ᤖᤥᤔᤡ 9 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤃᤢᤛᤡᤒᤠ ᤛᤢᤘᤠᤱ 1 ᤀᤡᤱᤃᤠ᤹ ᤐᤠ᤺ᤵᤔᤠ ᤏᤡᤱᤘᤠ᤹ ᤀᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣᤖᤥ॥ ᤀᤡᤱᤃᤠ᤹ ᤂᤪᤡᤛ᤻ᤋᤖᤧ ᤁᤢᤔᤏᤠᤀᤠ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤡᤱᤗᤧᤰ ᤔᤧᤒᤠ᤺ᤳᤋᤠᤴᤗᤥ॥ ᤀᤠᤄᤠᤛᤡᤱᤅᤡᤴ ᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤆᤥᤰᤗᤥ ᤑᤠ᤹ᤀᤠᤱ ᤏᤡ᤺ᤴᤎᤥ ᤆᤥ᤺ᤰᤛᤢ᤹ᤖᤥ॥ 2-3 ᤀᤠᤔᤡ᤺ᤶ ᤀᤡᤛᤪᤠᤀᤡᤗᤡ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤜᤠ᤹ᤖᤧ ᤂᤢᤏᤡ᤹ ᤗᤠᤃᤡ ᤀᤡᤱᤃᤠ᤹ ᤏᤡᤱᤘᤠ᤹ᤀᤥ ᤋᤢᤰᤂᤣ᤺ᤸᤗᤧ ᤛᤠ᤹ᤖᤡᤰ ᤕᤠ᤺ᤴᤍᤠᤱᤅᤠᤱ ᤘᤠ᤹ᤀᤠᤖᤥ॥ ᤀᤠᤒᤠᤅᤣ ᤀᤠᤛᤢᤘᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤴᤗᤵ ᤂᤥᤔᤠ ᤔᤧᤛᤢᤰᤋᤢᤸᤗᤧᤃ ᤀᤡᤱᤃᤠ᤹ ᤂᤢᤶᤍᤡᤱᤅᤥ ᤌᤠᤔᤠ ᤏᤢ ᤂᤪᤡᤛ᤻ᤋᤗᤠᤶ ᤗᤠ᤺ᤳᤗᤠ᤺ᤳ ᤐᤥᤱᤔᤠ ᤛᤢᤰᤋᤠᤱᤒᤠᤔᤧᤴ॥ 4 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤡᤜᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ ᤐᤥᤱᤛᤧ ᤛᤣᤃᤢᤛᤡᤀᤠᤱ ᤁᤢᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤔᤠᤱᤜᤢᤵᤜᤠ᤹ ᤆᤥᤃᤢᤀᤠᤱ ᤛᤠᤶᤕᤥᤌᤡᤶᤔᤡᤴ ᤐᤡᤖᤢᤛᤡ॥ ᤂᤧᤱᤜᤠ᤹ᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤠᤱᤜᤡᤶᤔᤥᤒᤠ ᤛᤧᤘᤠ ᤆᤥ᤺ᤰᤔᤠᤴ ᤏᤢ ᤕᤖᤡᤰ ᤔᤠᤱᤜᤧᤰᤜᤠ᤹ ᤐᤡᤖᤢᤛᤡᤖᤥ॥ 5 ᤁᤢᤔᤡᤱ ᤁᤧᤛᤧᤒᤠ ᤀᤒᤪᤠᤜᤠᤔ. ᤀᤡᤛᤜᤠᤁ ᤏᤢ ᤕᤠᤁᤢᤒᤧᤴ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤋᤠᤰᤌᤧᤒᤠᤛᤡᤖᤥ. ᤜᤧᤰᤁᤩᤠᤱ ᤕᤧᤛᤢ ᤂᤪᤡᤛ᤻ᤋᤧᤴ ᤔᤧᤴᤇᤠᤶᤃᤧᤴ ᤌᤰᤁᤥ ᤂᤢᤏᤡ᤹ ᤛᤢᤘᤠᤱᤅᤥᤀᤣ ᤛᤠᤘᤠ᤺ᤴᤇᤡᤱᤗᤥ॥ ᤂᤢᤏᤧ᤹ᤀᤣ ᤁᤧᤖᤧᤰ ᤛᤶᤍᤠᤱ ᤜᤠᤱ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤔᤠᤱᤗᤥ॥ ᤛᤍᤠᤍᤡᤱ ᤁᤢᤏᤠᤖᤠ ᤔᤧᤓᤥᤛᤢᤖᤖᤥ᥄ ᤀᤠᤔᤧᤴ॥ 6 ᤁᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ᤏᤢ ᤆᤥᤃᤢᤒᤠ ᤔᤠᤱᤜᤧᤰᤜᤠ᤹ᤃ ᤔᤧᤃᤧᤖᤧᤶᤒᤠ ᤔᤣ᤺ᤴᤗᤥ. ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗ ᤛᤢᤘᤠᤱᤗᤠᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤁᤧᤖᤧᤰᤁ ᤛᤧᤰᤂᤠᤒᤠ ᤀᤡᤛᤪᤠᤀᤡᤗᤡ ᤔᤣ᤺ᤴᤇᤡᤖᤥ॥ 7 ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤔᤧᤒᤥᤱᤅᤡᤸᤗᤧᤛᤠ ᤁᤧᤖᤧᤰ ᤛᤧᤰᤂᤠᤒᤠ ᤁᤢᤛ᤻ᤛᤠ ᤔᤧᤶᤒᤥᤱᤏᤧᤴᤗᤥ॥ ᤁᤖ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤔᤠᤱᤜᤧᤰ ᤆᤥᤃᤢᤱᤒᤠ ᤁᤧᤛ᤻ᤛᤠ ᤀᤡᤛᤜᤠᤁᤗᤠᤶᤔᤣ ᤁᤧᤔᤢ᤹ᤀᤡᤍᤠᤱᤛᤠᤜᤠ᤹ ᤔᤧᤒᤥᤱᤗᤥ॥” 8 ᤁᤴ ᤑᤠ᤹ᤀᤡᤱᤃ ᤀᤒᤪᤠᤜᤠᤔᤖᤧ ᤏᤠᤛᤡᤱᤃᤧᤴ ᤁᤢᤎᤰᤁᤥᤗᤠᤶ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠᤛᤡ ᤁᤧᤗ᤹ᤒᤠ ᤐᤠᤴ ᤔᤣ᤺ᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤡᤏᤧ ᤑᤠ᤹ᤀᤠᤱ ᤐᤡᤖᤢᤒᤠ ᤔᤠᤱᤜᤧᤰᤗᤠᤶᤒᤠ ᤛᤠᤃᤧᤘᤠ᤺ᤴᤇᤡᤱᤒᤠᤜᤠ᤹ᤀᤣ ᤀᤒᤪᤠᤜᤠᤔᤖᤧ ᤛᤧᤰᤂᤠᤒᤠ ᤁᤢᤔᤢ᤹ᤀᤡᤍᤠᤱᤛᤠᤛᤡᤖᤥ॥ 9 ᤂᤧᤴ ᤔᤠᤱᤜᤧᤰᤁᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ. “ᤀᤠᤴᤏᤧᤶᤔᤠ᤹ ᤒᤠ ᤁᤴ ᤕᤧᤶᤔᤥ ᤀᤡᤱᤃᤠ᤹ ᤏᤢ᤺ᤱᤅᤠ ᤋᤠᤀᤠᤖᤥ. ᤜᤧᤰᤁᤩᤠᤱ ᤁᤧᤔᤣ᤺ᤳ ᤛᤠᤖᤠ᤺ᤸᤗᤧ ᤕᤧᤶᤒᤡᤳᤇᤠ ᤛᤠᤎᤡᤰ ᤁᤳᤋᤢᤖᤥ॥” 10 ᤜᤧᤰᤁᤣᤖᤰ ᤔᤣ᤺ᤴ. ᤁᤖ ᤀᤠᤏᤡᤃᤣ ᤋᤠᤰᤌᤧᤒᤠ ᤀᤡᤛᤜᤠᤁᤗᤠᤶ ᤁᤢᤔᤣᤳ ᤖᤡᤒᤣᤰᤁᤠ᤺ᤸᤗᤧ ᤁᤠᤵᤛᤠᤒᤠᤛᤠᤜᤠ᤹ ᤁᤳᤋᤢᤛᤡᤀᤠᤱ ᤘᤕᤧ. 