ᤈᤁᤖᤡᤕᤠ 13 - LIFOTNT

ᤗᤠᤕᤥᤗᤠᤶᤒᤠ ᤛᤣᤛᤣ ᤐᤥᤱᤔᤠ

¹ “ᤂᤧᤴ ᤕᤧᤴᤏᤥ ᤍᤠᤀᤢᤍᤖᤧ ᤁᤢᤜᤡᤶᤛᤕᤱ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤠᤛᤢᤳᤌᤥᤴ ᤛᤣᤛᤣᤛᤠᤱᤛᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤗᤳᤇᤠ ᤘᤠᤒᤢᤴᤍᤠᤰᤘᤠ ᤆᤫᤠ᤺ᤳ ᤐᤢᤴ ᤗ᤺ᤴ॥”

² ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹. “ᤂᤧᤴ ᤕᤧᤶᤔᤥ ᤀᤠᤱᤃᤠ᤹ ᤗᤠᤈᤣ᤹ᤗᤠᤶᤒᤠ ᤔᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤅᤣ ᤔᤠᤛᤢᤱ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤏᤡᤱᤘᤠ᤹ᤛᤢᤶᤔᤠᤱ ᤔᤧᤸᤗ᤹ᤏᤧᤴ᤹॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤀᤠᤛᤢᤳᤌᤥ ᤛᤠᤶᤜᤠ᤹ᤀᤠᤱ ᤗᤠᤈᤣ᤹ᤗᤠᤶ ᤀᤠᤱᤃᤠ᤹ ᤗ᤺ᤳᤋᤢᤱᤍᤣᤛᤢᤱᤛᤡᤱ᤹॥

³ ᤜᤧᤰᤁᤩᤠᤱ ᤀᤠᤖᤛᤠᤱ ᤁᤢᤓᤠᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤏᤧᤓᤃᤪ. ᤂᤢᤏᤧ᤹ ᤛᤠᤃᤧᤘᤠ᤺ᤶᤒᤠ ᤁᤢᤶᤔᤠ ᤁᤢᤶᤒᤠᤛᤡᤖᤧᤀᤣ ᤂᤧᤴ ᤀᤰᤂᤣ ᤔᤧᤔᤧᤳᤋᤢ᤹. ‘ᤂᤧᤏᤧ᤹ ᤛᤡᤔᤠᤀᤣ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤱᤅᤥ ᤀᤡᤱᤗᤧᤰ ᤁᤧᤒᤠ᤺ᤳᤋᤢᤀᤠᤱ ᤘᤠ᤹॥’ ᤂᤧᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤸᤗᤧ ᤂᤢᤏᤧ᤹ ᤛᤠᤃᤧᤘᤠ᤺ᤶᤒᤠ ᤁᤢᤶᤔᤠ ᤁᤢᤶᤒᤠᤛᤡᤖᤧ ᤂᤧᤴ ᤑᤩᤠᤰ ᤗᤛ᤻ᤛᤢᤖ ᤔᤧᤎᤢᤒᤢ᤹॥”

⁴ “ᤂᤧᤴ ᤕᤧᤴᤏᤥ ᤁᤧᤖᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤂᤢᤴᤇᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤛᤢᤑᤥᤗᤠᤶ ᤛᤡᤖᤡᤱᤔᤔᤥ ᤔᤧᤎᤠᤖᤥ. ᤜᤧᤰᤁᤩᤠᤱ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤵᤔᤠᤖᤧ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤸᤗᤧ ᤛᤠᤔᤢᤖᤡᤰᤗᤠᤶ ᤌᤠᤰᤔᤏᤠᤒᤠ ᤆᤠᤱ ᤔᤧᤈᤠᤰᤂᤢᤴ᤹॥

⁵ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ‘ᤀᤠᤱᤃᤠ᤹ᤃ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤣ᤺ᤴᤀᤠ. ᤁᤖ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤈᤠᤒᤠᤀᤠᤖᤰᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤌᤠᤱᤒᤧᤴ ᤘᤕᤠᤱᤅᤠᤱᤎᤥᤀᤣ ᤂᤠᤶᤒᤣ᤺ᤰᤁᤥᤗᤠᤶ ᤜᤡᤱᤛᤡᤱᤅᤠᤀᤠᤱ ᤘᤠ᤹ᤀᤠ॥’

