ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 4 - LIFOTNT

ᤕᤧᤶᤒᤡᤳᤇᤠ—

¹ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤂᤧᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤁᤧᤈᤥ᤺ᤰᤗᤥ᥄ ᤂᤧᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤁᤧᤈᤥ᤺ᤰᤗᤥ᥄ ᤂᤧᤏᤧ᤹ ᤁᤧᤔᤡᤰᤁᤡᤴ ᤐ᤺ᤳᤌᤠᤱ ᤛᤡᤃᤠᤱ ᤐᤢᤳᤋᤢ᤺ᤰᤁᤣ ᤁᤢᤀᤡᤛᤡᤰ ᤗ᤹ᤖᤥ॥ ᤃᤡᤗᤠᤍᤒᤠ ᤁᤥ᤺ᤰᤔᤠᤀᤥ ᤔᤧᤴᤍᤠᤰ ᤗᤢᤵᤜᤠ᤹ ᤛᤱᤔᤠᤱ ᤔᤧᤒᤡᤴᤗ ᤔᤧᤎᤠᤒᤠ ᤜᤧᤰᤁᤣ ᤂᤧᤏᤧ᤹ ᤁᤧᤎᤣᤃᤣᤰ ᤀᤡ᤺ᤴ ᤁᤧᤏᤠᤖᤠᤀᤥ ᤛᤧᤖᤧᤀᤠᤱ ᤐᤳᤗᤥ॥

² ᤀᤠᤸᤗᤥ ᤂᤠᤖᤰ ᤁᤢᤔᤪᤡᤰ ᤏ᤺ᤱᤔᤏᤠᤀᤠᤱ ᤘᤠᤜᤵᤔᤏᤠᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤣ ᤂᤧᤏᤧ᤹ ᤁᤧᤜᤠᤒᤥ᤹ᤒᤠᤜᤠ᤹ ᤑᤛᤢ᤺ᤰᤕᤠ᤺ᤵᤐᤠ ᤆᤥᤰᤗᤥ॥ ᤂᤧᤱᤜᤠ᤹ ᤁᤧᤖᤧᤰ ᤛᤠ᤹ᤖᤡᤰ ᤁᤧᤍᤱᤒᤠ ᤆᤥᤰᤗᤥ ᤁᤧᤜᤠᤒᤥ᤹ᤒᤠᤜᤠ᤹ ᤌᤡᤰᤁᤠᤱ ᤜᤠᤷᤃᤠ᤺ᤱᤘᤠ ᤔᤧᤈᤥᤰᤏᤧᤴᤗᤥ॥

³ ᤂᤧᤏᤧ᤹ ᤁᤧᤶᤒᤪᤠᤛᤣᤴ ᤜᤧ᤺ᤳᤋᤠᤱᤒᤠ ᤀᤡᤍᤠᤰ ᤜᤧᤰᤁᤣ ᤗ᤹ᤖᤥ. ᤂᤧᤏᤧ᤹ ᤁᤧᤒᤠ᤺ᤳᤋᤡᤸᤗᤧ ᤂᤧᤴ ᤆᤠ᤹ᤖᤡᤰ ᤂᤧᤶᤍᤢᤖᤥ॥ ᤂᤧᤏᤧ᤹ ᤁᤢᤏᤧᤍᤧᤱᤒᤠᤴ ᤐ᤺ᤳᤌᤠᤱ ᤛᤡᤃᤠᤱ ᤁᤢᤓᤧᤸᤗᤧᤰ ᤏᤧᤳᤇᤡ ᤆᤥ᤺ᤰᤔᤏᤠᤒᤠ ᤑᤢ᤹ᤗᤧ᤹ᤛᤣ᤹ ᤜᤧᤰᤁᤣᤍᤱᤒᤠ ᤆᤥᤰᤗᤥ॥

