ᤈᤁᤖᤡᤕᤠ 14 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤢᤔᤠ 1 ᤕᤖᤢᤛᤗᤧᤔᤀᤣ. ᤀᤥᤔᤧᤳᤋᤧᤶᤔᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤗᤳᤇᤠ ᤀᤰᤋᤱᤒᤠ ᤁᤢᤕᤧᤴ ᤌᤡᤰ ᤋᤠᤖ ᤐᤳ. ᤀᤠᤸᤗ ᤂᤡᤏᤡ᤹ ᤆᤡᤃᤰᤘᤠ ᤛᤠᤔᤠᤜᤠ᤹ ᤁᤧᤶᤏᤠᤵᤋᤡᤀᤠᤱ ᤂᤡᤏᤡ᤹ ᤋᤃᤡᤀᤣ ᤔᤧᤜᤠ᤺ᤳᤇᤡᤱ᤹॥ 2 ᤀᤠᤱᤃᤠ᤹ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤖᤢᤛᤗᤧᤔᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤵᤛᤢᤱᤛᤡᤱ᤹. ᤜᤧᤰᤁᤩᤠᤱ ᤁᤴ ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢ᤹. ᤜᤡᤶᤜᤠ᤹ᤀᤥᤒᤠ ᤆᤡᤃᤰᤘᤠᤜᤠ᤹ ᤔᤧᤏᤠᤵᤋᤢᤛᤡ᤹ ᤜᤧᤰᤁᤩᤠᤱ ᤔᤧᤴᤇᤢᤔᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤔᤣ᤺ᤳ ᤔᤧᤔᤧᤳᤋᤢᤛᤡ᤹॥ ᤕᤧᤰᤕᤰᤁᤥᤒᤠ ᤁᤢᤓᤪᤧ᤺ᤱ ᤔᤏᤠᤜᤠ᤹ ᤔᤧᤍᤧᤶᤛᤢᤛᤡᤀᤠᤱ ᤘᤣ᤹ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤛᤡ᤹. ᤁᤖ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤃ ᤕᤧᤰᤕᤰᤁᤥᤗᤠᤶ ᤗᤠ᤺ᤳᤗᤠ᤺ᤳ ᤔᤧᤴᤍᤣ᤹ᤖᤢᤛᤡᤴ᤹॥ 3 ᤂᤧᤒᤩᤠᤱ ᤌᤱ ᤐᤥᤱᤒᤠ ᤕᤧᤴᤏᤥ ᤋᤧᤴᤎᤱ ᤆᤥ᤺ᤰᤐᤠ ᤁᤢᤀᤡᤛᤡᤰ ᤕᤜᤘᤣ ᤍᤠᤱᤒᤧᤴ ᤗ᤺ᤴ ᤋᤠᤀᤠᤱ ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤌᤱ ᤆᤥᤰ॥ 4 ᤂᤧᤴ ᤕᤧᤴᤏᤥ ᤕᤖᤢᤛᤗᤧᤔ ᤋᤃᤡ ᤏᤠᤱᤃᤧᤴ ᤐᤡᤛᤠᤱ ᤁᤧᤕᤢᤱᤒᤠ ᤆᤤᤋᤢᤏ ᤁᤥ᤺ᤰᤔᤠᤀᤥ ᤂᤢᤏᤧ᤹ ᤁᤢᤗᤠᤱᤅᤡᤸᤗᤧ ᤋᤥ᤹ᤖᤢᤀᤠᤱ ᤕᤧᤶᤛᤡᤱ᤹. ᤂᤧᤒᤩᤠᤱ ᤏᤠᤱᤃᤧᤴᤗᤠᤶ ᤏᤠᤶᤎᤠ ᤌᤠᤖᤡᤰ ᤆᤤᤋᤢᤏ ᤁᤥ᤺ᤰᤔᤠᤸᤗᤧ ᤁᤢᤗᤢᤶᤔᤥ ᤐᤰᤁᤪᤧ᤹ ᤐ᤺ᤱ᤹ ᤜᤧᤰᤁᤩᤠᤱ ᤂᤧᤵᤔᤥ ᤗᤳᤇᤠ ᤕᤶᤒᤠ ᤏᤧᤏᤧᤒᤠᤍᤧᤴ ᤐᤥᤱ᤹॥ ᤁᤢᤓᤪᤧ᤺ᤱ ᤁᤥ᤺ᤰᤔᤠᤴ ᤌᤠᤱᤃᤧᤳ ᤗᤧᤵᤔᤠᤱ ᤏᤢ ᤁᤢᤓᤪᤧ᤺ᤱ ᤁᤥ᤺ᤰᤔᤠᤴ ᤗᤠᤱᤃᤧᤳ ᤗᤧᤵᤔᤠᤱ ᤛᤧᤶᤒᤣ᤺ᤰᤗᤥ॥ 5 ᤀᤠᤱᤃᤠ᤹ ᤀᤠᤃᤥ᤺ᤰᤔᤠᤀᤥᤒᤠ ᤏᤧᤏᤧᤒᤠᤍᤧᤴᤗᤠᤶᤒᤠ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ ᤁᤧᤄᤧᤳᤋᤠᤛᤡ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤀᤠᤛᤣᤗ ᤌᤠᤖᤡᤰ ᤐᤥᤒᤣᤰ॥ ᤕᤜᤢᤍᤠᤒᤠ ᤜᤠᤱ ᤀᤢᤈ᤻ᤈᤡᤕᤠᤜ᤺ᤸᤗᤧ ᤁᤢᤕᤧᤶᤔᤥ ᤗᤢᤵᤗᤡ ᤌᤠᤅᤧᤸᤗᤧ ᤔᤏᤠᤜᤠ᤹ ᤔᤧᤄᤧᤳᤇᤡᤱᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤁᤧᤄᤧᤳᤋᤠ᤹ᤛᤡ᤹॥ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤏᤧ᤹ ᤁᤧᤖᤧᤰ ᤁᤢᤔᤠᤱᤗᤠᤀᤡᤱᤒᤠᤜᤠ᤹ᤏᤢ ᤕᤢᤖᤥ॥ 6 ᤂᤧᤴ ᤕᤧᤴᤏᤥ ᤂᤠᤀᤠᤱ ᤔᤧᤀᤥ᤺ᤳᤏᤧᤴ. ᤛᤣ᤺ᤶᤔᤠᤀᤠᤱ ᤔᤧᤛᤣ᤺ᤶᤏᤧᤴ ᤀᤡᤃᤪ ᤛᤣ᤺ᤰᤘᤠᤀᤠᤱ ᤔᤧᤎᤠᤏᤧᤴ॥ 7 ᤂᤧᤴ ᤕᤧᤴᤏᤥ ᤏᤠᤶᤔᤠᤱ ᤔᤧᤎᤠᤏᤧᤴ. ᤂᤧᤴ ᤗᤳᤇᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤧᤴ ᤐᤥᤱ᤹—ᤕᤢ᤺ᤴᤇᤡᤰ ᤐᤥᤱᤛᤠᤱ ᤂᤠᤀᤥ᤺ᤳᤋᤠᤱᤅᤣ ᤐᤳ॥ ᤂᤧᤴ ᤕᤧᤴᤏᤡᤴ ᤕᤜᤘᤣ ᤍᤠᤱᤒᤠᤸᤗᤧᤖᤰ ᤏᤡᤛᤢᤖᤥ॥ 8 ᤂᤧᤴ ᤕᤧᤴᤏᤥ ᤕᤖᤢᤛᤗᤧᤔᤗᤠᤶ ᤑᤈᤱᤈᤱᤏᤠ ᤆᤫᤠ᤺ᤳ ᤗ᤺ᤴ ᤕᤢᤖᤥ. ᤁᤢᤓᤪᤧ᤺ᤱ ᤆᤫᤠ᤺ᤳᤋᤡᤴ ᤏᤠᤱᤃᤧᤴ ᤘᤖ᤺ᤱ ᤗᤧᤵᤔᤠᤱ ᤏᤢ ᤁᤢᤓᤪᤧ᤺ᤱ ᤆᤫᤠ᤺ᤳᤋᤡᤴ ᤏᤠᤶᤎᤠ ᤘᤖ᤺ᤱ ᤗᤧᤵᤔᤠᤱ ᤁᤢᤱᤒᤣ᤺ᤰᤗᤥ॥ ᤆᤢᤱᤘᤠ᤺ᤶᤔᤠ ᤏᤢ ᤘᤜᤡᤳ ᤌᤠᤔᤠ ᤕᤧᤶᤔᤥ ᤆᤰᤔᤧᤸᤗ᤹ᤀᤣ ᤁᤢᤱᤅᤠᤱ ᤏᤧᤖᤥ॥ 9 ᤕᤜᤘᤣ ᤍᤠᤱᤒᤧᤴ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱ ᤐᤥᤱ᤹॥ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤠ ᤗᤳᤇᤠᤖᤰ ᤘᤠ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤧ᤹ ᤁᤢᤔᤡᤱᤅᤥᤖᤰ ᤔᤠᤱᤛᤧᤘᤠ ᤔᤧᤈᤥᤃᤢ᤹॥ 