ᤖᤢᤌᤖᤧ ᤁᤢᤛᤠᤵᤐᤴ 3 - LIFOTNT

ᤖᤢᤌᤧᤴ ᤏᤢ ᤒᤥᤀᤈᤧᤴ ᤜ᤺ᤰᤛᤡ ᤜᤡᤵᤔᤠᤍᤧᤴᤏᤥ ᤋᤢᤶᤛᤡ᤹

¹ ᤁᤢᤓᤠ ᤕᤧᤶ ᤀᤣᤃᤠᤱ ᤏᤠᤀᤥᤔᤡ᤺ᤸᤗᤧ ᤖᤢᤌᤧᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤡᤶ ᤁᤧᤎᤠ᤺ᤱ ᤐᤥᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤜᤡᤶᤛᤠᤒᤠᤎᤡᤰ ᤁᤥ᤺ᤵᤔᤠ ᤐᤡᤔᤠ ᤀᤠᤏᤡᤱᤘᤠ᤹ ᤘᤠ᤹॥

² ᤒᤥᤀᤈᤧᤴ ᤀᤠᤏᤡ᤹ ᤀᤠᤒᤠᤅᤣ ᤔᤏᤠ॥ ᤂᤧᤏᤧ᤹ ᤂᤢᤏᤧ᤹ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤗ ᤁᤧᤘᤠ᤹॥ ᤀᤠᤸᤗ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤏᤢᤖᤡᤰᤁᤠᤱ ᤂᤧᤵᤛᤧ᤹॥ ᤀᤠᤀᤡᤴ ᤛᤧᤴᤍᤡᤰ ᤆᤠᤏᤢᤰᤔᤠᤍᤧᤴᤏᤥ ᤂᤢᤏᤧ᤹ ᤜ᤺ᤰᤛᤡ ᤜᤡᤵᤋᤢᤖ ᤕᤠᤰ॥

³ ᤂᤧᤏᤧ᤹ ᤘᤠᤖᤢ᤺ᤶᤛᤡᤱᤅᤧ᤹ ᤘᤠᤜᤵᤛᤡᤱᤅᤧ᤹. ᤁᤢᤏᤠᤶᤃᤧᤏᤢ᤹ᤒᤠ ᤑᤢᤱᤏᤠᤶ ᤜᤢ᤺ᤳᤇᤡᤱᤅᤧ᤹ᤀᤠᤱ ᤏᤢᤒᤠ ᤆᤠᤱ ᤆᤠᤰᤂᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤜ᤺ᤰᤛᤡ ᤜᤡᤵᤋᤢᤒᤠᤍᤧᤴᤏᤥ ᤐᤣᤃᤧ᤹॥ ᤁᤖ ᤂᤢᤏᤧ᤹ ᤆᤠᤔᤠ ᤌᤢᤱᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤂᤧᤏᤧ᤹ ᤂᤧᤵᤔᤥ ᤁᤧᤘᤠ᤹ ᤁᤧᤗ᤹ᤒᤠ ᤂᤢᤏᤧ᤹ ᤏᤡᤱᤘᤠ᤹ ᤔᤧᤄᤥᤛᤢᤴᤗ॥

⁴ ᤂᤢᤏᤧ᤹ ᤀᤡᤶᤛᤧ ᤐᤣ᤺ᤰᤁᤡᤸᤗᤧ ᤂᤧᤏᤧ᤹ ᤂᤢᤏᤧ᤹ ᤁᤢᤀᤡᤶᤔᤠᤍᤧᤴᤏᤡᤴ ᤀᤥᤔᤧᤳᤋᤧ ᤏᤧᤛ᤻ᤛᤧ᤹॥ ᤂᤧᤴ ᤀᤣᤃᤠᤱ ᤐᤣᤃᤧ᤹ᤀᤠᤱ ᤂᤢᤏᤧ᤹ ᤁᤢᤗᤠᤱ ᤗᤧᤵᤔᤠᤱᤒᤠ ᤁᤢᤄᤠᤶᤍᤣ᤺ᤳᤋᤡᤴ ᤑᤥ᤺ᤰᤂᤧᤀᤠᤱ ᤂᤧᤵᤔᤥᤀᤣ ᤏᤧᤛᤡᤱᤅᤧ᤹॥ ᤂᤧᤒᤩᤠᤱ ᤂᤧᤏᤧ᤹ ᤌᤣ ᤆᤥ᤺ᤰᤔᤠ ᤐᤥᤱ᤹. ᤂᤧᤴ ᤂᤢᤏᤧ᤹ᤀᤣ ᤁᤧᤔᤧᤳ॥”

