ᤖᤢᤌᤖᤧ ᤁᤢᤛᤠᤵᤐᤴ 4 - LIFOTNT

ᤒᤥᤀᤈ ᤏᤢ ᤖᤢᤌᤖᤧ ᤂᤢᤴᤇᤡ᤹ ᤔᤣ᤺ᤰᤂᤡᤶ

¹ ᤒᤥᤀᤈᤧᤴ ᤐᤣᤀᤠᤱ ᤕᤧᤰᤕᤰᤁᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤆᤢᤶᤗᤢᤱ ᤁᤧᤒᤥᤱᤒᤠᤍᤧᤴᤏᤥ ᤕᤢᤱᤛᤡᤱ॥ ᤂᤧᤵᤔᤥ ᤀᤣᤗᤡᤔᤣᤰᤁᤧᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤏᤡ᤺ᤳᤋᤠᤱᤒᤠ ᤂᤧᤴ ᤁᤢᤃᤠ᤹ᤀᤡᤴ ᤋᤩᤧ. ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤒᤥᤀᤈᤧᤸᤗᤧ ᤐᤠᤴ ᤐᤠ᤺ᤳᤋᤢᤀᤠᤱ ᤘᤕᤧ॥ ᤒᤥᤀᤈᤧᤸᤗᤧ ᤂᤧᤴ ᤀᤢ᤺ᤳᤋᤢᤀᤠᤱ ᤔᤧᤳᤋᤢ. “ᤁᤳᤏᤠ ᤑᤧᤖᤧ᤹ᤀᤠᤱ ᤕᤢᤅᤧ᤹ᤒᤠ.” ᤂᤢᤏᤧ᤹ ᤒᤥᤀᤈᤧᤸᤗᤧ ᤁᤢᤒᤣᤛᤠᤱ ᤑᤧᤖᤧᤀᤠᤱ ᤕᤢᤱᤛᤡᤱ॥

² ᤒᤥᤀᤈᤧᤸᤗᤧ ᤕᤧᤰᤕᤰᤁᤥᤒᤠ ᤌᤡᤒᤥᤱ ᤋᤢᤶᤓᤠᤰᤐᤠ ᤕᤧᤶᤒᤡᤳᤇᤠᤜᤠ᤹ ᤀᤢ᤺ᤳᤋᤢᤛᤡᤀᤠᤱ ᤂᤧᤵᤔᤥ ᤕᤢᤱ ᤐᤠᤱᤄᤢᤛᤡ॥ ᤂᤧᤱᤜᤠ᤹ ᤁᤧᤖᤧᤰ ᤔᤧᤕᤢᤱᤛᤡᤱ

³ ᤂᤧᤒᤩᤠᤱ ᤒᤥᤀᤈᤧᤸᤗᤧ ᤂᤧᤴ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤴ ᤔᤧᤳᤋᤢ. “ᤀᤠᤏᤡ᤹ ᤑᤢ᤹ ᤀᤣᤗᤡᤔᤣᤗᤧᤰᤁᤧᤸᤗᤧ ᤗᤳᤇᤠ ᤁᤢᤗᤰᤌᤡᤰ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤁᤧᤏᤡᤱᤘᤠ᤹ ᤕᤠᤰᤗᤠ᤹ᤒᤠ॥ ᤔᤥᤀᤠᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥᤗᤠᤶ ᤏᤠᤀᤥᤔᤡᤴ ᤏᤢ᤺ᤰᤂᤧ ᤑᤧᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤴ ᤁᤢᤗᤰᤌᤡᤰ ᤗᤠᤈᤣᤴ ᤛᤱᤔᤠ ᤁᤢᤏᤡᤱᤘᤠ᤹ ᤘᤠ᤹॥

⁴ ᤁᤴ ᤀᤠᤱᤃᤠ᤹ ᤀᤠᤛᤢᤘᤠᤱᤒᤠ ᤋᤢᤶᤓᤠᤰᤛᤠᤜᤠ᤹ᤖᤧ ᤂᤢᤏᤡ᤹ ᤋᤃᤡ ᤂᤧᤏᤧ᤹ ᤂᤧᤴ ᤗᤠᤈᤣᤴ ᤌᤧ᤹ᤖᤧ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤁᤴ ᤐᤠ᤺ᤴᤏᤡᤴ ᤐᤠ᤺ᤵᤔᤠ ᤀᤡ᤺ᤳᤋᤢᤱᤅᤠᤱ ᤘᤠ᤹॥ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤆᤥᤃᤧ᤹. ᤁᤖ ᤂᤧᤏᤧ᤹ ᤁᤧᤴᤈᤥᤃᤢᤴᤏᤧᤓᤃᤪ ᤀᤠᤱᤃᤠ᤹ ᤔᤧᤳᤋᤠᤱᤅᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ᤹॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤀᤣᤃᤠᤱ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ ᤀᤠᤱᤃᤠ᤹ᤀᤠ॥” ᤂᤧᤸᤗᤧ ᤐᤠ᤺ᤳᤋᤢ. “ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤆᤥᤃᤢᤱ᤹॥”

⁵ ᤂᤧᤒᤩᤠᤱ ᤒᤥᤀᤈᤖᤧ ᤔᤧᤳᤋᤢ. “ᤐᤥᤱ᤹. ᤂᤧᤏᤧ᤹ ᤏᤠᤀᤥᤔᤡ᤺ᤴᤗᤠᤶᤒᤠ ᤏᤢ ᤔᤥᤀᤠᤒᤗᤠᤶ ᤁᤧᤓᤧᤶᤔᤠ ᤔᤧᤴᤇᤢᤔᤠ ᤖᤢᤌᤗᤠᤶᤒᤠ ᤂᤧᤴ ᤀᤡᤰᤋᤠᤵᤐᤡᤴ ᤁᤧᤀᤡᤅᤢᤒᤠ ᤕᤧᤴᤏᤥ ᤁᤧᤔᤠᤛᤡᤱᤒᤠ ᤀᤣᤗᤡᤔᤣᤗᤧᤰᤁᤡᤸᤗᤧ ᤁᤢᤗᤰᤁᤡᤴᤏᤢ ᤛᤥᤛᤥᤖᤡᤰ ᤂᤧᤸᤗᤧ ᤁᤢᤔᤡᤱᤅᤡᤴ ᤔᤧᤶᤔᤠᤖᤧ ᤗᤠᤃᤡ ᤖᤢᤌᤧᤴᤏᤠᤱ ᤁᤧᤄᤥᤛᤢ᤹॥”

⁶ ᤁᤴ ᤂᤧᤵᤛᤢᤀᤠᤱ ᤂᤧᤴ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤒᤥᤀᤈᤧᤴ ᤔᤧᤳᤋᤢ. “ᤜᤧᤰᤁᤣᤏᤧᤓᤃᤪ ᤀᤠᤱᤃᤠ᤹ ᤀᤠᤄᤥᤔᤠ ᤗᤰᤁᤡᤴ ᤂᤧᤏᤧ᤹ ᤗᤧᤖᤢᤱ ᤐᤡᤏᤧ. ᤌᤣᤀᤠᤱᤓᤧᤸᤗᤧ ᤀᤠᤛ᤻ᤛᤠᤜᤠ᤹ᤖᤧ ᤂᤧᤴ ᤀᤡᤰᤋᤠᤵᤐᤥ ᤕᤢᤰ ᤆᤥ᤺ᤰᤔᤠ ᤔᤧᤱᤄᤥᤛᤢᤶᤒᤠᤖᤧᤳᤇ. ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤆᤥ᤺ᤰᤔᤠ ᤁᤧᤒᤥᤱᤒᤠ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤂᤧᤏᤧ᤹ ᤆᤥᤃᤧ᤹॥ ᤀᤠᤱᤃᤠ᤹ ᤁᤴ ᤕᤠ᤺ᤶᤒᤰᤁᤡᤴ ᤆᤥ᤺ᤰᤔᤠ ᤔᤧᤛᤢᤰᤁᤠᤴ॥”

⁷ ᤂᤧᤴ ᤕᤧᤶᤔᤥ ᤗᤠᤈᤣ᤹ᤛᤡᤱᤒᤢᤱ ᤀᤡᤃᤪ ᤕᤠᤱᤛᤠᤁᤢᤴᤎᤣ ᤀᤡᤱᤔᤠ ᤛᤱᤔᤠ ᤐᤥᤱᤅᤡᤸᤗᤧ ᤀᤡᤃᤪ ᤗᤧᤰᤔᤠ ᤐᤥᤱᤅᤡᤸᤗᤧ ᤁᤧᤛᤱᤒᤠ ᤔᤏᤠ᤺ᤸᤗᤧ ᤗᤠᤱᤛᤢ᤺ᤵᤐᤡᤴ ᤑᤧᤶᤔᤠᤀᤠᤱ ᤁᤧᤀᤡᤱᤒᤧᤴ ᤐᤡᤔᤠ ᤁᤧᤒᤥᤱᤒᤠ ᤘᤕᤧ॥ ᤗᤧᤱᤜᤱ ᤆᤥ᤺ᤰᤔᤏᤠᤒᤠᤴ ᤛᤧᤰᤂᤠ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤁᤶᤓᤗ᤹ᤖᤡᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢ॥

