ᤈᤁᤖᤡᤕᤠ 6 - LIFOTNT

ᤗᤡᤛᤡ ᤀᤴᤗᤠᤎᤠᤜᤠ᤹

¹ ᤕᤠᤶᤔᤥ ᤀᤠᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤏᤧᤳᤇᤡ ᤁᤥ᤺ᤰᤔᤠᤜᤠ᤹ᤖᤧ ᤁᤢᤗᤢᤶᤔᤥᤗᤠᤶ ᤗᤡᤛᤡ ᤀᤴᤗᤠᤎᤠᤜᤠ᤹ ᤔᤧᤕᤧᤒᤠ ᤏᤡᤛᤢᤱᤛᤡᤱ॥ ᤂᤧᤴ ᤁᤠᤛᤠᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤆᤥᤃᤧ॥

² ᤌᤡᤰᤛᤡᤃᤣᤰᤐᤠ ᤀᤴᤗᤠᤎᤠᤀᤥ ᤜᤧ᤺ᤳᤁᤧᤗ᤹ᤒᤠ ᤀᤴᤜᤠ᤹. ᤏᤡᤛᤡᤃᤣᤰᤐᤠ ᤀᤴᤗᤠᤎᤠᤀᤥ ᤔᤠᤰᤁᤧᤗ᤹ᤒᤠ ᤀᤴᤜᤠ᤹.

³ ᤛᤢᤶᤛᤡᤃᤣᤰᤐᤠ ᤀᤴᤗᤠᤎᤠᤀᤥ ᤑᤃᤧᤗ᤹ᤒᤠ ᤀᤴᤜᤠ᤹ ᤏᤢ ᤗᤡᤛᤡᤃᤣᤰᤐᤠ ᤀᤴᤗᤠᤎᤠᤀᤥ ᤜᤧ᤺ᤋᤩᤱᤕᤱᤒᤠ ᤀᤴᤜᤠ᤹ ᤔᤧᤕᤠᤃᤧ. ᤂᤧᤱᤜᤠ᤹ ᤁᤧᤖᤧᤰ ᤁᤧᤎᤢᤶᤒᤠ ᤔᤧᤈᤥᤃᤧ॥

⁴ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤛᤣ᤺ᤴᤍᤥᤛᤢᤱ. “ᤀᤠᤍᤠᤱᤒᤣ. ᤁᤴᤜᤠ᤹ ᤌᤣᤛᤡᤒᤣ᥅”

⁵ ᤂᤧᤴ ᤔᤠᤱᤗᤠᤀᤡᤱᤒᤧᤸᤗᤧ ᤏᤢᤃᤵ ᤐᤡᤖᤠᤱᤅᤠᤱ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴᤜᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ ᤁᤧᤖᤧᤰ ᤐᤡᤛᤠᤱ ᤁᤧᤒᤣ᤺ᤰᤐᤠ ᤗᤡᤛᤡ ᤛᤢᤖᤡᤳ ᤁᤈᤱᤛᤡᤖᤥ. ᤂᤧᤱᤜᤠ᤹ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤍᤠᤱᤒᤧᤸᤗᤧ ᤁᤢᤍᤃᤡᤗᤠᤶ ᤔᤧᤕᤧᤶᤛᤡᤱᤅᤠᤱ ᤀᤣᤃᤠᤱ ᤔᤧᤗ᤺ᤴᤍᤧ ᤔᤧᤕᤧᤒᤠᤖᤥ॥

⁶ ᤔᤠᤰᤁᤧᤗ᤹ᤒᤠ ᤀᤴᤜᤠ᤹ ᤁᤧᤕᤠᤰᤐᤠ ᤀᤴᤗᤠᤎᤠᤴ ᤌᤠᤱᤃᤧᤳ ᤐᤡᤛᤠᤱ ᤐᤣᤰ. ᤑᤃᤧᤗ᤹ᤒᤠ ᤀᤴᤜᤠ᤹ ᤁᤧᤕᤠᤰᤐᤠ ᤀᤴᤗᤠᤎᤠᤴ ᤏᤠᤶᤎᤠ ᤗᤧᤵᤔᤠᤱ ᤐᤣᤰ. ᤜᤧᤰᤁᤩᤠᤱ ᤜᤧ᤺ᤋᤩᤱᤕᤱᤒᤠ ᤀᤴᤜᤠ᤹ ᤁᤧᤕᤠᤰᤐᤠ ᤀᤴᤗᤠᤎᤠᤴ ᤗᤠᤱᤃᤧᤳ ᤐᤡᤛᤠᤱ ᤐᤣᤰ॥”

⁷ ᤀᤠᤸᤗ ᤁᤧᤎᤢᤶᤒᤠ ᤀᤴᤜᤠ᤹ ᤗᤠ᤺ᤰᤁᤠᤳ ᤔᤧᤗ᤺ᤴᤍᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤐᤡᤛᤠᤱ ᤁᤧᤵᤔᤠᤖᤧ ᤗᤠᤃᤡ ᤔᤧᤛᤠ᤺ᤶᤛᤡᤱᤗ ᤔᤧᤘᤕᤧ॥ ᤔᤠᤱᤗᤠᤀᤡᤱᤒᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤡᤛᤠᤱ ᤐᤣᤃᤧᤶᤔᤧ᤹॥” ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤐᤡᤛᤠᤱ ᤔᤧᤒᤣ॥

