ᤈᤁᤖᤡᤕᤠ 4 - LIFOTNT

ᤇᤰᤁᤱ ᤏᤢ ᤏᤧᤳᤇᤡ ᤆᤤᤋᤢᤏ ᤛᤡᤱᤒᤢᤱ

¹ ᤂᤧᤒᤩᤠᤱ ᤁᤢᤓᤠ ᤔᤏᤠᤴ ᤔᤡᤰᤕᤢᤔᤥᤗᤠᤶ ᤋᤠᤍᤠᤵ ᤗ᤹ᤖᤡᤰ ᤑᤥ᤺ᤱᤔᤏᤠᤒᤠ ᤜᤧᤰᤁᤣ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤕᤠᤶᤔᤥ ᤋᤩᤧᤀᤠᤱ ᤛᤥᤛᤠᤱ॥

² ᤂᤢᤏᤧ᤹ ᤛᤣ᤺ᤴᤍᤥᤛᤠᤱ. “ᤂᤧᤏᤧ᤹ ᤌᤣ᤺ᤴ ᤁᤧᤏᤡᤛᤢ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤁᤢᤛᤶᤔᤥ ᤏᤡ᤺ᤱᤃᤣ᤹ ᤕᤢᤱᤔᤠ ᤗᤳᤇᤠ ᤕᤶᤒᤠ ᤂᤥᤷᤕᤠ ᤁᤧᤒᤵᤐᤠ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤠ ᤇᤰᤁᤱ ᤌᤡᤰ ᤏᤡᤛᤢᤱ᤹॥ ᤂᤧᤸᤗᤧ ᤁᤢᤛᤶᤔᤥ ᤏᤢᤛᤡ ᤛᤣᤔᤡᤜᤠ᤹ ᤐᤳ. ᤜᤧᤰᤁᤩᤠᤱ ᤁᤢᤛᤶᤔᤥ ᤁᤧᤒᤵᤐᤠ ᤛᤣᤔᤡ ᤌᤵᤔᤣ ᤏᤢᤛᤡ ᤋ᤺ᤱᤃᤪᤣ ᤑᤶᤔᤠ ᤆᤰᤛᤡᤱᤅᤠᤱ ᤐᤳ॥

³ ᤛᤣᤔᤡ ᤜᤠ᤺ᤶᤔᤠ ᤇᤰᤁᤱᤅᤡᤸᤗᤧ ᤁᤢᤒᤣᤛᤠᤱ ᤆᤤᤋᤢᤏ ᤛᤡᤱᤒᤢᤱ ᤏᤧᤳᤇᤡᤀᤠᤱ ᤕᤢᤱ᤹. ᤂᤥᤷᤕᤠ᤺ᤸᤗᤧ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤗᤳᤇᤠ ᤏᤢ ᤘᤣ᤹ᤀᤡᤴ ᤁᤢᤓᤧᤴᤇᤠᤱ ᤗᤧᤵᤔᤠᤱ ᤕᤢᤱ᤹॥”

⁴ ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤛᤣ᤺ᤴᤍᤥᤛᤢᤱ. “ᤀᤠᤍᤠᤱᤒᤣ. ᤁᤴᤜᤠ᤹ ᤌᤧᤔᤠᤒᤣ᥅”

⁵ ᤂᤢᤏᤧ᤹ ᤏᤢᤃᤵ ᤐᤡᤖᤠᤱ. “ᤁᤴᤜᤠ᤹ ᤌᤧᤔᤠ ᤑᤠ᤹ᤀᤠᤱ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤴᤒᤡ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤀᤠᤲᤜᤠ᤹. ᤀᤠᤱᤃᤠ᤹ ᤁᤢᤛᤡᤱ ᤔᤧᤏᤡ᤺ᤳᤋᤠᤴ ᤀᤠᤍᤠᤱᤒᤣ॥”

⁶ ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤔᤧᤳᤋᤠᤱ. “ᤕᤖᤢᤒᤠᤒᤣᤗᤖᤧ ᤁᤢᤗᤠᤃᤡ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤁᤴ ᤘᤠ᤹—‘ᤌᤢᤶᤔᤧᤸᤗᤧᤀᤠᤱ ᤔᤣ᤺ᤴ ᤔᤢᤰᤛᤠᤶᤔᤡᤸᤗᤧᤀᤠᤱ ᤔᤣ᤺ᤴ. ᤁᤖ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤸᤗᤧ.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

⁷ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤜᤧᤰᤋᤱᤒᤠ ᤐᤕᤶ ᤕᤶᤒᤠ ᤕᤠᤵᤔᤡ ᤁᤧᤜᤶᤒᤠ ᤐᤠ᤺ᤴᤜᤠ᤹ ᤌᤧᤔᤠᤀᤠᤱᤒᤣ᥅ ᤕᤖᤢᤒᤠᤒᤣᤗᤖᤧ ᤁᤢᤍᤃᤡ ᤂᤧᤏᤧ᤹ ᤗᤧᤵᤐᤧᤵᤐᤠ ᤁᤧᤒᤥᤱ᤹॥ ᤜᤧᤰᤁᤩᤠᤱ ᤔᤏᤠᤜᤠ᤹ ᤔᤧᤛ᤺ᤳᤋᤠᤱ ‘ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤖ. ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤖ᥄’” ᤋᤡᤕᤠᤜᤠ ᤔᤧᤗ᤹ᤖ ᤔᤧᤀ᤺ᤰᤁᤡᤸᤗᤧ ᤂᤢᤏᤧ᤹ ᤁᤢᤶᤔᤠᤗᤢᤱᤅᤡᤴ ᤕᤢᤰᤂᤢ᤹॥

