ᤈᤁᤖᤡᤕᤠ 11 - LIFOTNT

¹ ᤗᤧᤒᤏᤠᤏᤀᤣ. ᤂᤧᤏᤧ᤹ ᤁᤧᤗᤠᤶᤎᤣ᤺ᤵᤐᤠᤜᤠ᤹ ᤜᤴᤍᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤔᤡ᤺ᤸᤗᤧ ᤁᤧᤛᤠᤶᤔᤠᤱᤛᤡᤱᤜᤠ᤹ ᤌᤩ᤺ᤱ ᤆᤥᤃᤢᤖᤖᤥ᥄

² ᤀᤠᤱ ᤛᤡᤱᤒᤢᤱᤛᤣ. ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤶᤔᤠᤱᤛᤡᤱᤅᤡᤴ ᤆᤥ᤺ᤴᤍᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤁᤣ᤺ᤶᤒᤠ ᤏᤢ ᤏᤢᤒᤠ ᤛᤡᤱᤒᤢᤱᤜᤠ᤹ ᤔᤧᤃᤧᤀᤠᤱ ᤕᤢᤱᤗᤥ॥ ᤒᤠᤛᤠᤏᤒᤠ ᤕᤜᤡᤒᤠ ᤛᤡᤱᤒᤢᤱᤛᤣ. ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤋᤢᤶᤓᤢᤱᤗᤠ ᤋᤠᤶᤓᤢᤱᤜᤠ᤹ ᤔᤧᤗᤧ᤺ᤰᤂᤢᤀᤠᤱ ᤏᤧᤖᤥ॥

³ ᤔᤧᤸᤗᤢᤰᤁᤶᤒᤠᤜᤠ᤹ ᤔᤧᤖᤡᤱ ᤔᤧᤎᤰᤐᤠᤴ ᤂᤧᤵᤛᤧᤶᤔᤧ᤹ᤀᤥ. ᤂᤢᤴᤇᤡ᤹ ᤐᤏᤢᤏᤢᤒᤠ ᤌᤰᤛᤠ ᤆᤠᤖᤠᤶᤔᤠᤍᤧᤴᤏᤡᤴ ᤔᤧᤔᤧᤰᤂᤢᤀᤠᤱ ᤏᤧᤖᤥ᥄ ᤂᤡᤖᤡᤱᤒᤠᤜᤠ᤹ ᤔᤧᤜᤢ᤺ᤰᤐᤧᤴ ᤂᤡᤏᤡ᤹ ᤂᤧᤵᤛᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤕᤷᤍᤏᤒᤠ ᤛᤖᤣ᤺ᤰᤕᤠ᤺ᤵᤐᤠ ᤋᤠᤶᤓᤢᤱᤅᤡᤴ ᤌᤩ᤺ᤱ ᤐᤥ᤺ᤰᤂᤧᤀᤠᤱ ᤏᤧᤖᤥ᥄

ᤏᤧᤵᤑᤢ ᤔᤧᤸᤗᤢᤰᤁᤶᤒᤠᤜᤠ᤹

⁴ ᤕᤜᤘᤣ ᤍᤠᤱᤒᤠ ᤀᤠᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “‘ᤆᤧᤵᤔᤠ ᤛᤧᤵᤔᤠᤛᤡ ᤁᤧᤒᤥᤱᤒᤠ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤆᤠᤖᤠᤶᤛᤧᤛᤧ᤹॥’

⁵ ᤂᤧᤱᤜᤠ᤹ ᤁᤧᤀᤡᤱᤒᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤈᤧᤵᤋᤢ ᤔᤧᤛᤩᤧᤖᤢᤛᤡ᤹. ᤂᤶᤓᤩᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤔᤧᤱᤄᤥᤀᤣ ᤔᤧᤒᤣ᤺ᤰ॥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠᤳᤋᤢ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤏᤠᤖᤠ ᤐᤥᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤕᤠᤱᤛᤠᤁᤢᤴᤎᤣᤛᤠᤒᤠ ᤐᤥ᤺ᤰᤂᤡᤃᤧ᥄’ ᤁᤧᤀᤡᤱᤒᤠᤜᤠ᤹ᤖᤧ ᤔᤧᤛᤠᤅᤢᤛᤡᤒᤠ ᤔᤧᤸᤗᤢᤰᤁᤶᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤔᤧᤴᤍᤠᤱᤄᤢᤛᤡᤴ᤹॥