⁸ ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤒᤥᤀᤈᤧᤴ ᤔᤧᤳᤋᤢ. “ᤂᤧᤏᤧ᤹ ᤀᤠᤒᤠᤅᤣ ᤁᤧᤗᤠᤃᤡ ᤂᤧᤴ ᤀᤡᤅᤧ᤹॥” ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤠᤱᤛᤢ᤺ᤵᤐᤡᤴ ᤑᤧᤴᤍᤢ॥

⁹ ᤂᤧᤒᤩᤠᤱ ᤒᤥᤀᤈᤖᤧ ᤂᤧᤵᤔᤥ ᤁᤧᤘᤠ᤹ᤒᤠ ᤋᤢᤶᤓᤠᤰᤐᤠᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ ᤔᤧᤳᤋᤢᤛᤡ. “ᤂᤧᤏᤡ᤹ ᤁᤧᤖᤧᤰ ᤁᤴ ᤐᤠ᤺ᤴᤏᤡᤴ ᤁᤧᤏᤡᤒᤠ ᤀᤠᤛᤠ᤺ᤰᤂᤡ ᤁᤧᤘᤕᤡ. ᤀᤠᤱᤃᤠ᤹ ᤀᤠᤀᤡᤴ ᤏᤠᤀᤥᤔᤡ᤺ᤴᤗᤠᤶᤒᤠ ᤀᤣᤗᤡᤔᤣᤗᤧᤁ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠ ᤔᤜᤗᤥᤏ ᤏᤢ ᤁᤡᤗᤩᤥᤏᤖᤧ ᤆᤩᤠᤈᤩᤠ ᤔᤧᤃᤳᤋᤢ. ᤂᤧᤱᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤀᤡᤅᤢᤱᤅᤠᤱ ᤘᤠ᤹॥

¹⁰ ᤁᤴᤏᤢ ᤛᤥᤛᤥᤖᤡᤰ. ᤔᤜᤗᤥᤏᤖᤧ ᤔᤣᤔᤣᤍᤢᤔᤠ ᤁᤢᤔᤣᤳ ᤔᤥᤀᤠᤒᤗᤠᤶ ᤁᤧᤓᤧᤶᤔᤠ ᤖᤢᤌᤧᤴ ᤀᤠᤱᤃᤠ᤹ ᤀᤠᤔᤣᤳ ᤐᤥᤱ᤹॥ ᤜᤧᤰᤁᤣ ᤐᤥᤱᤅᤡᤸᤗᤧ ᤁᤧᤛᤡᤒᤠ ᤁᤧᤄᤧᤵᤐᤠ ᤔᤏᤠ᤺ᤸᤗᤧ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤘᤠ᤹ᤕᤠ᤺ᤰ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤕᤧᤰᤕᤰᤁᤥ ᤁᤢᤎᤠ᤺ᤰᤜᤠ᤹ ᤔᤧᤘᤠ᤹ ᤔᤧᤕᤠ᤺ᤰ॥ ᤀᤠᤀᤡᤴᤒᤠ ᤕᤧᤴᤏᤥ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤏᤡᤒᤠ ᤛᤠ᤺ᤰᤂᤡ ᤁᤧᤘᤕᤡ॥”

¹¹ ᤂᤧᤴ ᤋᤢᤶᤓᤠᤰᤐᤠᤜᤠ᤹ ᤏᤢ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤥᤖᤥ. ᤀᤠᤏᤡᤃᤣ ᤛᤠ᤺ᤰᤂᤡ ᤘᤕᤡᤃᤧᤖᤥ॥ ᤌᤡᤴᤍᤠᤱ ᤛᤠᤕᤥᤒᤥᤖᤠᤜᤠ᤹ᤖᤧ ᤕᤠᤁᤢᤒᤖᤧ ᤁᤢᤜᤡᤶᤔᤡᤴ ᤁᤢᤗᤧ᤺ᤶ ᤁᤧᤎᤡᤶᤔᤠ ᤁᤧᤒᤡᤔᤠ ᤖᤠᤜᤣᤗ ᤏᤢ ᤗᤧᤀᤠ᤺ᤴ ᤜᤧᤰᤁᤣ ᤂᤧᤏᤧ᤹ ᤁᤧᤔᤣ᤺ᤳᤋᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤖᤖᤥ. ᤂᤧᤱᤜᤠ᤹ᤃ ᤀᤡᤛᤪᤠᤀᤡᤗᤖᤧ ᤁᤢᤎᤠ᤺ᤰᤛᤡᤖᤥ॥ ᤀᤣᤐᤪᤠᤋᤠᤀᤥ ᤂᤧᤏᤧ᤹ ᤁᤧᤔᤡᤱᤛᤥ ᤀᤡᤱᤎᤠᤱ ᤐᤥᤱᤗ. ᤜᤧᤰᤁᤩᤠᤱ ᤒᤣᤌᤗᤧᤜᤧ᤺ᤶᤔᤥ ᤂᤧᤏᤧ᤹ ᤁᤧᤔᤡᤱ ᤋᤡ᤺ᤳᤗ॥

