ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 2 - LIFOTNT

¹ ᤀᤠᤱᤃᤠ᤹ᤃ ᤛᤠᤖᤥᤏᤒᤠ ᤗᤥᤈᤡ ᤑᤢᤱᤀᤠᤖᤥ. ᤏᤧᤘᤠᤗᤠ ᤗᤢᤶᤔᤥᤒᤠ ᤗᤧᤰᤘᤠ ᤑᤢᤱᤀᤠᤖᤥ॥

ᤕᤧᤶᤒᤡᤳᤇᤠ—

² ᤋᤡᤱᤃᤪᤣᤰ ᤗᤢᤶᤔᤥ ᤂᤥᤃᤧᤍᤧᤵᤐᤠ ᤗᤧᤰᤘᤠ ᤑᤢᤱ ᤜᤧᤰᤁᤣ ᤔᤧᤴᤇ᤻ᤕᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤜᤡ᤺ᤵᤋᤢᤱᤔᤧᤴ ᤘᤠ᤹ᤖᤥ॥

ᤔᤧᤴᤇᤢᤔᤠ—

³ ᤋᤠᤶᤓᤢᤱ ᤛᤡᤱᤒᤢᤱᤜᤠ᤹ ᤗᤢᤶᤔᤥ ᤗᤳᤇᤠ ᤏᤠᤱᤛᤣ᤹ ᤛᤡᤱᤒᤢᤱ ᤜᤧᤰᤁᤣ ᤌᤠᤱᤒᤧᤴᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤘᤠ᤹ᤖᤥ॥ ᤂᤧᤸᤗᤧ ᤀᤡ᤺ᤵᤋᤢᤒᤠ ᤏᤠᤶᤈᤡ᤺ᤰᤂᤥ᤹ ᤛᤡᤃᤠᤱ ᤕᤢᤱᤔᤠ ᤀᤠᤛᤡᤖᤠ᤹ ᤌᤠᤱᤗᤥ ᤂᤧᤸᤗᤧ ᤁᤢᤈᤠ᤹ᤀᤡᤴ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤈᤠᤏᤢ᤹ᤖ ᤏᤡᤛᤢᤱᤗᤥ॥

⁴ ᤂᤢᤏᤧ᤹ ᤀᤠᤱᤃᤠ᤹ ᤁᤢᤈᤠᤔᤠ ᤁᤢᤎᤢᤱᤔᤠᤍᤧᤴᤏᤥ ᤋᤣ᤹ᤖᤠᤱᤗᤥ ᤜᤧᤰᤁᤩᤠᤱ ᤀᤠᤛᤶᤍᤠᤱ ᤗᤢᤱᤔᤠ᤹ ᤜᤡ᤺ᤶᤔᤠ ᤏᤡᤛᤠᤏ ᤑᤳᤇᤢᤖᤥ॥

⁵ ᤆᤧᤸᤗᤧᤰᤛᤣ᤹ ᤂᤧᤰᤕᤠ᤺ᤸᤗᤧ ᤀᤠᤱᤃᤠ᤹ ᤁᤧᤎᤢᤶᤔᤠ ᤆᤥᤃᤠᤱᤅᤧ᤹ᤀᤥ. ᤏᤠᤱᤛᤣ᤹ᤀᤡᤸᤗᤧ ᤀᤠᤱᤃᤠ᤹ ᤀᤠᤕᤠᤶ ᤆᤠᤱᤈᤠᤱ ᤆᤥᤃᤧ᤹ᤀᤥ॥ ᤗᤢᤱᤔᤠ᤹ ᤜᤡ᤺ᤶᤔᤧᤸᤗᤧ ᤀᤠᤱᤃᤠ᤹ ᤔᤧᤴᤎᤢᤶᤔᤏᤠᤒᤠ ᤐᤥ᤺ᤰᤂᤠᤱᤅᤠᤱ ᤘᤠ᤹ᤀᤠᤖᤥ॥

⁶ ᤁᤢᤓᤧᤴᤇᤠᤱ ᤜᤢᤰᤁᤡᤴ ᤀᤠᤎ᤻ᤃᤣᤰ ᤛᤡᤃᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤁᤢᤈᤢᤵᤛᤠᤱ ᤜᤢᤰᤁᤡᤸᤗᤧ ᤀᤠᤱᤃᤠ᤹ ᤜᤧᤵᤐᤠᤖᤥ॥