⁶ ᤌᤣᤀᤠᤱᤓᤧᤸᤗᤧ ᤀᤠᤸᤗᤀᤠᤱᤎᤥ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤏᤧᤴ॥ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤁᤧᤖᤧᤰ ᤂᤢᤴᤇᤡ᤹ ᤀᤠᤵᤑᤣᤰ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤏᤢ ᤂᤢᤴᤇᤡ᤹ ᤀᤠᤵᤑᤣᤰ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤌᤠᤛᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤗᤠᤈᤣᤴ ᤔᤧᤕᤢᤰᤋᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤛᤧ᤺ᤵᤋᤢᤱᤛᤡᤱᤅᤡᤴ᤹॥”

⁷ ᤁᤸᤗᤧᤆᤥᤃᤢᤸᤗᤧ ᤆᤧᤵᤔᤠ ᤛᤧᤵᤔᤠᤛᤡᤖᤧ ᤗᤠᤃᤡ ᤔᤧᤃᤳᤋᤢᤛᤡᤒᤠ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹. ᤛᤧᤰᤂᤠ᤺ᤸᤗᤧ ᤌᤰᤛᤠ ᤗᤢᤵᤐᤥ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠ ᤔᤧᤕᤢᤰᤋᤢᤛᤡᤒᤠᤜᤠ᤹ ᤀᤠᤱᤃᤠ᤹ ᤆᤠᤖᤠᤶᤛᤢᤱᤛᤡᤱ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤋᤰᤁᤠᤳ ᤏᤧᤳᤇᤡ ᤕᤠᤱᤛᤡᤱᤅᤠ—ᤗᤳᤇᤠᤖᤧ ᤁᤢᤔᤡᤱ “ᤗᤢᤱᤃᤢᤶ” ᤏᤢ ᤘᤣ᤹ᤀᤡᤸᤗᤧ ᤁᤢᤔᤡᤱ “ᤌᤡᤰᤜᤢᤵ” ᤘᤠ᤺ᤳᤋᤢᤱ—ᤜᤧᤰᤁᤩᤠᤱ ᤔᤧᤸᤗᤢᤰ ᤗᤢᤵᤜᤠ᤹ ᤆᤠᤖᤠᤶᤛᤢᤱᤛᤡᤱ॥

⁸ ᤀᤠᤱᤃᤠ᤹ ᤗᤳᤇᤠ ᤗᤠᤀᤥᤛᤠ ᤛᤢᤶᤛᤡ ᤔᤧᤸᤗᤢᤰᤁᤶᤒᤠᤜᤠ᤹ ᤗ᤺ᤳᤋᤢᤱᤍᤣᤛᤢᤱᤛᤡᤱ॥ ᤂᤧᤴ ᤌᤰᤛᤠ ᤗᤢᤵᤜᤠ᤹ᤖᤧ ᤀᤠᤱᤃᤠ᤹ ᤔᤧᤈᤡ᤺ᤳᤋᤠᤱ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤏᤡᤱ ᤛᤳᤋᤪᤧ᤹ ᤔᤧᤗᤧ᤹ᤖᤢ॥

⁹ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱ. “ᤀᤠᤱᤃᤠ᤹ ᤂᤡᤏᤡ᤹ ᤔᤧᤸᤗᤢᤰᤁᤶᤒᤠ ᤔᤧᤒᤥᤱᤅᤠᤴ॥ ᤁᤧᤛᤡᤒᤠᤜᤠ᤹ ᤔᤧᤛᤡᤀᤣ ᤔᤧᤏᤠ᤹. ᤁᤧᤔᤧᤰᤐᤠᤜᤠ᤹ ᤔᤧᤔᤧᤰᤁᤣ ᤔᤧᤏᤠ᤹. ᤜᤧᤰᤁᤩᤠᤱ ᤁᤧᤜᤡᤱᤒᤠᤜᤠ᤹ᤖᤧ ᤌᤡᤰᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤛᤠᤴ ᤔᤧᤈᤖᤖᤥ॥”

