ᤖᤥᤔᤡ 7 - LIFOTNTᤔᤣ᤺ᤰᤂᤡᤶᤗᤠᤶ ᤗᤳᤇᤠ ᤁᤢᤒᤡ 1 ᤀᤠᤸᤗ ᤛᤠᤶᤕᤥᤌᤡᤶ ᤁᤧᤗᤧᤒᤠ ᤁᤧᤏᤡᤒᤠ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ ᤐᤠ᤺ᤵᤔᤠ ᤁᤥ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤁᤧᤏᤡ᤺ᤳᤋᤢᤶᤗᤥ॥ ᤛᤠᤶᤕᤥᤌᤡᤶᤔᤡᤸᤗᤧᤃ ᤔᤏᤠᤴ ᤁᤢᤜᤡᤱᤘᤧᤳ ᤘᤠ᤹ᤖ ᤌᤠᤖᤡᤰᤗᤰ ᤕᤢᤰᤋᤢ᤹॥ 2 ᤔᤣ᤺ᤰᤂᤡᤶᤔᤡᤸᤗᤧ ᤁᤢᤒᤡᤎᤡᤰ ᤐᤡᤏᤡᤱᤗᤥ. ᤔᤣ᤺ᤰᤂᤡᤶ ᤁᤧᤒᤥᤱᤔᤠ ᤔᤧᤴᤇᤢᤔᤠ᤹ᤀᤡᤴ ᤀᤡᤳᤌᤢᤱᤃᤧᤴ ᤁᤢᤕᤧᤶᤒᤠ᤹ᤀᤡᤴ ᤜᤡᤱᤅᤠᤱ ᤘᤠ᤹ᤖ ᤌᤠᤖᤡᤰ ᤛᤠᤶᤕᤥᤌᤡᤶᤔᤡᤸᤗᤧ ᤂᤧᤴ ᤁᤢᤕᤧᤶᤒᤠ᤹ᤀᤡᤴᤏᤢ ᤀᤡᤄᤣ᤺ᤰᤂᤢᤀᤠᤱ ᤘᤠ᤹॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡᤏᤧᤓᤃᤪ ᤂᤧᤴ ᤔᤣ᤺ᤰᤂᤡᤶᤌᤡᤶᤗᤠᤶ ᤆᤥ᤺ᤰᤕᤢᤶᤓᤥᤔᤠ ᤐᤥᤱᤗᤥ॥ 3 ᤜᤧᤰᤁᤣᤗ᤹ᤖᤡᤰᤁᤣ ᤁᤢᤕᤧᤶᤒᤠ᤹ᤀᤡᤴ ᤁᤢᤜᤡᤱᤘᤧᤳ ᤘᤠ᤹ᤖᤀᤣ ᤂᤧᤸᤗᤧ ᤘᤣ᤹ ᤔᤏᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤏᤧ ᤑᤠ᤹ᤃᤪ ᤂᤧᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤧᤳᤋᤢ᤹ᤖᤥ॥ ᤁᤖ ᤁᤢᤕᤧᤶᤒᤠ᤹ᤀᤡᤴ ᤛᤡᤀᤠᤱᤃ ᤂᤢᤏᤧ᤹ ᤔᤣ᤺ᤰᤂᤡᤶᤌᤡᤶᤗᤠᤶ ᤆᤥ᤺ᤰᤕᤢᤶᤓᤥᤔᤠ ᤐᤥᤱᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤘᤣ᤹ ᤔᤏᤠ᤺ᤴᤏᤢ ᤔᤣ᤺ᤰᤂᤡᤶ ᤆᤥᤃᤢᤸᤗᤧ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢᤒᤠ ᤔᤧᤒᤥᤱᤏᤧᤸᤗᤥ॥ 4 ᤜᤧᤰᤁᤣ᤺ᤸᤗᤧ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤪᤡᤛ᤻ᤋᤧᤴ ᤛᤩᤧ᤺ᤸᤗᤧ ᤂᤡᤏᤡ᤹ᤀᤠᤱ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤡᤸᤗᤧ ᤀᤡᤃᤧᤓᤢᤳᤋᤡᤀᤠᤱ ᤁᤧᤘᤕᤡᤒᤠᤀᤥᤗᤠᤶ ᤁᤧᤒᤠ᤺ᤰᤂᤡᤖᤥ॥ ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤀᤠᤏᤡ᤹ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤀᤠᤏᤡ᤹ᤃ ᤛᤡᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤁᤧᤒᤥᤱᤒᤠᤴᤏᤢ ᤌᤡᤰᤜᤢᤵ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤖᤥ॥ 5 ᤀᤠᤏᤡ᤹ᤃ ᤗᤠᤕᤥᤒᤠ ᤛᤢᤳᤏᤠ᤺ᤸᤗᤧ ᤀᤠᤕᤢᤰᤋᤧᤀᤠᤱ ᤀᤠᤘᤕᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤗᤠᤕᤥᤒᤠ ᤏᤡᤱᤘᤠ᤹ᤀᤡᤴ ᤑᤥ᤺ᤰᤂᤢᤀᤠᤱ ᤀᤠᤏᤡ᤹ ᤀᤠᤈᤥᤃᤢᤶᤒᤠ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤛᤡᤔᤧᤴ ᤋᤠᤖᤢᤖᤥ॥ 6 ᤁᤖ ᤀᤠᤸᤗᤥᤃ. ᤋᤃᤡ ᤀᤠᤏᤡ᤹ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤐᤠ ᤛᤠᤶᤕᤥᤌᤡᤶᤗᤠᤶᤒᤠ ᤆᤥ᤺ᤰᤕᤢᤶᤓᤥ ᤀᤠᤄᤥᤛᤢᤶᤔᤠᤱ ᤀᤠᤘᤠ᤹॥ ᤀᤠᤸᤗ ᤀᤠᤏᤡ᤹ᤃ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤘᤕᤧᤸᤗᤧ ᤛᤧᤘᤠ ᤀᤠᤈᤥᤃᤢᤶᤒᤠ ᤜᤧᤰᤁᤣ ᤔᤣ᤺ᤴ. ᤁᤖ ᤛᤣᤛᤣᤔᤠᤱᤗᤠᤶᤒᤠ ᤁᤢᤛᤱ ᤜᤡᤱᤔᤴᤏᤥ ᤛᤧᤘᤠ ᤀᤠᤈᤥᤃᤢᤶᤗᤥ॥ ᤛᤠᤶᤕᤥᤌᤡᤶ ᤏᤢ ᤗᤠᤕᤥ 7 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤛᤠᤶᤕᤥᤌᤡᤶᤔᤡᤴ ᤗᤠᤕᤥᤒᤡ᥅ ᤛᤧᤰᤂᤠᤛᤠᤱ ᤔᤣ᤺ᤴᤗᤥ᥄ ᤁᤖ ᤛᤠᤶᤕᤥᤌᤡᤶᤔᤡᤴ ᤜᤥ᤺ᤵᤋᤧᤸᤗᤧᤃ ᤀᤡᤱᤃᤠ᤹ ᤀᤠᤜᤡᤱᤔᤴᤏᤥᤒᤠ ᤗᤠᤕᤥᤜᤠ᤹ ᤔᤧᤴᤏᤡᤒᤠᤴᤔᤧᤴ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤸᤗᤧ. “ᤂᤧᤏᤧ᤹ ᤔᤧᤄᤡ᤺ᤵᤛᤧᤴᤏᤧ᤹” ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤴᤏᤡᤸᤗᤧᤃ ᤀᤡᤱᤃᤠ᤹ ᤂᤡ᤺ᤶᤔᤠᤴ ᤋᤠᤵᤑᤧ᤺ᤶᤒᤠᤖᤥ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤱᤅᤡᤴᤒᤠᤖᤥ॥ 