11-13 ᤁᤖ ᤂᤧᤴ ᤁᤠᤵᤛᤠᤒᤠᤛᤠᤜᤠ᤹ ᤛᤠᤘᤠ᤺ᤴᤇᤡᤱᤔᤠᤏᤢ᤺ᤸᤗᤧ ᤋᤃᤡᤀᤣ. ᤂᤧᤱᤜᤠ᤹ᤖᤧ ᤏᤢᤒᤠ ᤏᤢ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤌᤣᤀᤠᤱ ᤔᤧᤴᤈᤥ᤺ᤰᤁᤣ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤖᤡᤒᤣᤰᤁᤠᤴ ᤀᤰᤂᤣ ᤔᤧᤳᤋᤢᤀᤠᤱ ᤘᤕᤧᤖᤥ. “ᤋᤢᤶᤒᤠᤸᤗᤧ ᤑᤥ᤹ᤒᤠᤴ ᤛᤧᤘᤠ ᤆᤥᤃᤢ᤹ᤖᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤀᤡᤱᤃᤠ᤹ ᤕᤠᤁᤢᤒᤧᤴ ᤗᤢᤱᤔᤠ᤹ ᤋᤢᤰᤋᤢᤱ. ᤁᤖ ᤀᤧᤛᤠᤀᤢ᤺ᤴ ᤆᤡ᤺ᤳᤋᤢᤱᤗᤥ॥” ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤰᤁᤡᤴ ᤀᤥᤔᤧᤳᤋᤢᤀᤠᤱ ᤔᤣ᤺ᤴ. ᤁᤖ ᤂᤢᤏᤧ᤹ ᤀᤠᤒᤠᤅᤣ ᤁᤢᤏᤡᤱᤘᤠ᤹ᤛᤥᤰ ᤁᤢᤀᤡᤛᤡᤰ ᤛᤣᤃᤢ᤹ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡ᤺ᤴᤎᤥ ᤆᤥᤃᤢᤖᤥ॥ 14 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ᤺ᤖᤡᤰᤁᤠᤱ ᤂᤠᤛᤧᤴ ᤔᤧᤗᤥ᤺ᤴᤏᤧᤴᤒᤡ᥅ ᤛᤧᤰᤂᤠᤛᤠᤱ ᤔᤣ᤺ᤴᤗᤥ᥄ 15 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤥᤛᤠᤴ ᤀᤰᤂᤣ ᤔᤧᤳᤋᤢ. “ᤀᤠᤳᤋᤡᤴ ᤏᤢᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢᤱ ᤂᤧᤴ ᤏᤢᤖᤡᤰ ᤔᤧᤳᤋᤢᤱ. ᤜᤧᤰᤁᤩᤠᤱ ᤀᤠᤳᤋᤡᤴ ᤗᤢᤱᤔᤠ᤹ ᤋᤢᤰᤔᤠ ᤏᤡᤱᤘᤠ᤹ ᤆᤥᤃᤢᤱ ᤂᤧᤴ ᤗᤢᤱᤔᤠ᤹ ᤋᤢᤰᤋᤢᤱ॥” 16 ᤂᤧᤸᤗᤧᤆᤥᤃᤢᤸᤗᤧ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤆᤥ᤺ᤰᤔᤠᤸᤗᤧ ᤀᤡᤃᤪ ᤋᤶᤛᤡᤱ ᤆᤥ᤺ᤰᤔᤠᤸᤗᤧᤃ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤗᤠᤶ ᤁᤠᤰ ᤐᤠ᤺ᤴᤜᤠ᤹ ᤋᤠᤖᤥ॥ 17 ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤛᤠᤵᤗᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤠᤖᤥ ᤜᤠᤱᤅᤡᤴ ᤀᤰᤂᤣ ᤔᤧᤳᤋᤢᤀᤠᤱ ᤐᤳ. “ᤂᤧᤏᤧ᤹ ᤁᤧᤛᤶᤍᤠᤱ ᤀᤠᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥᤃᤢᤱᤅᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤠᤔᤡᤱᤅᤡᤴ ᤀᤡᤱᤓᤥᤖ ᤁᤧᤗ᤹ᤒᤠ ᤏᤡᤱᤘᤠ᤹ᤛᤥᤰᤁᤥ ᤀᤡᤱᤃᤠ᤹ᤀᤣ ᤂᤧᤏᤧ᤹ ᤜᤠᤱ ᤆᤥ᤺ᤰᤏᤧᤀᤠᤱ ᤘᤠ᤹ᤀᤠᤖᤥ॥” 