ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 6 - LIFOTNT

ᤔᤧᤴᤇᤢᤔᤠᤜᤠ᤹—

¹ ᤔᤧᤴᤇᤢᤔᤠᤜᤠ᤹ᤀᤥ ᤛᤠ᤹ᤖᤡᤰ ᤐᤏᤢᤏᤢᤔᤠᤀᤣ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤒᤠᤴ ᤀᤠᤳᤋᤠᤴ ᤐᤣᤀᤠᤱ ᤘᤠ᤹ᤒᤣ᥅ ᤀᤠᤏᤡᤃᤣ ᤕᤠᤵᤔᤡ ᤀᤠᤔᤧᤳᤋᤧᤏᤠ ᤜᤧᤰᤁᤩᤠᤱ ᤂᤢᤏᤧ᤹ ᤁᤥ᤺ᤵᤔᤠᤖᤧ ᤗᤠᤃᤡ ᤀᤠᤏᤡᤃᤣ ᤑᤠ᤹ᤀᤠᤛᤡᤃᤧᤖᤥ॥

ᤔᤧᤴᤇᤢᤔᤠ—

² ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠ ᤀᤠᤍᤠᤱᤒᤠᤴ ᤁᤢᤓᤢᤱᤀᤡᤰᤁᤥ ᤐᤣᤀᤠᤱ ᤘᤠ᤹ᤖᤥ. ᤔᤠᤖᤢᤰᤜᤠ᤹ᤖᤧᤴ ᤁᤢᤏᤧᤳᤏᤠᤀᤥ॥ ᤂᤢᤏᤧ᤹ ᤁᤢᤓᤢᤱᤀᤡᤰᤁᤥ ᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤖᤠᤶᤛᤢᤛᤡᤖᤥ ᤂᤧᤒᤩᤠᤱ ᤛᤠᤱᤃᤠ ᤑᤢᤱᤜᤠ᤹ ᤛᤢᤵᤛᤢᤖ ᤕᤠᤰᤗᤥ॥

³ ᤀᤠᤱᤃᤠ᤹ ᤂᤢᤏᤧ᤹ᤀᤡᤴᤏᤠᤖᤥ. ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠ ᤀᤠᤍᤠᤱᤒᤠᤴ ᤀᤠᤱᤃᤠ᤹ᤀᤡᤴᤗᤥ. ᤛᤠᤱᤃᤠ ᤑᤢᤱᤜᤠ᤹ ᤗᤢᤶᤔᤥ ᤂᤢᤏᤧ᤹ ᤁᤢᤔᤧᤸᤗᤢᤰ ᤁᤢᤔᤧ᤺ᤴᤍᤠ ᤆᤠᤖᤠᤶᤛᤢᤛᤡᤖᤥ॥

ᤅᤠᤛᤡᤃᤣᤰᤐᤠ ᤛᤠᤶᤗᤥ ᤕᤧᤶᤒᤡᤳᤇᤠ—

⁴ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤂᤧᤏᤧ᤹ ᤋᤡᤷᤛᤠ ᤜᤧᤰᤁᤣ ᤐᤏᤢᤏᤢᤔᤠ ᤁᤧᤈᤥ᤺ᤰᤗᤥ ᤜᤧᤰᤁᤩᤠᤱ ᤕᤖᤢᤛᤗᤧᤔ ᤜᤧᤰᤁᤣ ᤏᤢᤔᤠ ᤁᤧᤈᤥ᤺ᤰᤗᤥ॥ ᤂᤧᤏᤧ᤹ᤃ ᤛᤠ᤹ᤖᤡᤰ ᤏᤢᤔᤠ ᤏᤡᤛᤠ ᤁᤧᤓᤥᤱᤒᤠ ᤋᤢᤖᤠ ᤜᤧᤰᤁᤣ ᤁᤧᤗ᤹॥

