ᤈᤁᤖᤡᤕᤠ 12 - LIFOTNT

ᤕᤖᤢᤛᤗᤧᤔᤡᤸᤗᤧ ᤁᤢᤏᤡᤱᤔᤡᤜᤠ᤹ ᤔᤧᤱᤔᤠᤛᤡ

¹ ᤀᤡᤛᤪᤠᤀᤡᤗᤖᤧ ᤁᤢᤕᤠ᤺ᤶᤒᤣᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱ ᤜᤠᤒᤠ ᤁᤴᤗᤥ॥ ᤋᤠᤱᤛᤠᤰᤐᤠ ᤁᤧᤄᤡᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤒᤢᤱ ᤁᤧᤕᤢᤱᤒᤠ ᤏᤢ ᤔᤏᤠ᤺ᤸᤗᤧ ᤁᤢᤕᤠᤶᤛᤠᤶᤔᤡᤴ ᤂᤧᤴ ᤛᤡᤃᤠᤱ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹—

² “ᤀᤥᤔᤧᤳᤋᤧᤶᤔᤧ᤹. ᤁᤧᤖᤧᤰ ᤐᤡᤛᤠᤱ ᤁᤧᤕᤢᤱᤒᤠ ᤔᤏᤠᤜᤠ᤹ ᤜᤥ᤹ᤍᤥᤴ ᤜᤥ᤹ᤍᤥᤴ ᤗ᤹ᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤂᤥᤷᤕᤠ ᤜᤧᤰᤋᤱᤒᤠ ᤆᤥᤃᤢᤱ᤹॥ ᤕᤖᤢᤛᤗᤧ᤺ᤶᤔᤡᤴ ᤁᤡᤷᤃᤵ ᤁᤵᤔᤠᤖᤧ ᤗᤠᤃᤡ ᤕᤜᤢᤍᤠᤴ ᤏᤡᤱᤔᤡᤜᤠ᤹ᤏᤢ ᤛᤥᤖᤡᤰ ᤑᤢᤱᤛᤡᤱ॥

³ “ᤀᤠᤸᤗ ᤂᤧᤸᤗᤧ ᤕᤠ᤺ᤴᤍᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤂᤧᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤶᤔᤡᤸᤗᤧ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤗᤳᤇᤠ ᤔᤧᤶᤔᤢᤶᤔᤏᤠᤒᤠ ᤕᤠᤰᤐᤣ᤹ ᤆᤥᤃᤢᤱ ᤐᤡᤖᤢᤱᤛᤡᤱ᤹॥ ᤂᤧᤴ ᤔᤢᤶᤔᤠ ᤁᤧᤃᤥ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤃᤠ᤺ᤴᤗᤥ॥”

⁴ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤂᤢᤴᤇᤡ᤹ ᤀᤴᤜᤠ᤹ ᤔᤡᤰᤑ᤺ᤶᤒᤠ ᤆᤥᤃᤢᤱᤛᤡᤱ᤹ ᤜᤧᤰᤁᤩᤠᤱ ᤁᤧᤖᤧᤰ ᤀᤴᤜᤠ᤹ ᤛᤠ᤹ᤖᤡᤰ ᤔᤧᤃᤡᤔᤧᤛᤡᤖ ᤕᤠ᤺ᤴᤍᤢᤱᤛᤡᤱ᤹ ᤜᤧᤰᤁᤩᤠᤱ ᤀᤴᤃᤧᤕᤢᤰᤐᤠᤜᤠ᤹ ᤔᤧᤏᤠᤱᤗ ᤕᤠ᤺ᤴᤍᤢᤱᤛᤡᤱ᤹॥ ᤁᤖ ᤀᤠᤱᤃᤠ᤹ ᤕᤜᤢᤍᤠᤒᤠ ᤔᤏᤠᤜᤠ᤹ ᤀᤥᤔᤧᤳᤛᤡᤱ᤹॥