⁸ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

⁹ “ᤁᤴ ᤔᤠᤱᤜᤡᤶᤔᤡᤸᤗᤧ ᤁᤢᤕᤢᤰᤏᤠᤴ ᤕᤖᤢᤒᤠᤒᤣᤗᤖᤧ ᤁᤢᤜᤢᤰᤁᤡᤸᤗᤧ ᤕᤢᤰᤂᤢᤀᤠᤱ ᤕᤢᤱ᤹. ᤂᤢᤏᤧ᤹ ᤁᤢᤜᤢᤰᤁᤡᤸᤗᤧ ᤂᤧᤴ ᤆᤥᤃᤢ ᤛᤢᤖᤢ᤹॥” ᤂᤧᤒᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥

¹⁰ ᤔᤠᤱᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤆᤒᤧ᤺ᤳᤇᤡᤰᤗᤰ ᤐᤥᤱᤅᤡᤸᤗᤧ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤂᤧᤱ ᤁᤖ ᤕᤖᤢᤒᤠᤒᤣᤗᤖᤧ ᤁᤢᤜᤢᤰᤁᤥ ᤁᤢᤛᤡ᤺ᤰᤔᤠ ᤂᤡ᤺ᤴ ᤔᤧᤏᤡᤛᤢᤸᤗᤧ ᤂᤧᤱᤜᤠ᤹ ᤔᤧᤛ᤺ᤳ॥ ᤔᤠᤱᤗᤠᤀᤡᤱᤒᤧᤸᤗᤧ ᤔᤧᤳᤋᤠᤱ. “ᤁᤴ ᤏᤢᤛᤡ ᤛᤣᤔᤡᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤰᤗᤥ. ᤂᤧᤴ ᤔᤡᤰᤜᤠ᤹ᤖᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤔᤧᤔᤧᤳᤋᤢᤀᤠᤱ ᤐᤳᤗᤥ॥”

¹¹ ᤂᤧᤒᤩᤠᤱ ᤀᤠᤱᤃᤠ᤹ ᤔᤠᤱᤗᤠᤀᤡᤱᤒᤧᤴ ᤛᤣ᤺ᤴᤍᤥᤛᤢᤱ. “ᤁᤴ ᤛᤣᤔᤡᤕᤢᤱᤍᤧᤴ ᤇᤰᤁᤱᤅᤡᤸᤗᤧ ᤆᤢᤰᤘᤠ ᤏᤢ ᤑᤧᤱᤘᤠ ᤗᤧᤵᤔᤠᤱ ᤁᤧᤕᤢᤱᤒᤠ ᤁᤴ ᤏᤧᤳᤇᤡ ᤆᤤᤋᤢᤏ ᤛᤡᤱᤒᤢᤱᤜᤠ᤹ ᤌᤣᤒᤣ᥅”

¹² ᤕᤠᤶᤔᤥ ᤂᤢᤏᤧ᤹ ᤛᤣ᤺ᤴᤍᤥᤛᤢᤱ. “ᤏᤧᤳᤇᤡ ᤛᤠᤶᤔᤩᤠᤱ ᤁᤢᤜᤥ᤺ᤴᤍᤪᤠᤗᤠᤶ ᤏᤡ᤺ᤱᤃᤣ᤹ ᤁᤧᤒᤣ᤺ᤰᤐᤠ ᤏᤧᤳᤇᤡ ᤆᤤᤋᤢᤏᤧᤸᤗᤧ ᤁᤢᤒᤥᤖᤠᤰᤜᤠ᤹ᤖᤧ ᤁᤢᤒᤣ ᤌᤣᤃ᥅”

¹³ ᤂᤢᤏᤧ᤹ ᤏᤢᤃᤵ ᤐᤡᤖᤠᤱ. “ᤁᤴᤜᤠ᤹ ᤌᤣᤒᤣ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤴᤏᤡᤋᤢᤶᤒᤡ᥅” ᤀᤠᤱᤃᤠ᤹ ᤔᤧᤳᤋᤢᤱ. “ᤀᤠᤲᤜᤠ᤹. ᤁᤢᤛᤡᤱ ᤔᤧᤏᤡ᤺ᤳᤋᤠᤴ. ᤀᤠᤍᤠᤱᤒᤣ॥”

¹⁴ ᤂᤧᤶᤒᤩᤠᤱ ᤂᤢᤏᤧ᤹ ᤔᤧᤳᤋᤠᤱ. “ᤁᤴ ᤏᤧᤳᤇᤡᤃ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤛᤣᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤔᤠᤱᤌᤥ᤺ᤰᤏᤠ ᤁᤧᤒᤥᤱᤒᤠᤛᤡᤖᤥ॥”