⁵ ᤂᤧᤏᤧ᤹ ᤁᤧᤔᤡᤰᤁᤡᤴ ᤀᤠᤱᤃᤠ᤹ᤗᤠᤶᤒᤠ ᤂᤧᤳᤋᤧ᤹ᤀᤥ. ᤂᤧᤸᤗᤧ ᤀᤠᤱᤃᤠ᤹ ᤏᤠᤰᤋᤠᤱ ᤐᤣᤃᤠᤱᤗ ᤕᤠ᤺ᤴᤍᤠᤱᤗᤥ॥ ᤃᤡᤗᤠᤍᤒᤠ ᤁᤥ᤺ᤰᤔᤠᤀᤥ ᤔᤧ᤺ᤴᤍᤠᤗᤢᤵᤜᤠ᤹ ᤛᤱᤔᤠᤱ ᤔᤧᤒᤡᤴ ᤔᤧᤗᤠ᤺ᤱᤗ ᤔᤧᤎᤠᤖᤥ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤎᤣᤃᤣᤰ ᤀᤡ᤺ᤴ ᤁᤧᤏᤠᤖᤠᤀᤥ ᤛᤧᤖᤧᤀᤠᤱ ᤐᤳᤗᤥ॥

⁶ ᤀᤠᤸᤗᤥ ᤂᤠᤖᤰ ᤘᤠᤜᤵᤔᤏᤠᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤂᤧᤏᤧ᤹ ᤁᤧᤜᤠᤒᤥ᤹ᤒᤠᤜᤠ᤹ ᤑᤛᤢ᤺ᤰᤕᤠ᤺ᤵᤐᤠ ᤆᤥᤰᤗᤥ॥ ᤂᤧᤴ ᤁᤧᤖᤧᤰ ᤌᤧᤵᤐᤧᤳ ᤁᤧᤃᤠᤶᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤂᤧᤴ ᤁᤠᤰ ᤛᤠ᤹ᤖᤡᤰ ᤁᤧᤍᤱᤒᤠ ᤆᤥᤰᤗᤥ॥

⁷ ᤐ᤺ᤳᤌᤠᤱ ᤛᤡᤃᤠᤱ ᤂᤧᤏᤧ᤹ ᤁᤢᤏᤧᤍᤧᤱᤒᤠᤴ ᤐ᤺ᤳᤌᤠᤱ ᤛᤡᤃᤠᤱ ᤁᤢᤓᤧᤸᤗᤧᤰ ᤏᤧᤳᤇᤡ ᤆᤥ᤺ᤰᤔᤏᤠᤒᤠ ᤑᤢ᤹ᤗᤧ᤹ᤛᤣ᤹ ᤜᤧᤰᤁᤣᤍᤱᤒᤠ ᤆᤥᤰᤗᤥ॥

⁸ ᤂᤧ᤹ᤕᤥ ᤋᤢᤰᤐᤥᤱ ᤜᤠᤱᤔᤠᤜᤠ᤹. ᤕᤧᤵᤐᤥᤱ ᤆᤰᤔᤣ᤺ᤳᤜᤠ᤹ ᤔᤧᤘᤠ᤹ᤛᤠᤱ ᤂᤧᤴᤏᤢ᤺ᤸᤗᤧ ᤕᤖᤡᤰ ᤔᤧᤴᤇ᤻ᤕᤠᤜᤠ᤹ ᤔᤧᤘᤠ᤹ᤛᤠᤱ᥄

⁹ ᤁᤖ ᤀᤠᤱᤃᤠ᤹ᤃ ᤗᤳᤇᤠᤖᤰ ᤗᤢᤱᤔᤠ᤹ ᤜᤡ᤺ᤵᤋᤢᤱᤗᤥ. ᤀᤠᤱᤃᤠ᤹ ᤀᤠᤒᤢᤳᤋᤢ᤺ᤰᤁᤣ. ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤗᤡᤱᤍᤥ ᤁᤧᤃᤧᤵᤔᤠᤀᤣ॥ ᤂᤧᤴ ᤂᤢᤏᤧ᤹ ᤁᤢᤶᤔᤠᤖᤧ ᤌᤡᤰᤗᤰ ᤁᤢᤛ᤻ᤛᤠ ᤔᤧᤴᤇᤢᤔᤠᤖᤥ— ᤁᤢᤶᤔᤠᤖᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤋᤢᤰᤋᤢᤔᤠ ᤁᤢᤛ᤻ᤛᤠᤖᤥ᥄ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤏᤧ᤹ ᤔᤧᤏᤡᤛᤢᤀᤠᤱ ᤁᤢᤏᤠᤖᤠ ᤔᤧᤓᤥᤛᤢᤖᤥ. ᤜᤠᤱᤔᤠᤜᤠ᤹ ᤏᤢ ᤆᤰᤔᤣ᤺ᤳᤜᤠ᤹ᤖᤧ ᤂᤧᤴ ᤔᤧᤈᤔᤢᤖᤥ॥

