ᤈᤁᤖᤡᤕᤠ 7 - LIFOTNT

ᤋ᤺ᤰᤏᤧᤳ ᤕᤢᤱᤔᤠ ᤔᤣ᤺ᤴ. ᤂᤠᤛᤧᤴ ᤏᤢ ᤗᤢᤱᤔᤠ ᤋᤢᤰᤔᤠ

¹ ᤍᤠᤖᤠ ᤜᤠᤱᤅᤡᤸᤗᤧ ᤜᤠᤱᤕᤢᤰ ᤆᤥᤃᤢᤒᤠ ᤗᤡᤛᤡᤃᤣᤰᤐᤠ ᤋᤱᤒᤣ ᤁᤡᤛᤗᤣᤒ ᤗᤠ ᤀᤡᤃᤪ ᤑᤠᤱᤛᤡᤃᤣᤰᤐᤠ ᤗᤠ᤺ᤸᤗᤧ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤈᤁᤖᤡᤕᤠᤀᤥ ᤁᤧᤖᤧ॥

² ᤒᤣᤌᤣᤗᤒᤠ ᤔᤏᤠᤜᤠ᤹ᤖᤧ ᤛᤖᤣᤛᤣᤖ ᤏᤢ ᤖᤣᤃᤣᤔ-ᤔᤣᤗᤣᤰᤁᤧᤴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤁᤶᤓᤗ᤹ᤖᤡᤰ ᤔᤢ᤹ᤀᤡᤛᤠᤶᤗᤧ ᤗᤠᤃᤡ ᤐᤣᤗᤡ ᤑᤠᤰᤛᤧ ᤔᤧᤒᤠᤱᤄᤢᤛᤡᤀᤠᤱ ᤘᤕᤧ.

³ ᤜᤧᤰᤁᤣᤗ᤹ᤖᤡᤰ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤛᤧ᤺ᤴᤔᤧᤗᤠᤵᤋᤢᤛᤡ. “ᤔᤠᤱᤜᤡᤶᤔᤡᤴ ᤔᤧᤕᤴᤇᤢ ᤔᤧᤍᤣᤛᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤋᤱᤒᤣ ᤋᤃᤡᤀᤠᤱᤎᤥ ᤆᤥᤃᤢᤶ ᤕᤢᤖᤢᤶᤒᤧᤒᤠ ᤜᤧᤰᤁᤣ ᤌᤣ ᤅᤠᤛᤡᤃᤣᤰᤐᤠ ᤗᤠᤀᤥ ᤀᤠᤏᤡᤃᤣ ᤔᤧᤖᤡᤱ ᤌᤰᤔᤠ ᤏᤢ ᤋ᤺ᤰᤏᤧᤳ ᤕᤢᤱᤔᤠ ᤐᤥᤱᤒᤡ᥅”

⁴ ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

⁵ “ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤧᤶᤛᤡᤶᤔᤧ᤹. ‘ᤂᤡᤏᤡ᤹ ᤂᤧᤴ ᤏᤢᤒᤥᤱ ᤋᤱᤒᤣ ᤌᤠᤖᤡᤰ ᤅᤠᤛᤡᤃᤣᤰᤐᤠ ᤏᤢ ᤏᤢᤛᤡᤃᤣᤰᤐᤠ ᤗᤠᤀᤥ ᤋ᤺ᤰᤏᤧᤳ ᤁᤧᤕᤢᤅᤡᤀᤠᤱ ᤔᤧᤖᤡᤱ ᤁᤧᤎᤰᤋᤡᤸᤗᤧ. ᤌᤣ ᤂᤧᤴ ᤀᤠᤱᤃᤠ᤹ ᤀᤠᤔᤡᤱᤅᤡᤸᤗᤧ ᤗᤠᤃᤡᤀᤣ ᤋ᤺ᤰᤏᤧᤳ ᤁᤧᤕᤢᤅᤡᤀᤠᤱ ᤘᤕᤧᤒᤡ᥅

⁶ ᤜᤧᤰᤁᤩᤠᤱ ᤀᤠᤸᤗ ᤂᤡᤏᤡ᤹ ᤁᤧᤈᤠᤶ ᤁᤧᤎᤢᤅᤢᤶᤔᤠᤱ ᤁᤧᤘᤕᤡᤸᤗᤧ ᤌᤣ ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤧᤈᤠᤶ ᤁᤧᤎᤢᤅᤢᤶᤔᤠᤱ ᤁᤧᤴᤘᤕᤡᤴᤒᤡ᥅

