ᤖᤥᤔᤡ 3 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠ᤺ᤴᤛᤠᤒᤠ ᤆᤥᤰᤗᤥ 1 ᤜᤧᤰᤁᤣ᤺ᤸᤗᤧ ᤕᤜᤢᤍᤡ ᤐᤥᤱᤔᤠᤸᤗᤧ ᤌᤣ ᤀᤡᤴᤎᤠ᤺ᤰ ᤘᤠ᤹ᤒᤣ᥅ ᤜᤷᤍᤥ ᤜᤧᤰᤔᤠ ᤕᤜᤢᤍᤡ ᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤌᤣ ᤐᤥᤱᤒᤣ᥅ 2 ᤛᤧᤰᤂᤠ᤺ᤸᤗᤧ ᤕᤜᤢᤍᤡ ᤐᤥᤱᤔᤠᤸᤗᤧ ᤁᤧᤖᤧᤰ ᤐᤖᤡᤰᤗᤧᤴ ᤏᤢᤒᤠ ᤐᤠ᤺ᤴᤜᤠ᤹ ᤘᤠ᤹ᤖᤥ᥄ ᤁᤠᤰᤏᤢ᤺ᤸᤗᤧ ᤁᤧᤕᤧᤰᤐᤠ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ ᤏᤠᤛᤠ᤹ᤖᤢᤛᤡᤀᤠᤱ ᤁᤢᤒᤠ᤺ᤴᤈᤠᤰᤁᤡᤸᤗᤧᤴ ᤗᤰᤐᤧᤴ ᤐᤡᤖᤢᤛᤡᤀᤠᤱ ᤘᤠ᤹॥ 3 ᤂᤧᤱᤜᤠ᤹ ᤁᤢᤓᤠ ᤏᤛᤠ᤺ᤴᤛᤠᤒᤠ ᤔᤧᤴᤈᤥ᤺ᤰᤏᤧᤴᤇᤠᤱ ᤌᤣ ᤐᤥ᤺ᤰᤂᤧᤀᤠᤱᤒᤣ᥅ ᤂᤧᤱᤜᤠ᤹ ᤏᤛᤠ᤺ᤴᤛᤠᤒᤠ ᤔᤧᤴᤈᤥ᤺ᤰᤏᤧᤴᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤔᤧᤃᤧᤳᤋᤢᤶᤒᤡ᥅ 4 ᤔᤣ᤺ᤴᤗᤥ᥄ ᤁᤧᤖᤧᤰ ᤔᤏᤠᤜᤠ᤹ ᤀᤡᤱᤗᤧᤰᤐᤠ ᤔᤧᤈᤥ᤺ᤰᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤧᤰᤂᤠᤒᤠ ᤆᤥᤰᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤛᤧᤰᤂᤠᤀᤣ ᤐᤥᤱ ᤑᤠ᤹ᤀᤠᤱ ᤏᤡᤍᤧᤳᤗᤥ. ᤜᤧᤰᤁᤩᤠᤱ ᤂᤠᤛᤧᤴ ᤐᤥᤱᤅᤡᤸᤗᤧ ᤂᤧᤏᤧ᤹ᤀᤣ ᤁᤧᤏᤠ᤺ᤴᤍᤢ᤹ᤖᤥ॥” 5 ᤁᤖ ᤁᤢᤓᤠᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤔᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤏᤡᤔᤠᤴ ᤏᤢᤖᤡᤰᤁᤠᤱ ᤁᤢᤛᤡᤱ ᤏᤡ᤺ᤳᤋᤧᤳᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤢᤶᤍᤡᤱ ᤀᤠᤒᤡ᤺ᤸᤗᤧ ᤂᤢᤏᤧ᤹ ᤑᤧᤴ ᤕᤠ᤺ᤶᤒᤰ ᤆᤥᤃᤢᤒᤠ ᤐᤥᤱᤒᤡ᥅ (ᤀᤡᤱᤃᤠ᤹ ᤁᤢᤓᤠ ᤔᤧᤴᤇᤠᤶ ᤕᤠᤵᤔᤡ ᤁᤢᤀᤡᤛᤡᤰ ᤐᤠ᤺ᤳᤋᤠᤒᤠᤖᤥ॥) 6 ᤛᤧᤰᤂᤠᤛᤠᤱ ᤔᤣ᤺ᤴᤗᤥ᥄ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤶᤕᤥᤒᤠ ᤔᤧᤈᤥ᤺ᤰᤏᤧᤴᤏᤡᤸᤗᤧᤃ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤠᤛᤧᤴ ᤆᤥ᤺ᤰᤔᤠ ᤔᤧᤕᤠᤖᤢᤴᤗᤥ᥄ 7 ᤁᤢᤓᤠᤖᤧ ᤔᤧᤒᤠ᤺ᤳᤋᤢᤒᤡᤗᤠ. “ᤀᤡᤱᤃᤠ᤹ ᤀᤠᤀᤡᤱᤗᤧᤰᤁᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤰᤂᤠᤴ ᤏᤢ ᤁᤢᤔᤡᤔᤡᤍᤡᤱᤅᤡᤴ ᤑᤥᤛᤢ᤹ᤏᤧ ᤑᤠ᤹ᤃᤪ ᤌᤣᤀᤠᤱ ᤀᤠᤸᤗᤛᤠᤱ ᤗᤠᤕᤥᤒᤠ ᤁᤢᤀᤡᤛᤡᤰ ᤀᤠᤵᤋᤡᤰ ᤁᤢ᤺ᤳᤋᤠᤒᤠᤒᤣ᥅” 8 ᤏᤢᤒᤠ ᤐᤠᤴ ᤗ᤺ᤴᤗ ᤑᤠ᤹ᤀᤠᤱ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤆᤥᤃᤢᤶ ᤗ᤹ᤖᤡᤰ ᤀᤠᤏᤡᤃᤣ ᤐᤠ᤺ᤳᤋᤢᤶᤒᤧ᤹ᤔᤢ ᤑᤠ᤹ᤀᤠᤱ ᤁᤢᤓᤠ ᤔᤏᤠᤜᤠ᤹ᤖᤧ ᤐᤠᤴ ᤔᤧᤎᤡᤰᤋᤡᤃᤧ᤹ᤖᤥ॥ ᤜᤧᤰᤁᤣ ᤁᤧᤒᤠ᤺ᤵᤐᤠᤜᤠ᤹ ᤀᤠᤵᤋᤡᤰ ᤁᤢ᤺ᤵᤔᤠ ᤗᤠ᤹ᤖᤢᤛᤡᤖᤥ॥ ᤁᤧᤖᤧᤰ ᤔᤏᤠᤜᤠ᤹ ᤗᤠᤕᤥᤒᤠᤛᤡ 9 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤕᤜᤢᤍᤡᤜᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤏᤢᤒᤠ ᤀᤠᤈᤥ᤺ᤰᤐᤡ᥅ ᤛᤧᤰᤂᤠᤛᤠᤱ ᤀᤠᤴᤈᤥᤰᤏᤧᤴᤗᤥ᥄ ᤕᤜᤢᤍᤡᤜᤠ᤹ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤠᤱ ᤗᤠᤕᤥᤸᤗᤧ ᤋᤧᤳᤋᤢᤛᤡᤀᤠᤱ ᤘᤠ᤹ ᤑᤠ᤹ᤀᤠᤱ ᤔᤧᤳᤋᤢᤱ ᤛᤢᤖᤢᤱᤛᤡᤱᤅᤠᤱ ᤘᤠ᤹ᤖᤥ॥ 10 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤠᤶᤕᤥᤒᤠ ᤜᤠ᤺ᤳᤋᤠᤱ ᤜᤥᤵᤗᤥ. ᤗᤳᤌᤡᤰᤁᤠᤱ ᤜᤥᤵᤗᤥ॥ 11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤠᤛᤡᤱ ᤁᤧᤏᤡ᤺ᤵᤐᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤧᤃᤥ᤺ᤵᤐᤠ ᤜᤠ᤺ᤳᤋᤠᤱ ᤜᤥᤵᤗᤥ॥ 12 ᤁᤧᤖᤧᤰᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤗᤧᤖᤢ ᤔᤧᤍᤣᤛᤢᤀᤠᤱ ᤌᤣᤏᤠᤎᤣᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤖᤥ॥ ᤏᤢᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤜᤠ᤺ᤳᤋᤠᤱ ᤜᤥᤵᤗᤥ. ᤗᤳᤌᤡᤰᤁᤠᤱ ᤜᤥᤵᤗᤥ॥” 13 “ᤂᤧᤱᤜᤠ᤹ᤖᤧ ᤂᤢᤏᤡ᤹ ᤐᤠ᤺ᤴᤛᤢᤳᤗᤠ᤺ᤱᤃ ᤜᤱᤒᤧᤳ ᤁᤧᤒᤵᤐᤠ ᤀᤡ᤺ᤵᤐᤢᤱᤅᤥᤗᤠᤶ ᤁᤧᤗ᤺ᤶᤒᤠ ᤏᤠᤶᤃᤧᤛᤢᤒᤠ ᤁᤢᤏᤠᤶ ᤁᤢᤀᤡᤛᤡᤰ ᤆᤥᤰᤗᤥ॥ ᤂᤧᤱᤜᤠ᤹ ᤀᤡᤱᤗᤧᤰᤗᤰ ᤔᤧᤒᤠ᤺ᤳᤗᤥ॥” “ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤁᤠᤰ ᤐᤠ᤺ᤴᤏᤡᤱᤃ ᤀᤛᤣ᤺ᤰᤐᤠᤸᤗᤧ ᤁᤢᤏᤡᤱᤅᤡᤴ ᤜᤧᤰᤋᤱᤒᤠ ᤆᤥᤰᤗᤥ॥” 