⁵ ᤖᤢᤌᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤁᤧᤖᤧᤰ ᤀᤠᤱᤃᤠ᤹ ᤆᤥᤃᤢᤱ᤹॥”

⁶ ᤖᤢᤌᤧᤴ ᤜ᤺ᤰᤛᤡ ᤜᤡᤵᤔᤠᤍᤧᤴᤏᤥ ᤐᤣ ᤜᤧᤰᤁᤩᤠᤱ ᤁᤢᤴᤏᤢ᤺ᤵᤔᤧᤸᤗᤧ ᤔᤧᤳᤋᤢᤒᤠ ᤜᤧᤰᤁᤣᤀᤣ ᤆᤥᤃᤢ॥

⁷ ᤁᤢᤈᤠ ᤆ ᤌᤢᤅᤢ ᤛᤢᤖᤢᤀᤠᤱ ᤒᤥᤀᤈᤧᤸᤗᤧ ᤁᤢᤏᤡᤱᤘᤠ᤹ ᤋᤩᤧ॥ ᤜ᤺ᤰᤛᤡ ᤔᤧᤗᤢᤵᤛᤢᤀᤠᤱ ᤏᤧᤛ᤻ᤛᤧᤒᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤐᤣᤀᤠᤱ ᤂᤢᤏᤧ᤹ ᤀᤡᤵᤛᤧ॥ ᤖᤢᤌᤧᤴ ᤕᤠ᤺ᤰᤕᤠ᤺ᤰ ᤛᤫᤠ᤺ᤳᤋᤠᤱ ᤋᤩᤧ. ᤂᤠᤶᤍᤣ᤺ᤳᤋᤡᤴ ᤑᤥ᤺ᤰᤂᤢᤀᤠᤱ ᤂᤢᤏᤧ᤹ ᤁᤢᤗᤠᤱ ᤗᤧᤵᤔᤠᤱ ᤀᤡᤵᤛᤧ॥

⁸ ᤛᤧᤴᤍᤡᤰ ᤂᤄᤵ ᤒᤥᤀᤈᤧᤴ ᤛᤥᤖᤧ ᤜᤧᤰᤁᤩᤠᤱ ᤗᤧᤱᤛᤡᤱᤅᤧᤸᤗᤧ ᤔᤧᤴᤇᤢᤔᤠᤎᤡᤰ ᤂᤢᤏᤧ᤹ ᤁᤢᤗᤠᤱᤅᤡᤸᤗᤧ ᤁᤢᤕᤠᤀᤥ ᤀᤡᤵᤛᤧᤀᤠᤱ ᤏᤧᤛ᤻ᤛᤧᤒᤠ ᤏᤡᤛᤢ॥

⁹ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤜᤠ᤺ᤳᤏᤧᤃ᥅” ᤖᤢᤌᤧᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤘᤠᤖᤥᤔᤠ ᤖᤢᤌᤀᤠᤖᤥ. ᤀᤠᤍᤠᤱᤒᤣ॥ ᤂᤧᤏᤧ᤹ ᤀᤠᤏᤡᤃᤣ ᤏᤡ᤺ᤳᤋᤠᤱᤒᤠ ᤀᤠᤏᤡᤃᤣ ᤀᤠᤵᤑᤣᤰ ᤔᤏᤠᤏᤧ॥ ᤀᤠᤱᤃᤠ᤹ ᤁᤶᤒᤪᤠᤱ ᤔᤧᤵᤔᤠ ᤗᤰᤐᤧᤴ ᤂᤧᤏᤧ᤹ ᤁᤧᤜᤢᤰᤁᤥ ᤘᤠ᤹॥ ᤗᤢᤱᤔᤠ᤹ ᤋᤢᤰᤋᤠᤱᤅᤧ᤹ᤀᤠᤱ ᤀᤠᤱᤃᤠ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤔᤧᤳᤋᤠᤱᤅᤧ᤹॥”