⁷ ᤕᤖᤢᤛᤗᤧᤔ ᤏᤢ ᤂᤧᤴ ᤁᤧᤖᤧᤰ ᤐᤡᤛᤠᤱᤒᤠ ᤐᤠᤱᤈᤢᤶᤜᤠ᤹ᤀᤥ ᤆᤡᤈᤡ ᤕᤧᤶᤕᤧᤶ ᤏᤢ ᤏᤢ᤹ᤔᤠᤍᤠᤔᤠ ᤐᤥ᤺ᤰᤂᤧᤀᤠᤱ ᤘᤕᤧ ᤜᤧᤰᤁᤩᤠᤱ ᤏᤣᤃᤣᤘ ᤏᤢ ᤏᤠᤶᤎᤠ ᤐᤡᤛᤠᤱ ᤌᤧᤃᤢᤃᤢᤒᤠᤍᤧᤴᤜᤠ᤹ᤀᤥ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧᤀᤠᤱ ᤘᤕᤧᤒᤠ ᤋᤃᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤀᤡᤱᤓᤴ ᤐᤥ᤺ᤰᤂᤧᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤜᤠᤒᤠ ᤁᤴ ᤘᤕᤧᤖᤥ॥’”

⁸ ᤜᤧᤰᤁᤩᤠᤱ ᤈᤁᤖᤡᤕᤠᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤕᤠᤶᤔᤥ ᤁᤧᤖᤧ—

⁹ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤴᤍᤧᤶᤔᤧ᤹ ᤌᤡᤰᤗᤧ ᤘᤣ᤹ᤀᤡᤴ ᤗᤢᤱᤔᤠ᤹ ᤋᤢᤰᤋᤧᤶᤔᤧ᤹ᤀᤠᤱ ᤏᤢᤖᤡᤰ ᤔᤧᤳᤋᤧᤶᤔᤧ᤹॥

¹⁰ ᤁᤢᤕᤧᤶᤒᤠ ᤁᤧᤛᤡᤔᤠ ᤔᤣᤔᤣᤍᤢᤔᤠᤜᤠ᤹ ᤏᤢ ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹. ᤘᤣ᤹ ᤗᤠᤈᤣ᤹ᤒᤠ ᤀᤡᤃᤪ ᤕᤠᤱᤃᤧᤛᤠ᤹ᤒᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤠᤶᤛᤡᤶᤔᤡᤴᤏᤧ᤹॥ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤌᤡᤰᤏᤢ ᤘᤣ᤹ ᤋᤠᤵᤑᤧ᤺ᤶᤒᤠ ᤔᤧᤀᤡ᤺ᤳᤋᤠᤛᤡᤶᤔᤧᤴᤏᤧ᤹॥’

¹¹ “ᤁᤖ ᤂᤧᤱᤜᤠ᤹ᤖᤧ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤶᤔᤠ ᤔᤧᤴᤍᤧᤴᤍᤧᤴ. ᤂᤧᤱᤜᤠ᤹ ᤀᤠᤎᤡᤱᤃᤠᤏᤡ ᤔᤧᤒᤥ᤺ᤰᤂᤧᤀᤠᤱ ᤂᤢᤴᤇᤡ᤹ ᤀᤣ᤺ᤰᤁᤡᤴ ᤔᤧᤜᤡᤛᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤏᤧᤓᤠᤰᤜᤠ᤹ ᤔᤧᤜᤢ᤹ᤖᤢ॥

¹² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤥᤗᤠᤶ ᤋᤃᤡ ᤋᤃᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶᤔᤡᤴ ᤏᤢ ᤀᤡᤱᤄᤱᤅᤡᤴ ᤂᤧᤶᤔᤠ ᤂᤧᤱᤜᤠ᤹ ᤔᤧᤴᤍᤧᤴᤍᤧᤴ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤗᤢᤱᤛᤧᤖᤢᤱᤒᤠ ᤁᤢᤀᤡᤛᤡᤰ ᤁᤧᤛᤠ᤺ᤰᤐᤠ ᤔᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤁᤢᤕᤠ᤺ᤰᤗᤧ᤹ᤖᤧ॥

¹³ “‘ᤀᤠᤱᤃᤠ᤹ ᤂᤧᤱᤜᤠ᤹ ᤀᤢ᤺ᤳᤋᤢᤅᤛᤡᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ. ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤀᤢ᤺ᤳᤋᤠᤀᤠᤱ ᤐᤣᤗᤡ ᤔᤧᤓᤠᤰᤁᤠᤸᤗᤧ ᤂᤧᤶᤄᤧᤶ ᤔᤧᤗᤠᤵᤐᤠᤴ.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁴ ‘ᤂᤧᤱᤜᤠ᤹ ᤘᤣ᤹ ᤗᤠᤈᤣ᤹ᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤕᤢᤅᤧᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤑᤧᤛᤢᤛᤡᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤑᤢᤳᤇᤡᤱᤈᤩᤠᤱ ᤆᤥᤃᤢᤱᤛᤡᤱ॥ ᤀᤠᤳᤋᤡᤴᤜᤠ᤹ᤀᤠᤱ ᤋᤠᤔᤠ ᤐᤣ᤺ᤰᤔᤠ ᤔᤧᤴᤇᤢᤰᤋᤧᤴᤗ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧ॥ ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤴ ᤏᤢᤒᤠ ᤗᤠᤈᤣᤴ ᤆᤡᤈᤡ ᤂᤰᤂᤰᤐᤠ ᤔᤧᤈᤥᤃᤢᤖᤥ॥’”