ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 7 - LIFOTNT

ᤕᤧᤶᤒᤡᤳᤇᤠ—

¹ ᤜᤠᤱᤕᤢᤰᤐᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤀᤣ᥄ ᤗᤠᤱᤗᤥ᤺ᤳᤋᤡ ᤁᤧᤈᤠᤰᤂᤢᤒᤠ ᤂᤧᤏᤧ᤹ ᤁᤧᤗᤠᤱᤜᤠ᤹ ᤛᤠ᤹ᤖᤡᤰ ᤏᤢᤒᤠ ᤆᤥᤰᤗᤥ॥ ᤂᤧᤏᤧ᤹ ᤁᤧᤗᤠᤱ ᤛᤧᤒᤱᤒᤠᤜᤠ᤹ᤖᤧ ᤁᤒᤪᤡᤱ ᤁᤢᤄᤥ᤺ᤵᤔᤠᤴ ᤁᤢᤜᤢᤰᤆᤥ ᤁᤧᤏᤢ᤹ᤒᤠ ᤛᤠᤵᤆᤥᤒᤠᤸᤗᤧ ᤆᤥᤃᤢᤒᤠ ᤕᤠ᤺ᤶᤒᤰ ᤜᤧᤰᤁᤣ ᤗ᤹ᤖᤥ॥

² ᤂᤧᤏᤧ᤹ ᤁᤧᤒᤣ᤹ᤜᤡ ᤕᤥ᤺ᤰᤁᤡᤴ ᤁᤠᤰᤐᤧᤳᤋᤠ ᤂᤥᤷᤕᤠ ᤜᤧᤰᤁᤣ ᤗ᤹ᤖᤥ॥ ᤂᤧᤱᤃ ᤔᤠᤖᤢᤰ ᤑᤢᤵᤔᤏᤠᤒᤠ ᤛᤣᤈ᤺ᤱᤘᤠ᤺ᤸᤗᤧ ᤁᤧᤍᤡᤶᤒᤠ ᤆᤥᤰᤗᤥ॥ ᤁᤧᤛᤠᤵᤐᤥ᤺ᤰᤐᤠᤴ ᤗᤧᤰᤘᤠ ᤑᤢᤱᤅᤡᤸᤗᤧ ᤁᤒᤢ ᤕᤢᤰᤂᤢᤒᤠ ᤔᤠᤛᤡ᤺ᤸᤗᤧ ᤁᤢᤗᤢᤵ ᤜᤧᤰᤁᤣ ᤗ᤹ᤖᤥ॥

³ ᤁᤠᤵᤛᤠᤒᤠ ᤐᤧ᤺ᤱᤘᤠᤛᤠ᤺ᤳᤜᤠ᤹ ᤜᤧᤰᤁᤣ ᤂᤧᤏᤧ᤹ ᤁᤧᤏᤢᤒᤰᤜᤠ᤹ᤀᤠᤱ ᤌᤠ᤺ᤵᤗᤥ॥

⁴ ᤂᤧᤏᤧ᤹ ᤁᤧᤏᤡᤃᤡ᤺ᤱᤔᤠᤴ ᤋᤰᤔᤡᤒᤠ ᤁᤣ᤺ᤱ ᤆᤱᤜᤡᤶ ᤜᤧᤰᤁᤣ ᤗ᤹ᤖᤥ. ᤂᤧᤏᤧ᤹ ᤁᤧᤔᤡᤰᤁᤡᤴ ᤜᤣᤛ᤻ᤒᤥᤏᤒᤠ ᤘᤖᤰᤜᤠ᤹ ᤜᤧᤰᤋᤱᤒᤠ ᤆᤥᤰᤗᤥ. ᤂᤧᤱᤃ ᤕᤶᤒᤠ ᤕᤧᤰᤕᤰᤁᤥ ᤐᤕᤶ ᤕᤶᤒᤠ ᤋᤠ᤺ᤰᤜᤴ ᤐᤣᤛᤠᤱ ᤕᤢᤱᤗᤥ॥ ᤁᤧᤏᤧᤒᤥᤴᤃ ᤍᤔᤛ᤻ᤁᤛ ᤗᤧᤵᤔᤠᤱ ᤀᤥᤃᤧᤔᤒᤠ ᤗᤧᤒᤏᤠ᤺ᤴᤒᤠ ᤆᤱᤜᤡᤶ ᤁᤢᤀᤡᤛᤡ᤺ᤰᤐᤠ ᤆᤥᤰᤗᤥ॥