14 “ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥᤗᤠᤶ ᤛᤠᤱᤃᤪᤠ ᤏᤢ ᤋᤠᤵᤑᤧ᤺ᤶᤒᤠ ᤐᤠ᤺ᤴᤗᤰ ᤗ᤺ᤴᤗᤥ॥” 15 “ᤂᤧᤱᤜᤠ᤹ᤃ ᤔᤏᤠᤛᤧᤵᤔᤠ ᤕᤠ᤺ᤶᤒᤰᤁᤥ ᤜᤠᤖᤠ ᤕᤠᤖᤡᤵ ᤔᤧᤒᤥᤱᤗᤥ. 16 ᤂᤧᤱᤜᤠ᤹ ᤀᤠᤳᤋᤡ ᤔᤧᤒᤣ᤺ᤰᤛᤠᤱ ᤔᤧᤶᤓᤤ ᤏᤢ ᤋᤢᤰᤂᤣ ᤗᤠᤰᤂᤣ ᤔᤧᤍᤠᤖᤢ᤹. 17 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤏᤠᤖᤢᤱᤅᤥ ᤀᤠᤰᤂᤣᤗ᤹ᤖᤡᤰ ᤘᤠ᤹ᤔᤠ ᤐᤥᤱ ᤁᤧᤗ᤹ᤒᤠᤴ ᤔᤧᤴᤏᤡᤛᤢᤴᤗᤥ॥” 18 “ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤧᤱᤃᤡᤖᤢᤴᤗᤥ॥” 19 ᤀᤠᤸᤗ ᤛᤠᤶᤕᤥᤌᤡᤶᤔᤡᤱᤃ ᤛᤠᤶᤕᤥᤌᤡᤶᤔᤡᤸᤗᤧ ᤁᤢᤕᤢᤰᤁᤥ ᤁᤧᤘᤠ᤹ᤒᤠᤜᤠ᤹ᤀᤣ ᤐᤡᤖᤢᤛᤡᤒᤠᤴ ᤀᤠᤏᤡ᤹ ᤀᤠᤏᤡᤛᤢᤶᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤗᤠᤕᤥ ᤔᤧᤴᤈᤥ᤺ᤰᤔᤏᤠᤒᤠ ᤗᤧᤱᤛᤡᤱᤔᤠ ᤔᤧᤱᤄᤥᤏᤧᤴᤏᤠᤱ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤂᤠᤛᤧᤴᤏᤥ ᤕᤧᤵᤔᤠ ᤐᤥᤱᤗᤥ॥ 20 ᤂᤧᤸᤗᤧᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤥ ᤁᤧᤒᤵᤐᤠ ᤐᤠ᤺ᤴᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤔᤠᤀᤥ ᤀᤠᤳᤋᤡᤴᤏᤠᤱ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤶᤒᤥᤱᤏᤧᤴᤗᤥ॥ ᤛᤠᤶᤕᤥᤌᤡᤶᤔᤡᤸᤗᤧᤃ ᤀᤠᤏᤡ᤹ ᤗᤠᤕᤥ ᤀᤠᤈᤥᤃᤢᤶᤔᤠᤱ ᤀᤠᤘᤠ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴ ᤀᤠᤎᤠᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤛᤠᤶᤕᤥᤒᤠ ᤆᤥᤃᤢᤛᤡ᤹ 21 ᤁᤖ ᤀᤠᤸᤗ ᤛᤠᤶᤕᤥᤌᤡᤶ ᤔᤧ᤺ᤴᤏᤣᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤢᤛᤡᤀᤠᤱ ᤘᤠ᤹ ᤁᤧᤗ᤹ᤒᤠ ᤗᤠᤶᤔᤡᤴ ᤂᤥᤍᤧᤳᤋᤧᤀᤠᤱ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤠᤶᤕᤥᤌᤡᤶ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ॥ 