ᤈᤁᤖᤡᤕᤠ 3 - LIFOTNT

ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤧᤴ ᤏᤡᤎᤠᤒᤧᤒᤠ ᤛᤢᤑᤥ

¹ ᤂᤧᤒᤩᤠᤱ ᤔᤠᤱᤗᤠᤀᤡᤱᤒᤧᤸᤗᤧ ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤁᤢᤍᤃᤡ ᤕᤧᤒᤧᤃᤖᤧᤒᤠ ᤀᤥ᤺ᤴᤎᤠᤰᤋᤠᤱ॥ ᤕᤜᤥᤛᤢᤴ ᤀᤵᤔᤠᤖᤧ ᤗᤠᤃᤡ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤈᤢᤰᤘᤠ ᤗᤧᤵᤔᤠᤱ ᤔᤠᤑᤧᤴᤛᤠᤶᤔᤡᤴ ᤕᤧᤒᤧᤃᤖᤧ॥

² ᤕᤜᤘᤣ ᤍᤠᤱᤒᤧᤸᤗᤧ ᤔᤠᤑᤧᤴᤛᤠᤶᤔᤡᤴ ᤔᤧᤳᤋᤢ. “ᤔᤠᤑᤧᤴᤛᤠᤶᤔᤣ. ᤕᤖᤢᤛᤗᤧ᤺ᤶᤔᤡᤴ ᤁᤧᤛᤣ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤁᤧᤓᤧ᤺ᤰᤗᤖᤥ᥄ ᤌᤣ ᤁᤴ ᤔᤏᤠᤴ ᤔᤡᤀᤥᤗᤠᤶ ᤗ᤺ᤵᤔᤏᤠᤒᤠ ᤔᤡᤎᤰᤐᤢ ᤔᤣ᤺ᤴᤏᤠᤱᤒᤡ᥅”

³ ᤀᤠᤸᤗ ᤕᤜᤥᤛᤢᤴ ᤔᤰᤘᤠ᤹ ᤀᤡᤛᤣ᤺ᤱᤒᤠ ᤆᤠᤱ ᤆᤠᤰᤂᤢᤀᤠᤱ ᤔᤠᤱᤗᤠᤀᤡᤱᤒᤧᤸᤗᤧ ᤁᤢᤍᤃᤡ ᤕᤧᤒᤧᤃᤖᤧ॥

⁴ ᤂᤧᤒᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤧᤸᤗᤧ ᤂᤢᤏᤧ᤹ ᤁᤢᤍᤃᤡ ᤁᤧᤕᤧᤵᤐᤠᤜᤠ᤹ ᤔᤧᤳᤋᤢᤛᤡ. “ᤁᤴ ᤔᤏᤠ᤺ᤸᤗᤧ ᤔᤰᤘᤠ ᤀᤡᤛᤣ᤺ᤱᤒᤠ ᤁᤢᤈᤠᤱᤅᤡᤴ ᤑᤧᤴᤍᤧᤶ ᤐᤡᤖᤧᤶᤔᤧ᤹॥” ᤂᤶᤓᤩᤠᤱ ᤂᤧᤸᤗᤧ ᤕᤜᤥᤛᤢᤴ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤕᤥᤴ ᤂᤧᤳᤋᤢᤱ ᤐᤡᤏᤧᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤀᤡᤔᤧᤸᤗᤢᤱᤒᤠ ᤆᤠᤱᤜᤠ᤹ ᤆᤠᤰᤏᤧᤀᤠᤱ ᤘᤠ᤹॥”

⁵ ᤂᤧᤒᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤕᤜᤥᤛᤢ᤺ᤸᤗᤧ ᤁᤢᤎᤧᤃᤣ᤺ᤰᤐᤥ ᤛᤢᤳᤌᤥ ᤐᤠᤃᤠᤖᤡ ᤂᤢ᤺ᤰᤋᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤳᤇᤠ ᤛᤢᤳᤌᤥ ᤐᤠᤃᤠᤖᤡ ᤔᤧᤄᤢ᤺ᤰᤋᤢᤀᤠᤱ ᤆᤠᤱ ᤔᤧᤈᤠᤰᤋᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤧᤴ ᤏᤡ᤺ᤳᤋᤠᤱ ᤕᤧᤒᤧᤃᤖᤧ॥

