ᤖᤥᤔᤡ 6 - LIFOTNTᤗᤠᤕᤥᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤧᤃᤧ 1 ᤀᤠᤸᤗ ᤀᤠᤏᤡ᤹ ᤌᤣ ᤐᤠ᤺ᤵᤔᤠᤒᤣ᥅ ᤗᤢᤱᤃᤢᤶᤔᤡᤴ ᤀᤠᤳᤋᤠᤳᤋᤠᤴᤏᤣ ᤀᤠᤄᤥᤛᤢᤶᤗ ᤑᤠ᤹ᤀᤠᤱ ᤗᤠᤕᤥ ᤆᤥ᤺ᤰᤔᤠᤖ ᤘᤠ᤹ᤔᤠᤒᤡ᥅ 2 ᤔᤣ᤺ᤴᤗᤥ᥄ ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴᤗᤥ᥄ ᤀᤠᤏᤡ᤹ᤃ ᤁᤢᤛᤡᤘᤧᤳ ᤔᤏᤠ ᤜᤧᤰᤋᤱᤒᤠ ᤀᤠᤈᤥ᤺ᤰᤗᤥ. ᤜᤧᤰᤁᤩᤠᤱ ᤀᤠᤸᤗ ᤗᤠᤕᤥᤸᤗᤧ ᤁᤢᤕᤢᤰᤁᤥ ᤀᤠᤴᤘᤠ᤹ᤏᤧᤴᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤀᤠᤱᤎᤥ ᤗᤠᤕᤥ ᤆᤥ᤺ᤰᤔᤠᤖ ᤘᤠ᤹ᤔᤠ ᤔᤧᤏᤢ᤹ᤏᤧᤴᤗᤥ॥ 3 ᤀᤠᤏᤡ᤹ ᤂᤪᤡᤛ᤻ᤋ ᤕᤧᤛᤢᤀᤥ ᤒᤵᤋᤡᤛ᤻ᤔᤠ ᤀᤠᤒᤥ᤺ᤰᤂᤧᤸᤗᤧ ᤂᤢᤏᤧ᤹ᤏᤢᤀᤣ ᤀᤠᤛᤩᤧ ᤁᤧᤗ᤹ᤒᤠᤴ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤡᤴᤒᤡ᥅ 4 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ᤃ ᤒᤵᤋᤡᤛ᤻ᤔᤠᤗᤠᤶ ᤛᤡᤔᤧᤴᤏᤥ ᤂᤢᤏᤧ᤹ᤏᤢ ᤀᤠᤜᤢᤶᤛᤡᤱ. ᤜᤧᤰᤁᤣ᤺ᤸᤗᤧ ᤂᤪᤡᤛ᤻ᤋᤧᤴ ᤐᤠᤏᤢᤍᤡᤱ ᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡᤔᤡᤍᤡᤱᤃᤧᤴ ᤁᤢᤔᤢᤰᤛᤠᤶᤔᤡᤸᤗᤧ ᤛᤡᤔᤧᤴᤗᤠᤶᤒᤠ ᤁᤢᤜᤡᤱᤘᤧᤳ ᤆᤥᤃᤢᤒᤠ ᤁᤢᤀᤡᤛᤡᤰ ᤀᤠᤏᤡ᤹ᤀᤠᤱ ᤁᤢᤛᤱ ᤜᤡᤱᤔᤴᤏᤥ ᤀᤠᤜᤡᤱᤗᤥ॥ 5 ᤀᤠᤏᤡ᤹ ᤁᤢᤛᤡᤔᤧᤴᤏᤥ ᤂᤢᤏᤧ᤹ᤏᤢ ᤌᤡᤰᤜᤢᤵ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤒᤠ ᤜᤧᤰᤁᤣ ᤀᤠᤏᤡ᤹ᤀᤠᤱ ᤂᤢᤏᤧ᤹ᤏᤢᤀᤣ ᤛᤡᤔᤧᤴᤗᤠᤶ ᤕᤠᤶᤔᤥ ᤀᤠᤜᤡᤱᤗᤥ॥ 6 ᤗᤠᤕᤥᤸᤗᤧ ᤁᤢᤕᤢᤰᤁᤡᤴ ᤀᤠᤏᤡ᤹ ᤜᤡᤱᤔᤴᤏᤥᤗᤠᤶ ᤔᤧᤰᤗ ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤗᤠᤕᤥᤖᤧ ᤁᤢᤕᤥ᤺ᤰᤐᤠ ᤀᤠᤶᤒᤥᤱᤅᤡᤴᤗ ᤑᤠ᤹ᤀᤠᤱ ᤀᤠᤏᤡ᤹ ᤋᤃᤡᤛᤔᤠ ᤜᤡᤱᤔᤴᤏᤡᤴ ᤂᤪᤡᤛ᤻ᤋᤧᤴᤏᤢ ᤛᤡᤗᤠᤶᤛᤠᤰᤔᤠ ᤛᤡᤱᤅᤥ ᤑᤥ᤺ᤴᤍᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤁᤢᤛᤡᤱ ᤀᤠᤏᤡ᤺ᤳᤋᤢᤶ. 