22 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤏᤠᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤢᤛᤡᤒᤠ ᤁᤴ ᤗᤠᤶᤔᤡᤱᤃ ᤕᤧᤛᤢ ᤂᤪᤡᤛ᤻ᤋᤧᤴ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤏᤛᤠ᤺ᤴᤗᤠᤶᤔᤣ ᤂᤥᤍᤧᤳᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱ ᤗ᤹ᤖᤡᤰ ᤔᤧᤛᤧᤴᤍᤢᤴᤇᤡᤴᤗᤥ. 23 ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤀᤠᤱ ᤔᤧᤘᤠ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤃᤧᤴ ᤁᤢᤗᤡᤱᤍᤥ ᤔᤧᤱᤃᤧᤳᤏᤧᤴᤗᤥ॥ 24 ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤢᤱᤔᤠ᤹ ᤀᤠᤍᤢᤰᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤪᤡᤛ᤻ᤋ ᤕᤧᤛᤢᤗᤠᤶ ᤀᤠᤏᤡ᤹ ᤗᤠᤕᤥᤀᤥᤏᤢ ᤀᤠᤎᤧ᤹ᤖᤧᤀᤠᤱ ᤀᤠᤶᤓᤠ ᤀᤠᤏᤡ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤈᤥᤃᤧᤀᤠᤱ ᤘᤠ᤹ᤖᤥ॥ 25 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤏᤡ᤹ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤗᤠᤶ ᤋᤠᤱᤃᤧᤛᤧ᤺ᤵᤐᤠ ᤛᤡᤍᤢᤱᤈᤓᤠ ᤐᤥᤱᤛᤧ ᤂᤪᤡᤛ᤻ᤋᤧᤴ ᤐᤠᤱᤄᤢᤕᤢᤛᤢ॥ ᤂᤢᤏᤧ᤹ ᤁᤢᤔᤠᤰᤂᤡ᤹ᤀᤡᤴ ᤀᤠᤏᤡ᤹ ᤗᤠᤃᤡ ᤘᤠᤍᤣ᤺ᤴᤍᤢᤒᤠ ᤑᤠ᤹ᤀᤠᤱ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰᤗᤧ ᤗᤠᤕᤥᤗᤠᤶ ᤗᤧᤵᤔᤡ ᤔᤧᤄᤥᤛᤢ᤹ᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤢᤀᤠᤱ ᤀᤠᤒᤠᤅᤣ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤆᤥᤰ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤰᤛᤡᤱ. ᤌᤣᤀᤠᤱᤓᤧᤸᤗᤧ ᤂᤪᤡᤛ᤻ᤋᤧᤴ ᤕᤢᤔᤠᤏᤢ᤺ᤸᤗᤧ ᤋᤃᤡ ᤂᤢᤏᤧ᤹ ᤁᤢᤛᤡᤰᤁᤡᤴ ᤌᤖᤢᤀᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤗᤠᤕᤥᤸᤗᤧᤴ ᤂᤢᤶᤍᤡᤱ ᤔᤧᤒᤡᤖᤢᤴᤇᤡᤴᤗᤥ॥ 