ᤖᤢᤌᤖᤧ ᤁᤢᤛᤠᤵᤐᤴ 2 - LIFOTNT

ᤒᤥᤀᤈᤖᤧ ᤁᤢᤀᤡᤰᤋᤠᤵᤐᤥ ᤖᤢᤌᤧᤴ

¹ ᤏᤠᤀᤥᤔᤡ᤺ᤸᤗᤧ ᤗᤳᤇᤠ ᤒᤥᤀᤈ ᤔᤡᤱ ᤁᤧᤘᤠ᤺ᤵᤐᤠ ᤁᤢᤔᤏᤠᤎᤡᤰ ᤘᤕᤧ॥ ᤏᤠᤀᤥᤔᤡ᤺ᤸᤗᤧ ᤁᤢᤕᤧᤶᤒᤠ ᤀᤣᤗᤡᤔᤣᤗᤧᤰᤁᤧᤸᤗᤧ ᤁᤢᤜᤡᤶᤛᤕᤱᤒᤠ ᤗᤳᤇᤠ ᤕᤠᤱᤛᤠᤁᤢᤴᤎᤣᤛᤠᤒᤠ ᤌᤡᤰ ᤘᤕᤧ॥

² ᤌᤡᤰᤕᤠᤴ ᤔᤥᤀᤥᤒᤗᤠᤶ ᤁᤧᤓᤧᤶᤔᤠ ᤖᤢᤌᤧᤸᤗᤧ ᤏᤠᤀᤥᤔᤡᤴ ᤔᤧᤳᤋᤢ. “ᤀᤠᤱᤃᤠ᤹ ᤀᤡᤰᤋᤠᤵᤐᤠᤜᤠ᤹ᤀᤥ ᤐᤣ᤺ᤰᤁᤠᤀᤠᤱ ᤂᤧ᤹ᤕᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤁᤢᤈᤠᤜᤠ᤹ ᤑᤢᤰᤂᤢᤱ ᤋᤠᤖᤢᤱᤒᤡ᥅ ᤁᤢᤓᤠᤖᤧᤃ ᤀᤠᤱᤃᤠ᤹ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤓᤠ᤺ᤰᤁᤠᤗᤠ᤹ᤒᤣ᥅” ᤏᤠᤀᤥᤔᤡ᤺ᤸᤗᤧ ᤔᤧᤳᤋᤢ. “ᤐᤥᤱ. ᤀᤠᤛ᤻ᤛᤠᤀᤣ ᤜᤧᤰᤁᤣᤀᤣ ᤆᤥᤃᤧ᤹॥”

³ ᤜᤧᤰᤁᤩᤠᤱ ᤖᤢᤌᤧᤴ ᤀᤡᤰᤋᤠᤵᤐᤥ ᤐᤣᤀᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤀᤣᤃᤠᤱ ᤂᤧᤱᤜᤠ᤹ᤖᤧ ᤔᤧᤗᤧᤖᤢ ᤔᤧᤎᤒᤠ ᤆᤠᤍᤠᤵᤔᤠᤜᤠ᤹ ᤂᤶᤔᤠ ᤜᤣ᤺ᤰᤋᤢ॥ ᤜᤧᤰᤁᤩᤠᤱ ᤂᤧᤴ ᤀᤡᤰᤋᤠᤵᤐᤡᤴ ᤀᤣᤗᤡᤔᤣᤗᤧᤰᤁᤧᤸᤗᤧ ᤁᤢᤜᤡᤶᤛᤕᤱᤒᤠ ᤒᤥᤀᤈᤖᤧᤀᤣ ᤁᤢᤀᤡᤰᤋᤠᤵ ᤏᤧᤛ᤻ᤛᤧ॥