10 ᤕᤜᤢᤍᤠ ᤌᤠᤱᤃᤧᤳ ᤃᤣᤒᤠᤗᤠᤶ ᤕᤖᤢᤛᤗᤧᤔ ᤗᤠᤱᤃᤧᤳ ᤖᤡᤶᤔᤥᤏ ᤌᤠᤖᤡᤰ ᤁᤧᤖᤧᤰ ᤗᤠᤈᤣᤴ ᤀᤖᤠᤒᤠ ᤜᤧᤰᤋᤱᤒᤠ ᤐᤥᤱ᤹॥ ᤁᤖ ᤕᤖᤢᤛᤗᤧ᤺ᤶᤔᤡᤴ ᤆᤠᤱᤈᤠᤱᤒᤠ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤒᤣᤏᤩᤠᤔᤡᤏᤖᤧ ᤁᤢᤗᤠᤶᤎᤣ᤺ᤵᤐᤥᤗᤠᤶ ᤌᤡᤰᤛᤡᤃᤣᤰᤐᤠ ᤗᤠᤶᤎᤣᤳ ᤁᤢᤛᤢᤰᤐᤥᤒᤠ ᤗᤠᤶᤎᤣᤳ ᤌᤠᤖᤡᤰ. ᤜᤧᤰᤁᤩᤠᤱ ᤜᤏᤏᤣᤗᤖᤧ ᤁᤢᤈᤱᤜᤡᤶᤔᤥᤗᤠᤶ ᤜᤠᤱᤅᤡᤸᤗᤧ ᤁᤢᤈᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴ ᤌᤠᤖᤡᤰ ᤀᤠᤵᤑᤣᤰ ᤁᤢᤏᤧᤔᤠᤍᤧᤴᤏᤥ ᤏᤧᤖᤥ॥ 11 ᤕᤖᤢᤛᤗᤧ᤺ᤶᤔᤥ ᤔᤏᤠᤜᤠ᤹ ᤔᤧᤏᤢ᤹ᤔᤧᤍᤠᤀᤠᤱ ᤔᤧᤕᤢᤱ᤹. ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤶᤔᤧᤰᤂᤢᤴ᤹॥ ᤂᤧᤴ ᤌᤠᤵᤌᤣ᤺ᤰ ᤕᤠᤶᤎᤣᤰᤁᤥ ᤏᤧᤖᤥ॥ 12 ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤁᤧᤈᤥ᤺ᤰᤐᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤋᤱᤒᤠ ᤗᤳᤇᤠ ᤔᤠᤱᤍᤢᤰᤔᤧᤸᤗᤧ ᤋᤖᤢᤛᤡᤖ ᤕᤠ᤺ᤴᤍᤢᤛᤡ᤹—ᤂᤧᤱᤜᤠ᤹ ᤗᤠᤱᤅᤡᤸᤗᤧ ᤔᤧᤍᤰᤛᤡᤱᤅᤠᤱ ᤔᤧᤕᤧᤵᤐᤠ ᤋᤧᤴᤏᤥᤀᤣ ᤂᤢᤴᤇᤡ᤹ ᤏᤧᤰᤛᤠᤴ ᤜᤷᤃᤡ᤹ ᤁᤡᤒᤣᤰ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤁᤡᤴ ᤂᤢᤴᤇᤡ᤹ ᤔᤡᤰᤜᤱᤅᤥᤀᤣ ᤜᤷᤃᤡ᤹ ᤁᤡᤒᤣᤰ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤧᤛᤥ᤺ᤳᤋᤧᤴ ᤂᤢᤴᤇᤡ᤹ ᤔᤢᤖᤠᤀᤥᤀᤣ ᤁᤡᤒᤣ᤺ᤰᤗᤥ॥ 13 ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤏᤠᤜᤠ᤹ ᤛᤠ᤹ᤖᤡᤰ ᤁᤡᤔᤠ ᤏᤢ ᤕᤱᤔᤠ ᤁᤧᤵᤔᤠᤀᤥ ᤌᤠᤛᤢᤛᤡ᤹॥ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤗᤢᤶᤔᤥ ᤜᤢᤰ ᤔᤧᤃᤣ᤺ᤳᤇᤡᤱ᤹. ᤜᤧᤰᤁᤩᤠᤱ ᤌᤡᤰ ᤏᤢ ᤘᤣ᤹ ᤔᤧᤓᤳᤇᤡᤱ᤹॥ 14 ᤕᤜᤢᤍᤠ᤺ᤸᤗᤧᤀᤠᤱ ᤕᤖᤢᤛᤗᤧ᤺ᤶᤔᤥ ᤋᤧᤴᤎᤱ ᤆᤥᤃᤢ᤹॥ ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤛᤢᤵᤛᤢ᤹—ᤛᤠᤶᤔᤩᤠᤱ. ᤕᤢᤵᤐᤠ. ᤆᤠᤱᤜᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤓᤢᤰᤂᤢ᤹॥ 15 ᤀᤴᤜᤠ᤹. ᤀᤴᤕᤥᤰᤜᤠ᤹. ᤀᤢᤔᤣᤜᤠ᤹. ᤀᤍᤱᤜᤠ᤹ ᤏᤢ ᤏᤡᤱᤔᤡ ᤛᤠ᤺ᤱᤃᤠᤜᤡᤶᤜᤠ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤌᤰᤛᤠᤜᤠ᤹ᤀᤠᤱ ᤜᤠᤒᤠ ᤂᤧᤴ ᤔᤠᤱᤍᤢᤰᤔᤠᤸᤗᤧ ᤛᤧᤖᤢᤛᤡ᤹॥ 16 ᤂᤧᤒᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤁᤧᤓᤵᤐᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤀᤠᤰᤂᤧᤴ ᤔᤧᤜᤡᤅᤧ ᤔᤧᤕᤠ᤺ᤰᤋᤧᤀᤠᤱ ᤔᤧᤘᤕᤧ. ᤂᤧᤱᤜᤠ᤹ ᤋᤱᤒᤣ ᤌᤰᤔᤠ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤜᤠᤱᤅᤡᤴ ᤔᤠᤱᤛᤧᤘᤠ ᤔᤧᤳᤇᤧ ᤏᤢ ᤛᤠ᤺ᤱᤃᤠᤜᤡᤶ ᤋᤱᤏᤠᤶ ᤋᤥᤛᤧ ᤕᤖᤢᤛᤗᤧ᤺ᤶᤔᤥ ᤔᤧᤒᤣ᤺ᤰ॥ 17 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤜᤠᤱᤅᤡᤴ ᤕᤖᤢᤛᤗᤧ᤺ᤶᤔᤥ ᤔᤠᤱᤛᤧᤘᤠ ᤔᤧᤳᤇᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤜᤡᤶᤛᤕᤱᤜᤠ᤹ᤀᤥᤗᤠᤶ ᤔᤧᤶᤒᤣ᤺ᤰᤏᤧᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤐᤠᤱᤃᤧᤴᤍᤡᤱ ᤘᤜᤡᤳ ᤔᤧᤎᤠᤏᤧᤴ᤹॥ 