⁵ ᤂᤧᤒᤩᤠᤱ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤀᤥ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ ᤁᤧᤎᤢᤶᤒᤠ ᤔᤧᤈᤥᤰ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤗᤥ॥’”

⁶ ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ ᤕᤖᤡᤰ ᤛᤡᤱᤜᤠ᤹ᤀᤥᤒᤠ ᤔᤡᤄᤠᤱᤃᤪᤥ᤺ᤰ ᤕᤠᤱᤔᤠ ᤛᤠᤱᤋᤧᤖᤧ᤺ᤱ ᤁᤢᤀᤡᤛᤡᤰ ᤏᤢ ᤆᤠᤎ᤺ᤱᤔᤠᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤜᤢᤖᤢᤖᤢ ᤁᤧᤍᤡ᤺ᤵᤐᤠ ᤔᤡ ᤜᤧᤰᤋᤱᤒᤠ ᤆᤥᤃᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤁᤠᤰ ᤐᤡᤛᤠᤱᤒᤠ. ᤆᤢᤵᤛᤠᤱ ᤏᤢ ᤑᤧᤴᤇᤠᤱ ᤗᤧᤵᤔᤠᤱᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤛᤡ᤹. ᤁᤖ ᤕᤖᤢᤛᤗᤧ᤺ᤶᤔᤡᤴ ᤀᤠᤵᤑᤣᤰ ᤁᤢᤕᤢᤰᤏᤠᤀᤥ ᤜᤠᤒᤠ ᤕᤢᤱᤗᤥ॥

⁷ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤕᤜᤢᤍᤠᤒᤠ ᤕᤢᤱᤍᤧᤴᤜᤠ᤹ ᤋᤃᤡᤀᤣ ᤋᤠᤱᤛᤧ᤺ᤵᤋᤢᤱ᤹. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱᤅᤡᤴ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤔᤡᤍᤡᤱᤅᤡᤴ ᤕᤜᤢᤍᤠᤒᤠᤜᤠ᤹ᤖᤧᤴᤏᤢ᤺ᤸᤗᤧ ᤕᤖᤡᤰ ᤔᤧᤒᤥᤱᤏᤧᤴᤗ॥

⁸ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ ᤋᤠᤱᤛᤧ᤺ᤵᤋᤢᤛᤡ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤀᤥ ᤀᤠᤳᤋᤡᤴ ᤁᤧᤖᤧᤰᤏᤢ᤺ᤸᤗᤧ ᤔᤧᤴᤎᤢᤶᤔᤏᤠᤒᤠ ᤆᤥᤰ ᤂᤧᤴ ᤍᤠᤀᤢᤍᤧᤴ ᤜᤧᤰᤋᤱᤒᤠ ᤐᤥᤱ᤹. ᤜᤧᤰᤁᤩᤠᤱ ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤋᤱᤒᤠ ᤔᤧᤒᤥᤱ᤹. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤋᤃᤠᤱ ᤁᤧᤒᤣ᤺ᤰᤐᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤠᤱᤗᤠᤀᤡᤱᤒᤠ ᤁᤢᤀᤡᤛᤡᤰ ᤔᤧᤒᤥᤱᤗᤥ॥

ᤔᤧᤎᤢᤒᤢᤒᤠᤸᤗᤧ ᤁᤢᤗᤠᤃᤡ ᤔᤧᤖᤡᤱ

⁹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤂᤧᤴ ᤕᤧᤴᤏᤥ ᤕᤖᤢᤛᤗᤧ᤺ᤶᤔᤡᤴ ᤑᤵᤔᤠᤖᤧ ᤗᤠᤃᤡ ᤁᤧᤍᤠᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤍ᤹ ᤔᤧᤱᤔᤠᤛᤡ ᤗᤠᤶ ᤆᤥᤃᤢᤱ᤹॥

