ᤈᤁᤖᤡᤕᤠ 5 - LIFOTNT

ᤁᤧᤒᤧᤒᤠᤖ ᤁᤧᤒᤵᤐᤠ ᤛᤠᤵᤗᤠᤌᤱᤔᤠ ᤛᤢᤑᤥ

¹ ᤂᤧᤒᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤃᤡ ᤁᤧᤒᤧᤒᤠᤖ ᤁᤧᤒᤵᤐᤠ ᤗᤳᤇᤠ ᤛᤠᤵᤗᤠᤌᤱᤔᤠᤎᤡᤰ ᤐᤳᤇᤧ॥

² ᤂᤢᤏᤧ᤹ ᤛᤣ᤺ᤴᤍᤥᤛᤠᤱ. “ᤂᤧᤏᤧ᤹ ᤌᤣ ᤁᤧᤏᤡᤛᤢᤖ ᤁᤧᤒᤳ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤏᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤌᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧᤒᤠ ᤁᤧᤒᤧᤒᤠᤖ ᤁᤧᤒᤵᤐᤠ ᤛᤠᤵᤗᤠᤌᤱᤔᤠᤎᤡᤰ ᤀᤠᤱᤃᤠ᤹ ᤏᤡᤛᤢᤱ᤹॥”

³ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤛᤠᤵᤗᤠᤌ᤺ᤱᤔᤥ ᤗᤠᤈᤣ᤹ᤀᤥ ᤁᤧᤖᤧᤰ ᤌᤠᤔᤠ ᤁᤧᤀᤡ᤺ᤵᤐᤠ ᤛᤠᤰᤔᤢᤖᤠ ᤔᤠᤱᤍᤣᤴ ᤐᤳ. ᤌᤣᤀᤠᤱᤓᤧᤸᤗᤧ ᤁᤸᤗᤧ ᤌᤡᤰᤏᤠᤜᤠᤱ ᤐᤡᤛᤠᤱ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤂᤢ᤺ᤴᤍᤪᤡᤰᤐᤠᤜᤠ᤹ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡ᤹. ᤜᤧᤰᤁᤩᤠᤱ ᤘᤣ᤹ ᤗᤧᤵᤔᤠᤱ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤀᤡᤱᤗᤧᤰ ᤔᤠᤱᤃᤧᤜᤧᤰᤛᤡᤱᤒᤠᤜᤠ᤹ ᤂᤰᤐᤧᤳ ᤗᤠᤈᤣ᤹ᤗᤠᤶ ᤗᤠ᤺ᤰᤁᤠᤳ ᤔᤧᤗ᤺ᤳᤋᤢᤛᤡ᤹॥

⁴ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹. ‘ᤀᤠᤱᤃᤠ᤹ ᤛᤠᤰᤔᤢᤖᤠ ᤔᤠᤱᤍᤣ ᤐᤠᤱᤄᤢᤱ ᤋᤠᤛᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤂᤢ᤺ᤴᤍᤪᤡᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤏᤢ ᤀᤠᤔᤡᤱᤅᤥ ᤀᤡᤱᤗᤧᤰ ᤔᤠᤱᤃᤧᤜᤧᤰᤛᤡᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤂᤧᤴ ᤗᤠ᤺ᤳ. ᤂᤶᤓᤩᤠᤱ ᤜᤡᤶᤔᤥ ᤂᤧᤴ ᤕᤠᤰ ᤜᤧᤰᤁᤩᤠᤱ ᤂᤧᤸᤗᤧ ᤂᤧᤵᤔᤥᤒᤠ ᤛᤡᤱ ᤏᤢ ᤗᤢᤱᤜᤠ᤹ ᤏᤧᤵᤔᤠᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤍᤣᤛᤢᤖᤥ॥’”

ᤛᤠᤵᤐᤥᤀᤥ ᤗᤳᤇᤠ ᤔᤧᤴᤇᤢᤔᤠ ᤕᤠᤃᤧᤒᤠ ᤛᤢᤑᤥ

⁵ ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤋᤠ᤹ᤃᤧᤈᤧᤱᤒᤠ ᤔᤠᤱᤗᤠᤀᤡᤱᤒᤧᤴ ᤋᤃᤡ ᤑᤧᤖᤧᤀᤠᤱ ᤔᤧᤳᤋᤠᤱ. “ᤌᤥ ᤀᤥᤔᤧᤳᤋᤧ᤹. ᤂᤧᤵᤔᤥ ᤌᤧᤔᤠᤀᤡ ᤏᤡᤎᤠ᤺ᤵᤗ ᤐᤳ॥”

⁶ ᤂᤧᤒᤩᤠᤱ ᤀᤠᤱᤃᤠ᤹ ᤛᤣ᤺ᤴᤍᤥᤛᤢᤱ. “ᤂᤧᤴ ᤌᤣᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ ᤏᤢᤃᤵ ᤐᤡᤖᤠᤱ. “ᤂᤧᤱᤃ ᤗᤳᤇᤠ ᤁᤢᤛᤡ᤺ᤰᤔᤠ ᤛᤠᤵᤐᤥᤖᤥ॥ ᤗᤠᤈᤣ᤹ ᤁᤧᤖᤧᤰ ᤁᤧᤘᤠ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤴ ᤜᤠᤒᤠ ᤁᤴᤗᤥ॥”

