ᤈᤁᤖᤡᤕᤠ 2 - LIFOTNT

ᤁᤢᤛᤡ᤺ᤰᤔᤠ ᤀᤡᤍᤠᤰ ᤁᤧᤃᤵᤐᤠ ᤛᤢᤑᤥ

¹ ᤂᤧᤒᤩᤠᤱ ᤀᤠᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱ ᤜᤧᤰᤁᤩᤠᤱ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤀᤠᤍᤃᤡ ᤁᤢᤜᤢᤰᤁᤥ ᤁᤢᤛᤡ᤺ᤰᤔᤠ ᤀᤡᤍᤠᤰ ᤁᤧᤃᤵᤐᤠ ᤗᤳᤇᤠ ᤔᤏᤠᤎᤡᤰ ᤘᤕᤧ॥

² ᤀᤠᤱᤃᤠ᤹ ᤛᤣ᤺ᤴᤍᤥᤛᤢᤱ. “ᤀᤠᤍᤠᤱᤒᤠ ᤀᤠᤳᤋᤡ ᤁᤧᤒᤣ᤺ᤰᤗ ᤁᤧᤒᤵᤐᤠᤒᤣ᥅” ᤂᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤖᤢᤛᤗᤧ᤺ᤶᤔᤡᤴ ᤛᤡ᤺ᤰᤔᤠᤖᤧ ᤗᤠᤃᤡ ᤐᤣ᤺ᤰᤁᤠᤒᤠ. ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤏᤢ ᤁᤢᤓᤧᤖᤧᤴ ᤀᤠᤰᤂᤧᤴ ᤏᤧᤀᤡ ᤑᤠ᤹ᤀᤠᤱ ᤀᤥᤔᤧᤵᤔᤠᤖᤧ ᤗᤠᤃᤡ ᤐᤣ᤺ᤰᤁᤠᤖ ᤐᤳᤋᤠ॥”

³ ᤂᤧᤒᤩᤠᤱ ᤀᤠᤱᤃᤠ᤹ᤏᤢ ᤁᤧᤒᤠ᤺ᤵᤐᤠᤖ ᤁᤧᤒᤵᤐᤠ ᤂᤧᤴ ᤔᤠᤱᤗᤠᤀᤡᤱᤒᤧᤴ ᤌᤠᤛᤡᤱᤒᤣ. ᤜᤧᤰᤁᤩᤠᤱ ᤘᤣ᤹ ᤔᤠᤱᤗᤠᤀᤡᤱᤒᤧᤴ ᤂᤢᤏᤧ᤹ ᤁᤢᤍᤢᤶᤛᤧ ᤋᤩᤧ.

⁴ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤠᤱ. “ᤗᤥ᤺ᤰᤋᤧ᤹ᤖ ᤐᤣᤃᤧ᤹ᤀᤠᤱ ᤂᤧᤴ ᤌᤠᤱᤒᤧᤴ ᤔᤏᤠᤴ ᤔᤧᤳᤋᤧ᤹. ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤕᤖᤡᤰ ᤂᤠᤏᤡ᤺ᤳ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤗᤢᤱᤎᤠᤰ ᤔᤣ᤺ᤴᤏᤣᤒᤠ ᤕᤧᤰᤕᤰ ᤐᤥᤱ᤹॥

⁵ ᤜᤧᤰᤁᤩᤠᤱ ‘ᤀᤠᤱᤃᤠ᤹ ᤀᤠᤵᤑᤣᤰ ᤂᤧᤴ ᤁᤧᤖᤧᤰ ᤐᤡᤛᤠᤱ ᤔᤡᤎᤢᤱ ᤔᤡᤖᤠ᤺ᤰᤗᤧᤴ ᤗᤢᤱᤎᤠᤰ ᤐᤥᤱᤅᤠᤖᤥ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤔᤡᤔᤡᤍᤡᤱ ᤀᤠᤱᤃᤠ᤹ᤀᤣ ᤐᤥᤱᤅᤠᤖᤥ.’ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥”

ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤏᤢ᤺ᤱᤔᤠᤍᤠᤔᤠ ᤐᤣᤗᤡ

⁶ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤋᤩᤧᤶᤔᤧ᤹ᤀᤥ᥄ ᤋᤩᤧᤶᤔᤧ᤹ᤀᤥ᥄ ᤌᤠᤱᤃᤧᤳ ᤐᤡᤛᤠᤱᤒᤠ ᤗᤠᤈᤣ᤹ᤗᤠᤶ ᤂᤧᤳᤋᤠᤛᤡᤶᤔᤧ᤹ᤀᤠᤱ ᤕᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤋᤠᤱᤛᤠᤱᤒᤥᤒᤠ ᤁᤧᤖᤧᤰ ᤐᤡᤛᤠᤱ ᤛᤢᤖᤡᤳ ᤁᤣᤈᤱᤅᤥ ᤑᤢᤳᤇᤡᤈᤩᤠ᤺ᤱ ᤛᤧᤏᤡᤱᤍᤣᤏᤡᤱᤅᤠᤱ ᤘᤠ᤹॥

⁷ ᤛᤡᤕᤥᤏᤀᤣ. ᤋᤩᤧ᤹ᤀᤥ᥄ ᤒᤣᤒᤡᤗᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤏᤢ ᤁᤧᤕᤢᤱᤒᤠᤜᤠ᤹ ᤂᤧᤳᤋᤠᤛᤡᤶᤔᤧ᤹ᤀᤠᤱ ᤋᤩᤧᤶᤔᤧ᤹ᤀᤥ.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ॥

⁸ ᤌᤣᤀᤠᤱᤓᤧᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤡᤱᤛᤥ ᤀᤡᤱᤎᤠᤱ ᤐᤡᤖᤠᤱᤅᤠᤱ ᤐᤠᤱᤄᤠᤱᤅᤠᤱ ᤀᤣᤃᤠᤱ ᤀᤠᤳᤋᤡᤴᤜᤠ᤹ᤖᤧ ᤂᤡᤏᤡ᤹ ᤁᤧᤶᤏᤠᤵᤋᤡ ᤁᤧᤶᤜᤡᤵᤋᤡ᤹. ᤂᤢᤏᤧ᤹ ᤐᤠ᤺ᤳᤋᤢ᤹. “ᤌᤣᤀᤠᤱᤓᤧᤸᤗᤧ ᤜᤠ᤺ᤳᤗᤧ ᤂᤡᤏᤡ᤹ ᤁᤧᤛᤢᤛᤡ᤹ ᤂᤧᤸᤗᤧ ᤀᤠᤱᤃᤠ᤹ ᤀᤠᤔᤡᤰᤜᤠᤱᤔᤧᤴ ᤛᤢᤛᤢ᤹॥

⁹ ᤛᤧᤰᤂᤠᤀᤣ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤂᤧᤱᤜᤠ᤹ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤛᤠ᤺ᤵᤛᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤔᤧᤏᤠ᤺ᤳᤋᤢᤛᤡ᤹.” ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥ ᤂᤧᤒᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

¹⁰ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤛᤡᤕᤥᤏᤖᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ. ᤛᤠ᤹ᤖᤡᤰ ᤀ᤺ᤰᤋᤧ᤹ᤀᤥ ᤜᤧᤰᤁᤩᤠᤱ ᤛ᤺ᤳᤋᤧ᤹ᤀᤥ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤢᤀᤠᤖ ᤐᤳᤋᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤘᤠ᤹ᤀᤠ.

¹¹ ᤂᤧᤴ ᤕᤧᤴᤏᤥ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤑᤢᤱᤛᤡᤱᤛᤧ ᤔᤧᤍᤠᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹॥ “ᤀᤠᤱᤃᤠ᤹ ᤂᤡᤏᤡ᤹ ᤗᤢᤶᤔᤥ ᤘᤠ᤹ᤀᤠ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠᤱᤄᤠᤱᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

¹² ᤕᤜᤘᤣ ᤍᤠᤱᤒᤧᤸᤗᤧ ᤛᤣᤛᤣ ᤗᤠᤈᤣ᤹ᤀᤥ ᤕᤜᤢᤍᤠᤴ ᤀᤠᤵᤑᤣᤰ ᤁᤢᤗᤰ ᤆᤥᤃᤢᤀᤠᤱ ᤕᤢᤰ ᤆᤥᤃᤢ᤹. ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤕᤠᤶᤔᤥ ᤛᤣᤃᤢ᤹॥

¹³ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤛᤫᤠ᤺ᤳ ᤘᤕᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤛᤣᤛᤣ ᤕᤢᤱᤍᤧᤴᤏᤥᤗᤠᤶ ᤋᤠᤖ ᤐᤳᤗᤥ॥”