¹⁰ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤁᤧᤒᤡᤖ. ᤂᤧᤏᤧ᤹ ᤁᤧᤴᤏᤢ᤺ᤵᤔᤠᤴ ᤀᤠᤰᤂᤩᤠᤖᤡᤰ ᤏᤢᤖᤡᤰ ᤁᤧᤔᤧᤳᤋᤢ. ᤂᤧᤴᤏᤢ᤺ᤸᤗᤧ ᤕᤖᤡᤰ ᤁᤴ ᤐᤠ᤺ᤴᤏᤥ ᤂᤧᤏᤧ᤹ ᤁᤧᤜᤡᤶᤛᤕᤱᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡ ᤜᤧᤰᤁᤩᤠᤱ ᤏᤡᤱᤘᤠ᤹ᤀᤥ ᤁᤧᤕᤢᤰᤂᤢᤛᤡ॥ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤀᤡᤃᤪ ᤁᤢᤓᤠ ᤕᤠᤱᤃᤧᤛᤠ᤹ᤒᤠ ᤌᤠᤱᤒᤧᤴᤏᤧᤴᤏᤢ ᤐᤣ᤺ᤰᤔᤠ ᤁᤧᤛᤢᤰᤋᤢᤒᤠ ᤘᤕᤧ. ᤁᤖ ᤂᤧᤏᤧ᤹ ᤜᤧᤰᤁᤣ ᤁᤧᤴᤈᤥᤃᤢᤴ॥

¹¹ ᤀᤠᤸᤗ ᤖᤢᤌᤀᤣ. ᤂᤧᤏᤧ᤹ ᤁᤧᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤔᤧᤒᤥᤱᤏᤧᤴ॥ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤆᤥᤃᤢᤱ᤹॥ ᤁᤴ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤛᤢᤶᤒᤥᤎᤠᤛᤠᤔᤠ ᤁᤧᤈᤥᤰ ᤑᤠ᤹ᤀᤠᤱ ᤔᤧᤏᤡᤛᤢ॥

¹² ᤛᤧᤰᤂᤠᤀᤣ ᤀᤠᤱᤃᤠ᤹ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡᤀᤠ. ᤀᤠᤱᤃᤠ᤹ ᤂᤧᤏᤧ᤹ ᤁᤶᤒᤪᤠᤱ ᤔᤧᤵᤔᤠᤀᤣ ᤐᤥᤱ᤹॥ ᤁᤖ ᤁᤴᤏᤢ᤺ᤸᤗᤧ ᤀᤠᤸᤗᤛᤠᤱ ᤏᤡ᤺ᤳᤋᤠᤱᤒᤠ ᤗᤳᤇᤠ ᤘᤣ᤹ ᤁᤠ᤹ᤀᤡᤎᤡᤰ ᤘᤠ᤹॥

¹³ ᤀᤠᤸᤗ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤀᤠᤶᤓᤠ ᤁᤵᤔᤥᤀᤣ ᤏᤧᤛ᤻ᤛᤧ᤹॥ ᤋᤠᤏᤠᤶ ᤂᤠᤀᤥ᤺ᤳᤋᤠᤱ ᤂᤧᤏᤧ᤹ ᤜᤢᤰᤁᤥ ᤋᤠ᤺ᤰᤔᤠ ᤂᤢᤏᤧ᤹ ᤋᤧᤴᤏᤡ ᤔᤧᤍᤧᤴᤏᤧᤴᤏᤡ. ᤀᤠᤱᤃᤠ᤹ ᤁᤥ᤺ᤳᤋᤢᤱ᤹॥ ᤁᤖ ᤂᤧᤏᤧ᤹ ᤁᤧᤗᤠᤃᤡ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡ᤺ᤸᤗᤧ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤴ ᤔᤧᤈᤥᤃᤢᤴᤏᤧᤓᤃᤪ ᤕᤜᤘᤣ ᤍᤠᤱᤒᤧᤴ ᤁᤢᤜᤡᤱᤘᤧᤳ ᤘᤠ᤹ᤒᤠ ᤁᤢᤀᤡᤛᤡᤰ ᤁᤴ ᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤆᤥᤃᤢᤱ᤹॥ ᤀᤠᤸᤗ ᤋᤠᤏᤠᤶ ᤌᤠᤖᤡᤰ ᤜᤠᤒᤠ ᤁ᤹ᤕᤥ ᤏᤧᤛ᤻ᤛᤧ᤹॥”

¹⁴ ᤜᤧᤰᤁᤣᤗ᤹ᤖᤡᤰ ᤖᤢᤌᤧᤴ ᤂᤧᤵᤔᤥᤀᤣ ᤒᤥᤀᤈᤧᤸᤗᤧ ᤁᤢᤗᤠᤱ ᤗᤧᤵᤔᤠᤱ ᤀᤡᤵᤛᤧ॥ ᤁᤖ ᤋᤢᤶᤒᤠ᤺ᤱ ᤘᤒᤠ᤺ᤱ ᤂᤠᤀᤥ᤺ᤵᤔᤠᤏᤢ᤺ᤸᤗᤧ ᤋᤃᤡ ᤜᤠ᤺ᤳᤗᤧᤀᤠᤱ ᤔᤧᤴᤏᤡᤀᤣ ᤐᤥᤃᤧ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤂᤧᤵᤔᤥ ᤋᤩᤧᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤴᤗ ᤁᤧᤗ᤹ᤒᤠ ᤒᤥᤀᤈᤧᤸᤗᤧ ᤁᤢᤏᤡᤱᤘᤠ᤹ ᤘᤕᤧ॥