⁵ ᤂᤧᤏᤧ᤹ ᤁᤢᤎᤧᤃᤣᤰᤐᤠᤴ ᤁᤷᤔᤣᤗ ᤁᤥ᤺ᤰᤔᤠ ᤜᤧᤰᤁᤣ ᤗ᤹ᤖᤥ॥ ᤁᤣ᤺ᤶᤒᤠ ᤁᤧᤎᤣᤃᤣᤰ ᤀᤡ᤺ᤴ ᤋᤡᤸᤗᤧᤰ ᤁᤧᤗᤧᤰᤐᤠ ᤏᤢ ᤔᤠᤰᤋᤠᤱᤒᤠ ᤆᤥᤰ ᤂᤧᤸᤗᤧ ᤜᤠᤱᤅᤡᤴ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤆᤥᤃᤢᤖᤥ॥

⁶ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤔᤣ. ᤂᤧᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤆᤠ᤹ᤖᤡᤰ ᤏᤢᤔᤠᤛᤢᤰᤔᤠ ᤁᤧᤈᤥ᤺ᤰᤗᤥ. ᤂᤧᤏᤧ᤹ᤃ ᤁᤧᤖᤧᤰ ᤀᤠᤛ᤺ᤵᤔᤠᤏᤧᤖᤥ॥

⁷ ᤂᤧᤏᤧ᤹ ᤂᤧᤒᤰᤛᤡᤱ ᤜᤧᤰᤋᤱᤔᤠ ᤁᤣ᤺ᤶᤔᤠ ᤁᤧᤈᤥ᤺ᤰᤗᤥ. ᤁᤧᤏᤢᤜᤠ᤹ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤈᤠ ᤜᤧᤰᤁᤣ ᤗ᤹ᤖᤥ॥

⁸ ᤀᤠᤱᤃᤠ᤹ ᤂᤧᤒᤰᤛᤡᤱᤅᤡᤴ ᤗᤡᤅᤢᤱᤗᤥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤈᤠ᤹ᤀᤡᤴ ᤋᤢᤒᤢᤱᤗᤥ॥ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤧ᤹ ᤁᤧᤏᤢᤜᤠ᤹ ᤆᤧᤸᤗᤧᤰᤛᤣᤸᤗᤧ ᤁᤢᤒᤈᤠ ᤜᤧᤰᤁᤣ ᤗ᤹ᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤰᤔᤠᤴ ᤏᤠᤱᤛᤣ᤹ᤀᤡᤸᤗᤧ ᤁᤢᤏᤠᤶ ᤜᤧᤰᤁᤣ ᤏᤠᤶᤗᤥ॥

⁹ ᤂᤧᤏᤧ᤹ ᤁᤧᤶᤒᤪᤠᤴ ᤏᤢᤒᤠ ᤆᤧᤸᤗᤧᤰᤛᤣ᤹ ᤜᤧᤰᤁᤣ ᤁᤢᤈᤠ ᤁᤧᤏᤢ᤹ᤒᤠ ᤆᤥᤰᤗᤥ॥ ᤀᤠᤸᤗ ᤆᤧᤸᤗᤧᤰᤛᤣ᤹ ᤌᤡᤴ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤸᤗᤧ ᤁᤢᤶᤒᤪᤠᤀᤥ ᤛᤖᤰ ᤁᤧᤳᤗᤖᤥ. ᤂᤢᤏᤧ᤹ ᤁᤢᤶᤒᤪᤠᤛᤣᤴ ᤏᤢ ᤁᤢᤜᤠᤒᤥ᤹ᤒᤠᤀᤥ ᤂᤧᤴ ᤜᤥᤀᤠᤱ ᤐᤣ᤺ᤰᤗᤖᤥ॥