⁶ ᤁᤢᤓᤠᤖᤧ ᤂᤧᤴ ‘ᤂᤧᤏᤧ᤹ ᤁᤧᤎᤰᤁᤥ ᤁᤴ ᤁᤠ᤺ᤴᤍᤧᤀᤠᤱ ᤁᤧᤒᤵᤐᤠᤜᤠ᤹ ᤌᤧᤔᤠᤒᤣ᥅’ ᤑᤠ᤹ᤀᤠᤱ ᤛᤣ᤺ᤴᤔᤧᤍᤥᤛᤢᤏᤧᤓᤃᤪ ᤂᤧᤸᤗᤧ ᤀᤰᤂᤣ ᤔᤧᤳᤋᤢᤛᤡ᤹. ‘ᤁᤴ ᤀᤠᤱᤃᤠ᤹ ᤀᤠᤴᤈᤢᤶ ᤀᤠᤴᤍᤣᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤁᤠ᤺ᤴᤍᤠᤱᤒᤠ ᤕᤠᤱᤄᤣ᤺ᤰᤗᤥ॥’”

ᤔᤧᤸᤗᤢᤰᤁᤶᤒᤠᤴ ᤜᤡᤵᤔᤠ

⁷ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤖᤥ. “ᤋᤠᤓᤣᤀᤣ᥄ ᤀᤠᤔᤧᤸᤗᤢᤰᤁᤶᤒᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤐᤥᤃᤧ᤹ᤀᤥ. ᤂᤢᤏᤧ᤹ᤃ ᤏᤡ᤺ᤳᤋᤠᤱᤒᤠ ᤀᤠᤴᤈᤢᤶ ᤀᤠᤴᤍᤣᤱᤒᤠᤖᤥ॥ ᤔᤧᤸᤗᤢᤁᤶᤒᤧᤴ ᤌᤧᤰᤋᤢᤰ ᤛᤠᤰᤂᤠ᤺ᤰ ᤜᤡᤵᤋᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ ᤑᤢᤳᤇᤡᤱᤈᤩᤠᤱ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤀᤠᤜᤢᤰᤁᤡᤸᤗᤧ ᤆᤢᤈᤢᤰᤛᤠᤜᤠ᤹ ᤛᤠ᤺ᤵᤛᤢᤱᤛᤡᤱᤗᤥ॥

⁸ ᤁᤧᤖᤧᤰ ᤗᤠᤈᤣ᤹ᤀᤥ ᤁᤢᤗᤰ ᤏᤧᤳᤇᤡ ᤔᤏᤠᤜᤠ᤹ ᤔᤧᤛᤧᤖᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤰᤐᤧᤳ ᤕᤢᤔᤪᤧᤰ ᤔᤧᤔᤧᤰᤗᤥ. ᤜᤧᤰᤁᤣᤛᤠᤱ ᤁᤢᤗᤰ ᤌᤡᤰ ᤔᤧᤍᤠᤱ ᤔᤧᤕᤠ᤺ᤰᤗᤥ॥

⁹ ᤂᤧᤸᤗᤧ ᤕᤠ᤺ᤴᤍᤡᤰ ᤁᤢᤗᤰ ᤌᤡᤰᤜᤠ᤹ ᤔᤡᤀᤥ ᤕᤠᤰᤋᤢᤱᤛᤡᤱᤗᤥ. ᤕᤢᤵᤐᤠ ᤛᤠᤱᤔᤏᤠᤒᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤕᤥ᤺ᤴᤍᤢᤱᤛᤡᤱᤗᤥ. ᤛᤠᤶᤔᤩᤠᤱ ᤕᤥ᤺ᤶᤔᤏᤠᤒᤠ ᤁᤢᤀᤡᤛᤡᤰ ᤛᤠ᤹ᤖᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤡᤱᤅᤥ ᤐᤣᤗᤡ ᤔᤧᤓᤠᤰᤁᤠᤖᤥ. ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤏᤢᤃᤵ ᤐᤡᤖᤢᤱᤛᤡᤱᤗᤥ॥ ‘ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠᤛᤡ’ ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖᤥ. ‘ᤕᤜᤘᤣ ᤍᤠᤱᤒᤧᤴ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤗᤥ॥’”