⁴ ᤂᤧᤏᤧ᤹ ᤁᤧᤏᤡᤃᤡ᤺ᤱᤔᤠᤴ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤈᤱᤜᤡᤶ ᤜᤧᤰᤁᤣ ᤗ᤺ᤵᤐᤧᤵᤐᤠ ᤏᤢ ᤘᤖᤧᤱᤗᤧᤱᤒᤠ ᤆᤥᤰᤗᤥ॥ ᤁᤧᤛᤡᤳᤗᤠᤀᤥ ᤗᤳᤌᤡᤰ ᤁᤠᤴᤎᤡ ᤐᤳᤗᤥ. ᤂᤧᤱᤃ ᤜᤧᤴᤇᤡᤱᤎᤡᤰ ᤂᤥᤜᤠ᤹ ᤑᤥ᤺ᤶᤔᤏᤠᤒᤠ ᤜᤧᤰᤁᤣ ᤏᤡᤍᤧᤳᤗᤥ॥

⁵ ᤁᤠᤵᤛᤠᤒᤠ ᤐᤧ᤺ᤱᤘᤠᤛᤠ᤺ᤳᤜᤠ᤹ ᤗᤧᤰᤘᤠᤓᤢᤱᤅᤥ ᤆᤠᤖᤠᤶᤛᤡᤒᤠ ᤜᤧᤰᤁᤣ ᤂᤧᤏᤧ᤹ ᤁᤧᤏᤢᤒᤰᤜᤠ᤹ᤀᤠᤱ ᤌᤠ᤺ᤵᤗᤥ॥

⁶ ᤋᤠᤏᤠᤶᤒᤠ ᤛᤢᤖᤡ᤺ᤳᤔᤠᤴ ᤔᤧᤴᤜᤢᤀᤣ ᤌᤠᤖᤡᤰ. ᤔᤠᤰᤆᤡᤄᤢ᤺ᤱᤒᤠᤴ ᤔᤧᤴᤀᤡ᤺ᤱᤛᤡᤱᤅᤣ ᤌᤠᤖᤡᤰ ᤀᤠᤱᤃᤠ᤹ ᤐᤠᤱᤐ᤺ᤳᤑᤢᤱ ᤁᤥ᤺ᤰᤔᤠᤀᤥ. ᤁᤢᤏᤠᤶᤃᤧᤏᤢ᤹ᤒᤠ ᤛᤢᤰᤐᤠ ᤁᤧᤕᤢᤱᤒᤠ ᤌᤧᤃᤢᤀᤥ ᤐᤣ᤺ᤰᤁᤠᤖᤥ॥

⁷ ᤂᤧᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤁᤧᤈᤥᤰ. ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤁᤢᤎᤣᤀᤠᤱ ᤁᤢᤔᤧᤱᤄᤣᤶᤔᤠ ᤁᤧᤜᤥ᤺ᤵᤔᤠ ᤐᤏᤢᤏᤢᤔᤠᤀᤣ᥄

⁸ ᤀᤠᤔᤣ᤺ᤰᤂᤡᤶᤛᤠᤔᤠᤀᤣ. ᤗᤧᤒᤏᤠ᤺ᤴᤒᤠ ᤁᤥ᤺ᤰᤔᤠᤜᤠ᤹ᤀᤥᤗᤠᤶ ᤀᤠᤱᤃᤠ᤹ᤏᤢ ᤐᤡᤳᤇᤡᤖᤥ. ᤗᤧᤒᤏᤠ᤺ᤏᤗᤠᤶᤒᤠ ᤀᤠᤱᤃᤠ᤹ᤏᤢ ᤑᤧᤖᤧ᤹ᤀᤥ ᤀᤔᤠᤏᤠ ᤏᤠᤱᤈᤱᤗᤢᤱᤗᤠᤶᤒᤠ. ᤂᤡᤖᤡᤱᤒᤠᤜᤠ᤹ ᤏᤢ ᤌᤧᤖᤡᤱᤒᤠᤜᤠ᤹ ᤁᤧᤕᤠᤰᤐᤠ ᤛᤣᤏᤡᤖ ᤏᤢ ᤜᤣᤷᤔᤥᤏ ᤁᤥ᤺ᤰᤔᤠᤗᤠᤶᤒᤠ ᤌᤩᤧ᤹ᤀᤥ ᤌᤧᤃᤢ ᤔᤠᤱᤘᤠᤜᤠ᤹ᤗᤠᤶ ᤂᤧᤏᤧ᤹ ᤕᤧ᤹ᤀᤥ॥

