ᤈᤁᤖᤡᤕᤠ 10 - LIFOTNT

ᤛᤧᤴᤗᤵ ᤂᤥᤔᤠ ᤔᤠᤱᤜᤢᤵ

¹ ᤘᤜᤡᤳ ᤌᤠᤔᤠ ᤏᤠ᤹ᤒᤠ ᤕᤧᤶᤔᤥ ᤕᤜᤘᤣ ᤍᤠᤱᤒᤧᤴ ᤘᤜᤡᤳ ᤏᤠ᤺ᤰᤋᤧᤶᤔᤧ᤹ᤀᤥ. ᤕᤜᤘᤣ ᤍᤠᤱᤒᤧᤸᤗᤧᤀᤣ ᤂᤠ᤹ᤔᤡ᤺ᤳᤜᤠ᤹ ᤁᤧᤒᤵᤐᤠ ᤛᤢᤖᤡᤳ ᤁᤣᤈᤱ ᤆᤥᤃᤢᤖᤥ॥ ᤂᤢᤏᤧ᤹ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤘᤃᤣ᤺ᤱᤔᤠ ᤘᤜᤡᤳ ᤌᤠᤛᤢᤖᤥ. ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤠᤃᤡ ᤀᤡᤰᤋᤠᤵᤐᤥ ᤁᤢᤗᤡ᤺ᤶᤒᤠ ᤐᤡᤖᤢᤛᤡᤖᤥ॥

² ᤏᤠᤘᤠᤀᤡᤳᤗᤠᤜᤠ᤹ᤖᤧ ᤀᤡᤱᤗᤧᤰᤐᤠ ᤐᤠᤴ ᤔᤧᤒᤠ᤺ᤳᤋᤢᤖᤥ. ᤜᤧᤰᤁᤩᤠᤱ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤀᤡᤱᤗᤧᤰᤐᤠ ᤛᤢᤑᤥᤜᤠ᤹ ᤔᤧᤏᤡᤛᤢᤖᤥ. ᤂᤶᤓᤩᤠᤱ ᤔᤧᤴᤘᤠ᤹ᤔᤏᤠᤒᤠ ᤛᤧᤵᤔᤠᤱᤜᤠ᤹ ᤔᤧᤒᤠ᤺ᤳᤋᤢᤖᤥ. ᤂᤧᤱᤜᤠ᤹ᤖᤧ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤀᤠ᤺ᤴᤇᤡᤱᤔᤠ ᤔᤧᤒᤡᤖᤢᤛᤡᤖᤥ॥ ᤁᤸᤗᤧᤆᤥᤃᤢᤸᤗᤧ ᤔᤧᤸᤗᤢᤰᤁᤶᤒᤠᤜᤠ᤹ ᤔᤧᤛᤢ᤺ᤶᤒᤠᤸᤗᤧ ᤆᤥᤃᤢᤸᤗᤧ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡᤒᤠ ᤔᤧᤸᤗᤢᤰᤜᤠ᤹ ᤁᤢᤀᤡᤛᤡᤰ ᤔᤏᤠᤜᤠ᤹ ᤋᤠᤵᤔᤧᤒᤧ᤹ᤖᤥ॥

³ “ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤔᤧᤸᤗᤢᤰᤁᤶᤒᤠᤜᤠ᤹ ᤛᤶᤎᤠᤱ ᤌᤠᤖᤥ. ᤀᤠᤱᤃᤠ᤹ ᤗᤠᤶᤗᤥᤒᤠᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤑᤣᤰ ᤁᤢᤔᤧᤸᤗᤢᤰᤗᤢᤵ. ᤕᤜᤢᤍᤠᤒᤠ ᤜᤡᤶᤛᤕᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤌᤱᤅᤥ ᤁᤧᤜᤧᤴᤇᤡᤱᤒᤠ ᤀᤴ ᤜᤧᤰᤋᤱᤒᤠ ᤆᤥᤃᤢᤛᤡᤖᤥ॥

