤜᤠ᤹ ᤂᤢᤴᤇᤡ᤹ ᤁᤢᤍᤢᤶᤛᤩᤠᤰ ᤔᤧᤒᤥᤱᤒᤧᤸᤗᤧ ᤆᤥᤃᤢᤸᤗᤧ ᤜᤢᤰᤁᤥ ᤋᤰᤁᤠᤳ ᤔᤧᤍᤰᤛᤡᤱᤅᤠᤱ ᤔᤧᤕᤢᤱ᤹॥

⁵ ᤕᤧᤰᤕᤰᤁᤥᤒᤠ ᤔᤠᤖᤠᤶᤜᤠ᤹ ᤐᤠᤱᤃᤧᤘᤠᤒᤠ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤖᤧ ᤁᤢᤗᤧ᤺ᤶ ᤔᤧᤎᤡᤶᤛᤢ᤹॥

⁶ ᤂᤧᤴ ᤕᤧᤴᤏᤥ ᤁᤴ ᤔᤏᤠᤜᤠ᤹ᤀᤥᤗᤠᤶ ᤁᤧᤜᤡᤱᤒᤠᤜᤠ᤹ᤖᤧ ᤗᤠᤃᤡ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤥᤱᤒᤡᤗᤠ. ᤁᤖ ᤌᤣ ᤂᤧᤴ ᤀᤠᤱᤃᤠ᤹ ᤀᤠᤏᤡᤔᤥᤀᤠᤱ ᤏᤡᤱᤘᤠ᤹ ᤁᤧᤔᤠᤒᤠ ᤐᤥᤱᤅᤠᤱᤒᤡ᥅” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥

⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤏᤠᤱᤃᤧᤴᤒᤠ ᤗᤠᤈᤣ᤹ ᤏᤢ ᤏᤠᤶᤎᤠᤒᤠ ᤗᤠᤈᤣ᤹ᤜᤠ᤹ᤗᤠᤶ ᤋᤠᤱᤛᤧ᤺ᤵᤋᤢᤱᤛᤡᤱ᤹॥

⁸ ᤀᤠᤱᤃᤠ᤹ ᤂᤧᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤕᤢᤱᤛᤧ ᤋᤠᤖᤢᤱᤛᤡᤱ᤹॥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤛᤠ᤺ᤴᤛᤠᤒᤠ ᤏᤢ ᤛᤠᤶᤕᤥᤒᤠ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥”

⁹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤒᤢᤱ ᤔᤧᤕᤢᤰᤂᤢᤸᤗᤧ ᤂᤧᤵᤔᤥ ᤁᤧᤘᤠ᤹ᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ‘ᤔᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤶᤗ’ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤠᤸᤗᤥ ᤁᤵᤔᤥ ᤁᤧᤘᤠ᤹ᤒᤠᤜᤠ᤹ᤖᤧ ᤁᤧᤄᤧᤵᤛᤢᤶᤗ ᤁᤧᤘᤕᤡ᤹॥

¹⁰ ᤌᤣᤀᤠᤱᤓᤧᤸᤗᤧ ᤂᤧᤴ ᤕᤧᤶᤔᤡᤴᤏᤢ᤺ᤸᤗᤧ ᤋᤃᤡ ᤔᤏᤠ ᤏᤢ ᤌᤰᤛᤠᤖᤧ ᤗᤠᤃᤡ ᤏᤠᤶᤕᤠᤰ ᤜᤥ᤺ᤵᤋᤧ॥ ᤏᤡᤱᤔᤡᤜᤠ᤹ᤖᤧ ᤔᤧᤈᤥᤃᤢᤸᤗᤧ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤜᤠᤱᤜᤠᤱ ᤗ᤹ᤖᤡᤰ ᤕᤠ᤺ᤶᤒᤰᤁᤥ ᤐᤣ᤺ᤰᤔᤠ ᤔᤧᤴᤇᤢᤰᤁᤣ ᤔᤧᤘᤕᤧ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤧᤖᤧᤰ ᤔᤏᤠᤜᤠ᤹ ᤂᤢᤴᤇᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤋᤰᤗᤧᤱᤘᤠᤀᤥ ᤑᤥ᤺ᤰᤂᤢᤱᤛᤡᤱᤅᤠᤱ ᤔᤧᤘᤕᤧ॥