¹² ᤁᤴ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤴᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤏᤧ᤹ ᤁᤧᤒᤡᤒᤠ ᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤂᤧᤏᤧ᤹ ᤁᤧᤜᤡᤶᤛᤕᤱᤅᤡᤴ ᤕᤜᤢᤍᤠ᤺ᤴᤗᤠᤶ ᤋᤠᤔᤠᤖᤧᤸᤗᤧ ᤁᤳᤋᤢᤒᤠ ᤕᤧᤶᤒᤡᤳᤇᤠᤛᤠ ᤑᤠᤖᤣᤛᤧᤸᤗᤧ ᤁᤢᤜᤡᤔᤩᤛᤱ ᤜᤧᤰᤁᤣ ᤂᤧᤏᤧ᤹ ᤁᤧᤏᤢ᤹ ᤁᤧᤍᤠᤖ ᤆᤥᤃᤢᤖᤖᤥ॥”

ᤒᤥᤀᤈᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹

¹³ ᤁᤶᤓᤗ᤹ᤖᤡᤰ ᤒᤥᤀᤈᤧᤸᤗᤧ ᤖᤢᤌᤧᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤢᤀᤠᤱ ᤜᤡᤶᤔᤥ ᤋᤠᤖᤢ॥ ᤀᤠᤸᤗ ᤂᤢᤴᤇᤡ᤹ ᤛᤥᤖᤡᤰ ᤀᤡᤵᤛᤧᤳᤇᤡᤀᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤢ᤹ᤀᤡᤛᤠᤶ ᤐᤡᤖᤢ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤴᤇᤢᤰᤔᤠ ᤐᤥ᤺ᤰᤂᤧᤀᤠᤱ ᤗᤳᤇᤠ ᤕᤧᤶᤒᤡᤳᤇᤠᤛᤠ ᤁᤳᤋᤢ॥

¹⁴ ᤔᤧᤴᤇᤢᤔᤠᤜᤠ᤹ᤖᤧ ᤏᤠᤀᤥᤔᤡᤴ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤑᤥᤛᤧ᤹᥄ ᤂᤢᤏᤧ᤹ ᤂᤧᤏᤧ᤹ ᤔᤧᤴᤇᤠ᤹ᤎᤡᤰ ᤁᤧᤒᤡᤖᤧᤀᤠᤱ ᤘᤠ᤹॥ ᤔᤧᤴᤇᤠ᤹ᤀᤡᤸᤗᤧ ᤂᤧᤏᤧ᤹ ᤁᤧᤜᤡᤱ ᤁᤧᤃᤢᤶ॥ ᤁᤴ ᤕᤧᤶᤒᤡᤳᤇᤠ ᤀᤅᤧ᤺ᤰᤘᤠᤴ ᤀᤡᤛᤪᤠᤀᤡᤗᤀᤥ ᤁᤢᤔᤡᤱ ᤁᤧᤀᤡᤱᤒᤠ ᤐᤥᤱᤗ᥄