8 ᤁᤖ ᤁᤴ ᤗᤠᤕᤥᤸᤗᤧ ᤛᤠᤶᤕᤥᤀᤡᤱᤈᤠᤱᤗᤠᤶ ᤛᤢᤕᤧᤶ ᤂᤥᤛᤢᤀᤠᤱ ᤀᤡᤱᤃᤠ᤹ ᤀᤠᤛᤡᤃᤠᤱ ᤁᤠᤰ ᤐᤖᤡᤰᤗᤧᤴ ᤂᤡ᤺ᤶᤔᤠ ᤏᤡᤱᤘᤠ᤹ᤀᤡᤴ ᤑᤥ᤺ᤰᤂᤢ॥ ᤌᤣᤀᤠᤱᤓᤧᤸᤗᤧ ᤛᤠᤶᤕᤥᤌᤡᤶᤔᤡᤴ ᤜᤥ᤺ᤵᤋᤧᤸᤗᤧᤃ ᤗᤠᤕᤥᤸᤗᤧ ᤁᤢᤔᤢᤰᤛᤠᤶ ᤜᤥ᤺ᤵᤋᤧᤒᤠᤖᤥ॥ 9 ᤋᤃᤡ ᤀᤡᤱᤃᤠ᤹ ᤛᤠᤶᤕᤥᤌᤡᤶᤔᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱᤅᤡᤸᤗᤧ ᤏᤢᤒᤠ ᤘᤕᤧ. ᤁᤖ ᤛᤠᤶᤕᤥᤀᤡᤱᤈᤠᤱᤅᤡᤴ ᤁᤢᤛᤡᤱ ᤏᤡ᤺ᤳᤋᤢᤱᤅᤡᤸᤗᤧ ᤀᤡᤱᤃᤠ᤹ ᤀᤠᤜᤡᤱᤔᤴᤏᤥ ᤗᤠᤕᤥᤴ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤀᤠᤱ ᤀᤡᤱᤃᤠ᤹ ᤛᤩᤠᤱᤗᤥ॥ 10 ᤁᤴ ᤛᤠᤶᤕᤥᤀᤡᤱᤈᤠᤱᤅᤡᤸᤗᤧᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤋᤠ᤺ᤵᤔᤠ ᤁᤧᤒᤥᤱᤒᤠ ᤘᤕᤧ ᤁᤖ ᤂᤧᤸᤗᤧᤃ ᤛᤡᤔᤠᤏᤡ ᤋᤠᤖᤢ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤂᤥᤛᤢᤱᤗᤥ॥ 11 ᤌᤣᤀᤠᤱᤓᤧᤸᤗᤧ ᤗᤠᤕᤥᤸᤗᤧ ᤛᤠᤶᤕᤥᤀᤡᤱᤈᤠᤱᤗᤠᤶ ᤛᤢᤕᤧᤶ ᤂᤥᤛᤢᤀᤠᤱ ᤀᤡᤱᤃᤠ᤹ ᤀᤡᤱᤗᤧᤰᤋᤠᤱᤗᤥ. ᤜᤧᤰᤁᤩᤠᤱ ᤒᤠ ᤁᤴ ᤛᤠᤶᤕᤥᤀᤡᤱᤈᤠᤱᤗᤠᤶ ᤀᤡᤱᤃᤠ᤹ ᤛᤧᤖᤠᤱᤗᤥ॥ 12 ᤜᤧᤰᤁᤣᤛᤠᤱ ᤛᤠᤶᤕᤥᤌᤡᤶᤔᤡᤴ ᤛᤣᤛᤣᤒᤠ ᤆᤥ᤺ᤰᤐᤠᤸᤗᤧ ᤁᤢᤀᤡᤱᤈᤠᤱᤜᤠ᤹ ᤛᤣᤛᤣᤒᤠ. ᤛᤠᤶᤕᤥᤒᤠ ᤏᤢ ᤏᤢᤒᤠ ᤆᤥᤰᤗᤥ॥ 13 ᤜᤧᤰᤁᤣ᤺ᤸᤗᤧ ᤏᤢᤒᤠ ᤐᤠ᤺ᤴᤏᤡᤸᤗᤧ ᤀᤡᤱᤃᤠ᤹ ᤀᤠᤗᤠᤃᤡ ᤛᤡᤔᤧᤴ ᤋᤠᤖᤢᤒᤡ᥅ ᤔᤧᤍᤠᤖᤢᤴᤗᤥ. ᤁᤖ ᤗᤠᤕᤥᤴ ᤗᤠᤕᤥᤀᤣᤖᤥ ᤗ᤹ᤖᤡᤰ ᤁᤢᤛᤡᤱ ᤏᤡ᤺ᤵᤔᤠ ᤀᤠᤛᤢᤰᤋᤢᤶᤗ ᤑᤠ᤹ᤀᤠᤱ ᤗᤠᤕᤥᤸᤗᤧ ᤏᤢᤒᤠ ᤐᤠ᤺ᤴᤗᤠᤶ ᤀᤡᤱᤃᤠ᤹ᤀᤥ ᤕᤠᤶᤛᤠᤶᤃᤧᤴ ᤛᤡᤔᤧᤴ ᤋᤠᤖᤢ. ᤜᤧᤰᤁᤣ᤺ᤸᤗᤧ ᤛᤠᤶᤕᤥᤀᤡᤱᤈᤠᤱᤅᤡᤸᤗᤧ ᤆᤥᤃᤢᤸᤗᤧ ᤗᤠᤕᤥᤴ ᤀᤠᤸᤗᤛᤠᤱ ᤛᤠ᤹ᤖᤡᤰ ᤗᤠᤕᤥᤒᤠ ᤆᤥᤰ ᤑᤠ᤹ᤀᤠᤱ ᤏᤡᤛᤢᤱᤗᤥ॥ ᤏᤧᤳᤇᤡ ᤐᤖᤡᤰᤐᤠ ᤔᤧᤴᤇᤠᤶ ᤛᤢᤳᤏᤠ 14 ᤛᤠᤶᤕᤥᤌᤡᤶᤔᤡᤴ ᤕᤠᤶᤛᤠᤶᤒᤠ ᤆᤥᤰ ᤗ᤹ᤖᤡᤰ ᤁᤢᤛᤡᤱ ᤀᤠᤏᤡ᤺ᤳᤋᤢᤶᤔᤠᤱ ᤘᤠ᤹. ᤁᤖ ᤀᤡᤱᤃᤠ᤹ ᤕᤠᤶᤛᤠᤶᤒᤠ ᤔᤧᤈᤥᤰᤁᤠᤴ ᤜᤧᤰᤁᤩᤠᤱ ᤕᤥ᤺ᤰᤐᤠᤜᤠ᤹ ᤔᤧᤍᤥ᤺ᤰᤐᤠ ᤁᤢᤀᤡᤛᤡᤰ ᤀᤡᤱᤃᤠ᤹ᤀᤠᤱ ᤗᤠᤕᤥᤀᤥᤀᤣ ᤋᤥ᤺ᤰᤋᤠᤱᤅᤠᤱ ᤘᤠ᤹ᤀᤠᤖᤥ॥ 15 ᤀᤡᤱᤃᤠ᤹ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤠᤴ. ᤌᤣᤀᤠᤱᤓᤧᤸᤗᤧ ᤆᤥᤃᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢᤱᤒᤠᤴ ᤔᤧᤈᤥᤰᤁᤠᤴ. ᤁᤖ ᤀᤡᤱᤃᤠ᤹ ᤆᤡ᤺ᤳᤋᤢᤱᤒᤠ ᤐᤠ᤺ᤴᤏᤡᤴᤏᤣ ᤆᤥᤃᤢᤱᤗᤥ॥ 16 ᤜᤧᤰᤁᤩᤠᤱ ᤀᤡᤱᤃᤠ᤹ ᤆᤥᤃᤢᤱᤒᤠ ᤐᤠ᤺ᤴᤏᤡᤴ ᤋᤠᤵᤑᤧ᤺ᤶᤒᤠ ᤆᤥᤰ ᤑᤠ᤹ᤀᤠᤱ ᤏᤡᤛᤢᤱᤏᤧ ᤑᤠ᤹ᤃᤪ ᤛᤠᤶᤕᤥᤌᤡᤶᤔᤡᤴ ᤏᤢᤒᤠ ᤆᤥᤰ ᤗ᤹ᤖᤡᤰ ᤋᤧᤴᤍᤡᤱ ᤆᤥᤃᤢᤱᤒᤠ ᤐᤥᤱᤗᤥ॥ 17 ᤂᤧᤸᤗᤧᤆᤥᤃᤢᤸᤗᤧ. ᤀᤠᤸᤗ ᤜᤧᤰᤁᤣ ᤁᤧᤈᤥᤰᤐᤧᤴ ᤀᤡᤱᤃᤠ᤹ ᤔᤣ᤺ᤴ. ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤗᤠᤕᤥᤸᤗᤧ ᤆᤥᤃᤢᤒᤠᤖᤥ॥ 18 ᤌᤣᤀᤠᤱᤓᤧᤸᤗᤧ ᤗᤠᤕᤥᤸᤗᤧ ᤁᤢᤎᤡᤶ ᤘᤠ᤹ᤀᤠᤒᤠᤸᤗᤧ ᤀᤡᤱᤃᤠ᤹ ᤀᤠᤛᤢᤳᤏᤠᤀᤥ ᤌᤣᤀᤠᤱ ᤏᤢᤒᤠ ᤐᤠᤴ ᤜᤥᤵ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤢᤱᤗᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤏᤢᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤳᤋᤢᤱᤛᤠᤱ ᤆᤥ᤺ᤰᤔᤠ ᤔᤧᤛᤢᤰᤁᤠᤴᤗᤥ॥ 19 ᤌᤣᤀᤠᤱᤓᤧᤸᤗᤧ ᤏᤢᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱ. ᤂᤧᤴ ᤔᤧᤈᤥᤰᤁᤠᤴ. ᤁᤖ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠᤴᤏᤧ ᤆᤥᤃᤢᤱᤗ ᤘᤠ᤹ᤀᤠᤖᤥ॥ 20 ᤜᤧᤰᤁᤣᤗ᤹ᤖᤡᤰ ᤀᤡᤱᤃᤠ᤹ ᤔᤧᤴᤈᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ ᤆᤥᤃᤢᤱᤏᤧ ᤑᤠ᤹ᤃᤪ ᤁᤴ ᤁᤧᤈᤥ᤺ᤰᤐᤠᤱᤃ ᤀᤡᤱᤃᤠ᤹ ᤔᤣ᤺ᤴ. ᤁᤖ ᤀᤡᤱᤃᤠ᤹ᤀᤥ ᤁᤧᤘᤠ᤹ᤒᤠ ᤗᤠᤕᤥᤸᤗᤧ ᤜᤧᤰᤁᤣ ᤆᤥᤃᤢᤒᤠᤖᤥ॥ 