⁴ ᤕᤜᤢᤍᤠᤗᤠᤶ ᤗᤠᤶᤗᤥᤒᤠᤜᤠ᤹ ᤁᤢᤶᤔᤠᤗᤢᤱ. ᤛᤠ᤺ᤱᤃᤠᤜᤡᤶ ᤗᤰᤆᤢ ᤜᤧᤰᤁᤩᤠᤱ ᤌᤱᤅᤥᤒᤠ ᤗᤡ ᤜᤧᤰᤁᤣ ᤁᤧᤖᤧᤰ ᤔᤧᤗ᤺ᤴᤗᤥ॥

⁵ ᤂᤧᤱᤜᤠ᤹ᤏᤢ ᤛᤥᤖᤡᤰ ᤌᤱᤅᤥ ᤂᤢᤴᤇᤡ᤹ ᤏᤡᤱᤔᤡᤜᤠ᤹ ᤔᤠᤖᤠᤶᤔᤥᤒᤠ ᤗᤧᤰᤘᤠᤀᤥ ᤆᤡᤍᤥ᤹ ᤆᤡᤍᤥ᤹ ᤁᤧᤍᤥ᤹ᤒᤠ ᤔᤢᤰᤛᤠᤶᤛᤠᤒᤠ ᤔᤏᤠᤜᤠ᤹ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤘᤠ᤹ᤖᤥ ᤂᤧᤱᤜᤠ᤹ ᤌᤱ ᤔᤧᤈᤥ᤺ᤰᤁᤠᤱ ᤀᤴᤃᤧᤕᤢᤰᤐᤠᤜᤠ᤹ ᤏᤠᤎᤠᤔᤥ ᤔᤧᤎᤠᤛᤢᤛᤡᤖᤥ॥

⁶ “ᤀᤠᤱᤃᤠ᤹ ᤕᤜᤢᤍᤠᤒᤠ ᤜᤡᤶᤛᤕᤱᤜᤠ᤹ ᤁᤧᤎᤢᤶᤒᤠ ᤆᤥᤃᤢᤱᤛᤡᤱᤗᤥ. ᤜᤧᤰᤁᤩᤠᤱ ᤕᤥᤛᤣᤑᤖᤧ ᤁᤢᤜᤡᤶᤛᤕᤱᤜᤠ᤹ ᤋᤠᤱᤛᤧ᤺ᤵᤋᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤕᤠᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤏᤠ᤹ᤖᤢᤱᤛᤡᤱᤅᤡᤴᤒᤠ ᤜᤧᤰᤋᤱᤒᤠ ᤔᤧᤒᤥᤱᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤃᤧᤴ ᤋᤢᤘᤠᤴ ᤂᤧᤵᤛᤢᤱᤗᤥ॥

⁷ ᤀᤣᤑᤪᤠᤀᤡᤔᤒᤠ ᤔᤏᤠᤜᤠ᤹ᤃ ᤔᤢᤰᤛᤠᤶᤛᤠᤒᤠ ᤔᤧᤒᤥᤱᤗᤥ. ᤜᤧᤰᤁᤩᤠᤱ ᤆᤧᤸᤗᤧᤰᤛᤣ᤹ ᤌᤡ ᤁᤧᤎᤢᤱᤒᤠᤀᤠᤱ ᤁᤧᤛ᤺ᤵᤐᤠ ᤜᤧᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤐᤍᤠᤍᤠᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ᤖᤧ ᤂᤧᤴ ᤔᤧᤏᤡᤛᤢᤀᤠᤱ ᤔᤧᤛ᤺ᤳᤗᤥ. ᤕᤜᤘᤣ ᤍᤠᤱᤒᤠᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤐᤛ᤺ᤳᤛ᤺ᤳᤗᤥ॥

⁸ “ᤂᤧᤱᤜᤠ᤹ ᤀᤠᤱᤃᤠ᤹ ᤀᤢ᤺ᤳᤋᤢᤱᤛᤡᤱᤅᤠᤱ ᤛᤢᤵᤛᤢᤱᤛᤡᤱᤗᤥ. ᤌᤣᤀᤠᤱᤓᤧᤸᤗᤧ ᤛᤧᤰᤂᤠᤀᤣ ᤔᤧᤸᤗᤢᤱ ᤜᤢᤅᤢᤱᤅᤠᤱ ᤂᤧᤱᤜᤠ᤹ ᤌᤧ᤹ᤖᤢᤱᤛᤡᤱᤅᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤋᤃᤡ ᤁᤢᤀᤡᤛᤡᤰ ᤏᤡ᤺ᤳᤔᤧᤴᤍᤧᤳᤋᤣ ᤕᤖᤡᤰ ᤔᤧᤒᤥᤱᤗᤥ॥