⁶ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠᤸᤗᤧ ᤕᤜᤥᤛᤢᤴ ᤁᤴ ᤀᤡᤱᤈᤠᤱᤅᤡᤴ ᤐᤡᤖᤢ—

⁷ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤂᤧᤏᤧ᤹ ᤀᤠᤱᤃᤠ᤹ ᤀᤠᤗᤠᤶᤔᤥ ᤗᤠᤱᤃᤧᤄᤣ᤺ᤰ ᤜᤧᤰᤁᤩᤠᤱ ᤂᤧᤏᤧ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤁᤧᤈᤥᤃᤢᤏᤧᤓᤃᤪ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤜᤡᤶ ᤀᤥᤃᤧᤔᤧᤵᤐᤠ ᤏᤢ ᤀᤠᤱᤃᤠ᤹ ᤀᤠᤗᤰᤂᤢᤶᤔᤡᤴ ᤁᤶᤒᤪᤠᤱ ᤁᤧᤔᤧᤵᤐᤠ ᤁᤧᤒᤥᤱ᤹. ᤜᤧᤰᤁᤩᤠᤱ ᤁᤵᤔᤥ ᤁᤴ ᤁᤧᤕᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤂᤧᤏᤧ᤹ ᤗᤳᤇᤠ ᤋᤠᤰᤑᤠ ᤐᤡᤏᤧᤖᤥ॥

⁸ “‘ᤋᤢᤶ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤜᤥᤛᤢᤀᤣ᥄ ᤂᤧᤏᤧ᤹ ᤏᤢ ᤁᤧᤍᤃᤡ ᤁᤧᤕᤢᤱᤒᤠ ᤁᤧᤴᤍᤣ᤺ᤱᤒᤠᤜᤠ᤹ᤀᤣ ᤋᤠ᤺ᤴᤍᤡᤒᤠ ᤔᤡᤰᤛᤣ᤺ᤴᤏᤡᤱᤗᤥ॥ ᤁᤢᤒᤥᤖᤠᤰ ᤔᤧᤵᤔᤏᤠᤒᤠ ᤀᤠᤛᤧᤘᤠᤖᤥᤒᤧᤴ ᤀᤠᤱᤃᤠ᤹ ᤋᤠᤖᤢᤱᤗᤥ॥

⁹ ᤀᤥᤔᤧᤳᤋᤧᤶᤔᤧ᤹. ᤕᤜᤥᤛᤢ᤺ᤸᤗᤧ ᤁᤢᤍᤃᤡ ᤀᤠᤱᤃᤠ᤹ ᤕᤧᤵᤛᤢᤱᤒᤠ ᤗᤢᤱᤅᤡᤴ᥄ ᤂᤧᤵᤔᤥ ᤏᤢᤛᤡ ᤁᤢᤔᤡᤰ ᤐᤳ. ᤜᤧᤰᤁᤩᤠᤱ ᤂᤧᤵᤔᤥ ᤀᤠᤱᤃᤠ᤹ᤀᤣ ᤁᤢᤓᤠ ᤛᤰᤛᤣ᤹ᤜᤠ᤹ ᤗᤰᤋᤢᤱ᤹. ᤂᤶᤓᤩᤠᤱ ᤌᤡᤰᤕᤠ᤺ᤴᤗᤧ ᤁᤴ ᤗᤠᤈᤣ᤹ᤀᤥᤒᤠ ᤗᤠᤕᤥᤴ ᤂᤧᤳᤋᤢᤱᤍᤣᤛᤢᤱ᤹॥

¹⁰ ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤁᤧᤖᤧᤰᤗᤧ ᤂᤡᤏᤡ᤹ ᤜᤡᤶᤒᤣᤛᤠᤱᤒᤧᤴ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤛᤡᤃᤠᤱ ᤏᤢ ᤐ᤺ᤳᤇᤣᤸᤗᤧ ᤁᤢᤒᤢᤱ ᤛᤡᤃᤠᤱ ᤕᤢᤱᤔᤠᤖᤧ ᤗᤠᤃᤡ ᤁᤧᤀᤢ᤺ᤳᤋᤢᤶ᤹.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥”