ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 5 - LIFOTNT

ᤕᤧᤶᤒᤡᤳᤇᤠ—

¹ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠ᥄ ᤀᤠᤔᤣ᤺ᤰᤂᤡᤶᤛᤠᤔᤣ᥄ ᤀᤠᤱᤃᤠ᤹ ᤀᤠᤓᤢᤱᤀᤡᤰᤁᤥ ᤗᤠᤛᤠᤱᤅᤠᤱ ᤕᤠᤰᤁᤠᤖᤥ. ᤀᤠᤱᤃᤠ᤹ ᤀᤠᤔᤢᤷᤖ ᤏᤢ ᤀᤠᤔᤠᤖᤢᤰ ᤛᤢᤵᤛᤢᤱᤗ ᤘᤠ᤹ᤀᤠᤖᤥ॥ ᤀᤠᤱᤃᤠ᤹ ᤀᤠᤛᤰᤘᤠᤄᤢᤴ ᤏᤢ ᤁᤢᤗᤧᤰᤁᤡᤴ ᤆᤠᤱᤗ ᤘᤠ᤹ᤀᤠᤖᤥ. ᤂᤧᤒᤩᤠᤱ ᤀᤠᤛᤣᤈ᤺ᤱᤘᤠᤴ ᤏᤢ ᤐᤡᤳᤏᤢᤴ ᤌᤢᤅᤢᤱᤗ ᤘᤠ᤹ᤀᤠᤖᤥ॥ ᤆᤧᤶᤔᤧ᤹ᤀᤥ. ᤀᤠᤔᤡ᤺ᤶ ᤀᤠᤴᤈᤢᤶᤛᤣ ᤜᤧᤰᤁᤩᤠᤱ ᤌᤢᤅᤧᤶᤔᤧ᤹ᤀᤥ. ᤗᤢᤱᤔᤠ᤹ ᤜᤡ᤺ᤶᤔᤠᤖᤧ ᤏᤡᤱᤘᤠ᤹ ᤔᤧᤴᤍᤠᤀᤣ ᤌᤧᤶᤒᤠ ᤌᤢᤅᤧᤶᤔᤧ᤹ᤀᤥ᥄

ᤔᤧᤴᤇᤢᤔᤠᤜᤠ᤹— ᤗᤡᤛᤡᤃᤣᤰᤐᤠ ᤛᤠᤶᤗᤥ ᤔᤧᤴᤇᤢᤔᤠ—

² ᤀᤠᤱᤃᤠ᤹ ᤀᤡᤵᤛᤠᤱ. ᤁᤖ ᤀᤠᤏᤡᤱᤘᤠ᤺ᤱᤃ ᤔᤧᤴᤀᤡᤶᤔᤣ ᤘᤕᤧᤖᤥ. ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤸᤗᤧ ᤗᤠᤶᤎᤣ᤺ᤵᤐᤠᤴ ᤂᤰᤂᤰ ᤔᤧᤳᤋᤢᤖᤥ ᤀᤠᤱᤃᤠ᤹ ᤂᤧᤴ ᤛᤧᤵᤔᤠᤱᤔᤥ ᤏᤡᤛᤢᤱᤗᤥ॥ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤣ. ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤗᤡᤱᤍᤥ ᤁᤧᤃᤧᤵᤔᤠᤀᤣ. ᤀᤠᤱᤃᤠ᤹ ᤀᤠᤗᤠᤃᤡ ᤁᤢᤗᤡᤱᤍᤥ ᤁᤧᤃᤧᤵᤔᤠᤀᤣ. ᤀᤠᤱᤃᤠ᤹ ᤛᤡᤃᤠᤱ ᤗᤠ᤺ᤵᤔᤠ ᤑᤠ᤺ᤰᤋᤠᤱᤅᤧ᤹ᤀᤥ॥ ᤛᤣ᤺ᤰᤘᤠ᤺ᤸᤗᤧ ᤀᤠᤎ᤻ᤃᤣᤰᤁᤡᤴ ᤘᤠᤒᤡ᤺ᤴᤍᤧᤀᤠᤱ ᤐᤳᤗᤥ. ᤛᤧᤴᤍᤡᤰ ᤂᤠᤶᤍ᤺ᤶᤒᤧᤸᤗᤧ ᤀᤠᤎᤧᤃᤣᤰ ᤀᤡ᤺ᤴ ᤁᤧᤛᤣ᤺ᤶᤒᤠ ᤐᤥ᤺ᤰᤂᤧᤀᤠᤱ ᤐᤳᤗᤥ॥