ᤔᤧᤴᤇᤢᤔᤠ—

¹⁰ ᤀᤠᤱᤃᤠ᤹ᤃ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤸᤗᤧᤴᤏᤠᤖᤥ. ᤂᤧᤶᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤠᤔᤡ᤺ᤵᤔᤠᤸᤗᤧ ᤋᤖᤢᤖᤥ॥

¹¹ ᤑᤧᤖᤧ᤹ᤀᤥ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤒᤣ. ᤀᤠᤴᤇᤡ᤹ ᤐᤩᤠᤱᤛᤡᤃᤧᤴ ᤀᤡᤰᤋᤠᤵ ᤜᤧᤴᤃᤠᤋᤡ ᤐᤡᤳᤇᤡᤖᤥ ᤜᤧᤰᤁᤩᤠᤱ ᤐᤠᤱᤓᤣ᤹ᤀᤥ ᤛᤧᤴᤍᤡᤰ ᤀᤡᤶᤛᤡᤖᤥ॥

¹² ᤋᤠᤏᤠᤶ ᤜᤠᤖᤠᤀᤣ ᤀᤠᤴᤇᤡ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ᤀᤥ ᤐᤡᤳᤇᤡᤖᤥ. ᤆᤧᤸᤗᤧᤰᤛᤣᤸᤗᤧ ᤁᤢᤓᤢᤱᤑᤧᤰᤔᤣᤳ ᤑᤧᤰᤋᤧᤒᤡ ᤑᤠ᤹ᤀᤠᤱ ᤀᤥᤔᤧᤳᤇᤢᤖᤥ ᤜᤧᤰᤁᤩᤠᤱ ᤑᤢ᤹ᤗᤧᤛᤣᤸᤗᤧ ᤁᤢᤓᤢᤱ ᤑᤧᤰᤋᤧᤒᤡ ᤑᤠ᤹ᤀᤠᤱ ᤀᤥᤔᤧᤳᤇᤢᤖᤥ ᤂᤧᤵᤔᤥ ᤀᤠᤱᤃᤠ᤹ ᤂᤧᤏᤧ᤹ ᤀᤠᤔᤡ᤺ᤶᤔᤧᤴ ᤐᤡᤏᤧᤖᤥ॥

¹³ ᤂᤧᤏᤧ᤹ ᤔᤡᤰᤁᤧᤕᤢᤒᤠ ᤔᤡᤰᤕᤢ᤺ᤴᤍᤣ᤺ᤸᤗᤧ ᤁᤢᤏᤠᤶᤔᤡᤴ ᤁᤧᤏᤠᤶᤛᤢᤖᤥ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤁᤢᤈᤠ ᤁᤧᤏᤢ᤹ᤒᤠ ᤛᤡᤱᤛᤣ᤹ᤜᤠ᤹ ᤗᤠᤶᤎᤣ᤺ᤵᤐᤢᤱᤔᤥᤀᤣ ᤏᤧᤖᤥ॥ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤒᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤃᤡ ᤁᤢᤛᤱ ᤏᤢ ᤋᤃᤡᤒᤠ ᤏᤡᤱᤘᤠ᤹ ᤁᤧᤍᤠᤒᤠ ᤛᤡᤱᤛᤣ᤹ᤜᤠ᤹ ᤕᤠᤱᤄᤥ᤺ᤳᤋᤢᤱ ᤕᤢᤰᤂᤢᤱᤅᤠᤱ ᤘᤠ᤹ᤖᤥ॥