⁴ ᤁᤢᤓᤠ ᤕᤧᤶ ᤀᤣᤃᤠᤱ. ᤒᤥᤀᤈᤧᤴ ᤀᤠᤒᤠᤅᤣ ᤒᤣᤌᤗᤧᤜᤧᤔᤗᤠᤶ ᤁᤧᤖᤧᤍᤩᤧ ᤜᤧᤰᤁᤩᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤋᤢᤔᤢᤛᤡᤀᤠᤱ ᤔᤧᤳᤋᤢᤛᤡ. “ᤕᤜᤘᤣ ᤍᤠᤱᤒᤠᤴ ᤂᤡᤏᤡ᤹ᤏᤢ ᤘᤠ᤹ᤖᤖᤥ॥” ᤂᤧᤱᤜᤠ᤹ᤖᤧ ᤂᤢᤏᤧ᤹ ᤔᤧᤔᤧᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤂᤧᤏᤧ᤹ ᤔᤢ᤹ᤀᤡᤛᤠᤶ ᤁᤧᤒᤡᤖ᥄”

⁵ ᤂᤧᤒᤩᤠᤱ ᤒᤥᤀᤈᤧᤸᤗᤧ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤀᤥᤒᤠ ᤕᤶᤒᤠ ᤔᤏᤠᤴ ᤛᤣ᤺ᤴᤍᤥᤛᤢ. “ᤂᤧᤴ ᤆᤢᤰᤔᤧᤴ ᤜᤠ᤺ᤳᤏᤡᤒᤣ᥅”

⁶ ᤛᤧᤘᤠᤖᤥᤒᤠᤸᤗᤧ ᤔᤧᤳᤋᤢ. “ᤂᤧᤴ ᤔᤥᤀᤠᤒᤗᤠᤶᤒᤠ ᤏᤠᤀᤥᤔᤡ᤺ᤴᤏᤢ ᤁᤧᤓᤧᤶᤔᤠ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤢᤔᤠᤖᤥ॥

⁷ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤑᤴᤇᤡᤱᤔᤠᤀᤠᤱ ᤁᤧᤔᤠᤒᤠ ᤁᤧᤕᤠ᤺ᤰᤐᤠ ᤁᤢᤈᤠᤜᤠ᤹ ᤛᤡᤗᤠ ᤁᤥ᤺ᤵᤔᤠ ᤑᤠ᤺ᤰᤋᤠᤱᤅᤧ᤹ ᤑᤠ᤹ᤀᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ॥ ᤂᤢᤏᤧ᤹ ᤀᤠᤴᤍᤣᤴ ᤋᤠᤏᤠᤶᤔᤠᤱᤎᤥ ᤕᤠ᤺ᤶᤒᤰ ᤆᤥ᤺ᤰᤏᤢ ᤕᤠᤰ ᤜᤧᤰᤁᤩᤠᤱ ᤀᤠᤸᤗᤥ ᤂᤠᤖᤰ ᤏᤠ᤺ᤶᤛᤡᤱᤔᤠᤖᤧ ᤗᤠᤃᤡ ᤏᤠᤶᤈᤡ᤺ᤰᤂᤥ᤹ᤀᤥ ᤕᤢᤱᤛᤡᤱᤅᤠᤱ ᤕᤢᤱ᤹॥”

⁸ ᤒᤥᤀᤈᤧᤸᤗᤧ ᤖᤢᤌᤧᤴ ᤔᤧᤳᤋᤢ. “ᤀᤠᤱᤃᤠ᤹ ᤂᤧᤏᤧ᤹ ᤌᤧᤔᤠᤀᤡ ᤛᤢᤈᤠ ᤐᤡᤏᤧ ᤗ᥅ ᤀᤠᤱᤃᤠ᤹ ᤀᤠᤀᤡᤰᤋᤠᤵᤐᤥᤖᤰ ᤕᤠ᤺ᤶᤒᤰ ᤆᤥᤃᤧ᤹. ᤘᤣ᤹ ᤀᤠᤳᤋᤡᤀᤠᤱ ᤔᤧᤒᤣᤃᤧᤴᤏᤧ᤹॥ ᤁ᤹ᤕᤥ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇ᤻ᤕᤠᤜᤠ᤹ᤏᤢ ᤕᤠ᤺ᤶᤒᤰ ᤆᤥᤃᤧ᤹॥