ᤕᤧᤶᤒᤡᤳᤇᤠ— ᤔᤧᤴᤇᤢᤔᤠ—

³ ᤀᤠᤱᤃᤠ᤹ ᤀᤠᤈᤠᤱᤅᤡᤴ ᤑᤧᤴᤍᤢᤱᤛᤢᤖᤢᤱᤗᤥ. ᤌᤣᤀᤠᤱ ᤂᤧᤴ ᤀᤠᤱᤃᤠ᤹ ᤕᤠᤶᤔᤥ ᤆᤠᤰᤂᤢᤱᤒᤣ᥅ ᤀᤠᤱᤃᤠ᤹ ᤀᤠᤗᤠᤱᤜᤠ᤹ ᤘᤠᤜᤵᤋᤢᤱᤛᤢᤖᤢᤱᤗᤥ. ᤜᤧᤏᤠᤱ ᤕᤠᤶᤔᤥ ᤂᤧᤱᤜᤠ᤹ ᤆᤡ᤺ᤴᤍᤢᤱᤒᤠᤒᤣ᥅

⁴ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤸᤗᤧ ᤗᤠᤶᤎᤣ᤺ᤵᤐᤥ ᤁᤢᤜᤢᤰᤁᤡᤴ ᤑᤳᤇᤢᤖᤥ. ᤂᤢᤏᤧ᤹ ᤁᤢᤗᤠᤃᤡ ᤀᤠᤗᤢᤱᤔᤠ᤹ ᤋᤡᤰᤋᤡᤰ ᤗ᤹ᤖᤧᤖᤥ॥

⁵ ᤂᤢᤏᤧ᤹ ᤛᤡᤃᤠᤱ ᤗᤠ᤺ᤵ ᤐᤠᤱᤛᤧ ᤐᤥᤃᤠᤱ. ᤀᤠᤱᤃᤠ᤹ ᤗᤠᤶᤎᤣ᤺ᤵᤐᤧᤸᤗᤧ ᤁᤢᤀᤧᤵᤔᤠᤴ ᤋᤧᤶᤛᤢᤱᤗᤥ. ᤂᤧᤴ ᤕᤧᤶᤔᤥ ᤀᤠᤜᤢᤰᤁᤥ ᤔᤢᤷᤖ᤺ᤴ ᤏᤧ᤺ᤰᤋᤢᤀᤠᤱ ᤐᤳᤇᤧᤖᤥ ᤜᤧᤰᤁᤩᤠᤱ ᤀᤠᤜᤢᤰᤆᤥᤴ ᤔᤢᤷᤖ᤺ᤸᤗᤧ ᤁᤢᤘᤠ᤺ᤸᤗᤧ ᤘᤠᤖᤃᤧᤀᤠᤱ ᤐᤳᤇᤧᤖᤥ॥

⁶ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤸᤗᤧ ᤁᤢᤗᤠᤃᤡ ᤗᤠᤶᤎᤣ᤺ᤵᤐᤠᤴ ᤜᤴᤍᤢᤱᤗᤥ. ᤁᤖ ᤂᤢᤏᤧ᤹ᤃ ᤀᤠᤴᤍᤣᤴ ᤐᤣᤀᤠᤱ ᤜᤥ᤺ᤵᤋᤧᤖᤥ᥄ ᤀᤠᤱᤃᤠ᤹ ᤂᤢᤏᤧ᤹ ᤁᤢᤀᤡᤰᤗᤠᤴ ᤆᤠ᤹ᤖᤡᤰ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ᥄ ᤀᤠᤱᤃᤠ᤹ ᤂᤢᤏᤧ᤹ ᤁᤥ᤺ᤳᤋᤢᤱ ᤁᤖ ᤂᤢᤏᤧ᤹ ᤂᤥᤔᤠ ᤔᤧᤴᤇᤢᤰᤐᤠᤴᤗᤥ. ᤀᤠᤱᤃᤠ᤹ ᤂᤢᤏᤧ᤹ ᤀᤢ᤺ᤳᤋᤢᤱ ᤁᤖ ᤌᤣᤀᤠᤱ ᤏᤥᤃᤵ ᤔᤧᤱᤄᤥᤒᤠᤴᤗᤥ॥

⁷ ᤕᤧᤰᤕᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤀᤠᤱᤃᤠ᤹ ᤔᤧᤍᤢᤔᤠᤱᤗᤥ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤧᤜᤡᤵᤋᤠᤱᤅᤠᤱ ᤔᤧᤄᤠ᤺ᤴᤍᤠᤱᤗᤥ. ᤕᤧᤰᤕᤰᤁᤥ ᤗᤢᤱᤎᤠᤰ ᤁᤧᤃᤥᤒᤠᤜᤠ᤹ᤖᤧ ᤀᤠᤒ᤺ᤳᤌᤠᤱᤅᤡᤴ ᤔᤧᤍᤣ᤹ᤖᤢᤖᤥ॥