⁹ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤔᤠ. ᤀᤠᤱᤃᤠ᤹ ᤀᤠᤔᤣ᤺ᤰᤂᤡᤶᤛᤠᤔᤣ. ᤂᤧᤏᤧ᤹ ᤁᤧᤔᤡᤰ ᤆᤡᤖᤠᤵᤐᤠ ᤌᤡᤰᤗᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤡᤳᤗᤠᤀᤥ ᤁᤧᤘᤠᤖᤢᤒᤠ ᤁᤠᤴᤎᤡ ᤌᤡᤰᤗᤧ ᤀᤠᤱᤃᤠ᤹ ᤀᤠᤗᤢᤱᤔᤠ ᤜᤡ᤺ᤵᤛᤢᤀᤠᤱ ᤘᤠ᤹ᤖᤥ॥

¹⁰ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤔᤠ ᤏᤢ ᤀᤠᤔᤣ᤺ᤰᤂᤡᤶᤛᤠᤔᤣ. ᤂᤧᤏᤧ᤹ ᤆᤠ᤹ᤖᤡᤰ ᤏᤢᤔᤠᤛᤢᤰᤔᤠ ᤁᤧᤈᤥ᤺ᤰᤗᤥ. ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤔᤠᤒᤧᤴ ᤛᤣ᤹ᤈ᤺ᤱᤘᤠ᤺ᤴᤏᤢ᤺ᤸᤗᤧᤀᤠᤱ ᤁᤢᤈᤠᤏᤢ᤹ᤖᤥ. ᤂᤧᤏᤧ᤹ ᤁᤧᤏᤠᤶᤏᤢ᤹ᤔᤧᤴ ᤁᤧᤖᤧᤰ ᤔᤠᤖᤢᤰᤜᤠ᤹ᤏᤢ᤺ᤸᤗᤧᤀᤠᤱ ᤆᤠ᤹ᤖᤡᤰ ᤁᤢᤏᤠᤶᤏᤢ᤹ᤖᤥ॥

¹¹ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤣ. ᤂᤧᤏᤧ᤹ ᤁᤧᤶᤒᤪᤠᤛᤣᤴ ᤛᤰᤘᤠᤗᤧᤰ ᤜᤧᤰᤁᤣ ᤐᤗᤡᤶ ᤗᤡᤶᤗᤥ. ᤂᤧᤏᤧ᤹ ᤁᤧᤸᤛᤥ᤺ᤳᤋᤡᤴ ᤀᤠᤗᤠᤃᤡ ᤛᤰᤘᤠᤄᤢ ᤏᤢ ᤐᤡᤳᤏᤢ ᤜᤧᤰᤁᤣ ᤁᤢᤈᤠᤏᤢ᤹ᤖᤥ॥ ᤂᤧᤏᤧ᤹ ᤁᤧᤈᤠᤱᤅᤡᤴ ᤗᤧᤒᤏᤠ᤺ᤏᤗᤧ ᤁᤢᤏᤠᤶ ᤜᤧᤰᤁᤣ ᤁᤢᤏᤠᤶᤏᤢ᤹ᤖᤥ॥

¹² ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠ. ᤀᤠᤱᤃᤠ᤹ ᤀᤠᤛᤡᤛᤠᤔᤣ᤺ᤳᤋᤣ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤁᤒᤢᤒᤠ ᤑᤢᤱᤀᤡᤰ ᤜᤧᤰᤁᤣ ᤁᤧᤗ᤹ᤖᤥ. ᤜᤧᤰᤁᤩᤠᤱ ᤔᤧᤍᤧᤵᤋᤢᤀᤠᤱ ᤁᤧᤒᤵᤐᤠ ᤀᤠᤒᤠᤅᤣ ᤂᤢᤴᤇᤡ᤹ ᤘᤠᤒᤢᤴᤍᤠᤰ ᤜᤧᤰᤁᤣ ᤁᤧᤗ᤹ᤖᤥ.