18 ᤔᤡᤛᤪ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤂᤧᤵᤔᤥ ᤔᤧᤶᤒᤣ᤺ᤰᤏᤧᤴᤏᤧᤓᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤘᤜᤡᤳ ᤔᤧᤎᤠᤏᤧᤴ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤺ᤱᤃᤠᤜᤡᤶ ᤋᤱᤏᤠᤶ ᤔᤧᤴᤍᤥᤔᤏᤠᤒᤠᤜᤠ᤹ᤀᤥ ᤋᤠᤖᤢᤒᤠ ᤔᤠᤱᤍᤢᤰᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤅᤠᤱ ᤋᤠᤖᤢ᤹॥ 19 ᤔᤡᤛᤪ ᤗᤠᤈᤣ᤹ᤀᤥ ᤏᤢ ᤛᤠ᤺ᤱᤃᤠᤜᤡᤶ ᤋᤱᤏᤠᤶ ᤋᤥᤛᤧ ᤔᤧᤶᤒᤣ᤺ᤰᤔᤏᤠᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤀᤠᤱ ᤀᤠᤶᤓᤠ ᤂᤧᤴ ᤂᤢᤶᤍᤡᤱᤅᤡᤴ ᤌᤠᤖᤥ॥ 20 ᤂᤧᤴ ᤕᤧᤴᤏᤥ ᤀᤴᤜᤠ᤹ᤖᤧ ᤂᤢᤴᤇᤡ᤹ ᤐ᤺ᤱᤃᤣ᤹ᤜᤠ᤹ᤀᤥ “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤥ᤺ᤶᤔᤏᤠᤒᤠ” ᤗ᤹ᤖᤡᤰ ᤗᤰᤔᤏᤠᤒᤠ ᤐᤳᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤛᤠᤔᤠᤐᤢᤔᤠᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤍᤃᤡ ᤁᤧᤕᤢᤱᤒᤠ ᤛᤢᤳᤌᤥ ᤂᤥᤷᤕᤠᤜᤠ᤹ ᤜᤧᤰᤋᤱᤒᤠ ᤐᤥᤱ᤹॥ 21 ᤕᤖᤢᤛᤗᤧᤔ ᤏᤢ ᤕᤜᤢᤍᤠᤀᤥ ᤁᤧᤕᤢᤱᤒᤠ ᤁᤧᤖᤧᤰ ᤂᤵᤐᤩᤠᤜᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤣᤛᤣ ᤐᤥᤱ᤹. ᤜᤧᤰᤁᤩᤠᤱ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤍᤥᤶᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤍᤠᤀᤠᤱ ᤁᤢᤓᤠ ᤂᤵᤐᤩᤠᤜᤠ᤹ ᤔᤧᤕᤠᤱᤛᤡᤱ ᤜᤧᤰᤁᤩᤠᤱ ᤜᤠᤒᤠ ᤂᤧᤵᤔᤥᤀᤣ ᤛᤠ ᤔᤧᤎᤥ᤺ᤰᤋᤢ᤹॥ ᤂᤧᤒᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤗᤳᤌᤡᤰᤁᤠᤱ ᤁᤏᤠᤏᤡ ᤔᤧᤘᤠ᤹ᤏᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.