18 ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤳᤋᤡᤴ ᤏᤢᤖᤡᤰ ᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤴ ᤏᤢᤖᤡᤰ ᤔᤧᤳᤋᤢ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤁᤢᤏᤡᤱᤘᤠ᤹ ᤏᤢ᤺ᤱᤔᤠ ᤁᤧᤛᤠᤰᤐᤠ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢ᤹. ᤂᤧᤴᤏᤡᤴ ᤁᤢᤏᤡᤱᤘᤠ᤹ ᤏᤢ᤺ᤱᤔᤠ ᤁᤧᤛᤠᤰᤐᤠ ᤆᤥᤃᤢ᤹ᤖᤥ॥ 19 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ᤀᤥ ᤁᤢᤓᤠᤖᤧ ᤀᤡᤱᤃᤠ᤹ ᤀᤰᤂᤣ ᤕᤠᤵᤔᤡ ᤁᤧᤔᤧᤳᤋᤡᤒᤡᤗᤠ. “ᤜᤧᤰᤁᤣᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤸᤗᤛᤠᤱ ᤌᤣᤀᤠᤱ ᤐᤠᤴ ᤀᤠᤎᤡᤰᤐᤠᤒᤣ᥅ ᤀᤠᤳᤋᤡᤸᤗᤧᤀᤠᤱ ᤂᤢᤏᤧ᤹ ᤆᤥ᤺ᤰᤔᤠ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤵᤔᤠ ᤔᤧᤛᤢᤰᤋᤢᤴᤗᤥ॥” 20 ᤔᤧᤴᤇᤠᤶ ᤕᤠᤵᤔᤡᤀᤣ. ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤔᤢᤖᤠ ᤁᤧᤍᤥᤒᤠ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤆᤥ᤺ᤰᤔᤏᤠᤒᤠ ᤆᤡᤃᤰᤘᤠ᤺ᤸᤗᤧ ᤁᤧᤈᤥᤰᤐᤧᤴ “ᤌᤣᤀᤠᤱ ᤀᤰᤋᤱᤒᤠ ᤁᤧᤈᤥᤃᤠᤱᤒᤠᤒᤣ᥅” ᤔᤧᤳᤋᤢᤒᤡ᥅ 21 ᤛ᤹ᤔᤏᤠᤒᤠ ᤂᤠᤶᤔᤥᤗᤠᤶ ᤁᤥ᤺ᤶᤓᤗᤣ᤺ᤸᤗᤧ ᤏᤢᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤁᤧᤒᤥᤱᤒᤠ ᤑᤢᤈᤡᤰ ᤜᤧᤰᤁᤩᤠᤱ ᤜᤠᤒᤠ ᤂᤧᤴ ᤂᤠᤶᤔᤥᤗᤠᤶ ᤔᤧᤴᤈᤥᤒᤠ ᤕᤠ᤺ᤶᤒᤰᤁᤥ ᤀᤥᤃᤵ ᤁᤧᤒᤥᤱᤒᤠ ᤑᤢᤈᤡᤰ ᤆᤥ᤺ᤰᤔᤠ ᤕᤢᤰ ᤔᤧᤃᤳᤋᤢᤶᤒᤡ᥅ 22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤡᤴ ᤏᤢ ᤁᤢᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤍᤠᤱ ᤆᤥ᤺ᤰᤔᤠ ᤕᤢᤰ ᤁᤳᤋᤢᤏᤧ ᤑᤠ᤹ᤃᤪ ᤜᤧᤰᤁᤣᤗ᤹ᤖᤡᤰᤁᤣ ᤔᤧᤰᤔᤠᤖᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤱᤒᤠ ᤔᤏᤠᤜᤠ᤹ ᤛᤡᤰᤁᤡᤸᤗᤧ ᤁᤢᤗᤧᤰᤘᤠ ᤏᤠᤛᤡ ᤌ᤺ᤳᤋᤢᤛᤡᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ 23 ᤜᤧᤰᤁᤩᤠᤱ ᤋᤃᤡᤛᤠ ᤁᤢᤔᤡᤔᤡᤍᤡᤱᤅᤡᤴ ᤂᤥᤔᤠ ᤑᤠ᤹ᤀᤠᤱ ᤕᤠᤖᤡᤵ ᤆᤥᤃᤢᤛᤡᤀᤠᤱ ᤗᤢᤱᤔᤠ᤹ ᤋᤢᤰᤋᤢᤛᤡᤒᤠᤜᤠ᤹ ᤀᤡᤔᤧᤸᤗᤢᤱᤒᤠ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤰᤛᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤆᤥᤃᤢᤖᤥ॥ 24 ᤜᤧᤰᤁᤣᤗ᤹ᤖᤡᤰᤁᤣ ᤀᤠᤏᤡ᤹ ᤕᤜᤢᤍᤡᤛᤠᤱ. ᤌᤡᤶᤔᤧᤴᤍᤱ ᤛᤢᤘᤠᤱᤛᤠᤱ. ᤂᤧᤴ ᤛᤣᤃᤢᤛᤡᤒᤠᤜᤠ᤹ᤃ ᤀᤠᤏᤡ᤹ᤀᤣᤖᤥ॥ 25 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤜᤥᤛᤣᤖᤧ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤢᤀᤠᤱ ᤐᤳᤗᤥ. “ᤀᤠᤳᤋᤡᤴᤜᤠ᤹ ᤀᤠᤔᤏᤠ ᤔᤧᤜᤥ᤺ᤵᤋᤧ ᤂᤧᤱᤜᤠ᤹ ᤀᤠᤔᤏᤠ ᤆᤥᤃᤢᤱᤛᤡᤱᤗᤥ॥ ᤋᤃᤡ ᤗᤢᤱᤔᤠ᤹ ᤔᤧᤍᤢᤰᤋᤢᤱᤛᤡᤱᤅᤡᤴᤒᤠᤜᤠ᤹. ᤀᤠᤸᤗᤥ ᤗᤢᤱᤔᤠ᤹ ᤋᤢᤰᤋᤢᤱᤛᤡᤱᤗᤥ॥” 26 ᤜᤧᤰᤁᤩᤠᤱ. ᤀᤠᤳᤋᤡᤴ ᤋᤧᤴᤏᤥ “ᤂᤡᤏᤡ᤹ ᤀᤠᤔᤏᤠ ᤁᤧᤜᤥ᤺ᤵᤋᤡ ᤗ᤹ᤖᤡᤰ ᤁᤧᤶᤔᤧᤳᤋᤡᤀᤠᤱ ᤘᤕᤧ. ᤒᤠ ᤂᤧᤴ ᤋᤧᤴᤏᤥ ‘ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛ᤻ᤛᤠᤏᤡᤱ’ ᤁᤧᤶᤔᤧᤳᤋᤡ᤹ᤖᤥ॥” 27 ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤀᤠᤱ ᤐᤳ. “ᤀᤡᤛᤪᤠᤀᤡᤗᤡᤜᤠ᤹ᤃ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤘᤠᤜᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠ ᤜᤧᤰᤁᤣ ᤕᤖᤡᤰ ᤔᤧᤈᤥ᤺ᤰᤛᤠᤱ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ᤖᤰ ᤋᤠᤱᤔᤧᤛᤧ᤺ᤵᤗᤥ॥ 28 ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤄᤢᤶᤍᤡᤱᤅᤡᤸᤗᤧᤴ ᤀᤡᤱᤈᤠᤱᤅᤡᤴ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤖᤠᤀᤣ ᤁᤧᤳᤋᤢ᤹ᤖᤥ॥” 