⁸ ᤂᤶᤓᤩᤠᤱ ᤔᤠᤱᤗᤠᤀᤡᤱᤒᤧᤸᤗᤧ ᤀ᤺ᤰᤋᤧᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤥᤔᤧᤳᤋᤧ᤹. ᤂᤧᤴ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤒᤣ᤺ᤰᤐᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤧᤵᤔᤥ ᤏᤠ᤺ᤶᤛᤡᤱᤔᤠ ᤔᤧᤒᤡᤖᤢᤀᤠᤱ ᤘᤠ᤹ᤖᤥ॥”

ᤕᤜᤥᤛᤢᤴ ᤋᤡᤆ ᤂᤢ᤺ᤰᤔᤠ ᤀᤡᤱᤈᤠᤱ

⁹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

¹⁰ “ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤒᤣᤒᤡᤗᤥᤏ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠᤗᤠᤶ ᤁᤧᤓᤧᤶᤒᤠᤜᤠ᤹ ᤜᤣᤸᤍᤤ. ᤋᤥᤒᤡᤕᤠᤜ ᤏᤢ ᤕᤍᤠᤕᤠᤜᤗᤠᤶ ᤜᤢᤰᤛᤥᤕᤠᤱ ᤋᤠ᤺ᤰᤋᤧ᤹॥ ᤀᤠᤶᤓᤠ ᤂᤧᤴ ᤕᤧᤴᤏᤥ ᤛᤐᤏᤩᤠᤜᤖᤧ ᤁᤢᤛ᤻ᤛᤠ ᤕᤥᤛᤡᤕᤠᤜ᤺ᤸᤗᤧ ᤁᤢᤜᤡᤶᤔᤥ ᤐᤣᤃᤧ᤹॥

¹¹ ᤂᤧᤱᤜᤠ᤹ᤗᤠᤶ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤋᤠ᤺ᤰᤋᤧ᤹ᤀᤠᤱ ᤗᤳᤇᤠ ᤋᤡᤆ ᤆᤥᤃᤧ᤹. ᤜᤧᤰᤁᤩᤠᤱ ᤕᤜᤥᤛᤠᤍᤠᤰᤁᤧᤸᤗᤧ ᤁᤢᤛ᤻ᤛᤠ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢ᤺ᤸᤗᤧ ᤁᤢᤎᤧᤃᤣ᤺ᤰᤁᤥ ᤂᤧᤴ ᤋᤡᤆ᤺ᤴ ᤂᤢ᤺ᤰᤋᤧ᤹॥

¹² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹ ᤑᤠ᤹ᤀᤠᤱ ᤂᤧᤴ ᤔᤧᤳᤋᤧ᤹—‘ᤀᤥᤔᤧᤳᤋᤧ᤹. ᤁᤴ ᤔᤏᤠ᤺ᤸᤗᤧ ᤁᤢᤔᤡᤱᤃ ᤐᤥᤖᤠ᤺ᤰᤗᤥ. ᤂᤧᤴ ᤀᤠᤵᤑᤣᤰ ᤁᤢᤕᤢᤰᤏᤠᤍᤧᤴᤏᤥ ᤐᤥᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥᤃᤢ᤹॥

¹³ ᤀᤠᤶᤓᤠ ᤂᤢᤏᤧ᤹ᤀᤣ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥᤃᤢ᤹. ᤜᤧᤰᤁᤩᤠᤱ ᤂᤢᤏᤧ᤹ ᤜᤠᤱ ᤔᤡᤱᤛᤥ ᤀᤡᤱᤎᤠᤱ ᤂᤥᤛᤢ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤜᤠᤱᤕᤢᤰᤏᤠᤀᤥ ᤕᤢᤱᤅᤠᤱ ᤜᤠᤱᤕᤢᤰ ᤆᤥᤃᤢ᤹. ᤂᤶᤓᤩᤠᤱ ᤂᤧᤴ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤒᤣᤛᤠᤱ ᤏᤡᤱᤘᤠ᤹ᤑᤢᤛᤠᤶᤒᤠ ᤌᤡᤰ ᤐᤥᤱ᤹॥ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤠᤍᤱ ᤐᤥᤱ᤹॥’

¹⁴ ᤜᤣᤸᤍᤤ. ᤋᤥᤒᤡᤕᤠᤜ. ᤕᤍᤠᤕᤠᤜ ᤏᤢ ᤛᤐᤏᤩᤠᤜᤖᤧ ᤁᤢᤛ᤻ᤛᤠ ᤜᤣᤏᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤛᤥᤰᤗᤧ ᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤂᤧᤴ ᤋᤡᤆ᤺ᤴ ᤔᤧᤏᤧᤛ᤻ᤛᤢ॥”

¹⁵ ᤂᤧᤴ ᤔᤠ᤺ᤱᤄᤠ ᤔᤠ᤺ᤱᤄᤠ ᤁᤧᤕᤢᤱᤒᤠᤜᤠ᤹ ᤔᤧᤍᤠᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤆᤥ᤺ᤰᤔᤠ ᤔᤧᤓᤠ᤹ᤖᤢᤛᤡ᤹. ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹॥ ᤂᤡᤏᤡ᤹ ᤏᤡᤱᤘᤠ᤹ ᤁᤧᤒᤡᤖᤢᤶᤔᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤏᤧᤓᤃᤪ ᤁᤴ ᤐᤠ᤺ᤴᤜᤠ᤹ ᤐᤥᤱᤗᤥ॥