⁹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤴ ᤀᤥᤔᤧᤳᤋᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠ᤺ᤶᤒᤰ ᤔᤧᤈᤥᤃᤢᤖ ᤔᤧᤕᤠᤰᤐᤠᤍᤧᤴᤏᤥ ᤘᤕᤧ᤹॥ ᤂᤧᤏᤧ᤹ ᤋᤢᤰᤂᤣ ᤁᤧᤔᤧᤴᤈᤠ᤺ᤳᤏᤧᤸᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤳᤋᤢᤱᤛᤡᤱᤅᤠᤱ ᤘᤠ᤹॥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤘᤠᤔᤡ᤺ᤰᤏᤧᤓᤃᤪ ᤐᤣᤃᤧ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤓᤠ᤺ᤳᤋᤢ ᤔᤧᤕᤢᤰᤂᤢᤒᤠ ᤁᤢ᤺ᤴᤍᤠᤀᤥᤒᤠ ᤆᤫᤠ᤺ᤳᤋᤡᤴ ᤌᤢᤅᤧ᤹॥”

¹⁰ ᤂᤧᤒᤩᤠᤱ ᤖᤢᤌᤧᤴ ᤂᤠᤶᤒᤠᤱᤅᤥ ᤛᤠᤒᤴ ᤑᤴᤇᤡᤱ ᤜᤧᤰᤁᤩᤠᤱ ᤛᤧᤘᤠ ᤔᤧᤳᤋᤢᤀᤠᤱ ᤒᤥᤀᤈᤧᤴ ᤔᤧᤳᤋᤢ. “ᤌᤣᤀᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤧ᤹ ᤁᤶᤓᤩᤠᤖᤡᤰ ᤛᤠ᤹ᤖᤡᤰ ᤏᤡᤱᤘᤠ᤹ ᤁᤧᤈᤥᤃᤢᤒᤠᤒᤣ᥅ ᤀᤠᤱᤃᤠ᤹ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤢᤔᤠᤴ ᤌᤣᤀᤠᤱ ᤗᤢᤱᤔᤠ᤹ ᤁᤧᤍᤢᤰᤁᤠᤒᤠᤒᤣ᥅”

¹¹ ᤒᤥᤀᤈᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤕᤧᤶᤒᤠ᤺ᤴ ᤔᤠᤛᤡᤱᤅᤠᤱ ᤂᤧᤏᤧ᤹ ᤁᤧᤴᤏᤢ᤺ᤵᤔᤠᤴ ᤏᤢᤖᤡᤰ ᤁᤧᤔᤧᤳᤋᤢᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹॥ ᤂᤧᤏᤧ᤹ ᤁᤧᤶᤒᤠ ᤁᤧᤶᤔᤠ ᤏᤢ ᤀᤠᤒᤠᤅᤣ ᤁᤧᤗᤠᤈᤣᤴ ᤁᤧᤗᤧᤖᤢᤀᤠᤱ ᤀᤠᤓᤧᤸᤗᤧᤀᤠᤱ ᤁᤢᤛᤣ᤺ᤴ ᤔᤧᤴᤏᤡᤀᤣᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤍᤩᤧᤀᤠᤱ ᤁᤧᤕᤢᤱᤒᤠᤴ ᤀᤠᤱᤃᤠ᤹ ᤏᤡᤛᤢᤱ᤹॥

¹² ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤕᤠ᤺ᤶᤒᤰᤁᤡᤸᤗᤧ ᤌᤢᤶᤄᤥᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤒᤡᤖ॥ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤃᤪᤶᤒᤠᤱᤅᤥ ᤂᤧᤏᤧ᤹ ᤁᤧᤀᤡ᤺ᤶᤛᤡᤱᤅᤠᤱ ᤁᤧᤘᤠ᤹. ᤂᤧᤏᤧ᤹ ᤂᤥᤔᤠ ᤁᤧᤒᤥᤱᤒᤠ ᤌᤢᤶᤄᤥᤴ ᤂᤢᤏᤧ᤹ ᤁᤧᤒᤡᤖ᥄”

¹³ ᤖᤢᤌᤧᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤀᤠᤱᤃᤠ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤁᤧᤍᤢᤰᤁᤠ. ᤀᤠᤱᤃᤠ᤹ ᤂᤧᤏᤧ᤹ ᤗᤳᤇᤠ ᤁᤧᤕᤥ᤺ᤃ᤻ᤔᤠᤀᤠᤱ ᤔᤣ᤺ᤴᤏᤠ. ᤜᤧᤰᤁᤣᤛᤠᤱ ᤀᤠᤱᤃᤠ᤹ᤏᤢ ᤌᤡᤰᤏᤧᤳᤇᤡ ᤐᤠ᤺ᤴᤜᤠ᤹ ᤁᤧᤒᤠ᤺ᤳᤋᤢᤀᤠᤱ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤋᤩᤧᤖ ᤁᤧᤈᤥᤃᤢ॥”

¹⁴ ᤋ᤺ᤰ ᤆᤠᤔᤠ ᤕᤧᤶ ᤐᤥ᤺ᤰᤂᤧᤸᤗᤧ ᤒᤥᤀᤈᤧᤸᤗᤧ ᤖᤢᤌᤧᤴ ᤔᤧᤳᤋᤢ. “ᤑᤧᤖᤧ᤹. ᤂᤖᤧ᤺ᤱᤅᤡᤴ ᤆᤩᤧ᤹. ᤂᤖᤧ᤺ᤱᤅᤡᤴ ᤁᤢᤘᤠᤀᤥ ᤜᤢᤶᤛᤧ᤹ᤀᤠᤱ ᤆᤩᤧ᤹॥” ᤜᤧᤰᤁᤩᤠᤱ ᤂᤢᤏᤧ᤹ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤏᤢ ᤕᤢᤱᤛᤡᤱ॥ ᤒᤥᤀᤈᤧᤸᤗᤧ ᤂᤢᤏᤧ᤹ ᤁᤢᤓᤠ ᤏᤔᤏᤠᤒᤠ ᤁᤢᤈᤠᤈᤡ ᤐᤡᤖᤢ॥ ᤂᤢᤏᤧ᤹ ᤁᤢᤛᤠᤵᤐᤥᤰ ᤂᤠᤄᤠ ᤆ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤆᤠᤔᤠ ᤁᤢᤈᤠ ᤏᤖᤧ॥

¹⁵ ᤂᤧᤴ ᤀᤣᤃᤠᤱ ᤂᤢᤏᤧ᤹ ᤐᤥᤃᤧᤀᤠᤱ ᤆᤠ ᤑᤢᤱᤛᤧ ᤐᤣ॥ ᤂᤧᤒᤩᤠᤱ ᤒᤥᤀᤈᤧᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤏᤠᤜᤠ᤹ ᤀᤰᤋᤱᤒᤠ ᤀᤡᤱᤈᤠᤱ ᤐᤡᤖᤢᤛᤡ. “ᤁᤢᤈᤠ ᤁᤧᤜᤧᤃᤢᤶᤔᤠᤱ ᤁᤧᤕᤢᤰᤂᤢᤶᤒᤠ ᤆᤠᤎ᤺ᤱᤔᤠᤜᤠ᤹ᤖᤧ ᤁᤢᤗᤢᤶᤔᤥᤀᤠᤱ ᤂᤧᤴ ᤛᤡᤗᤠ ᤁᤥ᤺ᤵᤔᤠ ᤑᤠ᤺ᤰᤋᤧᤶᤔᤧ᤹. ᤂᤢᤏᤧ᤹ ᤔᤧᤎᤣ᤺ᤰᤋᤧᤶ ᤔᤧᤛᤠᤰᤋᤧᤶᤔᤡᤴᤏᤧ᤹.

