ᤖᤥᤔᤡ 5 - LIFOTNTᤏᤛᤠ᤺ᤴᤏᤡᤸᤗᤧ ᤛ᤺ᤵᤔᤠᤴ ᤋᤠᤖᤢ᤹ 1 ᤂᤧᤸᤗᤧᤆᤥᤃᤢᤸᤗᤧ ᤏᤛᤠᤴ ᤀᤠᤈᤥᤃᤢᤶᤒᤠᤸᤗᤧ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡ᤹ ᤏᤠᤍᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ 2 ᤀᤠᤏᤡ᤹ ᤏᤛᤠᤴ ᤀᤠᤈᤥᤃᤢᤶᤒᤠᤸᤗᤧ ᤕᤧᤛᤢ ᤂᤪᤡᤛ᤻ᤋᤖᤧ ᤁᤴ ᤗᤢᤱᤃᤢᤶᤔᤥ ᤀᤠᤍᤠᤖᤧᤀᤠᤱ ᤘᤠ᤹॥ ᤀᤠᤸᤗᤥ ᤜᤠᤒᤠ ᤂᤧᤴ ᤗᤢᤱᤃᤢᤶᤔᤥᤀᤣ ᤀᤠᤘᤠ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤥᤔᤠ ᤗᤰ ᤀᤠᤄᤥᤛᤢᤶᤔᤣᤖᤥ ᤑᤠ᤹ᤀᤠᤱ ᤀᤠᤛ᤺ᤳᤗᤥ॥ 3 ᤜᤧᤰᤁᤣᤖᤰ ᤔᤣ᤺ᤴ. ᤁᤖ ᤀᤠᤏᤡ᤹ ᤏᤛᤠᤴ ᤀᤠᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣ ᤀᤠᤍᤢᤔᤢᤶᤔᤡᤸᤗᤧᤀᤣ ᤀᤠᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤀᤡᤏᤥᤃᤧᤴ ᤋᤢᤰᤂᤣ ᤗᤠᤰᤂᤣ ᤀᤠᤍᤢᤔᤢᤶᤔᤡᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤏᤠᤛᤡᤌ᤺ᤵᤔᤠ ᤀᤠᤛᤢᤰᤋᤢᤶ ᤁᤧᤗ᤹ᤒᤠᤴ ᤀᤠᤏᤡᤛᤢᤶᤔᤠᤱ ᤀᤠᤘᤠ᤹ᤖᤥ. 4 ᤜᤧᤰᤁᤩᤠᤱ ᤏᤠᤛᤡ ᤀᤠᤎ᤺ᤳᤋᤢᤶᤔᤡᤸᤗᤧ ᤏᤢᤒᤠ ᤕᤧᤵᤗᤧᤰ ᤀᤠᤄᤥᤛᤢᤶ. ᤜᤧᤰᤁᤩᤠᤱ ᤏᤢᤒᤠ ᤕᤧᤵᤗᤧᤰ ᤀᤠᤃᤳᤋᤢᤶᤔᤡᤸᤗᤧ ᤛᤧᤴᤗᤵ ᤀᤠᤄᤥᤛᤢᤶᤔᤣ ᤑᤠ᤹ᤀᤠᤱ ᤀᤠᤸᤗᤛᤠᤱ ᤕᤖᤡᤰ ᤏᤡᤱᤛᤠᤱ ᤀᤠᤈᤥᤃᤢᤶᤗᤥ॥ 5 ᤜᤧᤰᤁᤣᤗ᤹ᤖᤡᤰ ᤏᤡᤱᤛᤠᤱ ᤀᤠᤈᤥᤃᤢᤶᤔᤡᤸᤗᤧ ᤀᤠᤏᤡ᤹ ᤏᤡᤱᤛᤠᤱ ᤔᤧᤒᤢᤰᤏᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠ᤹ᤖᤡᤰ ᤗᤢᤱᤔᤠ᤹ ᤀᤠᤍᤢᤰᤋᤧᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤂᤢᤏᤧ᤹ ᤀᤠᤒᤡᤖᤧᤒᤠ ᤛᤣᤛᤣᤔᤠᤱᤗᤠᤶ ᤀᤠᤏᤡ᤹ ᤛᤡᤰᤗᤢᤱᤔᤥ ᤏᤡᤱᤘᤠ᤹ ᤀᤠᤄᤥᤛᤢᤶᤗᤥ॥ 6 ᤀᤠᤏᤡ᤹ ᤗᤠᤕᤥᤗᤠᤶ ᤀᤠᤒᤠᤅᤣ ᤋᤠᤱᤛᤧ᤺ᤵᤛᤡᤱᤔᤠ ᤔᤧᤴᤇᤢᤰᤔᤏᤠᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤕᤧᤸᤗᤧ ᤛᤢᤕᤧᤶᤔᤥ ᤗᤠᤕᤥᤒᤠᤜᤠ᤹ᤖᤧ ᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤖᤥ॥ 