¹⁰ ᤂᤧᤒᤩᤠᤱ ᤀᤠᤱᤃᤠ᤹ “ᤀᤠᤗᤢᤱᤃᤢᤶ” ᤔᤧᤵᤔᤏᤠᤒᤠ ᤋᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤔᤧᤱᤃᤧᤵᤔᤏᤠ ᤆᤥᤃᤢᤱᤅᤠᤱ ᤂᤧᤴ ᤀᤧᤰᤂᤢᤱ॥

¹¹ ᤂᤧᤴ ᤔᤠᤱᤜᤢᤵᤐᤡᤴ ᤀᤠᤶᤓᤠ ᤂᤧᤸᤗᤧ ᤕᤠ᤺ᤴᤍᤡᤰ ᤔᤧᤱᤃᤧᤵᤔᤏᤠᤒᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤀᤠᤱᤃᤠ᤹ ᤀᤥᤔᤧᤔᤧᤳᤋᤠᤱᤗ ᤔᤧᤒᤳᤇᤠᤱᤒᤠ ᤁᤧᤀᤡᤱᤒᤠᤜᤠ᤹ᤖᤧ ᤂᤧᤱᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰ ᤏᤣᤖᤳᤇ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ॥

¹² ᤂᤧᤒᤩᤠᤱ ᤀᤠᤱᤃᤠ᤹ ᤁᤧᤀᤡᤱᤒᤠᤜᤠ᤹ ᤔᤧᤳᤋᤢᤱᤛᤡᤱ. “ᤂᤡᤏᤡ᤹ ᤏᤢᤒᤠ ᤐᤥ᤺ᤰᤂᤧᤒᤠ ᤁᤧᤏᤡᤛᤢᤶᤏᤧᤓᤃᤪ ᤀᤠᤱᤃᤠ᤹ ᤀᤠᤏᤠᤶᤕᤠᤰᤁᤡᤴ ᤀᤠᤒᤡᤖᤧᤶᤔᤧ᤹॥ ᤔᤣ᤺ᤴᤏᤧᤓᤃᤪ ᤂᤡᤏᤡ᤹ᤀᤣ ᤁᤳᤋᤧᤶᤔᤧ᤹॥” ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤛᤢᤶᤒᤥᤱ ᤕᤢᤵᤐᤠ ᤕᤠᤱᤀᤡᤳᤇᤣ᤹ ᤔᤧᤒᤡᤖᤠᤱ॥

¹³ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤂᤧᤏᤧ᤹ ᤕᤠᤱᤅᤡᤴ ᤁᤥᤶᤓᤠᤗᤩᤠᤴ ᤗᤠᤵᤑᤢᤛᤧ ᤐᤡᤖᤧ᤹”—ᤁᤴ ᤀᤡᤔᤧᤸᤗᤢᤱᤒᤠ ᤁᤢᤔᤧᤴᤏᤡᤴ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤗᤠᤃᤡ ᤔᤧᤕᤠᤰᤋᤢᤖᤥ॥ ᤂᤶᤓᤩᤠᤱ ᤀᤠᤱᤃᤠ᤹ ᤂᤧᤴ ᤛᤢᤶᤒᤥᤱ ᤕᤢᤵᤐᤠ᤺ᤸᤗᤧ ᤁᤢᤀᤠ᤺ᤳᤜᤠ᤹ ᤋᤣ᤹ᤖᤢᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤕᤠᤱᤕᤢᤱᤔᤠᤍᤧᤴᤏᤥ ᤁᤥ᤺ᤶᤓᤠᤗᤩᤠ᤺ᤸᤗᤧ ᤁᤢᤗᤠᤃᤡ ᤗᤠᤵᤋᤣᤛᤢᤱ॥

¹⁴ ᤂᤧᤒᤩᤠᤱ ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗ ᤗᤢᤶᤔᤥᤒᤠ ᤑᤢ᤹ᤏᤢᤛᤠ᤹ ᤁᤠ᤹ᤀᤡ᤺ᤴ ᤏᤢᤵᤗ ᤕᤠ᤺ᤶᤔᤠᤖᤧ ᤗᤠᤃᤡ ᤀᤠᤱᤃᤠ᤹ “ᤌᤡᤰᤜᤢᤵ” ᤔᤧᤵᤔᤏᤠᤒᤠ ᤘᤣ᤹ ᤋᤰᤁᤠ᤺ᤳᤋᤡᤴ ᤀᤧᤰᤂᤢᤱ॥