⁸ ᤕᤖᤢᤛᤗᤧ᤺ᤶᤒᤠ ᤔᤧᤴᤇᤢᤔᤠᤛᤣ. ᤀᤠᤱᤃᤠ᤹ᤏᤢ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ. ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤁᤧᤍᤢᤔᤢᤶᤏᤧ ᤑᤃᤪ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤜᤡ᤺ᤶᤔᤠᤱ ᤘᤠ᤹ᤀᤠᤖᤥ ᤁᤴ ᤂᤢᤏᤧ᤹ ᤔᤧᤳᤋᤧᤶ ᤀᤠᤒᤡᤖᤧᤶᤔᤧ᤹ᤀᤥ॥

ᤔᤧᤴᤇᤢᤔᤠᤜᤠ᤹—

⁹ ᤔᤧᤴᤇᤢᤔᤠᤜᤠ᤹ᤀᤥ ᤛᤠ᤹ᤖᤡᤰ ᤐᤏᤢᤏᤢᤔᤠᤀᤣ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤒᤠᤴ ᤌᤣ ᤘᤣ᤹ᤜᤠ᤹ᤏᤢ᤺ᤸᤗᤧᤀᤠᤱ ᤘᤣ᤹ ᤆᤥ᤺ᤰᤐᤡ᥅ ᤂᤢᤏᤧ᤹ᤀᤥ ᤀᤰᤋᤱᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤐᤠᤴ ᤌᤣ ᤘᤠ᤹ᤒᤣ᥅ ᤂᤧᤏᤧ᤹ᤏᤢ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤒᤠᤸᤗᤧ ᤗᤠᤃᤡ ᤌᤧᤔᤠᤴ ᤁᤧᤕᤧ᤺ᤰᤐᤠ ᤆᤥ᤺ᤰᤐᤣ᥅

ᤔᤧᤴᤇᤢᤔᤠ—

¹⁰ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠ ᤀᤠᤍᤠᤱᤒᤠᤴ ᤏᤢᤒᤠ ᤏᤢ ᤁᤧᤎᤢᤶᤒᤠ ᤆᤥᤰᤗᤥ. ᤂᤢᤏᤧ᤹ᤃ ᤜᤧᤴᤇᤡᤱ ᤌᤡᤒᤥᤱᤅᤥ ᤂᤥᤃᤧᤍᤧᤵᤐᤠ ᤗᤳᤇᤠ ᤕᤧᤶᤒᤡᤳᤇᤠᤖᤥ॥

¹¹ ᤂᤢᤏᤧ᤹ ᤁᤢᤏᤠᤖᤠᤴ ᤀᤡᤛ᤻ᤛᤣ᤺ᤱᤒᤠ ᤛᤠᤶᤔᤩᤠᤱ ᤜᤧᤰᤋᤱᤒᤠ ᤆᤥᤰᤗᤥ. ᤂᤧᤒᤩᤠᤱ ᤁᤢᤎᤧᤃᤣᤰ ᤀᤡ᤺ᤱᤃ ᤁᤧᤏᤠ᤺ᤳᤇᤡᤱᤒᤠ ᤏᤢ ᤁᤠ᤺ᤰᤘᤠ ᤜᤧᤰᤁᤣ ᤔᤠᤰᤁᤧᤗ᤹ᤒᤠ ᤆᤥᤰᤗᤥ॥

¹² ᤂᤢᤏᤧ᤹ ᤁᤢᤔᤡᤰᤁᤡᤴ ᤕᤱᤄᤱᤅᤡᤸᤗᤧ ᤁᤢᤕᤠᤀᤥᤒᤠ ᤐᤢᤳᤋᤢ᤺ᤰᤁᤣ ᤁᤢᤀᤡᤛᤡᤰ ᤆᤥᤰᤗᤥ ᤜᤧᤰᤁᤩᤠᤱ ᤐᤡᤳᤏᤢᤀᤥ ᤘᤠᤖᤢ᤺ᤶᤔᤏᤠᤒᤠ ᤏᤢ ᤜ᤺ᤱᤃᤢ᤺ᤸᤗᤧ ᤁᤢᤕᤠᤶᤗᤧᤱᤒᤥ ᤁᤧᤕᤧᤵᤐᤠ ᤛᤠᤵᤐᤧᤳᤋᤪᤢ᤺ᤰᤔᤠ ᤁᤢᤛᤡᤱ ᤗ᤹ᤖᤥ॥

