ᤋᤡᤋᤛ 3 - LIFOTNT

ᤏᤢᤒ᤻ ᤏᤢᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ

¹ ᤜᤠᤱᤃᤧᤈᤥ᤺ᤰᤐᤠᤜᤠ᤹ ᤏᤢ ᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤏᤡ᤹ ᤕᤢᤰᤁᤥ ᤘᤠ᤹ᤔᤠ ᤐᤥᤱ. ᤀᤡᤱᤈᤠᤱᤃᤧᤶᤒᤠ ᤐᤥᤱᤔᤠ ᤐᤥᤱ ᤜᤧᤰᤁᤩᤠᤱ ᤀᤠᤵᤑᤠᤸᤗᤧᤛᤠᤱ ᤁᤠᤰ ᤐᤖᤡᤰᤗᤧᤴ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤕᤠᤖᤡᤵ ᤐᤥᤱᤔᤠ ᤐᤥᤱ ᤑᤠ᤹ᤀᤠᤱ ᤏᤛᤠᤏᤡᤒᤠᤜᤠ᤹ ᤕᤠᤶᤔᤥ ᤔᤧᤳᤋᤧᤛᤧ᤹ᤀᤥ॥

² ᤜᤧᤰᤁᤩᤠᤱ ᤘᤣ᤹ ᤀᤠᤳᤋᤡᤴ ᤔᤏᤠᤜᤠ᤹ᤖᤧᤀᤠᤱ ᤆᤧ᤹ᤕᤠ ᤐᤱᤔᤠ ᤔᤧᤏᤢ᤹ᤏᤧᤴ. ᤂᤣᤔᤠ ᤌᤰᤔᤠ ᤔᤧᤏᤢ᤹ᤏᤧᤴ. ᤁᤖ ᤘᤣ᤹ᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤐᤥᤱ ᤜᤧᤰᤁᤩᤠᤱ ᤁᤠᤰ ᤔᤏᤠᤜᤠ᤹ᤏᤢ ᤏ᤺ᤶᤏ᤺ᤶᤔᤠᤱ ᤘᤠ᤹ᤔᤠ ᤐᤥᤱ ᤗ᤹ᤖᤡᤰ ᤂᤧᤱᤜᤠ᤹ ᤔᤧᤳᤋᤧᤛᤧ᤹ᤀᤥ॥

³ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤀᤠᤱ ᤌᤡᤰᤗᤧᤱ ᤀᤍᤱ ᤏᤢ ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤶᤔᤏᤠᤒᤠ. ᤀᤡᤱᤗᤧᤰᤁᤣ. ᤕᤠᤶᤏᤡᤱᤘᤠ᤹ ᤋᤠᤍᤠ ᤏᤢ ᤕᤠᤶ ᤋᤠᤍᤠᤖᤧ ᤀᤠᤕᤢᤰᤋᤧᤀᤠᤱ ᤀᤠᤘᤕᤧᤖᤥ॥ ᤜᤧᤰᤁᤣᤗ᤹ᤖᤡᤰ ᤛᤡᤰᤐᤥ᤺ᤰᤔᤠ ᤏᤢ ᤏᤠᤜᤧᤶᤔᤠᤀᤥ ᤀᤠᤘᤕᤧ. ᤜᤧᤰᤁᤩᤠᤱ ᤔᤏᤠᤜᤠ᤹ ᤀᤠᤈᤡ᤺ᤳᤋᤢᤶᤛᤡᤶᤔᤠᤱ ᤀᤠᤘᤕᤧᤖᤥ॥

⁴ ᤁᤖ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤢ᤹ᤔᤠᤴ ᤏᤢ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤒᤧᤴ ᤌᤠ᤺ᤶᤛᤡᤱᤅᤡᤸᤗᤧ

⁵ ᤂᤢᤏᤧ᤹ ᤀᤠᤏᤡ᤹ ᤋᤠᤱᤀᤠᤛᤧ᤺ᤵᤋᤧᤖᤥ॥ ᤁᤱᤃ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤏᤢᤒ᤻ ᤏᤢᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤐᤥ᤺ᤰᤂᤧᤒᤠ ᤔᤣ᤺ᤴᤗᤥ. ᤁᤖ ᤂᤢᤏᤧ᤹ ᤀᤠᤵᤑᤣᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤋᤠᤱᤀᤠᤛᤧ᤺ᤵᤋᤧᤒᤠᤖᤥ. ᤜᤧᤰᤁᤩᤠᤱ ᤛᤣᤛᤣᤔᤠᤱᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤱ ᤔᤏᤠ ᤆᤥ᤺ᤰᤛᤧ ᤀᤠᤏᤡ᤹ ᤗᤠᤕᤥᤴ ᤘᤠᤜᤵᤋᤢᤀᤠᤱ ᤁᤢᤛᤱ ᤜᤡᤱᤔᤴ ᤀᤠᤒᤡᤖᤧᤖᤥ॥

