ᤛᤥᤗᤥᤔᤏᤖᤧ ᤁᤢᤛᤠᤶᤗᤥ 1 - LIFOTNT

¹ ᤛᤥᤗᤥᤔᤏᤖᤧ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤛᤠᤶᤗᤥᤜᤠ᤹ ᤜᤠᤒᤠ ᤁᤴᤗᤥ—

ᤌᤡᤰᤛᤡᤃᤣᤰᤐᤠ ᤛᤠᤶᤗᤥ ᤔᤧᤴᤇᤢᤔᤠ—

² ᤂᤧᤏᤧ᤹ ᤁᤧᤶᤒᤪᤠ᤺ᤸᤗᤧ ᤀᤠᤱᤃᤠ᤹ ᤆᤢᤵ ᤁᤧᤔᤧᤳᤋᤠᤖᤥ. ᤂᤧᤏᤧ᤹ ᤁᤧᤗᤢᤱᤔᤠ᤹ ᤜᤡ᤺ᤵᤔᤠᤴ ᤛᤣ᤹ᤈ᤺ᤱᤘᤠ᤺ᤴᤏᤢ᤺ᤸᤗᤧᤀᤠᤱ ᤏᤢᤒᤠ ᤆᤥᤰᤗᤥ॥

³ ᤂᤧᤏᤧ᤹ ᤁᤧᤏᤠᤶᤏᤢ᤹ᤔᤠᤴ ᤆᤠ᤹ᤖᤡᤰ ᤛᤡᤖᤠ᤹ᤁᤧᤎᤠᤱᤒᤠ ᤆᤥᤰ. ᤂᤧᤏᤧ᤹ ᤁᤧᤔᤡᤱᤅᤡᤴ ᤑᤢᤱᤏᤠᤶ ᤜᤢᤱᤔᤏᤠᤒᤠ ᤜᤧᤰᤁᤣ ᤗ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤔᤧᤴᤇᤢᤔᤠ ᤜᤡᤴᤈᤠ᤹ᤜᤠ᤹ᤖᤧ ᤂᤧᤏᤧ᤹ ᤗᤢᤱᤔᤠ᤹ ᤁᤧᤴᤜᤡ᤺ᤵᤗᤥ॥

⁴ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤣ᤹ᤖᤠᤱᤅᤧ᤹ᤀᤥ. ᤀᤠᤴᤇᤡ᤹ ᤂᤧᤳᤏᤧᤳᤇᤡᤀᤠᤱ ᤐᤡᤳᤇᤡᤖᤥ. ᤂᤧᤏᤧ᤹ ᤀᤠᤱᤃᤠ᤹ ᤀᤠᤜᤠᤱ ᤐᤥ᤺ᤰᤂᤧ᤹ᤀᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤠᤰᤑᤠᤀᤥ ᤋᤣ᤹ᤖᤠᤱᤅᤧ᤹ᤀᤥ॥ ᤀᤠᤴᤇᤡ᤹ ᤛᤥᤛᤥᤖᤡᤰ ᤛ᤺ᤳᤇᤡᤖᤥ. ᤛᤣ᤹ᤈ᤺ᤱᤘᤠ᤺ᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤧᤏᤧ᤹ ᤁᤧᤗᤢᤱᤔᤠ᤹ ᤜᤡ᤺ᤶᤔᤧᤴ ᤀᤡ᤺ᤳᤇᤢᤖᤥ॥ ᤁᤧᤖᤧᤰ ᤔᤧᤴᤇᤢᤔᤜᤠ᤹ᤖᤧ ᤂᤧᤏᤧ᤹ ᤗᤢᤱᤔᤠ᤹ ᤁᤧᤶᤜᤡ᤺ᤵᤗᤥ॥

ᤋᤣ᤺ᤱᤈᤢᤶᤜᤠ᤹— ᤔᤧᤴᤇᤢᤔᤠ—

⁵ ᤕᤖᤢᤛᤗᤧ᤺ᤶᤔᤥᤒᤠ ᤔᤧᤴᤇᤢᤔᤠᤛᤣ᥄ ᤀᤠᤱᤃᤠ᤹ ᤔᤠᤰᤛᤧᤶᤛᤧᤶᤔᤠ ᤆᤥ᤺ᤰᤁᤠᤖᤥ ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤏᤢᤔᤠ ᤆᤥ᤺ᤰᤁᤠᤖᤥ. ᤁᤣᤍᤠᤖᤒᤠ ᤕᤧ᤺ᤱᤄᤠᤍᤧᤴᤏᤥ ᤛᤠ᤺ᤱᤃᤠᤜᤡᤶ ᤜᤧᤰᤁᤣ ᤔᤠᤰᤁᤧᤗ᤹ᤔᤠ. ᤜᤧᤰᤁᤣᤛᤠᤱ ᤛᤥᤗᤥᤔᤏᤖᤧ ᤁᤢᤜᤠᤱᤜᤡᤶᤔᤥᤒᤠ ᤑᤥ᤺ᤴᤍᤠ ᤜᤧᤰᤁᤣ ᤐᤏᤢᤏᤢᤔᤠ॥