¹⁰ ᤏᤠᤶ ᤁᤧᤵᤐᤠ ᤜᤧᤰᤁᤣ ᤏᤡᤃᤧᤍᤧᤵᤐᤠᤴ ᤜᤠ᤺ᤳᤏᤡᤒᤣ᥅ ᤂᤧᤴ ᤐᤏᤢᤏᤢᤔᤠ ᤁᤢᤓᤢᤶᤒᤠ ᤗᤠᤒ ᤜᤧᤰᤋᤱᤔᤠ ᤆᤥᤰᤗᤥ. ᤏᤠᤶ ᤜᤧᤰᤁᤣ ᤛᤧᤍᤡᤱᤍᤡᤱ ᤁᤧᤀᤥ᤺ᤵᤔᤠ ᤆᤥᤰᤗᤥ॥

¹¹ ᤏᤧᤘᤠᤗᤠᤀᤥ ᤂᤠᤖᤰ ᤁᤧᤗᤡᤱᤒᤠ ᤛᤡᤱᤒᤢᤱᤜᤠ᤹ ᤀᤥᤔᤧᤵᤔᤠ ᤑᤠ᤹ᤀᤠᤱ. ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤥ ᤁᤢᤏ᤺ᤰ ᤁᤢᤓᤧᤰᤘᤠ ᤁᤧᤗ᤺ᤶᤒᤠ ᤜᤧᤰᤁᤩᤠᤱ ᤑᤢ᤹ᤗᤧᤛᤣ᤹ᤸᤗᤧ ᤁᤢᤒᤢᤱᤅᤥ ᤁᤢᤓᤢᤱᤑᤧᤰᤔᤣᤳ ᤀᤥᤔᤧᤵᤔᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤈᤱᤛᤣ᤹ ᤛᤡᤱᤒᤢᤱ ᤁᤧᤕᤢᤱᤒᤠ ᤀᤡᤰᤋᤠᤵᤐᤥ ᤐᤣᤃᤠᤱ॥

¹² ᤁᤖ ᤀᤠᤱᤃᤠ᤹ ᤁᤢᤓᤠ ᤐᤠᤴ ᤏᤡᤱᤘᤠ᤹ ᤂᤥᤔᤠᤏᤢ᤺ᤸᤗᤧ ᤋᤃᤡ. ᤀᤠᤱᤃᤠ᤹ ᤜᤰᤆᤄᤳ ᤜᤠᤱᤕᤢᤰᤐᤧᤸᤗᤧ ᤁᤢᤀᤴᤗᤠᤎᤠᤴ ᤕᤢᤰᤋᤢᤱᤅᤠᤱ ᤘᤕᤠᤱᤗᤥ॥

ᤔᤧᤴᤇᤢᤔᤠᤜᤠ᤹—

¹³ ᤛᤢᤗᤶᤔᤡᤒᤠ ᤔᤧᤴᤇ᤻ᤕᤠᤀᤣ. ᤂᤧᤏᤧ᤹ ᤏᤢ᤺ᤰᤂᤧ᤹. ᤏᤢ᤺ᤰᤂᤧ᤹ᤀᤥ. ᤀᤠᤏᤡᤃᤣ ᤂᤧᤏᤧ᤹ ᤀᤍᤰᤋᤰᤁᤠᤱ ᤀᤥᤔᤧᤳᤋᤠᤛᤡᤃᤧᤖᤥ॥ ᤔᤜᤏᤤᤔᤀᤥ ᤁᤧᤗᤠ᤺ᤱᤒᤠᤜᤠ᤹ ᤀᤥᤔᤧᤔᤧᤳᤋᤢᤛᤡᤒᤠ ᤜᤧᤰᤁᤣ ᤌᤣᤀᤠᤱ ᤂᤡᤏᤡ᤹ ᤀᤠᤱᤃᤠ᤹ ᤕᤠᤵᤔᤡ ᤀᤥᤔᤧᤵᤔᤠ ᤌᤣᤀᤠᤱ ᤏᤡᤱᤘᤠ᤹ ᤁᤧᤈᤥᤃᤢᤶᤒᤠᤒᤣ᥅