ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 8 - LIFOTNT

¹ ᤀᤠᤶᤔᤠᤖᤧᤀᤣ ᤁᤢᤏᤢ ᤁᤧᤎᤢᤅᤢᤀᤠᤱ ᤁᤧᤒᤥᤖᤧᤒᤠ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤵᤑᤣᤰ ᤀᤠᤶᤓᤢ᤹ ᤁᤧᤒᤥ᤺ᤰᤂᤧᤸᤗᤧᤃ ᤗᤠᤶᤔᤥ ᤋᤢᤶᤏᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤆᤢᤵ ᤔᤧᤳᤏᤧᤒᤠ ᤘᤕᤧᤔᤧᤴᤗᤥ. ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤌᤣᤀᤠᤱ ᤔᤧᤶᤒᤠ᤺ᤳᤋᤢᤶᤒᤠ ᤘᤕᤧᤔᤧᤴᤗᤥ॥

² ᤂᤧᤏᤧ᤹ ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤜᤡᤶᤔᤥ ᤋᤣ᤹ᤏᤧᤒᤠ ᤘᤕᤧᤖᤥ—ᤂᤢᤏᤧ᤹ᤀᤣ ᤜᤢ᤹ᤖᤠᤱᤅᤠᤱ ᤘᤕᤧᤖᤥ॥ ᤀᤠᤱᤃᤠ᤹ ᤂᤧᤏᤧ᤹ ᤔᤠᤖᤢᤰ ᤁᤣ᤺ᤵᤔᤏᤠᤒᤠ ᤆᤧᤸᤗᤧᤰᤛᤣ᤹ ᤌᤡ ᤐᤡᤏᤧᤔᤧᤴᤗᤥ. ᤀᤠᤱᤃᤠ᤹ ᤀᤠᤑᤢ᤹ᤗᤧᤛᤣ᤹ᤗᤠᤶ ᤕᤢᤔᤏᤠᤒᤠ ᤛᤣᤈᤱᤘᤠᤴ ᤌᤢᤱᤔᤠ ᤐᤡᤏᤧᤒᤠ ᤘᤕᤧᤖᤥ॥

³ ᤁᤢᤓᤧᤴᤇᤠᤱ ᤜᤢᤰᤁᤡᤴ ᤀᤠᤎ᤻ᤃᤣᤰ ᤛᤡᤃᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤁᤢᤈᤢᤵᤛᤠᤱ ᤜᤢᤰᤁᤡᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤐᤠᤖ ᤛᤢ᤺ᤴᤏᤠᤖᤥ॥

⁴ ᤕᤖᤢᤛᤗᤧᤔᤒᤠ ᤔᤧᤴᤇᤢᤔᤠᤛᤣ. ᤀᤠᤱᤃᤠ᤹ᤏᤢ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ. “ᤂᤧᤴᤇᤡ᤹ ᤗᤢᤱᤔᤠ᤹ ᤁᤧᤜᤡ᤺ᤵᤏᤧᤛᤡᤒᤠᤀᤥ ᤀᤠᤏᤡᤃᤣ ᤔᤧᤜᤶᤀᤠᤛᤡᤃᤧᤴᤗᤥ॥”

ᤋᤢᤰᤛᤡᤃᤣᤰᤐᤠ ᤛᤠᤶᤗᤥ ᤔᤧᤴᤇᤢᤔᤠᤜᤠ᤹—

⁵ ᤗᤢᤱᤔᤠ᤹ ᤜᤡ᤺ᤵᤋᤢᤔᤠᤸᤗᤥ ᤏᤠ᤺ᤶᤛᤡᤱᤗ ᤂᤧᤴ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤗᤠᤶ ᤁᤧᤓᤧᤶᤔᤧᤴ ᤜᤠ᤺ᤵᤐᤣ᥅ ᤏᤠᤱᤛᤣ᤹ ᤛᤡᤱᤒᤢᤱ ᤛᤡᤃᤠᤱᤗᤠᤶ ᤂᤧᤏᤧ᤹ ᤑᤥ᤺ᤱᤏᤧᤖᤥ. ᤂᤧᤏᤧ᤹ ᤁᤧᤶᤔᤠᤖᤧ ᤁᤢᤛᤠᤵᤐᤥ᤺ᤰᤁᤥ ᤁᤧᤜᤠᤱᤛᤡᤱᤅᤠᤱ ᤁᤧᤘᤕᤧ ᤂᤧ᤹ᤕᤥ ᤛᤠᤃᤧᤘᤠ᤺ᤴᤇᤡᤱᤅᤠᤱ ᤁᤧᤘᤕᤧ॥