⁶ ᤏᤠᤶᤔᤡᤸᤗᤧ ᤛᤧ᤺ᤰᤋᤠᤱᤅᤠᤱ ᤔᤠᤰᤋᤠᤱᤔᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤧᤏᤡᤱᤘᤠ᤹ᤔᤠᤖ ᤀᤥᤔᤧᤔᤳᤋᤠᤱᤅᤧᤴᤏᤧ᤹. ᤀᤠᤶᤓᤢ᤹ ᤀᤠᤴᤛᤠ᤹ᤜᤠ᤹ ᤀᤠᤱᤃᤠ᤹ᤏᤢ ᤂᤢᤏᤡ᤹ ᤛᤡᤰ ᤐᤥᤃᤧᤀᤠᤱ ᤘᤕᤧᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤀᤠᤱᤃᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤒᤠᤱᤄᤠᤱᤅᤠᤱ ᤘᤕᤧᤖᤥ॥ ᤀᤠᤱᤃᤠ᤹ ᤀᤠᤵᤑᤣᤰ ᤀᤥᤔᤳᤇᤡᤱᤔᤠ ᤆᤥ᤺ᤰᤛᤡᤱᤔᤠ ᤕᤧᤶ ᤔᤧᤱᤄᤥᤒᤠᤴᤗᤥ॥

⁷ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤒᤣ. ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹ᤀᤥ ᤁᤧᤔᤧᤸᤗᤢᤰ ᤔᤧ᤺ᤴᤍᤠ ᤆᤠᤖᤠᤶᤛᤧ ᤂᤧᤏᤧ᤹ ᤀᤠᤳᤋᤥ ᤁᤧᤍᤣ᤹ᤖᤢᤛᤡᤒᤣ᥅ ᤗᤧᤴᤍᤡᤰᤐᤠ ᤏᤠᤶᤔᤥ ᤂᤧᤱᤜᤠ᤹ ᤀᤠᤳᤋᤡ ᤔᤧᤏᤠ᤺ᤶᤛᤡᤱᤒᤠᤒᤣ᥅ ᤂᤧᤒᤩᤠᤱ ᤘᤣ᤹ ᤐᤡᤳᤁᤶᤒᤠᤜᤠ᤹ᤖᤧ ᤂᤢᤏᤡ᤹ ᤐᤡᤳᤗᤢᤵᤐᤥ ᤀᤠᤱᤃᤠ᤹ ᤂᤧᤏᤧ᤹ ᤁᤥ᤺ᤵᤔᤠᤖ ᤘᤠ᤹ᤔᤠ ᤔᤧᤒᤥᤱᤏᤧᤴᤗᤥ॥

ᤆᤢᤶᤍᤣᤱᤜᤠ᤹—

⁸ ᤔᤧᤴᤇᤢᤔᤠᤜᤠ᤹ᤀᤥ ᤁᤧᤖᤧᤰᤏᤢ᤺ᤸᤗᤧ ᤐᤏᤢᤏᤢᤔᤠᤀᤣ. ᤌᤣ ᤂᤧᤴ ᤋᤧᤴᤏᤡᤴ ᤂᤧᤏᤧ᤹ ᤁᤧᤴᤏᤡᤛᤢᤶᤒᤡ᥅ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵᤜᤠ᤹ ᤋᤡᤶᤍᤧᤛᤧ᤹ᤖ ᤐᤣᤃᤧ᤹ᤀᤥ ᤜᤧᤰᤁᤩᤠᤱ ᤐᤡᤳᤁᤶᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤰᤛᤠ᤺ᤸᤗᤧ ᤁᤢᤒᤣᤛᤠᤱ ᤁᤧᤔᤧ᤺ᤴᤍᤠᤰᤜᤠ᤹ ᤁᤔᤧᤛᤧ᤹ᤀᤥ॥

ᤕᤧᤶᤒᤡᤳᤇᤠ—

⁹ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤑᤠᤖᤥ ᤜᤠᤱᤅᤡᤸᤗᤧ ᤁᤢᤀᤴᤗᤠ᤺ᤸᤗᤧ ᤀᤴᤔᤠ᤺ᤴᤏᤢ ᤂᤧᤏᤧ᤹ ᤋᤱᤏᤧᤖᤥ॥

¹⁰ ᤂᤧᤏᤧ᤹ ᤁᤧᤏᤧᤍᤧᤱᤒᤥ ᤁᤧᤎᤣᤃᤣᤰ ᤀᤡ᤺ᤴ ᤌᤠ᤺ᤸᤗᤧ ᤏᤢᤒᤠ ᤏᤡᤍᤧᤳᤗᤥ ᤜᤧᤰᤁᤩᤠᤱ ᤕᤠᤱᤀᤡᤳᤇᤣ ᤜᤠᤖᤠ᤺ᤸᤗᤧ ᤁᤧᤏᤡᤃᤡᤱᤔᤧᤴ ᤏᤢᤒᤠ ᤂᤧᤶᤍᤢᤀᤠᤱ ᤐᤳᤗᤥ॥

