ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 3 - LIFOTNT

ᤔᤧᤴᤇ᤻ᤕᤠ᤺ᤸᤗᤧ ᤁᤢᤛᤧᤵᤔᤠᤱ

¹ ᤛᤧᤴᤍᤡᤰ ᤌᤰᤔᤠ ᤀᤠᤱᤃᤠ᤹ ᤀᤠᤏᤧᤳᤏᤠᤀᤥ. ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤴ ᤛᤧᤵᤔᤠᤱ ᤔᤠᤰᤋᤢᤱᤗᤥ. ᤀᤠᤱᤃᤠ᤹ ᤂᤢᤏᤧ᤹ ᤁᤥ᤺ᤳᤋᤢᤱᤗᤥ ᤁᤖ ᤀᤠᤱᤃᤠ᤹ ᤂᤢᤏᤧ᤹ ᤔᤧᤍᤢᤔᤢᤱᤅᤡᤴᤗᤥ॥

² ᤀᤠᤱᤃᤠ᤹ ᤐᤥᤃᤠᤱᤅᤠᤱ ᤕᤧᤰᤕᤰᤁᤥ ᤁᤥ᤺ᤳᤋᤢᤱᤗ ᤀᤥᤔᤧᤳᤋᤢᤱᤗᤥ. ᤂᤧᤵᤔᤥᤒᤠ ᤔᤠᤖᤠᤶᤜᤠ᤹ ᤏᤢ ᤗᤠᤶᤍᤥᤜᤠ᤹ᤀᤥ ᤂᤢᤏᤧ᤹ ᤜᤰᤛᤢᤱᤗᤥ॥ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤁᤥ᤺ᤳᤋᤢᤱᤗᤥ ᤁᤖ ᤀᤠᤱᤃᤠ᤹ ᤂᤢᤏᤧ᤹ ᤔᤧᤱᤄᤥᤒᤠᤴᤗᤥ॥

³ ᤕᤧᤰᤕᤰ ᤁᤶᤒᤪᤠᤱ ᤁᤧᤔᤧᤵᤐᤠᤜᤠ᤹ᤖᤧ ᤔᤧᤏᤡᤛᤠᤱᤗᤥ॥ ᤀᤠᤱᤃᤠ᤹ ᤂᤧᤱᤜᤠ᤹ ᤛᤧ᤺ᤴᤗᤠᤵᤋᤢᤱᤛᤡᤱᤗᤥ. “ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤌᤣ ᤂᤡᤏᤡ᤹ ᤁᤧᤏᤡᤛᤢᤶᤒᤡ᥅”

⁴ ᤀᤠᤱᤃᤠ᤹ ᤂᤧᤱᤜᤠ᤹ ᤐᤰᤌᤠᤱᤛᤡᤱᤗᤥ ᤜᤧᤰᤁᤩᤠᤱ ᤔᤡᤛᤠᤰ ᤏᤠᤏᤠᤰ ᤁᤧᤖᤠᤱᤅᤠᤱᤗᤰ ᤘᤕᤠᤱᤗᤥ ᤜᤧᤰᤁᤣ᤺ᤸᤗᤧ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤋᤢᤔᤢᤱᤗᤥ॥ ᤀᤠᤱᤃᤠ᤹ ᤀᤠᤶᤔᤠᤖᤧ ᤁᤢᤜᤡᤶᤔᤥ. ᤀᤠᤱᤃᤠ᤹ ᤛᤠᤘᤠ᤺ᤴᤇᤡᤱᤅᤠᤒᤠ ᤕᤠᤰᤑᤠᤱᤅᤥ ᤔᤧᤴᤍᤣ᤹ᤀᤣ ᤌᤠᤖᤡᤰ ᤀᤠᤱᤃᤠ᤹ ᤂᤢᤏᤧ᤹ ᤋᤧᤶᤛᤢᤱᤅᤠᤱ ᤐᤣ᤺ᤰᤔᤠ ᤔᤧᤶᤓᤠ᤺ᤰᤐᤠᤱᤗᤥ॥

⁵ ᤕᤖᤢᤛᤗᤧᤔᤒᤠ ᤔᤧᤴᤇᤢᤔᤠᤛᤣ᥄ ᤀᤠᤱᤃᤠ᤹ᤏᤢ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ. ᤐᤧ᤺ᤱᤘᤠ ᤏᤢ ᤛᤩᤠ᤺ᤰᤐᤧᤸᤗᤧ ᤁᤢᤔᤡᤱᤅᤥ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ ᤂᤧᤶᤒᤩᤠᤱ ᤀᤰᤂᤣ ᤐᤠ᤺ᤳᤋᤧᤶᤔᤧ᤹ᤀᤥ ᤀᤠᤴᤇᤡᤃᤣ ᤗᤢᤱᤔᤠ᤹ ᤜᤡ᤺ᤵᤏᤧᤛᤡᤃᤧᤒᤠ ᤐᤠ᤺ᤴᤏᤥ ᤀᤠᤴᤜᤶᤛᤧᤶᤔᤡᤴᤏᤧ᤹ᤀᤥ॥

ᤛᤢᤶᤛᤡᤃᤣᤰᤐᤠ ᤛᤠᤶᤗᤥ ᤔᤧᤴᤇᤢᤔᤠ—

⁶ ᤗᤧᤱᤜᤱᤒᤠᤜᤠ᤹ᤖᤧ ᤔᤧᤛᤱᤄᤢᤒᤠ ᤛᤠᤱᤛᤡᤱ ᤜᤧᤰᤋᤱᤒᤠ ᤛᤢᤰᤐᤠ ᤏᤢ ᤔᤢᤷᤖᤗᤧ ᤁᤢᤏᤠᤶᤏᤢ᤹ᤔᤠ ᤀᤡᤛᤣ᤺ᤱᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥᤗᤠᤶ ᤁᤧᤍᤠᤒᤠ ᤁᤴ ᤔᤡ᤺ᤰᤂᤢ᤹ ᤁᤧᤀᤡᤰᤛᤡᤱᤒᤠᤀᤠᤱ ᤁᤧᤎᤠᤱᤒᤧᤴ ᤜᤠ᤺ᤳᤏᤧᤒᤣ᥅