⁶ ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤜᤴᤍᤢᤀᤠᤱ ᤀᤠᤏᤡ᤹ ᤛᤧᤴᤗᤵᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤛᤣᤛᤣᤔᤠᤱᤅᤡᤴ ᤀᤠᤏᤡ᤹ᤀᤥ ᤐᤠᤱᤄᤢ

⁷ ᤜᤧᤰᤁᤣᤗ᤹ᤖᤡᤰ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤈᤥᤃᤧᤀᤠᤱ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤧᤴ ᤛᤧᤰᤂᤠ ᤏᤡᤱᤛᤠᤱ ᤁᤧᤈᤥ᤺ᤰᤐᤠ ᤏᤢ ᤗᤰᤁᤧᤄᤥᤒᤠ ᤐᤥᤱᤔᤠ ᤀᤠᤛᤢᤰᤋᤢᤶᤗᤥ॥

⁸ ᤁᤴ ᤐᤠ᤺ᤵᤔᤏᤠᤒᤠᤴ ᤛᤧᤰᤂᤠᤀᤣᤖᤥ॥ ᤁᤴ ᤐᤠ᤺ᤴᤜᤠ᤹ᤀᤥ ᤆᤰᤔᤧᤸᤗ᤹ᤀᤣ ᤐᤳᤇᤧ᤹ᤀᤥ. ᤜᤧᤰᤁᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ᤖᤧ ᤛᤡᤱᤛᤡᤱᤅᤠᤱ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤥᤱᤗᤥ॥ ᤁᤴ ᤐᤠ᤺ᤴᤜᤠ᤹ᤃ ᤁᤠᤰ ᤔᤧᤴᤇᤠᤶᤃᤧᤴ ᤕᤠᤵᤔᤡᤖᤧ ᤗᤠᤃᤡ ᤏᤢᤒᤠ ᤏᤢ ᤁᤢᤓᤠ᤹ ᤁᤧᤒᤡᤒᤠ ᤐᤠ᤺ᤴᤗᤥ॥

⁹ ᤁᤖ ᤀᤍᤱ ᤐᤠ᤺ᤴᤎᤱᤜᤠ᤹. ᤁᤣ᤺ᤶᤒ ᤁᤣ᤺ᤶᤒᤠ ᤔᤡᤱᤛᤪᤠᤜᤠ᤹ᤖᤧᤴ ᤐᤠ᤺ᤴᤎᤱᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹ᤀᤥ. ᤜᤧᤰᤁᤩᤠᤱ ᤔᤥᤛᤠᤖᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤔᤠ᤹ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤱᤃ ᤀᤥᤃᤵ ᤔᤧᤶᤒᤥᤱᤔᤏᤠ ᤏᤢ ᤀᤡᤴᤎᤠ᤺ᤱ ᤔᤣ᤺ᤴᤏᤣᤒᤠ ᤐᤠ᤺ᤴᤗᤥ॥

¹⁰ ᤜᤧᤰᤁᤣᤗ᤹ᤖᤡᤰ ᤂᤧᤔᤠ᤹ ᤁᤧᤓᤥᤱᤒᤠᤜᤠ᤹ ᤏᤡᤗᤧᤱ ᤌᤠᤖᤡᤰ ᤛᤠᤶᤍᤡᤱ ᤐᤡᤖᤧᤛᤧ᤹. ᤜᤧᤰᤁᤣᤛᤠᤱ ᤂᤧᤔᤠ᤹ ᤑᤥᤱᤔᤠ ᤔᤧᤸᤗᤧᤖᤢᤴᤏᤧ ᤑᤠ᤹ᤃᤪ ᤂᤧᤴ ᤔᤏᤠᤜᤠ᤹ᤏᤢ ᤔᤠ᤺ᤱᤄᤠ ᤘᤕᤧ᤹ᤀᤥ॥