¹⁶ ᤂᤧᤴᤏᤢ᤺ᤸᤗᤧ ᤘᤣ᤹ ᤁᤧᤄᤣ᤺ᤰᤂᤢᤶᤒᤠ ᤆᤠᤎ᤺ᤱᤔᤠᤜᤠ᤹ ᤗᤠᤶᤒᤠᤀᤠᤱ ᤁᤢᤓᤠ ᤁᤢᤈᤠ ᤂᤢᤏᤧ᤹ ᤗᤧᤖᤧᤶ ᤐᤡᤖᤧᤶᤔᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤏᤧ᤹ ᤛᤢᤶᤔᤠ ᤑᤠ᤺ᤰᤋᤧᤶᤔᤧ᤹॥”

¹⁷ ᤀᤰᤂᤣᤗ᤹ᤖᤡᤰ ᤖᤢᤌᤧᤸᤗᤧ ᤕᤢ᤺ᤴᤇᤡᤰ ᤌᤠᤖᤡᤰ ᤀᤡᤰᤋᤠᤵᤜᤠ᤹ᤀᤥ ᤛᤡᤗᤠ ᤁᤥ᤺ᤳᤋᤢ ᤂᤧᤴ ᤁᤥ᤺ᤳᤋᤢᤒᤠ ᤁᤢᤍᤠᤵᤔᤠᤜᤠ᤹ ᤏᤢᤃᤢᤸᤗᤧ ᤑᤥᤗᤰ ᤅᤠᤛᤡ ᤕᤠᤖᤡᤰ ᤁᤢᤈᤠ ᤗ᤺ᤴᤍᤧ॥

¹⁸ ᤜᤧᤰᤁᤩᤠᤱ ᤂᤧᤴ ᤁᤢ᤺ᤳᤇᤡᤱᤅᤠᤱ ᤂᤢᤏᤧ᤹ ᤕᤧᤰᤕᤰᤁᤥ ᤑᤧᤖᤧ. ᤂᤧᤒᤩᤠᤱ ᤂᤢᤏᤧ᤹ ᤑᤢᤰᤂᤢ ᤋᤠᤖᤢᤒᤠ ᤕᤖᤡᤰ ᤛᤡᤗᤠ ᤁᤢᤈᤠᤴ ᤁᤢᤴᤏᤢᤔᤧᤸᤗᤧ ᤏᤡᤛᤢ॥ ᤂᤧᤴ ᤀᤣᤃᤠᤱ ᤖᤢᤌᤧᤸᤗᤧ ᤀᤠᤵᤑᤣᤰ ᤆᤀᤠᤱ ᤏᤴᤇᤢᤒᤠ ᤁᤢᤈᤠ᤺ᤴᤏᤠᤱ ᤗ᤺ᤳᤋᤢᤀᤠᤱ ᤁᤢᤴᤏᤢ᤺ᤵᤔᤠᤴ ᤐᤡᤖᤢ॥

¹⁹ ᤁᤢᤴᤏᤢ᤺ᤵᤔᤠ ᤏᤠᤀᤥᤔᤡ᤺ᤸᤗᤧ ᤂᤢᤏᤧ᤹ ᤛᤣ᤺ᤴᤍᤥᤛᤢ. “ᤁᤓᤩᤠᤖᤡᤰ ᤁᤢᤈᤠᤴ ᤂᤧᤏᤧ᤹ ᤀᤠᤀᤡᤴ ᤀᤠᤳᤋᤡ ᤁᤧᤓᤢᤰᤂᤢᤒᤣ᥅ ᤂᤧᤏᤧ᤹ ᤜᤠ᤺ᤳᤗᤧ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤁᤧᤈᤥᤃᤧ᥅ ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤐᤠ ᤔᤏᤠ᤺ᤱᤃ ᤔᤢ᤹ᤀᤡᤛᤠᤒᤠᤖᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤖ᥄” ᤁᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤒᤥᤀᤈᤖᤧ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥᤃᤧᤒᤠ ᤐᤠ᤺ᤴᤏᤡᤴ ᤁᤢᤴᤏᤢ᤺ᤵᤔᤠ ᤏᤠᤀᤥᤔᤡᤴ ᤆᤧᤰᤋᤢ॥