ᤔᤧᤴᤇᤢᤔᤠ—

⁶ ᤂᤧᤏᤧ᤹ ᤀᤠᤓᤧᤸᤗᤧᤛᤠᤱ ᤁᤧᤛᤡᤰᤗᤢᤱᤔᤥ ᤀᤠᤱᤃᤠ᤹ ᤁᤳᤋᤠᤱᤅᤧ᤹ᤀᤥ ᤁᤧᤔᤡᤱᤅᤡᤴ ᤗᤰᤔᤏᤠᤒᤠ ᤛᤡᤁᤪᤡ᤺ᤴ ᤜᤧᤰᤁᤣ ᤁᤳᤋᤠᤱᤅᤧ᤹ᤀᤥ. ᤗᤢᤱᤔᤠ᤹ ᤜᤡ᤺ᤵᤛᤡᤱᤔᤧᤱᤃ ᤛᤡᤔᤧᤴ ᤜᤧᤰᤁᤣ ᤁᤧᤎᤢᤶᤒᤠ ᤆᤥᤰᤗᤥ. ᤏᤠᤜᤣᤶᤔᤧᤴ ᤀᤡ᤺ᤵᤐᤢᤱᤅᤡᤴ ᤜᤧᤰᤁᤣ ᤔᤢᤰᤛᤠᤶᤒᤠ ᤆᤥᤰᤗᤥ॥ ᤂᤧᤴ ᤔᤡᤎᤢᤱ ᤔᤡᤖᤠᤰ ᤐᤥᤱᤅᤠᤱ ᤗ᤺ᤴᤗᤥ ᤂᤧᤒᤩᤠᤱ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ ᤜᤧᤰᤁᤣ ᤋᤡ᤺ᤳᤗᤥ॥

⁷ ᤆᤫᤠ᤺ᤳᤋᤡᤸᤗᤧ ᤂᤧᤴ ᤘᤖᤱᤔᤠ ᤛᤧᤵᤔᤠ ᤔᤧᤛᤢᤰᤋᤢᤴᤗᤥ॥ ᤁᤧᤃᤢᤱᤒᤠ ᤁᤧᤕᤢᤒᤠ ᤆᤫᤠ᤺ᤳᤋᤡᤸᤗᤧᤀᤠᤱ ᤂᤧᤴ ᤜᤢᤶᤔᤠ ᤔᤧᤛᤢᤰᤋᤢᤴᤗᤥ॥ ᤁᤢᤓᤠ ᤔᤏᤠ᤺ᤸᤗᤧ ᤕᤠᤱᤛᤠᤁᤢᤴᤎᤣ ᤗ᤺ᤳᤋᤢᤀᤠᤱ ᤔᤡ᤺ᤶᤈᤡᤴ ᤀᤡᤱᤔᤠ ᤁᤥ᤺ᤳᤋᤢᤏᤧ ᤑᤃᤪ ᤔᤏᤠᤖᤧ ᤂᤧᤴ ᤔᤧᤕᤣ᤺ᤳᤋᤢᤖᤰᤗᤥ॥

ᤔᤧᤴᤇᤢᤔᤠ᤺ᤸᤗᤧ ᤁᤢᤶᤓᤢ᤹ᤜᤠ᤹—

⁸ ᤀᤠᤏᤡᤃᤣ ᤗᤳᤇᤠ ᤆᤢᤰᤔᤠ ᤏᤢᤛ᤻ᤛᤠ᤹ᤎᤡᤰ ᤘᤠ᤹ᤖᤥ. ᤂᤢᤏᤧ᤹ ᤁᤢᤏᤢᤒᤰᤜᤠ᤹ ᤕᤶᤒᤠ ᤔᤧᤶᤒᤥᤱᤅᤣ ᤘᤠ᤹ᤖᤥ॥ ᤁᤢᤓᤠ ᤌᤠᤱᤒᤧᤴᤎᤡᤰ ᤁᤢᤀᤡᤱᤗᤠᤵᤛᤧ ᤋᤠ᤺ᤸᤗᤧ ᤀᤠᤏᤡᤃᤣ ᤌᤧᤔᤠ ᤆᤥᤃᤢᤶᤒᤧᤒᤠᤒᤣ᥅

⁹ ᤂᤧᤴ ᤗᤢᤱᤎᤠᤰ ᤐᤥ᤺ᤰᤂᤧᤒᤠ ᤜᤧᤰᤁᤣ᤺ᤸᤗᤧᤃ ᤀᤠᤏᤡᤃᤣ ᤂᤧᤵᤔᤥ ᤕᤢᤵᤐᤠ ᤆᤱᤜᤡᤶ ᤆᤥᤃᤢᤶᤒᤧᤒᤠ ᤘᤕᤧᤖᤥ॥ ᤂᤧᤴ ᤗᤠᤶᤎᤣ᤺ᤵ ᤐᤥ᤺ᤰᤂᤧᤒᤠ ᤜᤧᤰᤁᤣ᤺ᤸᤗᤧᤃ ᤜᤧᤰᤔᤏᤠᤒᤠ ᤛᤠᤶᤔᤠᤱᤛᤡᤱᤅᤡᤸᤗᤧ ᤑᤠᤱᤔᤏᤠᤀᤠᤱ ᤂᤧᤴ ᤛᤧ᤺ᤵᤋᤢᤶᤒᤧᤒᤠ ᤘᤕᤧᤖᤥ॥