¹¹ ᤜᤧᤰᤋᤱᤒᤠ ᤔᤏᤠᤜᤠ᤹ᤃ ᤑᤧᤳᤁᤧᤗᤠ᤹ᤒᤠ ᤏᤢ ᤗᤠᤕᤥᤒᤠ ᤔᤧᤈᤥᤰᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤡ᤹ ᤀᤠᤒᤠᤅᤣ ᤗᤠᤕᤥᤸᤗᤧ ᤌᤡᤰᤋᤢᤛᤡ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧ᤹ᤀᤥ॥

ᤁᤢᤏᤢᤵᤔᤠ ᤛᤢᤈᤠ

¹² ᤀᤡᤱᤃᤠ᤹ ᤀᤠᤷᤋᤡᤔᤛᤧᤴ ᤔᤣ᤺ᤴᤇᤠᤱ ᤋᤢᤂᤡᤁᤛᤧᤴ ᤂᤧᤏᤧ᤹ᤀᤥ ᤐᤠᤱᤄᤢᤱᤗᤥ॥ ᤂᤧᤱᤜᤠ᤹ᤀᤥ ᤗᤳᤇᤠᤴ ᤁᤧᤳᤏᤢᤔᤧ᤺ᤴᤏᤣ ᤂᤧᤏᤧ᤹ ᤁᤧᤛᤢᤰᤛᤢᤰ ᤏᤡᤁᤥᤐᤥᤗᤡᤛ ᤕᤧᤰᤕᤰᤁᤥ ᤑᤧᤶᤔᤠ ᤋᤶᤛᤡᤱ ᤆᤥᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤆᤢᤱ ᤘᤠ᤺ᤶᤔᤠᤀᤥᤒᤠ ᤋᤠᤵᤑᤧ᤺ᤶᤒᤠ ᤘᤠᤏᤠᤶᤔᤡᤸᤗᤧ ᤆᤥᤃᤢᤸᤗᤧ ᤀᤡᤱᤃᤠ᤹ ᤂᤧᤵᤔᤥᤀᤣ ᤘᤠ᤹ᤔᤠ ᤏᤡ᤺ᤴᤎᤥ ᤆᤥᤃᤢᤱᤅᤠᤱ ᤘᤠ᤹ᤀᤠᤖᤥ॥

¹³ ᤁᤢᤓᤠᤱᤛᤧᤶᤒᤠ ᤈᤡᤏᤛᤧᤴ ᤏᤢ ᤀᤵᤐᤥᤗᤥᤛᤧᤴ ᤂᤢᤴᤇᤡ᤹ ᤗᤠᤶᤍᤡ᤺ᤰᤁᤥ ᤌᤣᤀᤠᤱ ᤁᤧᤛᤠᤰᤐᤠᤀᤥ ᤔᤧᤎᤠᤛᤡᤴᤗ ᤑᤠ᤹ᤀᤠᤱ ᤁᤢᤓᤠ᤹ ᤐᤡᤖᤧᤛᤧ᤹ᤀᤥ॥

¹⁴ ᤜᤧᤰᤁᤩᤠᤱ ᤀᤠᤏᤡ᤹ ᤔᤏᤠᤜᤠ᤹ᤖᤧ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤢ ᤛᤧᤰᤂᤠᤀᤣ ᤁᤧᤛᤠᤰᤐᤠᤀᤥ ᤁᤧᤎᤠᤒᤠᤜᤠ᤹ ᤁᤢᤓᤠ᤹ ᤐᤡᤔᤠᤛᤡ ᤔᤧᤜᤢ᤹ᤛᤡᤱᤗᤖᤥ॥ ᤂᤧᤱᤜᤠ᤹ ᤀᤡᤖᤧᤶ ᤀᤡᤖᤧᤶ ᤗ᤹ᤖᤡᤰ ᤔᤧᤴᤘᤠ᤹ᤏᤧᤴᤗᤖᤥ॥

¹⁵ ᤀᤡᤱᤃᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤂᤧᤏᤧ᤹ ᤛᤧᤘᤠ ᤁᤧᤶᤜᤠᤰᤋᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤕᤠᤵᤔᤡ ᤔᤡ᤺ᤶᤈᤡ ᤁᤧᤔᤧᤵᤐᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤠᤏᤡᤃᤣ ᤛᤧᤘᤠ ᤘᤠ᤹ᤔᤢ ᤔᤧᤳᤋᤧᤛᤧ᤹ᤀᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖ ᤑᤠ᤹ᤀᤠᤱ ᤀᤡᤱᤃᤠ᤹ ᤋᤢᤘᤠ ᤆᤥ᤺ᤰᤁᤠᤖᤥ॥