¹³ ᤂᤧᤏᤧ᤹ ᤁᤧᤏ᤺ᤰᤜᤠ᤹ ᤑᤢ᤹ᤗᤧᤛᤣ᤹ᤀᤡᤰᤁᤧᤴ ᤜᤧᤰᤁᤣ ᤗ᤹ᤖᤥ. ᤏᤢ᤺ᤒ᤻ᤏᤢᤒᤠ ᤛᤡᤱᤛᤣ᤹ᤜᤠ᤹ ᤁᤧᤎᤥ᤺ᤰᤐᤠ ᤛᤣᤴᤍᤡ᤹ᤀᤥ ᤜᤢ᤺ᤵᤔᤏᤠᤒᤠ ᤆᤠᤴ. ᤐᤠᤱᤒ᤺ᤳ ᤑᤢᤱᤔᤠ.

¹⁴ ᤆᤋᤠᤔᤛᤡ. ᤆᤠ᤺ᤴᤍᤪᤢᤰ. ᤗᤢᤵᤗᤠ᤺ᤰ. ᤛᤥᤖᤱᤒᤠ ᤜᤧᤰᤁᤩᤠᤱ ᤁᤧᤖᤧᤰ ᤐᤖᤡᤰᤐᤠ ᤛᤢᤰᤐᤠᤜᤠ᤹. ᤂᤧᤵᤔᤥ ᤔᤢᤷᤖ ᤏᤢ ᤂᤠᤶᤍᤥᤗᤡ. ᤁᤠᤰ ᤐᤖᤡᤰᤗᤧᤴ ᤏᤢᤒᤠ ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰᤜᤠ᤹॥

¹⁵ ᤂᤧᤏᤧ᤹ᤃ ᤑᤢᤱᤀᤡᤰᤁᤥᤒᤠ ᤘᤠᤒᤢᤴᤍᤠᤰᤘᤠ. ᤗᤧᤒᤏᤠᤏᤒᤠ ᤁᤥ᤺ᤰᤔᤠᤗᤠᤶᤒᤠ ᤁᤧᤃᤢᤱᤒᤠ ᤁᤧᤕᤢᤒᤠ ᤘᤜ᤺ᤱ ᤛᤣᤛᤣᤒᤠ ᤁᤢᤈᤠ ᤁᤧᤏᤢ᤹ᤒᤠ ᤆᤫᤠ᤺ᤳᤏᤧᤖᤥ॥

ᤔᤧᤴᤇᤢᤔᤠ—

¹⁶ ᤌᤠᤱᤃᤧᤳ ᤐᤡᤛᤠᤱᤒᤠ ᤛᤢᤖᤡᤳᤋᤣ. ᤜᤢᤖᤧ᤹ᤀᤥ. ᤗᤠᤱᤃᤧᤳ ᤐᤡᤛᤠᤱᤒᤠ ᤛᤠᤶᤔᤡ᤺ᤳᤋᤣ. ᤀᤠᤓᤢᤱᤀᤡᤰᤁᤥ ᤐᤅᤧ᤹ᤀᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤠᤶᤏᤢ᤹ᤔᤠ ᤑᤢᤱᤏᤠᤶᤔᤡᤴ ᤁᤧᤖᤧᤰ ᤐᤡᤛᤠᤱ ᤛᤧᤖᤖᤥ॥ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ. ᤁᤢᤓᤢᤱᤀᤡᤰᤁᤥ ᤋᤠᤖᤖᤥ᥄ ᤂᤧᤶᤒᤩᤠᤱ ᤛᤠ᤹ᤖᤡᤰ ᤏᤢ᤺ᤒ᤻ᤏᤢᤒᤠ ᤛᤡᤱᤛᤣ᤹ᤜᤠ᤹ ᤆᤖᤖᤥ᥄