ᤔᤧᤴᤇᤢᤔᤠ—

¹⁰ ᤀᤠᤱᤃᤠ᤹ᤃ ᤗᤳᤇᤠ ᤗᤢᤱᤎᤠᤰᤁᤠᤖᤥ. ᤀᤠᤱᤃᤠ᤹ ᤀᤠᤏᤢ᤺ᤴᤃ ᤂᤧᤸᤗᤧ ᤁᤢᤈᤱᤜᤡᤶᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤸᤗᤧ ᤁᤢᤏᤡᤔᤥ ᤁᤢᤛᤡᤰ ᤆᤡᤶᤗ ᤁᤧᤕᤠ᤺ᤶᤔᤠ ᤜᤧᤰᤋᤱᤔᤠ ᤀᤠᤱᤃᤠ᤹ ᤐᤥ᤺ᤰᤛᤠᤱᤅᤠᤱ ᤘᤠ᤹ᤀᤠᤖᤥ॥

¹¹ ᤒᤠᤗ-ᤜᤠᤔᤥᤏ ᤔᤧᤵᤔᤏᤠᤒᤠ ᤋᤧᤴᤏᤥ ᤛᤥᤗᤥᤔᤏᤧᤸᤗᤧ ᤗᤳᤇᤠ ᤆᤧᤸᤗᤧᤰᤛᤣ᤹ ᤁᤢᤀᤡᤰᤋᤠᤵ ᤏᤧᤖᤥ॥ ᤕᤠ᤺ᤴᤃᤧᤔᤒᤠᤜᤠ᤹ᤖᤧ ᤂᤧᤴ ᤕᤠᤱᤅᤥ ᤔᤧᤍᤣ᤹ᤖᤢᤀᤠᤱ ᤏᤧᤖᤥ ᤜᤧᤰᤁᤩᤠᤱ ᤁᤧᤖᤧᤰᤗᤧ ᤂᤢᤏᤧ᤹ ᤜᤧᤴᤇᤡᤱᤎᤡᤰ ᤕᤢᤵᤐᤠᤕᤠᤱ ᤔᤧᤒᤡᤖᤢᤖᤥ॥

¹² ᤛᤥᤗᤥᤔᤏᤧᤸᤗᤧ ᤂᤧᤴ ᤜᤧᤴᤇᤡᤱ ᤕᤢᤵᤐᤠ ᤕᤠᤱᤜᤠ᤹ ᤋᤣ᤹ᤖᤢᤖᤖᤥ. ᤂᤧᤴ ᤕᤠ᤺ᤴᤃᤧᤔᤒᤠᤜᤠ᤹ᤖᤧ ᤁᤡᤵ ᤏᤧᤳᤇᤡ ᤕᤠᤱᤅᤡᤴ ᤔᤧᤄᤥᤛᤢᤖᤖᤥ. ᤀᤠᤱᤃᤠ᤹ᤃ ᤀᤠᤒᤠᤅᤣ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤁᤳᤋᤢᤱᤗᤥ॥

ᤕᤧᤶᤒᤡᤳᤇᤠ—

¹³ ᤀᤠᤓᤢᤱᤀᤡᤰᤁᤥ ᤁᤧᤘᤠ᤹ᤔᤠ ᤗᤢᤱᤔᤠ᤹ ᤜᤡ᤺ᤵᤏᤧᤔᤣ. ᤁᤧᤀᤡᤰᤗᤠᤴ ᤂᤧᤶᤔᤠ ᤂᤥᤛᤢᤱᤗᤖᤥ॥ ᤀᤠᤱᤃᤠ᤹ ᤀᤠᤴᤈᤢᤶᤜᤠ᤹ᤖᤧ ᤂᤧᤏᤧ᤹ ᤁᤧᤛᤢᤳᤗᤠᤴ ᤂᤧᤶᤔᤠ ᤑᤠ᤹ᤀᤠᤱ ᤔᤧᤜᤠᤱᤄᤢᤖ ᤔᤧᤘᤠ᤹ᤖᤥ॥

ᤔᤧᤴᤇᤢᤔᤠ—

¹⁴ ᤗᤢᤱᤔᤠ᤹ ᤜᤡ᤺ᤵᤏᤧᤒᤠ ᤀᤠᤍᤠᤱᤒᤣ. ᤐᤧ᤺ᤱᤘᤠ ᤁᤢᤀᤡᤛᤡᤰ ᤀᤠᤱᤃᤠ᤹ᤀᤥ ᤜᤠᤖᤠ ᤑᤧᤖᤧ᤹ᤀᤥ. ᤔᤠᤖᤢᤰ ᤁᤧᤗᤡᤱᤒᤠ ᤁᤥ᤺ᤰᤔᤠᤀᤥ ᤌᤠᤱᤒᤧᤴ ᤂᤡᤖᤣᤒᤧᤴ ᤜᤧᤰᤁᤣ ᤂᤧᤏᤧ᤹ ᤀᤠᤱᤃᤠ᤹ᤀᤥ ᤋᤩᤧ᤹ᤀᤥ॥