⁷ ᤕᤖᤢᤛᤗᤧᤔᤒᤠ ᤔᤧᤴᤇᤢᤔᤠᤛᤣ᥄ ᤀᤠᤱᤃᤠ᤹ᤏᤢ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ. ᤐᤧ᤺ᤱᤘᤠ ᤏᤢ ᤛᤩᤠ᤺ᤰᤐᤧᤸᤗᤧ ᤁᤢᤔᤡᤱᤅᤥ ᤔᤠᤱᤜᤢᤵ ᤆᤥᤃᤧᤶᤔᤧ᤹ᤀᤥ ᤂᤧᤶᤒᤩᤠᤱ ᤀᤰᤂᤣ ᤐᤠ᤺ᤳᤋᤧᤶᤔᤧ᤹ᤀᤥ ᤀᤠᤴᤇᤡᤃᤣ ᤗᤢᤱᤔᤠ᤹ ᤜᤡ᤺ᤵᤏᤧᤛᤡᤃᤧᤒᤠ ᤐᤠ᤺ᤴᤏᤥ ᤀᤠᤴᤜᤶᤛᤧᤶᤔᤡᤴᤏᤧ᤹ᤀᤥ॥

ᤏᤡᤛᤡᤃᤣᤰᤐᤠ ᤛᤠᤶᤗᤥ ᤔᤧᤴᤇᤢᤔᤠ—

⁸ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤸᤗᤧ ᤁᤢᤀᤡᤰᤗᤠᤴ ᤂᤧᤵᤛᤢᤱᤗᤥ. ᤁᤥ᤺ᤰᤔᤠ ᤑᤠᤱᤈᤱ ᤛᤶᤎᤠᤱ ᤗᤥ᤺ᤰᤗ ᤐᤡᤴᤗᤥ ᤜᤧᤰᤁᤩᤠᤱ ᤌᤧᤃᤢ ᤔᤠᤱᤘᤠᤜᤠ᤹ ᤏᤠ᤺ᤰᤛᤢᤖ॥

⁹ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤠᤴ ᤆᤠ᤺ᤳᤆᤠ᤺ᤵᤐᤠ ᤐᤧ᤺ᤱᤘᤠ ᤜᤧᤰᤁᤣ ᤗ᤹ᤖᤥ. ᤀᤡᤃᤪ ᤌᤠᤱᤒᤧᤴ ᤂᤡᤖᤣᤒᤠ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤢᤏᤧ᤹ᤃ ᤀᤠᤏᤡᤃᤣ ᤗᤢᤱᤎᤠᤰᤁᤡᤸᤗᤧ ᤁᤢᤀᤣᤃᤠᤱ ᤕᤧᤵᤗᤥ. ᤜᤧᤰᤁᤩᤠᤱ ᤐᤣᤎᤠ᤺ᤵᤐᤥᤗᤠᤶᤒᤠ ᤀᤥᤔᤖᤥ ᤂᤧᤒᤩᤠᤱ ᤐᤣᤎᤠ᤺ᤵᤐᤥᤒᤠ ᤜᤱᤜᤱᤍᤠᤱᤒᤠᤗᤠᤶ ᤔᤡᤰᤆᤥ ᤔ᤹ᤖᤥ॥

¹⁰ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤀᤠᤱᤃᤠ᤹ᤏᤢ ᤋᤠ᤹ᤈᤧᤱᤗᤥ॥ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤐᤥᤃᤧ᤹ᤀᤥ. ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤀᤠᤱᤃᤠ᤹ᤏᤢ ᤑᤧᤖᤧ᤹ᤀᤥ॥

ᤕᤧᤶᤒᤡᤳᤇᤠ—

¹¹ ᤆᤢᤱᤛᤡ᤺ᤰᤔᤠᤴ ᤗᤧᤰᤋᤧ ᤐᤣᤖᤥ. ᤘᤜᤡᤳ ᤌᤠᤔᤠᤴᤏᤠᤱ ᤔᤠᤖᤧᤒᤧᤖᤥ.

¹² ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤑᤢᤱᤜᤠ᤹ ᤑᤧᤰᤋᤧᤀᤠᤱ ᤕᤢᤱᤗᤥ. ᤛᤠᤶᤗᤥᤔᤠ ᤕᤧᤶᤔᤡᤴ ᤀᤠᤶᤓᤠ ᤁᤴᤗᤥ. ᤀᤠᤏᤡ᤹ ᤗᤠᤈᤣ᤹ᤀᤥ ᤐᤢᤳᤋᤢ᤺ᤰᤁᤣᤜᤠ᤹ ᤔᤧᤒᤠ᤺ᤵᤐᤠ ᤂᤧᤶᤍᤧᤳᤗᤥ॥