¹¹ ᤁᤖ ᤀᤠᤸᤗ ᤀᤠᤱᤃᤠ᤹ ᤁᤴ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤀᤥ ᤋᤃᤡᤒᤠ ᤕᤧᤴᤜᤠ᤹ ᤁᤢᤀᤡᤛᤡᤰ ᤔᤧᤈᤥᤰᤁᤠᤴ॥

¹² “ᤂᤡᤏᤡ᤹ ᤜᤢᤰᤜᤠ᤹ ᤁᤧᤎᤢᤶᤒᤠ ᤐᤥᤱᤗ ᤌᤣᤀᤠᤱᤓᤧᤸᤗᤧ ᤕᤠ᤹ᤖᤡ᤺ᤶᤒᤠᤜᤠ᤹ ᤏᤢᤖᤡᤰ ᤐᤥᤎᤠᤱ. ᤆᤧᤸᤗᤧᤰᤛᤣ᤺ᤸᤗᤧ ᤁᤢᤒᤢᤱᤅᤥ ᤁᤢᤈᤠ᤹ ᤌᤥᤰ. ᤂᤠᤶᤒᤠᤱᤅᤡᤸᤗᤧ ᤐᤥᤃᤢᤃᤧᤴ ᤁᤢᤈᤠ ᤑᤳᤇᤢ᤹. ᤂᤶᤓᤩᤠᤱ ᤋᤠᤱᤛᤠᤱᤒᤧᤸᤗᤧ ᤛᤣ᤺ᤰᤘᤠ ᤌᤠᤛᤢ᤹॥ ᤀᤠᤱᤃᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤴ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤗᤰᤂᤥᤔᤠ ᤕᤢᤰ ᤐᤡᤖᤢᤱᤛᤡᤱ᤹॥

¹³ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤒᤠ ᤕᤰᤕᤢᤱᤒᤠᤛᤣ᥄ ᤀᤠᤰᤂᤣᤗ᤹ᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤔᤠᤱᤍᤣ ᤛᤠᤱᤃᤪᤠ ᤆᤠᤜᤠᤰ ᤁᤧᤒᤥ᤺ᤰᤂᤡᤀᤠᤱ ᤘᤕᤧ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤋᤠᤱᤛᤧ᤺ᤵᤏᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤖᤧ ᤁᤢᤒᤢᤱ ᤁᤧᤒᤥ᤺ᤰᤂᤡ᤹॥ “ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹. ᤁᤖ ᤂᤡᤏᤡ᤹ ᤜᤢᤰᤜᤠ᤹ ᤁᤧᤎᤢᤶᤒᤠ ᤐᤥᤱᤗ॥”

¹⁴ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤀᤠᤰᤂᤣᤗ᤹ᤖᤡᤰ ᤂᤧᤏᤡ᤹ ᤐᤠᤎᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤡᤰ ᤔᤧᤓᤥ᤺ᤰᤂᤢᤸᤗᤧ ᤂᤧᤱᤜᤠ᤹ᤀᤥ ᤕᤧᤳᤋᤢᤰᤂᤣ ᤋᤠ᤺ᤵᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤕᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤗᤥᤖᤧᤴ॥

¹⁵ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤸᤗ ᤕᤖᤢᤛᤗᤧ᤺ᤶᤔᤥ ᤏᤢ ᤕᤜᤢᤍᤠᤀᤥ ᤕᤠᤶᤔᤥ ᤏᤢ᤹ᤔᤠᤍᤠᤔᤠ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤏᤡᤱᤘᤠ᤹ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹॥ ᤂᤡᤏᤡ᤹ ᤔᤧᤃᤡᤛᤧᤶᤔᤡᤴᤏᤧ᤹॥

¹⁶ ᤂᤡᤏᤡ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ—ᤌᤡᤰᤏᤢ ᤘᤣ᤹ ᤁᤢᤈᤧᤰᤐᤠ ᤐᤠᤴ ᤐᤠᤖᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤠᤛᤧᤴᤗᤥᤶᤔᤠ ᤜᤡᤶᤔᤥ ᤛᤧᤰᤂᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤧᤶᤔᤧ᤹॥