7 ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤛᤩᤧᤀᤠᤱ ᤘᤠ᤹ ᤂᤧᤴ ᤗᤠᤕᤥᤸᤗᤧ ᤁᤢᤕᤢᤰᤁᤥᤏᤢ ᤆᤥ᤺ᤰᤕᤢᤶᤓᤥᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 8 ᤀᤠᤸᤗ ᤀᤠᤏᤡ᤹ ᤂᤪᤡᤛ᤻ᤋᤧᤴᤏᤢ ᤛᤥᤖᤡᤰ ᤀᤠᤛᤩᤧᤀᤠᤱ ᤀᤠᤘᤠ᤹ᤏᤧ ᤑᤠ᤹ᤃᤪ ᤂᤢᤏᤧ᤹ᤏᤢᤀᤣ ᤀᤠᤏᤡ᤹ᤀᤠᤱ ᤕᤠᤶᤔᤥ ᤀᤠᤜᤡᤱᤗᤥ ᤑᤠ᤹ᤀᤠᤱ ᤏᤛᤠᤴ ᤀᤠᤈᤥᤃᤢᤶᤗᤥ॥ 9 ᤂᤪᤡᤛ᤻ᤋᤧᤱᤃ ᤛᤩᤧᤀᤠᤱ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤒᤠᤸᤗᤧ ᤀᤠᤸᤗ ᤕᤠᤶᤔᤥ ᤔᤧᤛᤡᤏᤧᤴᤗᤥ ᤁᤧᤗ᤹ᤒᤠᤴ ᤀᤠᤏᤡ᤹ ᤀᤠᤏᤡᤛᤢᤶᤗᤥ॥ ᤜᤧᤰᤁᤣ᤺ᤸᤗᤧ ᤀᤠᤸᤗᤀᤠᤱᤎᤥ ᤂᤢᤏᤧ᤹ ᤛᤶᤍᤠᤱ ᤛᤡᤔᤧᤸᤗᤧ ᤕᤢᤰ ᤔᤧᤃᤳᤋᤢᤴᤗᤥ॥ 10 ᤂᤪᤡᤛ᤻ᤋᤧᤴ ᤛᤩᤧᤸᤗᤧ ᤗᤠᤕᤥᤸᤗᤧ ᤁᤢᤔᤢᤰᤛᤠᤶᤔᤡᤴ ᤏᤠ᤺ᤶᤔᤠ ᤑᤠ᤹ᤀᤠᤱ ᤛᤍᤠᤍᤡᤱᤖᤧ ᤗᤠᤃᤡ ᤂᤢᤏᤧ᤹ ᤌᤡᤰᤗᤧᤱᤅᤥ ᤛᤩᤧ. ᤁᤖ ᤀᤠᤸᤗ ᤂᤢᤏᤧ᤹ ᤁᤢᤜᤡᤱᤘᤧᤳ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤜᤡᤱᤔᤴᤏᤡᤴ ᤂᤢᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ ᤑᤠ᤹ᤀᤠᤱ ᤜᤡᤱᤗᤥ॥ 11 ᤜᤧᤰᤁᤣᤗ᤹ᤖᤡᤰᤁᤣ ᤁᤢᤛᤡᤘᤧᤳ ᤔᤏᤠ᤺ᤸᤗᤧ ᤗᤠᤕᤥ ᤔᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤗᤠᤕᤥ ᤆᤥ᤺ᤰᤔᤠᤀᤥ ᤁᤧᤛᤩᤧ᤹ᤀᤡ ᤁᤖ ᤂᤪᤡᤛ᤻ᤋ ᤕᤧᤛᤢᤴ ᤏᤢ ᤌᤡᤰᤜᤢᤵ ᤁᤧᤒᤥ᤺ᤰᤂᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠᤖᤧ ᤗᤠᤃᤡ ᤁᤧᤜᤡᤅᤡᤒᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 12 ᤂᤧᤸᤗᤧᤆᤥᤃᤢᤸᤗᤧ ᤗᤠᤕᤥᤸᤗᤧ ᤂᤡᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤕᤢᤰᤔᤠ ᤔᤧᤒᤠᤱᤄᤧᤶᤔᤡᤴᤏᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤑᤧᤴᤏᤡᤱᤘᤠ᤹ᤀᤡᤸᤗᤧ ᤁᤢᤒᤠ᤺ᤴᤏᤡᤴ ᤋᤧᤴᤍᤡᤱ ᤁᤧᤈᤥᤃᤢᤶᤗᤥ॥ 13 ᤂᤡᤏᤡ᤹ ᤌᤰᤁᤥᤒᤠ ᤕᤠᤶᤗᤰᤜᤠ᤹ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤗᤠᤕᤥᤴ ᤔᤧᤍᤥ᤺ᤴᤍᤧᤶ ᤔᤧᤒᤡᤖᤧᤶᤔᤡᤴᤏᤧ᤹॥ ᤂᤧᤸᤗᤧ ᤁᤢᤗᤧᤰᤘᤠ ᤛᤡᤔᤧᤴᤗᤠᤶ ᤜᤡᤱᤔᤴᤏᤥ ᤁᤧᤍᤠᤒᤠ ᤔᤏᤠᤜᤠ᤹ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤒᤠᤅᤣ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤏᤠ᤹ᤛᤡᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤗᤰᤜᤠ᤹ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤴᤍᤧᤶᤔᤧ᤹ᤀᤥ॥ 14 ᤂᤡᤏᤡ᤹ ᤛᤶᤍᤠᤱ ᤗᤠᤕᤥᤴ ᤕᤢᤰ ᤆᤥᤰ ᤔᤧᤒᤠᤱᤄᤧᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤜᤥ᤺ᤵᤋᤡ᤹. ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤘᤕᤡ᤹ᤖᤥ॥ ᤛᤠᤶᤕᤥᤏᤡᤔᤠᤸᤗᤧ ᤁᤢᤕᤥ᤺ᤰᤐᤠ 15 ᤁᤴ ᤁᤠᤰ ᤑᤠ᤹ᤀᤡᤱᤃ ᤌᤧᤔᤠᤒᤣ᥅ ᤀᤠᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤜᤥᤵ ᤁᤖ ᤏᤡᤱᤘᤠ᤹ᤑᤢ ᤗᤢᤱᤃᤢᤶᤔᤡᤸᤗᤧ ᤁᤢᤕᤢᤰᤁᤥ ᤀᤠᤘᤠ᤹ᤒᤠᤸᤗᤧ ᤗᤠᤕᤥ ᤆᤥᤃᤢᤶᤒᤡ᥅ ᤀᤠᤵᤑᤠᤸᤗᤧᤀᤠᤱ ᤆᤥᤃᤢᤶ ᤔᤣ᤺ᤴ᥄ 16 ᤀᤠᤳᤋᤡᤴᤜᤠ᤹ ᤀᤡᤱᤈᤠᤱ ᤂᤧᤶᤔᤠ ᤁᤧᤍᤧᤴᤍᤡ᤹. ᤒᤠ ᤂᤧᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡ᤹ ᤁᤧᤗ᤹ᤒᤠᤴ ᤁᤧᤴᤏᤡᤛᤢᤶᤔᤡᤴᤒᤡ᥅ ᤗᤠᤕᤥᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤁᤧᤛᤩᤧ᤹ᤀᤡ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱᤅᤡᤴ ᤁᤧᤄᤧᤵᤛᤢᤶᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤠᤶᤕᤥᤒᤠ ᤁᤧᤒᤥ᤺ᤰᤂᤡ᤹ᤖᤥ॥ 17 ᤁᤖ ᤂᤡᤏᤡ᤹ ᤗᤠᤕᤥᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤛᤠᤱ. ᤀᤠᤸᤗ ᤂᤡᤏᤡ᤹ ᤁᤧᤜᤢ᤹ᤀᤠᤛᤡᤒᤠ ᤏᤡᤛᤠᤶᤔᤡᤴ ᤛᤡᤰᤗᤢᤱᤔᤥᤏᤢᤀᤣ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤒᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴᤗᤥ॥ 