¹³ ᤛᤡᤍᤠ᤹ ᤏᤢ ᤔᤠᤖᤢᤰᤜᤠ᤹ᤖᤧ ᤁᤧᤍᤡᤶᤒᤠ ᤑᤢᤱᤀᤡᤰ ᤁᤢᤀᤡᤛᤡᤰ ᤂᤢᤏᤧ᤹ ᤁᤢᤏᤧᤍᤧᤱᤒᤠᤜᤠ᤹ ᤐᤏᤢᤏᤢᤒᤠ ᤆᤥᤰᤗᤥ॥ ᤔᤢᤷᤖ᤺ᤸᤗᤧ ᤁᤢᤘᤠ᤺ᤸᤗᤧ ᤘᤠᤃᤧᤖᤰᤐᤠ ᤗᤧᤰᤘᤠᤓᤢᤱ ᤜᤧᤰᤋᤱᤒᤠ ᤂᤢᤏᤧ᤹ ᤁᤢᤶᤒᤪᤠ ᤘᤛᤧᤴ ᤆᤥᤰᤗᤥ॥

¹⁴ ᤂᤢᤏᤧ᤹ ᤁᤢᤜᤢᤰᤁᤡᤴ ᤁᤢᤀᤡ᤺ᤳ ᤁᤧᤍᤠᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤁᤢᤜᤢᤰᤆᤥᤀᤥ ᤔᤢᤎᤡᤱ ᤕᤢᤱᤔᤏᤠᤒᤠ ᤛᤫᤠᤃᤣ᤺ᤵᤜᤠ᤹ ᤘᤠᤖᤢᤀᤠᤱ ᤐᤳᤗᤥ॥ ᤁᤢᤎᤰᤁᤡᤴ ᤁᤢᤓᤡᤱᤗᤢᤱ ᤁᤧᤒᤵᤐᤠ ᤋᤰᤔᤡᤒᤠᤸᤗᤧ ᤁᤢᤃᤣᤱ ᤜᤧᤰᤁᤣ ᤘᤖᤧᤱᤗᤧᤱ ᤁᤧᤗ᤹ᤒᤠ ᤆᤥᤰᤗᤥ॥

¹⁵ ᤁᤢᤗᤠᤱ ᤛᤧᤒᤱᤒᤠᤴ ᤛᤠᤶᤔᤩᤠᤱ ᤐᤠᤰᤂᤥ᤺ᤱᤅᤥ ᤕᤧᤶᤔᤏᤠᤒᤠ ᤗᤧᤶᤓᤠᤗᤢᤱ ᤛᤡᤳᤗᤠᤱᤜᤠ᤹ ᤜᤧᤰᤁᤣ ᤗ᤹ᤖᤥ. ᤂᤢᤏᤧ᤹ ᤗᤧᤒᤏᤠᤏᤒᤠ ᤁᤣ᤺ᤶᤒᤠ ᤛᤠᤶᤔᤠᤛᤡᤱᤜᤠ᤹ᤖᤧ ᤌᤡᤶᤛᤢᤒᤠ ᤁᤥ᤺ᤰᤔᤠ ᤜᤧᤰᤁᤣ ᤁᤢᤜᤠᤱᤘᤠ ᤁᤢᤔᤠᤱᤘᤠ ᤁᤧᤕᤠᤰᤐᤠ ᤔᤡᤔᤡᤍᤡᤱᤒᤠ ᤆᤥᤰᤗᤥ॥

¹⁶ ᤂᤢᤏᤧ᤹ ᤁᤢᤶᤒᤪᤠᤀᤥ ᤁᤢᤈᤠ ᤁᤧᤏᤢ᤹ᤒᤠ ᤐᤠᤴ ᤘᤠ᤹ᤖᤥ. ᤁᤠᤰ ᤁᤢᤒᤠ᤺ᤴᤜᤠ᤹ᤀᤥ. ᤂᤢᤏᤧ᤹ ᤀᤡᤔᤧᤳᤗᤢᤱᤒᤠ ᤆᤥᤰᤗᤥ॥ ᤕᤖᤢᤛᤗᤧ᤺ᤶᤒᤠ ᤔᤧᤴᤇᤢᤔᤠᤛᤣ. ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠ. ᤀᤠᤴᤈᤢᤶᤔᤡᤴ ᤜᤠᤒᤠ ᤁᤴᤗᤥ॥