7 ᤀᤠᤸᤗ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡ ᤛᤡᤔᤠ ᤏᤡᤱᤘᤠ᤹ ᤁᤧᤈᤥ᤺ᤰᤐᤠ ᤔᤏᤠᤃ ᤂᤥᤔᤠ ᤛᤠᤰᤐᤡᤗᤠ. ᤜᤧᤰᤁᤣᤛᤠᤱ ᤛᤧᤰᤂᤠᤀᤣ ᤏᤢᤒᤠ ᤔᤏᤠ᤺ᤸᤗᤧ ᤁᤢᤗᤠᤃᤡᤃ ᤁᤢᤓᤠ ᤛᤡᤔᤠᤖᤧ ᤗᤠᤃᤡ ᤀᤠ᤺ᤴᤇᤡᤱᤔᤠ ᤔᤧᤛᤢᤰᤗᤥ॥ 8 ᤁᤖ ᤀᤠᤏᤡ᤹ ᤗᤠᤕᤥᤀᤥ ᤀᤠᤘᤕᤧᤸᤗᤧᤛᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤪᤡᤛ᤻ᤋᤧᤴ ᤀᤠᤏᤡ᤹ ᤗᤠᤃᤡ ᤛᤡᤔᤠ ᤐᤠᤱᤄᤢᤀᤠᤱ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤥᤛᤣ᤺ᤴᤀᤠᤎᤠᤰᤋᤧᤖᤥ॥ 9 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ᤃ ᤂᤪᤡᤛ᤻ᤋᤖᤧ ᤁᤢᤔᤠᤰᤂᤡ᤹ᤀᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤛᤧᤰᤂᤠᤀᤣ ᤋᤠᤱᤀᤠᤛᤧ᤺ᤵᤗᤥ॥ 10 ᤂᤧᤴ ᤑᤠ᤹ᤀᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤔᤡ ᤀᤠᤘᤕᤧᤸᤗᤧᤛᤠ ᤀᤠᤒᤢᤃᤧᤴ ᤁᤢᤛ᤻ᤛᤠ᤺ᤸᤗᤧ ᤁᤢᤛᤡᤔᤧᤴᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤠᤍᤱ ᤀᤠᤒᤥ᤺ᤰᤂᤧᤀᤠᤱ ᤀᤠᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤁᤢᤜᤡᤱᤔᤴᤏᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱᤗᤠᤶ ᤛᤧᤰᤂᤠᤀᤣ ᤋᤠᤱᤀᤠᤛᤧ᤺ᤵᤗᤥ॥ 11 ᤂᤧᤴ ᤐᤠ᤺ᤴᤏᤥᤖᤰ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤥᤀᤠᤱ ᤀᤠᤛ᤺ᤳᤗᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤀᤠᤏᤡ᤹ ᤏᤠᤍᤱ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤀᤠᤍᤔ ᤏᤢ ᤂᤪᤡᤛ᤻ᤋ 12 ᤁᤠᤰᤏᤢ᤺ᤸᤗᤧ ᤋᤃᤡᤒᤠ ᤔᤧᤴᤇᤠᤶ ᤕᤠᤵᤔᤡ ᤀᤠᤍᤔᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤴ ᤐᤥᤃᤧ. ᤜᤧᤰᤁᤩᤠᤱ ᤂᤧᤴ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤛᤡᤔᤧᤴ ᤐᤥᤃᤧᤖᤥ॥ ᤀᤰᤂᤣᤗ᤹ᤖᤡᤰ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤀᤥ ᤛᤡᤔᤧᤴ ᤋᤩᤧᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤗᤠᤕᤥ ᤔᤧᤈᤥᤃᤢᤖᤥ॥ 