18 ᤂᤡᤏᤡ᤹ᤃ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤄᤥᤛᤢᤶᤔᤠᤱ ᤛᤠᤶᤕᤥᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ 19 ᤂᤡᤏᤡ᤹ ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤢᤰᤋᤢᤶᤗ ᤑᤠ᤹ᤀᤠᤱ ᤜᤡᤶᤍᤠᤱᤒᤠᤴ ᤏᤢ ᤕᤥ᤺ᤰᤁᤡᤸᤗᤧ ᤁᤢᤒᤡ᤺ᤴ ᤀᤥᤃᤵ ᤆᤥᤃᤢᤱᤗ ᤐᤳᤋᤠᤖᤥ॥ ᤂᤡᤏᤡ᤹ ᤀᤠᤒᤠᤅᤣ ᤕᤠᤶᤗᤰᤁᤡᤴ ᤋᤃᤡ ᤕᤠᤵᤔᤡ ᤁᤧᤈᤡ᤺ᤶᤒᤠ ᤏᤢ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤁᤢᤕᤥ᤺ᤰᤐᤠ ᤐᤥᤱᤛᤧ ᤁᤧᤍᤥ᤺ᤴᤍᤢᤶᤔᤠᤱ ᤁᤧᤘᤕᤡᤒᤠ ᤁᤢᤀᤡᤛᤡᤰ. ᤀᤠᤸᤗ ᤛᤣᤛᤣᤃᤧᤴ ᤛᤢᤳᤌᤥ ᤐᤥᤱᤔᤠᤖᤧ ᤗᤠᤃᤡ ᤛᤠᤶᤕᤥᤒᤠᤸᤗᤧ ᤁᤢᤕᤥ᤺ᤰᤐᤠ ᤐᤥᤱᤛᤧ ᤂᤡᤏᤡ᤹ ᤕᤠᤶᤗᤰᤁᤡᤴ ᤋᤥ᤺ᤴᤍᤧᤶᤔᤧ᤹ᤀᤥ॥ 20 ᤂᤡᤏᤡ᤹ ᤗᤠᤕᤥᤸᤗᤧ ᤁᤢᤕᤥ᤺ᤰᤐᤠ ᤁᤧᤘᤕᤡᤸᤗᤧ ᤛᤠᤶᤕᤥᤒᤠᤸᤗᤧ ᤁᤢᤕᤢᤰᤁᤥ ᤁᤧᤜᤥ᤺ᤵᤋᤡᤖᤥ॥ 21 ᤂᤧᤴ ᤕᤧᤶᤔᤥ ᤁᤧᤈᤥᤃᤢᤶᤒᤠ ᤐᤠ᤺ᤴᤜᤠ᤹ᤗᤠᤶ ᤀᤠᤸᤗᤥ ᤛᤡᤖᤡᤱ ᤁᤧᤔᤕᤡᤸᤗᤧ ᤌᤣ ᤀᤡᤴᤎᤠ᤺ᤰ ᤁᤧᤄᤥᤛᤢᤶᤒᤣ᥅ ᤁᤢᤏᤢᤵᤔᤥᤃ ᤂᤧᤴ ᤐᤠ᤺ᤴᤜᤠ᤹ᤖᤧ ᤔᤧᤴᤏᤢᤵᤔᤏᤠᤒᤠ ᤛᤡᤔᤧᤴᤏᤥ ᤁᤧᤃᤧᤳᤋᤡ᤹ᤖᤥ॥ 22 ᤁᤖ ᤀᤠᤸᤗᤥᤃ ᤂᤡᤏᤡ᤹ ᤗᤠᤕᤥᤗᤠᤶ ᤆᤥ᤺ᤰᤕᤢᤶᤓᤥ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤥ᤺ᤰᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ᤹ᤖᤥ॥ ᤂᤧᤸᤗᤧᤃ ᤛᤣᤛᤣᤃᤧᤴ ᤛᤢᤳᤌᤥ ᤁᤧᤈᤥᤃᤡ᤹. ᤜᤧᤰᤁᤩᤠᤱ ᤁᤢᤏᤢᤵᤔᤥ ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤏᤥ ᤁᤧᤃᤧᤳᤋᤡ᤹ᤖᤥ॥ 23 ᤌᤣᤀᤠᤱᤓᤧᤸᤗᤧ ᤗᤠᤕᤥᤖᤧ ᤀᤠᤒᤡᤒᤠ ᤏᤠᤶᤕᤠᤰᤁᤡᤱᤃ ᤛᤡᤔᤧᤴᤗᤥ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤶᤓᤠ ᤀᤠᤒᤡᤒᤠ ᤐᤷᤎᤠ᤺ᤶᤔᤡᤱᤃ ᤀᤠᤏᤡ᤹ ᤍᤠᤱᤒᤠ ᤂᤪᤡᤛ᤻ᤋ ᤕᤧᤛᤢᤀᤥᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.