¹⁷ ᤁᤖ ᤂᤡᤏᤡ᤹ ᤀᤠᤒᤠᤅᤣ ᤜᤡᤶᤒᤣᤛᤠᤱᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤠᤵᤑᤧ᤺ᤶᤒᤠ ᤆᤧᤶᤓᤴ ᤔᤧᤈᤥᤃᤧᤶᤔᤡᤴᤏᤧ᤹. ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤔᤠᤱᤜᤧᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤈᤥᤃᤧᤶᤔᤡᤴᤏᤧ᤹॥ ᤀᤠᤱᤃᤠ᤹ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤡ᤺ᤳᤋᤢᤱ᤹.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥

¹⁸ ᤕᤠᤶᤔᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ॥

¹⁹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤗᤡᤛᤡᤃᤣᤰᤐᤠ. ᤅᤠᤛᤡᤃᤣᤰᤐᤠ. ᤏᤢᤛᤡᤃᤣᤰᤐᤠ ᤏᤢ ᤌᤡᤒᤥᤱᤃᤣᤰᤐᤠ ᤗᤠᤀᤥ ᤋ᤺ᤰᤏᤧᤳ ᤕᤢᤱᤔᤠᤖᤧ ᤁᤢᤗᤧᤰᤘᤠ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤛ᤺ᤳᤗ. ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤖ ᤜᤧᤰᤁᤩᤠᤱ ᤕᤧᤕᤧ ᤔᤧᤗ᤹ᤖ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤰᤂᤠ ᤏᤢ ᤛᤏᤠᤖᤢᤱ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖ॥”

²⁰ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤕᤖᤡᤰ ᤕᤧᤰᤕᤰᤁᤥᤒᤠ ᤕᤰᤕᤢᤱᤒᤠᤜᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ ᤀᤠᤸᤗᤛᤠᤱ ᤔᤧᤍᤠᤖᤥ.

²¹ ᤜᤧᤰᤁᤩᤠᤱ ᤗᤳᤇᤠ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ ᤘᤣ᤹ ᤕᤧᤰᤕᤰᤁᤥ ᤀᤰᤂᤣ ᤔᤧᤗ᤹ᤖ ᤔᤧᤒᤣᤰ. ‘ᤔᤢ᤹ᤀᤡᤛᤠᤶ ᤏᤠ᤺ᤰᤛᤧ ᤂᤡᤔᤥ ᤕᤜᤘᤣ ᤍᤠᤱᤒᤠᤀᤥ ᤐᤣᤃᤡ ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤁᤥ᤺ᤳᤋᤢᤶ॥ ᤀᤠᤱᤃᤠ᤹ ᤀᤠᤵᤑᤣᤰᤁᤠᤱ ᤐᤣ᤺ᤰᤁᤠ॥’

²² ᤕᤖᤡᤰ ᤔᤢᤰᤛᤠᤶᤛᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤁᤥ᤺ᤳᤇᤧ ᤏᤢ ᤔᤢ᤹ᤀᤡᤛᤠᤶ ᤏᤠ᤺ᤰᤛᤧ ᤕᤖᤢᤛᤗᤧ᤺ᤶᤔᤥ ᤔᤧᤍᤠᤖᤥ॥”

²³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤂᤧᤴ ᤕᤧᤴᤏᤥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤏᤢ ᤁᤧᤖᤧᤰ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠᤜᤠ᤹ᤀᤥᤗᤠᤶ ᤌᤡᤒᤥᤱ ᤔᤏᤠᤖᤧ ᤗᤳᤇᤠ ᤕᤜᤢᤍᤡᤴ ᤁᤢᤍᤣ᤺ᤳ ᤑᤧᤖᤠᤀᤥ ᤔᤧᤍᤧᤶᤛᤢᤀᤠᤱ ᤀᤰᤂᤣ ᤔᤧᤔᤧᤳᤋᤢ᤹. ‘ᤀᤠᤏᤡᤃᤣ ᤂᤧᤏᤧ᤹ᤏᤢ ᤛᤥᤖᤡᤰ ᤐᤣᤃᤡᤃᤧ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤧᤏᤧ᤹ᤏᤢ ᤘᤠ᤹ ᤑᤠ᤹ᤀᤠᤱ ᤀᤠᤏᤡᤃᤣ ᤂᤧᤵᤛᤢᤶᤒᤧᤀᤠᤱ ᤘᤕᤡᤃᤧᤖᤥ॥’”