13 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤠᤶᤕᤥᤌᤡᤶ ᤔᤧᤶᤒᤡᤀᤣ ᤋᤃᤡᤛᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤕᤥᤴ ᤘᤕᤧᤖᤥ. ᤁᤖ ᤛᤠᤶᤕᤥᤌᤡᤶ ᤜᤥ᤺ᤵᤋᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤠᤕᤥᤜᤠ᤹ᤖᤧᤴ ᤂᤠᤖᤠᤳ ᤔᤧᤕᤢᤰᤂᤢᤴᤗᤥ॥ 14 ᤀᤠᤍᤶᤔᤡᤸᤗᤧ ᤁᤢᤕᤧᤶᤔᤠᤱᤎᤥ ᤛᤠᤶᤕᤥᤌᤡᤶ ᤁᤧᤛᤠᤵᤐᤠ ᤔᤥᤛᤠ᤺ᤸᤗᤧ ᤁᤢᤕᤧᤶ ᤌᤠᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤠᤍᤶᤔᤡᤴ ᤜᤧᤰᤁᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤔᤧᤶᤓᤣ᤺ᤴᤏᤣ ᤔᤧᤘᤕᤧᤛᤠᤱ ᤔᤧᤛᤩᤧᤖᤥ॥ ᤀᤠᤸᤗ ᤁᤢᤓᤠ ᤐᤠ᤺ᤴᤏᤥ ᤀᤠᤍᤔᤧᤱᤃ ᤋᤠ᤺ᤴᤍᤡ ᤁᤧᤍᤠᤒᤠ ᤂᤪᤡᤛ᤻ᤋᤧᤴ ᤜᤧᤰᤋᤱᤒᤠ ᤘᤕᤧᤖᤥ॥ 15 ᤁᤖ ᤗᤠᤕᤥ ᤏᤢ ᤐᤷᤎᤠ᤺ᤶᤔᤡᤱᤃ ᤗᤳᤌᤡᤰ ᤔᤧᤈᤥᤰᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤗᤳᤇᤠ ᤔᤏᤠ ᤀᤠᤍᤶᤔᤡᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤕᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧ. ᤁᤖ ᤗᤳᤇᤠ ᤔᤏᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤖᤡᤰ ᤔᤏᤠᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤀᤠᤶᤓᤠ ᤀᤠᤳᤋᤠᤳᤋᤠᤴᤏᤣ ᤛᤧᤴᤗᤵ ᤐᤡᤖᤢᤛᤡᤖᤥ॥ 16 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤗᤠᤶᤒᤠ ᤁᤧᤍᤠᤒᤠ ᤐᤷᤎᤠ᤺ᤶᤔᤡᤱᤃ ᤀᤠᤍᤔᤖᤧ ᤁᤢᤗᤠᤕᤥᤴ ᤏᤢ ᤔᤧᤍᤱᤏᤧᤴᤗᤥ॥ ᤗᤳᤇᤠ ᤗᤠᤕᤥᤎᤡᤰᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧᤖᤥ. ᤁᤖ ᤕᤖᤡᤰ ᤗᤠᤕᤥ ᤀᤠᤈᤥᤃᤢᤶᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤶᤓᤠ ᤀᤠᤒᤡᤒᤠ ᤐᤷᤎᤠ᤺ᤶᤔᤡᤸᤗᤧ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤈᤥ᤺ᤰᤗᤥ॥ 