²⁰ ᤜᤧᤰᤁᤩᤠᤱ ᤏᤠᤀᤥᤔᤡ᤺ᤸᤗᤧ ᤐᤠ᤺ᤳᤋᤢ. “ᤕᤜᤘᤣ ᤍᤠᤱᤒᤧᤸᤗᤧ ᤒᤥᤀᤈᤧᤴ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤐᤡᤖᤢᤖ. ᤕᤜᤘᤣ ᤍᤠᤱᤒᤠᤸᤗᤧ ᤆᤥᤃᤢᤒᤠ ᤔᤠᤱᤜᤢᤵᤐᤡᤴ ᤂᤢᤏᤧ᤹ ᤀᤠᤏᤡ᤹ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤏᤢ ᤀᤠᤏᤡ᤹ ᤜᤡᤶᤛᤕᤱᤒᤠ ᤁᤧᤛᤡᤒᤠ ᤁᤧᤖᤧᤰᤗᤧ ᤂᤢᤏᤡ᤹ ᤛᤶᤎᤠᤱ ᤁᤧᤳᤋᤢ᤹॥ ᤂᤧᤴ ᤔᤏᤠᤴ ᤀᤠᤎᤧ᤹ᤎᤧ᤹ᤒᤠ ᤀᤠᤏᤡ᤹ ᤀᤠᤒᤠᤅᤣ ᤏᤡ᤺ᤳᤋᤠᤱᤒᤠ ᤁᤠ᤹ᤀᤡᤖᤥ॥ ᤂᤢᤏᤧ᤹ᤃ ᤀᤠᤏᤡ᤹ ᤀᤥᤔᤧᤵᤔᤠᤀᤣ ᤁᤧᤒᤥᤱᤒᤠᤀᤠᤱᤗᤥ॥”

²¹ ᤖᤢᤌᤧᤸᤗᤧ ᤐᤠ᤺ᤳᤋᤢ. “ᤂᤧᤴᤏᤢ᤺ᤸᤗᤧ ᤘᤣ᤹ ᤆᤠ ᤜᤧᤰᤔᤠ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤂᤢᤏᤧ᤹ ᤁᤢᤔᤏᤠᤜᤠ᤹ᤏᤢ ᤛᤥᤖᤡᤰ ᤆᤠᤛᤢᤶᤔᤠ ᤕᤠ᤺ᤶᤒᤰ ᤆᤥᤃᤧ᤹ ᤔᤧᤳᤋᤠᤱᤅᤠᤱ ᤘᤠ᤹॥”

²² ᤏᤠᤀᤥᤔᤡ᤺ᤸᤗᤧ ᤖᤢᤌᤧᤴ ᤔᤧᤳᤋᤢ. “ᤀᤥᤘᤠ ᤀᤠᤛ᤻ᤛᤠᤀᤣ. ᤒᤥᤀᤈᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤂᤧᤏᤧ᤹ ᤕᤠ᤺ᤶᤒᤰ ᤆᤥᤃᤧ᤹॥ ᤁᤢᤓᤠ ᤘᤣ᤹ ᤔᤏᤠ᤺ᤸᤗᤧ ᤁᤢᤀᤡᤰᤋᤠᤵᤐᤥ ᤁᤧᤒᤣ᤺ᤰᤁᤡᤸᤗᤧ ᤂᤧᤏᤧ᤹ ᤋᤢᤰᤂᤣ ᤆᤠ᤺ᤵᤔᤠ ᤁᤧᤶᤛᤢᤰ॥”

²³ ᤁᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤔᤠᤛᤡ ᤏᤢ ᤜ᤺ᤰᤛᤡ ᤜᤧᤰᤔᤠ ᤔᤧᤴᤈᤢ᤺ᤳᤋᤣ ᤌᤠᤖᤡᤰ ᤖᤢᤌᤧᤸᤗᤧ ᤒᤥᤀᤈᤖᤧ ᤁᤢᤀᤡᤰᤋᤠᤵᤐᤥ ᤕᤠ᤺ᤶᤒᤰ ᤆᤥᤃᤢ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤒᤠᤅᤣ ᤁᤢᤴᤏᤢ᤺ᤵᤔᤠᤴᤏᤢ ᤕᤢᤅᤧᤖᤥ॥