21 ᤀᤰᤂᤣᤗ᤹ᤖᤡᤰ ᤁᤴ ᤌᤡᤶᤔᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤀᤡᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ—ᤀᤡᤱᤃᤠ᤹ ᤏᤢᤒᤠ ᤐᤠᤴ ᤆᤥ᤺ᤰᤔᤠ ᤏᤡᤱᤘᤠ᤹ ᤆᤥᤃᤢᤱᤅᤡᤸᤗᤧ ᤋᤠᤵᤑᤧ᤺ᤶᤒᤠᤴ ᤀᤡᤱᤃᤠ᤹ᤏᤢᤀᤣ ᤘᤠ᤹ᤖᤥ॥ 22 ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤥ ᤛ᤺ᤳᤋᤠᤖᤥ॥ 23 ᤁᤖ ᤀᤡᤱᤃᤠ᤹ᤀᤥᤃ ᤘᤣ᤹ᤛᤔᤠ ᤔᤢᤰᤛᤠᤶᤔᤡᤸᤗᤧ ᤕᤠ᤺ᤶᤒᤰ ᤆᤥᤃᤢᤒᤠ ᤏᤡᤛᤢᤱ॥ ᤂᤧᤴ ᤔᤢᤰᤛᤠᤶᤔᤡᤸᤗᤧᤃ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤏᤡᤱᤘᤠ᤹ᤀᤡᤸᤗᤧ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤥ᤺ᤳᤋᤢᤒᤠ ᤌᤡᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤆᤥᤃᤢ᤹. ᤜᤧᤰᤁᤩᤠᤱ ᤗᤠᤕᤥᤀᤥ ᤐᤢᤱᤗᤠᤎᤠᤒᤠ ᤆᤥ᤺ᤰᤁᤠᤀᤠᤱ ᤗᤠᤕᤥᤸᤗᤧ ᤀᤡᤱᤃᤠ᤹ ᤕᤢᤰᤁᤠᤖᤥ॥ 24 ᤀᤣ. ᤀᤡᤱᤃᤠ᤹ᤃ ᤀᤠᤰᤂᤧᤴ ᤛᤠ᤹ᤖᤡᤰ ᤐᤵᤐᤪᤠᤔᤠ ᤔᤏᤠᤀᤠᤒᤣ᥅ ᤁᤴ ᤗᤠᤕᤥ ᤏᤢ ᤛᤡᤔᤧᤸᤗᤧ ᤕᤢᤰᤋᤢᤒᤠ ᤜᤡᤱᤔᤴᤗᤠᤶ ᤜᤠ᤺ᤳᤗᤧ ᤛᤧ᤺ᤵᤔᤠ ᤛᤢᤰᤁᤠᤒᤣ᥅ 25 ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ᥄ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤛᤧ᤺ᤵᤗᤥ᥄ ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡᤱᤘᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶᤔᤡᤸᤗᤧ ᤁᤢᤛᤧᤘᤠ ᤆᤥᤃᤢᤱ. ᤁᤖ ᤗᤠᤕᤥᤒᤠ ᤌᤡᤶᤔᤡᤸᤗᤧ ᤌᤡᤶᤛᤢᤒᤠ ᤛᤢᤳᤏᤠᤀᤥᤃ ᤗᤠᤕᤥᤸᤗᤧ ᤁᤢᤛᤧᤘᤠ ᤆᤥᤃᤢᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.