¹⁵ ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤧᤸᤗᤢᤰᤁᤶᤒᤧᤸᤗᤧ ᤁᤢᤓᤧᤈᤢᤶ ᤁᤢᤓᤧᤕᤠᤴ ᤂᤧᤏᤧ᤹ ᤕᤠᤶᤔᤥ ᤕᤠᤱᤛᤡᤱᤅᤧ᤹॥

¹⁶ ᤌᤣᤀᤠᤱᤓᤧᤸᤗᤧ ᤛᤧᤰᤂᤠᤛᤠᤱ ᤀᤠᤱᤃᤠ᤹ ᤁᤴ ᤗᤠᤈᤣ᤹ᤀᤥ ᤗᤳᤇᤠ ᤀᤰᤋᤱᤒᤠ ᤔᤧᤸᤗᤢᤰᤁᤶᤒᤠᤎᤡᤰ ᤑᤥ᤺ᤰᤂᤢᤱ᤹. ᤂᤧᤸᤗᤧ ᤁᤧᤔᤠᤒᤠᤜᤠ᤹ ᤁᤶᤒᤪᤠᤱ ᤔᤧᤔᤧᤳᤋᤢᤛᤡᤴ᤹. ᤑᤢᤳᤇᤡᤱᤈᤩᤠᤱ ᤁᤧᤛᤧᤒᤠᤜᤠ᤹ᤀᤠᤱ ᤔᤧᤓᤢᤰᤂᤢᤛᤡᤴ᤹. ᤁᤧᤃᤠ᤺ᤶᤒᤠᤜᤠ᤹ᤀᤠᤱ ᤔᤧᤘᤣ᤺ᤴᤍᤢᤛᤡᤴ᤹. ᤔᤧᤴᤍᤢᤰᤔᤏᤠᤒᤠ ᤁᤢᤕᤠᤶ ᤆᤠᤱᤈᤠᤱᤒᤠᤜᤠ᤹ᤀᤠᤱ ᤆᤠᤔᤧᤖᤠᤶᤛᤢᤛᤡᤴ᤹. ᤁᤖ ᤂᤧᤸᤗᤧ ᤘᤖᤢᤵᤗᤢᤵᤐᤠ ᤔᤧᤸᤗᤢᤰᤁᤡᤸᤗᤧ ᤁᤢᤗᤠᤱ ᤋᤥ᤹ᤓᤣ᤺ᤳᤋᤧᤴ ᤌᤧ᤺ᤰᤂᤢᤀᤠᤱ ᤂᤢᤴᤇᤡ᤹ ᤋᤃᤡ ᤛᤠᤴ ᤆᤖᤥ॥

¹⁷ “ᤔᤧᤸᤗᤢᤰ ᤗᤢᤵᤜᤠ᤹ ᤁᤧᤗᤧᤵᤐᤠᤀᤠᤱ ᤁᤧᤒᤣ᤺ᤰᤐᤠ ᤁᤧᤄᤧᤵᤐᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤔᤧᤸᤗᤢᤰᤁᤶᤒᤠᤴ ᤆᤡ᤺ᤳᤋᤧᤛᤩᤧᤖᤥ᥄ ᤂᤧᤸᤗᤧ ᤁᤢᤜᤢᤰᤁᤡᤴ ᤏᤢ ᤁᤢᤈᤢᤵᤛᤠᤱ ᤔᤡᤰᤁᤡᤴ ᤋᤠᤓᤣ᤺ᤸᤗᤧ ᤆᤩᤧᤵᤋᤢᤖᤖᤥ᥄ ᤂᤧᤸᤗᤧ ᤁᤢᤜᤢᤰᤁᤡᤴ ᤁᤧᤖᤧᤰ ᤛᤷᤃᤧᤱ ᤜᤣᤒᤣ᤺ᤰᤗᤖᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤢᤵᤛᤠᤱ ᤔᤡᤰᤁᤡᤴ ᤂᤠᤔᤧᤴᤏᤡᤔᤏᤠᤒᤠ ᤐᤥᤱᤗᤖᤥ॥”