¹¹ ᤕᤢᤵᤐᤠ᤺ᤸᤗᤧ ᤁᤠᤵᤋᤢᤒᤠ ᤛᤠᤶᤔᤩᤠᤱ ᤁᤦ᤺ᤴ ᤀᤠᤏᤡᤃᤣ ᤂᤧᤏᤧ᤹ ᤁᤧᤗᤠᤃᤡ ᤌᤃᤢᤶᤒᤧᤖᤥ॥

ᤔᤧᤴᤇᤢᤔᤠ—

¹² ᤀᤠᤱᤃᤠ᤹ ᤀᤠᤜᤠᤱᤅᤡᤴ ᤀᤠᤒᤠᤅᤣ ᤁᤢᤏᤧᤳᤏᤠᤀᤥ ᤏᤠ᤺ᤶᤛᤡᤱᤅᤠᤱ ᤏᤧᤛ᤻ᤛᤧᤸᤗᤧ ᤑᤢᤱᤏᤠᤶᤔᤡᤸᤗᤧ ᤁᤢᤏᤠᤶᤏᤢ᤹ᤔᤧᤴ ᤁᤢᤏᤠᤶᤓᤫᤠ᤺ᤱ ᤛᤧᤖᤧᤖᤥ॥

¹³ ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤀᤠᤛᤠᤱᤒᤣᤀᤥ ᤑᤥ᤺ᤶᤔᤏᤠᤀᤠᤱ ᤁᤧᤒᤵᤐᤠ ᤐᤠᤱᤒ᤺ᤳ ᤑᤢᤱᤔᤧᤸᤗᤧ ᤁᤢᤛᤢᤱᤔᤧᤴ ᤜᤧᤰᤁᤣ ᤗ᤹ᤖᤥ॥

¹⁴ (ᤗᤢᤱᤔᤠ᤹ ᤜᤡ᤺ᤵᤋᤢᤱᤒᤧᤴ ᤀᤣᤏ-ᤃᤍᤡᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤐᤥ ᤁᤧᤓᤧᤰᤐᤠ ᤋᤠᤶᤓᤢᤱᤒᤠ ᤑᤢᤱ ᤁᤢᤀᤡᤛᤡᤰ ᤆᤥᤰᤗᤥ॥)

ᤕᤧᤶᤒᤡᤳᤇᤠ—

¹⁵ ᤀᤠᤱᤃᤠ᤹ ᤗᤢᤱᤔᤠ᤹ ᤜᤡ᤺ᤵᤏᤧᤔᤠᤀᤣ. ᤂᤧᤏᤧ᤹ ᤆᤠ᤹ᤖᤡᤰ ᤐᤏᤢᤏᤢᤔᤠ ᤁᤧᤈᤥ᤺ᤰᤗᤥ᥄ ᤆᤠ᤹ᤖᤡᤰ ᤐᤏᤢᤏᤢᤔᤠ ᤁᤧᤈᤥ᤺ᤰᤗᤥ᥄ ᤏᤧᤳᤇᤡ ᤁᤧᤔᤡᤰᤜᤠ᤹ ᤛᤠᤵᤐᤧᤳᤋᤪᤢ᤺ᤰᤔᤠᤜᤠ᤹ ᤜᤧᤰᤁᤣ ᤗ᤹ᤖᤥ᥄

ᤔᤧᤴᤇᤢᤔᤠ—

¹⁶ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤜᤡ᤺ᤶᤒᤣ. ᤂᤧᤏᤧ᤹ ᤛᤠ᤹ᤖᤡᤰ ᤏᤢᤒᤠ ᤁᤧᤈᤥ᤺ᤰᤗᤥ᥄ ᤂᤧᤏᤧ᤹ᤃ ᤀᤠᤱᤃᤠ᤹ ᤆᤠ᤹ᤖᤡᤰ ᤀᤠᤏᤡᤱᤘᤠ᤹ ᤁᤧᤍᤠᤛᤢᤖᤥ᥄ ᤛᤖᤣ᤺ᤰᤕᤠ᤺ᤵᤐᤠᤴ ᤀᤠᤴᤇᤡ᤹ ᤏᤧᤳᤏᤠ ᤐᤥᤱᤗᤥ॥

¹⁷ ᤛᤠᤶᤔᤠᤱᤛᤡᤱᤅᤡᤴ ᤀᤠᤴᤇᤡ᤹ ᤜᤡᤶᤔᤥᤒᤠ ᤐᤧᤖᤧᤶᤛᤡᤱ ᤐᤥᤱᤗᤥ. ᤀᤠ᤺ᤱᤛᤡᤱᤜᤠ᤹ ᤀᤠᤴᤇᤡ᤹ ᤗᤡᤱᤂᤠᤶᤒᤢ ᤐᤥᤱᤗᤥ॥