¹⁵ ᤒᤥᤀᤈᤧᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤧᤵᤛᤢᤒᤠ ᤐ᤺ᤳᤌᤠᤱᤅᤡᤴ ᤂᤠᤶᤒᤠᤱᤅᤥ ᤑᤧᤛᤧᤀᤠᤱ ᤋᤠ᤺ᤰᤋᤧ᤹॥” ᤖᤢᤌᤧᤸᤗᤧ ᤜᤧᤰᤁᤣᤀᤣ ᤆᤥᤃᤢ॥ ᤒᤥᤀᤈᤧᤸᤗᤧ ᤂᤵᤔᤧᤴ ᤑᤥᤗᤰ ᤋᤢᤰᤛᤡ ᤕᤠᤖᤡᤰ ᤜ᤺ᤰᤛᤡ ᤂᤧᤵᤔᤥ ᤌᤧᤰᤋᤢ ᤐᤡᤖᤢ ᤜᤧᤰᤁᤩᤠᤱ ᤁᤰᤁᤧᤴ ᤑᤥ᤺ᤰᤂᤢᤀᤠᤱ ᤁᤢᤓᤰᤋᤠᤱᤅᤥ ᤁᤢ᤺ᤳᤋᤢᤍᤣᤛᤢ॥ ᤂᤧᤴ ᤁᤢᤕᤢᤀᤠᤱ ᤖᤢᤌᤧᤴ ᤕᤧᤰᤕᤰᤁᤥ ᤏᤢ᤺ᤰᤂᤧ॥

¹⁶ ᤜᤡᤶᤔᤥ ᤁᤧᤖᤧᤍᤩᤧ᤺ᤸᤗᤧ ᤂᤢᤏᤧ᤹ ᤁᤢᤴᤏᤢ᤺ᤵᤔᤠᤸᤗᤧ ᤛᤣ᤺ᤴᤍᤥᤛᤢ. “ᤀᤠᤛ᤻ᤛᤠᤀᤣ. ᤜᤧᤴ ᤐᤥ᤺ᤰᤂᤧᤃ᥅” ᤒᤥᤀᤈᤖᤧ ᤆᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤖᤢᤌᤧᤸᤗᤧ ᤐᤠ᤺ᤳᤋᤢ॥

¹⁷ ᤂᤧᤸᤗᤧ ᤐᤠ᤺ᤳᤋᤢ. “ᤂᤢᤏᤧ᤹ ᤀᤠᤱᤃᤠ᤹ ᤁᤴ ᤑᤥᤗᤰ ᤋᤢᤰᤛᤡ ᤜ᤺ᤰᤛᤡ ᤐᤡᤖᤠᤱ॥ ᤂᤢᤏᤧ᤹ ᤌᤣᤀᤠᤱ ᤔᤣ᤺ᤴᤏᤣ ᤀᤠᤱᤃᤠ᤹ ᤀᤠᤴᤏᤢ᤺ᤵᤔᤠᤸᤗᤥ ᤔᤧᤒᤠᤱᤄᤠᤱᤅᤧᤴ॥”

¹⁸ ᤏᤥᤀᤥᤔᤡ᤺ᤸᤗᤧ ᤂᤢᤏᤧ᤹ ᤔᤧᤳᤋᤢ. “ᤖᤢᤌᤀᤣ. ᤀᤠᤸᤗ ᤏᤠᤛᤡ ᤌ᤺ᤳᤋᤧ᤹ᤀᤠᤱ ᤕᤢᤅᤧ᤹ ᤀᤠᤰᤂᤣ ᤐᤥᤱᤅᤡ. ᤀᤥᤔᤧᤳᤋᤧ᤹ᤖ ᤘᤕᤧ᤹॥ ᤀᤠᤀᤡᤴ ᤁᤴ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤔᤧᤴᤈᤥ᤺ᤰᤁᤣ ᤒᤥᤀᤈᤧᤴ ᤏᤠ᤺ᤶᤛᤡᤱᤔᤠ ᤔᤧᤄᤥᤏᤧᤴᤗᤥ॥”