¹³ ᤐ᤺ᤳᤇᤣ᤹ᤜᤠ᤹ ᤋᤢᤶᤔᤠ ᤀᤡ᤺ᤳᤋᤧᤀᤠᤱ ᤘᤠ᤹ᤖᤥ. ᤛᤢᤖᤡᤳᤋᤧᤴ ᤆᤧᤸᤗᤧᤰᤛᤣ᤹ ᤑᤢᤱᤜᤠ᤹ᤖᤧ ᤁᤢᤏᤠᤶᤔᤡᤸᤗᤧ ᤌᤡᤶᤛᤢᤀᤠᤱ ᤘᤠ᤹ᤖᤥ॥ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤑᤧᤖᤧ᤹ᤀᤥ. ᤀᤠᤱᤃᤠ᤹ ᤐᤏᤢ ᤀᤠᤏᤢᤔᤣ. ᤀᤠᤱᤃᤠ᤹ᤏᤢ ᤑᤧᤖᤧ᤹ᤀᤥ॥

¹⁴ ᤕᤠᤰᤐᤣᤴ ᤁᤠ᤹ᤖᤧᤀᤠᤱ ᤂᤧᤸᤗᤧᤰ ᤐ᤺ᤰᤂᤧᤒᤠ ᤋᤧᤴᤏᤥ ᤁᤧᤈᤡᤱᤛᤡᤱᤒᤠᤀᤠᤱ ᤁᤧᤕᤢᤱᤒᤠ ᤀᤠᤛᤠᤵᤐᤧᤳᤋᤪᤢ᤺ᤰᤔᤠᤏᤧᤖᤥ. ᤂᤧᤏᤧ᤹ ᤏᤢᤔᤠ ᤁᤧᤏᤠᤖᤠᤴ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤰᤋᤠᤱᤅᤧ᤹ᤀᤥ. ᤂᤧᤏᤧ᤹ ᤛᤣ᤺ᤶᤛᤣ᤺ᤶᤒᤠ ᤁᤧᤀᤡᤰᤗᤠᤴ ᤂᤧᤶ ᤐᤠᤱᤄᤠᤱᤅᤧ᤹ᤀᤥ᥄

¹⁵ ᤀᤠᤴᤇᤡ᤹ ᤆᤧᤸᤗᤧᤰᤛᤣᤸᤗᤧ ᤁᤢᤓᤢᤱᤑᤧᤰᤔᤣᤳ ᤑᤧᤰᤔᤠ ᤕᤧᤶᤔᤥ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤡᤴ ᤑᤧᤳᤗᤠ᤺ᤶᤔᤠᤏᤢ᤺ᤸᤗᤧ ᤋᤃᤡᤀᤣ ᤂᤧᤴ ᤆᤢᤈᤢᤰᤛᤠ ᤁᤡᤎᤡᤒᤠᤜᤠ᤹ ᤋᤧᤶᤛᤧᤛᤧ᤹ᤀᤥ॥

ᤔᤧᤴᤇᤢᤔᤠ—

¹⁶ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤒᤠᤴ ᤀᤠᤱᤃᤠ᤹ᤀᤡᤴᤏᤣᤖᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤢᤏᤧ᤹ᤀᤧᤴᤏᤠᤖᤥ॥ ᤂᤢᤏᤧ᤹ᤃ ᤗᤧᤰᤘᤠᤓᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤢᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ ᤆᤠᤖᤠᤶᤛᤢᤛᤡᤖᤥ.

¹⁷ ᤋᤠᤏᤠᤶᤒᤠ ᤛᤢᤖᤡᤳᤋᤧᤴ ᤔᤧᤴᤜᤢᤀᤣ ᤌᤠᤖᤡᤰ ᤂᤶᤓᤩᤠᤱ ᤂᤠᤎᤠᤶᤔᤠᤏᤢ᤺ᤸᤗᤧ ᤋᤃᤡ॥ ᤗᤢᤱᤔᤠ᤹ ᤜᤡ᤺ᤵᤏᤧᤔᤣ. ᤏᤢ᤺ᤰᤂᤧ ᤋᤩᤧ᤹ᤀᤥ. ᤒᤣᤋᤣᤖᤒᤠ ᤁᤥ᤺ᤰᤔᤠᤀᤥ ᤂᤡᤖᤣᤒᤠᤴ ᤏᤢ ᤐᤧ᤺ᤱᤘᤠᤴ ᤜᤧᤰᤁᤣ ᤂᤧᤴ ᤜᤧᤰᤁᤣ ᤂᤧᤏᤧ᤹ᤀᤠᤱ ᤏᤢ᤺ᤰᤂᤧ ᤋᤩᤧ᤹ᤀᤥ॥