26 ᤜᤧᤰᤁᤣ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤂᤠᤛᤧᤴ ᤁᤧᤈᤥ᤺ᤰᤐᤠ ᤆᤥᤰ ᤁᤧᤗ᤹ᤒᤠ ᤁᤴ ᤕᤧᤶᤔᤥ ᤀᤥᤛᤣ᤺ᤴᤎᤠᤰᤛᤡᤱ. ᤜᤧᤰᤁᤩᤠᤱ ᤕᤧᤛᤢᤴ ᤏᤛᤠᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤢᤛᤡ᤹ ᤁᤧᤗ᤹ᤒᤠᤴ ᤀᤥᤛᤣ᤺ᤴᤍᤠᤱ ᤆᤥᤃᤢ᤹॥ 27 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤌᤧᤔᤠᤀᤥ ᤀᤠᤱᤍᤡᤱ ᤗ᤹ᤔᤏᤠᤒᤠᤒᤣ᥅ ᤌᤧᤔᤠ ᤐᤠ᤺ᤴᤏᤥᤀᤠᤱ ᤔᤣ᤺ᤴᤗᤥ᥄ ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤛᤠᤶᤕᤥᤌᤡᤶ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱ ᤔᤣ᤺ᤴ. ᤁᤖ ᤂᤪᤡᤛ᤻ᤋᤧᤴ ᤏᤛᤠᤴ ᤀᤠᤈᤥᤃᤢᤶᤔᤠᤱᤗᤰ ᤀᤠᤏᤡ᤹ ᤛᤠᤶᤕᤥᤒᤠ ᤀᤠᤒᤥᤱ॥ 28 ᤂᤧᤸᤗᤧᤆᤥᤃᤢᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤠᤀᤡ᤺ᤳᤋᤢᤶ ᤀᤠᤏᤠ᤺ᤳᤋᤢᤶᤔᤠᤱᤃ ᤔᤣ᤺ᤴ. ᤁᤖ ᤏᤛᤠ᤺ᤴᤗᤠᤶᤔᤣ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤀᤠᤒᤥᤱᤗᤥ॥ 29 ᤛᤧᤰᤂᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤕᤜᤢᤍᤡᤜᤠ᤹ᤖᤧᤴᤗᤰ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤒᤡ᥅ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤔᤣ᤺ᤶᤒᤡ᥅ ᤛᤧᤰᤂᤠᤛᤠᤱ ᤂᤧᤱᤜᤠ᤹ᤖᤧᤴᤏᤠᤱᤗᤥ. 30 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤗᤳᤇᤠᤖᤰ ᤘᤠ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱ ᤏᤧᤵᤔᤠᤱ ᤂᤢᤏᤡ᤹ ᤏᤛᤠ᤺ᤴᤗᤠᤶᤔᤣ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤆᤥᤃᤢᤛᤡ᤹ᤖᤥ॥ 31 ᤀᤠᤏᤡ᤹ ᤏᤛᤠ᤺ᤴᤗᤠᤶ ᤛᤠᤶᤕᤥᤌᤡᤶᤔᤡᤴ ᤂᤠᤖᤥ᤺ᤳᤋᤡ ᤀᤠᤈᤥᤃᤢᤶᤒᤡ᥅ ᤛᤧᤰᤂᤠᤛᤠᤱ ᤔᤣ᤺ᤴᤗᤥ᥄ ᤂᤧᤸᤗᤧ ᤁᤢᤗᤧᤰᤘᤠ ᤀᤠᤏᤡ᤹ ᤛᤠᤶᤕᤥᤌᤡᤶᤔᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤢᤈᤧᤰᤐᤠ ᤐᤠ᤺ᤴᤜᤠ᤹ ᤀᤠᤃᤧᤳᤋᤢᤶᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.