⁷ ᤂᤡᤔᤥ ᤔᤠᤰᤗᤢᤶᤒᤠ ᤁᤢᤛᤢ᤺ᤵᤏᤠ᤺ᤴ ᤌᤠ᤺ᤱ ᤜᤸᤗᤧᤰ ᤔᤧᤜᤴᤍᤢ. ᤜᤧᤰᤁᤩᤠᤱ ᤛᤠᤵᤐᤥᤀᤥ ᤔᤧᤴᤇᤢᤔᤠᤎᤡᤰ ᤕᤢᤅᤧᤃᤖᤧᤒᤠ ᤏᤡᤛᤢᤱ॥

⁸ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤧᤸᤗᤧ ᤐᤠ᤺ᤳᤋᤢ. “ᤁᤴ ᤑᤧᤴᤕᤠ᤺ᤶᤒᤰᤁᤡᤴ ᤜᤠᤒᤠ ᤁᤴᤗᤥ॥” ᤂᤧᤒᤩᤠᤱ ᤂᤢᤏᤧ᤹ ᤂᤧᤴ ᤔᤧᤴᤇᤢᤔᤠᤴ ᤛᤠᤵᤐᤥᤀᤥ ᤕᤠᤱᤕᤥ ᤀᤡ᤺ᤴᤍᤢ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤔᤠᤰᤗᤢᤶᤒᤠ ᤁᤢᤛᤢ᤺ᤵᤔᤠᤸᤗᤧ ᤛᤠᤵᤐᤥ᤺ᤸᤗᤧ ᤁᤢᤶᤒᤪᤠ᤺ᤴ ᤛᤢ᤺ᤵᤋᤢ॥

⁹ ᤂᤧᤒᤩᤠᤱ ᤀᤠᤱᤃᤠ᤹ ᤌᤠ᤺ᤱ ᤘᤖᤧᤰ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤔᤧᤴᤇᤢᤔᤠ ᤏᤧᤳᤇᤡ ᤕᤧᤛᤡᤖ ᤐᤳᤇᤧᤛᤡᤒᤠ ᤏᤡᤛᤢᤱᤛᤡᤱ. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤵᤐᤥ ᤛᤢᤖᤡᤳ ᤁᤣᤈᤱᤏᤣ ᤐᤳᤇᤧ॥ ᤂᤢᤴᤇᤡ᤹ ᤗᤠᤵᤜᤠ᤹ ᤗᤡᤗᤡᤘᤠ᤺ᤸᤗᤧ ᤁᤢᤗᤠᤵ ᤜᤧᤰᤋᤱᤒᤠᤏᤣ ᤐᤳᤇᤧ. ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤔᤧᤴᤇᤢᤔᤠᤜᤠ᤹ᤖᤧ ᤂᤧᤴ ᤛᤠᤵᤐᤥᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤠᤱᤛᤠᤱᤒᤧᤸᤗᤧ ᤁᤢᤗᤢᤶᤔᤥ ᤐᤰᤂᤧ ᤋᤣ᤹ᤖᤧᤛᤢ॥

¹⁰ ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤋᤠ᤹ᤃᤧᤈᤧᤱᤒᤠ ᤔᤠᤱᤗᤠᤀᤡᤱᤒᤧᤴ ᤛᤣ᤺ᤴᤍᤥᤛᤢᤱ. “ᤁᤴ ᤏᤧᤵᤑᤢᤖᤧ ᤛᤠᤵᤐᤥᤴ ᤀᤠᤳᤋᤡ ᤋᤣ᤹ᤛᤢᤖ ᤐᤳᤇᤡᤒᤠᤒᤣ᥅”

¹¹ ᤂᤧᤸᤗᤧ ᤀᤠᤱᤃᤠ᤹ ᤏᤢᤃᤵ ᤐᤡᤖᤠᤱ. “ᤂᤧᤸᤗᤧ ᤁᤢᤗᤠᤃᤡ ᤗᤳᤇᤠ ᤔᤠᤱᤜᤡᤶ ᤆᤥ᤺ᤰᤛᤧ ᤒᤣᤒᤡᤗᤥᤏ ᤗᤠᤈᤣ᤹ᤀᤥ ᤋᤣ᤹ᤛᤢᤖ ᤐᤳᤇᤡ॥ ᤀᤠᤸᤗ ᤂᤧᤴ ᤔᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤆᤢ᤺ᤳᤋᤠᤱ ᤂᤧᤴ ᤛᤠᤵᤐᤥᤴ ᤜᤠᤒᤠ ᤂᤧᤸᤗᤧ ᤁᤢᤕᤢᤰᤏᤠᤀᤥᤀᤣ ᤕᤢᤱᤗᤥ॥”