29 ᤕᤛᤤᤕᤠᤖᤧ ᤀᤡᤛᤪᤠᤀᤡᤗᤖᤧ ᤁᤢᤕᤠ᤺ᤶᤒᤣᤀᤥ ᤁᤴ ᤋᤃᤡᤛᤠ ᤐᤠ᤺ᤳᤋᤢᤀᤠᤱ ᤘᤠ᤹ᤒᤠ ᤜᤧᤰᤁᤣᤀᤣ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤗᤠᤃᤡ ᤁᤢᤔᤢ᤹ᤀᤡᤍᤠᤱᤛᤠᤴ ᤀᤠᤴᤎᤠ᤹ᤖᤧᤴᤏᤡᤸᤗᤧᤃ ᤀᤠᤏᤡ᤹ ᤛᤍᤥᤔ ᤏᤢ ᤃᤔᤥᤖᤠ ᤁᤢᤀᤡᤛᤡ᤺ᤰᤁᤣ ᤂᤠᤵᤐᤢᤌᤩ᤺ᤱ ᤀᤠᤒᤥ᤺ᤰᤂᤧᤒᤠᤖᤥ॥” ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤛᤠᤴ ᤔᤧᤴᤈᤥᤃᤢᤴ 30 ᤜᤧᤰᤁᤣ᤺ᤸᤗᤧ ᤀᤠᤸᤗ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧᤃ ᤛᤠᤶᤕᤥᤒᤠ ᤐᤥᤱᤔᤠ ᤔᤧᤱᤃᤥ᤺ᤳᤋᤢᤴᤇᤠᤱ ᤏᤛᤠᤴ ᤔᤧᤈᤥᤃᤢᤒᤠᤗᤠᤶᤒᤠ ᤛᤠᤶᤕᤥᤒᤠ ᤔᤧᤒᤥ᤺ᤰᤂᤧ॥ 31 ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤠᤶᤕᤥᤒᤠ ᤐᤥᤱᤔᤠ ᤋᤶᤛᤡᤱ ᤔᤧᤈᤥᤃᤢᤛᤠᤱ ᤛᤠᤶᤕᤥᤒᤠ ᤔᤧᤴᤒᤥ᤺ᤰᤂᤧᤴᤗᤥ॥ 32 ᤌᤣᤀᤠᤱ ᤔᤧᤴᤒᤥ᤺ᤰᤂᤧᤴᤒᤣ᥅ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤱᤃ ᤀᤠᤒᤠᤅᤣ ᤕᤠ᤺ᤶᤒᤰᤗᤠᤶᤒᤠ ᤂᤥᤔᤠ ᤛᤢᤰᤋᤧᤳ ᤁᤧᤗ᤹ᤒᤠ ᤔᤧᤀᤡ᤺ᤳᤋᤢᤀᤠᤱ ᤏᤛᤠ᤺ᤴᤗᤠᤶᤒᤠ ᤁᤧᤍᤠᤒᤠ ᤛᤠᤶᤕᤥᤒᤠᤴ ᤔᤧᤱᤃᤥ᤺ᤳᤋᤢᤴᤗᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤕᤠᤵᤔᤡ ᤁᤧᤄ᤺ᤒᤠ ᤗᤢᤱᤅᤥ ᤔᤧᤍᤥ᤺ᤰᤋᤧᤀᤠᤱ ᤔᤧᤈᤥ᤺ᤴᤍᤧᤖᤥ॥ 33 ᤁᤱᤃ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤒᤠ ᤁᤢᤀᤡᤛᤡᤰ ᤐᤥ᤺ᤰᤂᤧᤖᤥ. “ᤀᤥᤔᤧᤳᤋᤧᤶᤔᤧ᤹. ᤀᤡᤱᤃᤠ᤹ ᤕᤖᤢᤛᤗᤧᤶᤔᤥ ᤔᤏᤠᤜᤠ᤹ ᤔᤧᤍᤥ᤺ᤰᤗ ᤑᤠ᤹ᤀᤠᤱ ᤔᤏᤠ ᤁᤧᤄᤒᤠ ᤗᤢᤱᤅᤡᤴ ᤏᤧᤛ᤻ᤛᤢᤱᤗᤥ. ᤜᤧᤰᤁᤩᤠᤱ ᤔᤧᤗᤧ᤺ᤱᤅᤠᤱ ᤔᤧᤃᤧᤱᤗ ᤑᤠ᤹ᤀᤠᤱ ᤗᤢᤱᤈᤣᤰ ᤏᤧᤛ᤻ᤛᤢᤱᤗᤥ. ᤁᤖ ᤂᤢᤏᤧ᤹ ᤛᤶᤍᤠᤱ ᤏᤛᤠᤴ ᤁᤧᤈᤥ᤺ᤰᤐᤠᤱᤃ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱᤔᤔᤥ ᤔᤧᤎᤠᤏᤧᤴᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.