⁷ ᤀᤥᤔᤧᤳᤋᤧᤶᤔᤧ᤹. ᤛᤥᤗᤥᤔᤏ ᤜᤠᤱᤅᤡᤸᤗᤧ ᤁᤢᤗᤠᤎᤠᤴ ᤋᤢᤰᤐᤥᤱ ᤌᤰᤗᤡᤜᤠᤱ ᤔᤏᤠ ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤌᤰᤛᤢᤒᤠᤜᤠ᤹ ᤆᤡᤒᤢ᤺ᤳᤔᤧᤒᤢ᤺ᤳᤋᤢᤀᤠᤱ ᤌᤰᤛᤢᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤱᤛᤥᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤵᤜᤠ᤹ ᤑᤧᤴᤗ ᤐᤳᤗᤥ॥

⁸ ᤂᤧᤱᤜᤠ᤹ ᤁᤧᤖᤧᤰ ᤋᤠᤓᤣ ᤕᤠᤱᤔᤠ ᤁᤧᤗᤧᤒᤠ ᤔᤧᤈᤥᤰᤗᤥ. ᤌᤱᤅᤥ ᤂᤧᤱᤜᤠ᤹ ᤕᤧᤳᤋᤡᤶᤒᤠ ᤁᤧᤒᤥᤱᤒᤠ ᤌᤰᤛᤢᤒᤠᤛᤡᤖᤥ॥ ᤁᤧᤖᤧᤰᤗᤧ ᤂᤢᤏᤡ᤹ ᤛᤧᤒᤱᤒᤥ ᤋᤠᤓᤣ ᤔᤧᤜᤣᤛᤢᤖᤥ ᤜᤧᤰᤁᤩᤠᤱ ᤛᤧᤴᤍᤡᤰ ᤏᤡᤱᤔᤡ᤺ᤸᤗᤧ ᤀᤠᤓᤵᤐᤡ ᤑᤠ᤹ᤀᤠᤱ ᤂᤢᤏᤧ᤹ ᤔᤧᤃᤥᤛᤢᤖ ᤔᤧᤘᤠ᤹ᤖᤥ॥

⁹ ᤛᤥᤗᤥᤔᤏ ᤜᤠᤱᤅᤡᤸᤗᤧ ᤗᤧᤒᤏᤠ᤺ᤴᤒᤠ ᤛᤡᤱᤅᤡᤴ ᤋᤠᤖᤢᤖᤥ ᤜᤧᤰᤁᤩᤠᤱ ᤀᤠᤵᤑᤣᤰ ᤁᤢᤗᤠᤃᤡ ᤁᤢᤗᤠᤎᤠ᤺ᤴ ᤆᤥᤃᤢᤒᤠᤖᤥ॥

¹⁰ ᤁᤢᤍᤰᤗᤠᤱᤜᤠ᤹ ᤕᤢᤵᤐᤠ᤺ᤸᤗᤧ ᤛᤢ᤺ᤵᤔᤏᤠᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤏᤠ᤺ᤶᤛᤡᤱᤔᤠ ᤋᤧᤴᤏᤡᤴ ᤛᤠᤶᤔᤩᤠᤱᤗᤠᤶᤒᤠ ᤔᤧᤈᤥᤃᤢᤀᤠᤱ ᤘᤠ᤹ᤖᤥ॥ ᤂᤧᤸᤗᤧ ᤁᤢᤕᤢᤱᤔᤠᤍᤧᤴᤏᤡᤴ ᤕᤖᤢᤛᤗᤧᤔᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤗᤢᤱᤔᤠ᤹ ᤐᤜᤡ᤺ᤶ ᤔᤧᤓᤕᤢᤒᤠᤖᤥ ᤂᤧᤴ ᤐᤠᤖᤠᤴᤗᤠ ᤋᤣ᤺ᤳᤋᤡᤸᤗᤧ ᤋᤧᤵᤔᤏᤠᤒᤠ ᤆᤥᤰᤗᤥ॥

¹¹ ᤛᤡᤕᤥᤏᤒᤠ ᤔᤧᤴᤇᤢᤔᤠᤛᤣ. ᤑᤧᤖᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤛᤥᤗᤥᤔᤏ ᤜᤠᤱᤅᤡᤴ ᤀᤥᤔᤧᤳᤋᤧᤶᤔᤧ᤹ᤀᤥ॥ ᤁᤢᤶᤔᤠᤖᤧ ᤂᤢᤏᤧ᤹ ᤁᤢᤔᤣ᤺ᤰᤂᤡᤶ ᤕᤧᤴᤏᤥ. ᤏᤡᤱᤘᤠ᤹ ᤋᤠᤔᤠ ᤏᤢ ᤛ᤺ᤵᤔᤠ ᤕᤧᤴᤏᤥ. ᤂᤢᤏᤧ᤹ ᤂᤢ᤺ᤰᤋᤢᤒᤠ ᤋᤡᤘᤠᤈᤥᤴ ᤂᤢᤏᤧ᤹ ᤁᤢᤎᤧᤃᤣ᤺ᤰᤁᤥ ᤐᤳᤗᤥ॥