17 ᤌᤡᤰ ᤔᤏᤠ ᤀᤠᤍᤶᤔᤡᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤁᤠᤰ ᤔᤏᤠᤜᤠ᤹ᤀᤥ ᤛᤡᤔᤧᤸᤗᤧ ᤜᤠᤱ ᤆᤥᤃᤢᤏᤧ ᤑᤠ᤹ᤃᤪ ᤀᤠᤸᤗᤛᤠᤱ ᤕᤖᤡᤰ ᤗᤢᤱᤃᤢᤶ ᤏᤢ ᤛᤠᤶᤕᤥᤏᤡᤔᤠᤖᤧᤴ ᤐᤷᤎᤠ᤺ᤶᤔᤡᤴ ᤀᤠᤶᤓᤠᤀᤣ ᤁᤧᤄᤥᤒᤠᤜᤠ᤹ᤖᤧ ᤌᤡᤰ ᤔᤏᤠ ᤕᤧᤛᤢ ᤂᤪᤡᤛ᤻ᤋᤗᤠᤶᤒᤠ ᤁᤧᤍᤠᤒᤠ ᤜᤡᤱᤔᤴᤏᤥ ᤜᤠᤱ ᤔᤧᤈᤥᤃᤢ᤹ᤖᤥ॥ 18 ᤜᤧᤰᤁᤣᤗ᤹ᤖᤡᤰ ᤗᤳᤌᤡᤰ ᤔᤏᤠ᤺ᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤁᤠᤰ ᤔᤏᤠᤜᤠ᤹ ᤀᤠᤵᤋᤡᤰᤁᤥ ᤔᤧᤎᤩᤧᤒᤠ ᤜᤧᤰᤁᤣᤀᤣ ᤗᤳᤇᤠ ᤔᤏᤠ᤺ᤸᤗᤧ ᤆᤥᤃᤢᤒᤠ ᤌᤡᤰ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤔᤧᤒᤥᤱᤅᤠᤱ ᤁᤢᤛᤱ ᤜᤡᤱᤔᤴ ᤔᤧᤄᤥᤛᤢ᤹ᤖᤥ॥ 19 ᤌᤣᤀᤠᤱᤓᤧᤸᤗᤧ ᤌᤡᤰ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤀᤡᤱᤈᤠᤱ ᤑᤧ᤺ᤴᤍᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤗᤠᤕᤥᤒᤠ ᤔᤧᤒᤥ᤺ᤰᤂᤧᤒᤠ ᤜᤧᤰᤁᤣᤀᤣ ᤗᤳᤇᤠ ᤔᤏᤠ᤺ᤸᤗᤧ ᤏᤡᤱᤘᤠ᤹ᤑᤢ ᤀᤡᤱᤈᤠᤱᤅᤡᤴ ᤋᤧᤴᤍᤡᤱ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤛᤠᤶᤕᤥᤒᤠ ᤔᤧᤒᤥᤱᤗᤥ॥ 20 ᤁᤧᤖᤧᤰ ᤔᤏᤠᤜᤠ᤹ ᤀᤠᤰᤂᤧᤴ ᤗᤠᤕᤥᤒᤠ ᤔᤧᤈᤥᤃᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤛᤠᤶᤕᤥᤌᤡᤶᤔᤡᤴ ᤋᤩᤧᤖᤥ. ᤁᤖ ᤗᤠᤕᤥᤴ ᤐᤥ᤺ᤖᤧᤸᤗᤧ ᤗᤢᤱᤃᤢᤶᤔᤡᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤐᤥᤖᤧᤖᤥ॥ 21 ᤜᤧᤰᤁᤣᤗ᤹ᤖᤡᤰ ᤗᤠᤕᤥᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤀᤥ ᤜᤠᤱ ᤆᤥᤃᤢᤀᤠᤱ ᤛᤡᤔᤧᤴ ᤋᤠᤖᤢᤒᤠ ᤁᤢᤀᤡᤛᤡᤰ ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤃᤢᤶᤔᤡᤸᤗᤧ ᤜᤠᤱ ᤆᤥᤃᤢ᤹ᤀᤠᤱ ᤂᤧᤸᤗᤧ ᤀᤠᤏᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤈᤥᤰ. ᤜᤧᤰᤁᤩᤠᤱ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤗᤠᤶ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤀᤠᤄᤥᤛᤢᤶᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.