¹⁰ ᤜᤧᤰᤁᤩᤠᤱ ᤀᤠᤱᤃᤠ᤹ ᤍᤠᤀᤢᤍᤖᤧ ᤁᤢᤜᤡᤶᤛᤕᤱ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠᤜᤠ᤹ᤀᤥ ᤗᤢᤱᤃᤢᤶ ᤜᤧᤰᤁᤩᤠᤱ ᤐᤣᤗᤡᤃᤧᤴ ᤋᤢᤘᤠ ᤁᤧᤈᤥ᤺ᤰᤐᤠ ᤕᤠᤶᤛᤠᤶᤔᤡᤴ ᤐᤠᤱᤄᤢᤱ ᤕᤢᤛᤢᤱ᤹॥ ᤂᤧᤱᤜᤠ᤹ᤖᤧ ᤔᤧᤎᤢᤒᤢᤒᤠᤴ ᤀᤥᤔᤧᤔᤧᤳᤋᤢ. ᤜᤧᤰᤁᤩᤠᤱ ᤗᤳᤌᤡᤰᤐᤠ ᤛᤠ᤺ᤸᤗᤧ ᤁᤢᤗᤠᤃᤡ ᤁᤢᤓᤠ ᤔᤧᤖᤡᤱ ᤌᤰᤐᤠ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤗᤠᤃᤡ ᤂᤧᤱᤜᤠ᤹ ᤔᤧᤖᤡᤱ ᤔᤧᤎᤰ. ᤋᤢᤶᤒᤠ ᤛᤠ᤺ᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤔᤧᤎᤰᤐᤠ ᤁᤢᤀᤡᤛᤡᤰ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤗᤥ॥

¹¹ ᤔᤃᤡᤍ᤻ᤍᤥᤒᤠ ᤏᤧᤏᤧᤒᤠᤍᤧᤴᤏᤥ ᤜᤍᤍ-ᤖᤡᤶᤔᤥᤏᤒᤠ ᤜᤧᤰᤁᤣ ᤕᤶᤒᤠ ᤜᤠ᤺ᤵᤔᤠ ᤆᤡ᤺ᤱᤔᤠ ᤐᤥ᤺ᤰᤂᤧᤀᤠᤱ ᤘᤕᤧ. ᤂᤧᤸᤗᤧ ᤕᤠ᤺ᤴᤍᤡᤰ ᤕᤖᤢᤛᤗᤧ᤺ᤶᤔᤥ ᤜᤠᤒᤠ ᤂᤠᤶᤍᤠᤱᤒᤠᤀᤣ ᤕᤶᤒᤠ ᤔᤧᤖᤡᤱ ᤌᤰᤔᤠ ᤐᤥᤱ᤹॥”

¹² “ᤗᤠᤈᤣ᤹ ᤁᤧᤖᤧᤰ ᤜᤡᤶᤛᤕᤱ ᤌᤰᤔᤠ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤀᤠᤱ ᤘᤣ᤹ ᤘᤣ᤹ ᤔᤧᤖᤡᤱ ᤔᤧᤎᤰ. ᤍᤠᤀᤢᤍᤖᤧ ᤁᤢᤜᤡᤶᤛᤕᤱᤒᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹. ᤏᤠᤋᤠᤏᤖᤧ ᤁᤢᤜᤡᤶᤛᤕᤱᤒᤠᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹.

¹³ ᤗᤧᤒᤡᤖᤧ ᤁᤢᤜᤡᤶᤛᤕᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹. ᤛᤡᤔᤡᤖᤧ ᤁᤢᤎᤠ᤺ᤰᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹.

¹⁴ ᤜᤧᤰᤁᤩᤠᤱ ᤁᤧᤍᤠᤱᤒᤠ ᤘᤣ᤹ ᤁᤧᤖᤧᤰ ᤌᤠ᤺ᤰᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ ᤔᤧᤖᤡᤱ ᤔᤧᤎᤰᤗᤥ॥”