¹⁵ ᤂᤧᤏᤧ᤹ ᤁᤧᤶᤒᤠᤱᤗᤡ᤺ᤸᤗᤧ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰ॥ ᤂᤧᤸᤗᤧ ᤂᤧᤏᤧ᤹ ᤏᤢᤛᤡ ᤕᤧᤶᤒᤡᤳᤇᤠ ᤛᤠᤜᤠ᤹ᤏᤢ᤺ᤸᤗᤧᤀᤠᤱ ᤕᤖᤡᤰ ᤏᤢᤖᤡᤰ ᤁᤧᤔᤧᤳᤋᤧᤀᤠᤱ ᤘᤠ᤹॥ ᤀᤠᤸᤗ ᤂᤢᤏᤧ᤹ ᤗᤳᤇᤠ ᤔᤧᤴᤇᤠ᤹ ᤌᤡᤰ ᤂᤧᤏᤧ᤹ ᤁᤧᤒᤡᤖᤧᤀᤠᤱ ᤘᤠ᤹॥ ᤂᤧᤸᤗᤧ ᤂᤧᤏᤧ᤹ ᤁᤧᤜᤡᤱᤔᤴᤏᤥ ᤁᤧᤛ᤺ᤳᤗ ᤁᤧᤕᤠᤴ ᤜᤧᤰᤁᤩᤠᤱ ᤁᤠᤵᤔᤢᤔᤠ ᤁᤧᤍᤢᤶᤔᤡᤸᤗᤧ ᤁᤧᤜᤡᤱ᤹॥”

¹⁶ ᤏᤠᤀᤥᤔᤡ᤺ᤸᤗᤧ ᤆᤢᤰᤐᤠ ᤀᤅᤧ᤺ᤰᤘᤠᤴ ᤁᤢᤓᤰᤋᤢᤱᤔᤥ ᤕᤠᤱᤛᤡᤱ. ᤜᤧᤰᤁᤩᤠᤱ ᤂᤧᤴ ᤀᤥᤔᤧᤳᤋᤢ ᤜᤡᤱᤄᤢ॥

¹⁷ ᤜᤡᤶᤒᤣᤛᤠᤱᤒᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤧᤴ ᤕᤧᤶᤒᤡᤳᤇᤠ ᤛᤠᤴ ᤀᤥᤒᤣᤍ ᤔᤡᤱ ᤔᤧᤘᤠ᤺ᤳᤋᤢ॥ ᤂᤧᤱᤜᤠ᤹ᤖᤧ ᤁᤧᤖᤧᤰ ᤔᤧᤔᤧᤳᤋᤢᤛᤡ. “ᤏᤠᤀᤥᤔᤡ᤺ᤸᤗᤧ ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤌᤡᤰ ᤛᤠᤘᤠ᤺ᤴᤇᤡᤱᤅᤠᤱ ᤘᤠ᤹॥” ᤀᤥᤒᤣᤍᤧᤴ ᤕᤡᤛᤤᤖᤧ ᤁᤢᤶᤒᤠ ᤏᤢ ᤍᤠᤀᤢᤍᤖᤧ ᤁᤢᤴᤎᤧᤒᤠ ᤐᤥ᤺ᤰᤂᤧ॥

¹⁸ ᤑᤠᤖᤣᤛᤀᤠᤱᤎᤥ ᤍᤠᤀᤢᤍ ᤌᤠᤖᤡᤰᤐᤠ ᤔᤡᤱᤛᤪᤠᤴ ᤀᤰᤋᤱᤒᤠ ᤘᤠ᤹—ᤑᤠᤖᤣᤛᤖᤧ ᤁᤢᤛ᤻ᤛᤠ ᤜᤣᤛᤪᤥᤏ.

¹⁹ ᤜᤣᤛᤪᤥᤏᤖᤧ ᤁᤢᤛ᤻ᤛᤠ ᤖᤠᤔ. ᤖᤠᤔᤖᤧ ᤁᤢᤛ᤻ᤛᤠ ᤀᤶᤔᤡᤏᤠᤍᤠᤒ.

²⁰ ᤀᤶᤔᤡᤏᤠᤍᤠᤒᤖᤧ ᤁᤢᤛ᤻ᤛᤠ ᤏᤜᤛᤥᤏ. ᤏᤜᤛᤥᤏᤖᤧ ᤁᤢᤛ᤻ᤛᤠ ᤛᤸᤔᤥᤏ.

²¹ ᤛᤸᤔᤥᤏᤖᤧ ᤁᤢᤛ᤻ᤛᤠ ᤒᤥᤀᤈ.

²² ᤒᤥᤀᤈᤖᤧ ᤁᤢᤛ᤻ᤛᤠ ᤀᤥᤒᤣᤍ. ᤀᤥᤒᤣᤍᤖᤧ ᤁᤢᤛ᤻ᤛᤠ ᤕᤡᤛᤤ ᤜᤧᤰᤁᤩᤠᤱ ᤕᤡᤛᤤᤖᤧ ᤁᤢᤛ᤻ᤛᤠ ᤍᤠᤀᤢᤍ ᤘᤕᤧᤖᤥ॥