⁹ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤴᤇᤠᤶ ᤛᤢᤘᤠᤱᤗᤢᤶᤔᤥ ᤑᤢᤳᤇᤠ᤺ᤱ ᤛᤧᤛᤢᤱᤛᤡᤱᤗᤥ ᤜᤧᤰᤁᤣᤛᤠᤱ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤀᤡ᤺ᤳᤋᤠᤖᤥ॥ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤜᤡᤱᤗᤥ ᤜᤧᤰᤁᤩᤠᤱ ᤂᤧᤱᤜᤠ᤹ ᤛᤥᤖᤡᤰ ᤀᤡᤛᤪᤠᤀᤡᤗᤀᤥ ᤔᤧᤏᤢ᤺ᤱ ᤔᤧᤍᤠᤖᤥ॥

¹⁰ ᤀᤠᤱᤃᤠ᤹ ᤂᤧᤱᤜᤠ᤹ ᤔᤡᤛᤪ ᤗᤠᤈᤣ᤹ᤗᤠᤶ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤀᤛ᤻ᤛᤢᤖ ᤗᤠᤈᤣ᤹ᤗᤠᤶ ᤂᤧᤱᤜᤠ᤹ ᤛᤢᤵᤛᤢᤱᤛᤡᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤃᤡᤗᤠᤍ ᤏᤢ ᤗᤣᤒᤏᤠᤏ ᤗᤠᤈᤣ᤹ᤜᤠ᤹ᤀᤥ ᤋᤠᤖᤢᤱᤛᤡᤱᤗᤥ ᤂᤧᤒᤩᤠᤱ ᤂᤧᤵᤔᤥ ᤁᤠᤰ ᤗᤠᤈᤣᤴ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤖᤥ॥

¹¹ ᤂᤧᤱᤜᤠ᤹ᤖᤧ ᤐᤕᤶ ᤕᤶᤒᤠ ᤋᤢᤰᤂᤣᤘᤠ ᤘᤖ᤺ᤱᤅᤡᤴ ᤔᤧᤗᤛ᤻ᤛᤢᤖᤥ. ᤂᤧᤱᤜᤠ᤹ᤖᤧ ᤘᤠᤓᤧᤸᤗᤧᤱᤜᤠ᤹ ᤆᤡᤈᤡ ᤕᤧᤶᤕᤧᤶ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤏᤡᤗ ᤘᤜ᤺ᤱᤅᤥᤒᤠ ᤁᤣ᤺ᤶᤒᤠ ᤁᤢᤍᤡᤶᤒᤣᤜᤠ᤹ ᤆᤵᤋᤢᤗᤠ᤺ᤳᤗᤥ॥ ᤀᤛ᤻ᤛᤢᤖᤖᤧ ᤕᤶᤒᤠ ᤁᤢᤜᤧᤴᤇᤡᤱᤔᤠ ᤁᤢᤀᤠᤱᤍᤡᤱᤅᤡᤴ ᤕᤥ ᤔᤰᤌᤠᤖᤥ ᤜᤧᤰᤁᤩᤠᤱ ᤔᤡᤛᤪᤖᤧ ᤁᤢᤜᤠᤱ ᤋᤰᤁᤠ᤺ᤳᤋᤡᤴ ᤔᤠᤒᤣ᤺ᤰᤗᤥ॥

¹² ᤀᤠᤱᤃᤠ᤹ ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤁᤧᤎᤢᤶᤒᤠ ᤆᤥᤃᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ᤀᤣ ᤁᤢᤔᤡᤱᤅᤥ ᤗᤠᤱᤔᤧᤄᤣᤰ ᤔᤧᤘᤠ᤹ᤖᤥ.” ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ॥