ᤖᤥᤔᤡ 14 - LIFOTNTᤏᤛᤠᤏᤡᤒᤠ ᤑᤢ᤹ᤏᤢᤛᤠ᤹ᤜᤠ᤹ ᤀᤡᤱᤍᤥ ᤔᤧᤵᤔᤠᤛᤡ ᤔᤣ᤺ᤴ 1 ᤏᤛᤠ᤺ᤴᤏᤥ ᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤏᤛᤠᤏᤡᤒᤠᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤏᤡᤱᤘᤠ᤹ ᤐᤠ᤺ᤴᤏᤡᤴ ᤀᤡᤱᤍᤥ ᤔᤧᤶᤔᤧᤳᤋᤣ ᤂᤡᤏᤡ᤹ ᤛᤣᤛᤣ ᤋᤱᤈᤢᤶᤔᤥ ᤂᤧᤱᤜᤠ᤹ ᤋᤠ᤺ᤰᤋᤧᤶᤛᤡᤶᤔᤧ᤹ᤀᤥ॥ 2 ᤁᤢᤒᤡᤀᤥ. ᤌᤡᤰ ᤏᤛᤠᤏᤡᤒᤠᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤆᤠᤔᤠ ᤌᤢᤱᤔᤠ ᤏᤢ᤹ ᤗ᤹ᤖᤡᤰ ᤏᤛᤠᤴ ᤆᤥᤃᤢ᤹. ᤁᤖ ᤏᤛᤠ᤺ᤴᤏᤥ ᤁᤢᤏᤡᤱᤘᤠ᤹ ᤁᤧᤒᤠ᤺ᤰᤐᤠ ᤏᤛᤠᤏᤡᤒᤠᤸᤗᤧᤃ ᤏᤢᤎᤡ-ᤛᤠᤰᤆᤡᤖᤰ ᤆᤖᤥ॥ 3 ᤜᤧᤰᤁᤣ᤺ᤸᤗᤧ ᤁᤠᤰ ᤐᤖᤡᤰᤐᤠ ᤁᤢᤈᤠ ᤁᤧᤈᤠᤒᤠᤸᤗᤧ ᤔᤧᤴᤈᤠ᤺ᤔᤏᤠᤒᤠᤴ ᤜᤡᤏᤠ᤺ᤶ ᤔᤧᤔᤧᤳᤋᤢᤴᤗ. ᤜᤧᤰᤁᤩᤠᤱ ᤔᤧᤴᤈᤠ᤺ᤶᤏᤠᤒᤠᤸᤗᤧᤀᤠᤱ ᤁᤠᤰ ᤐᤖᤡᤰᤐᤠ ᤁᤢᤈᤠ ᤁᤧᤈᤠᤒᤠᤴ ᤔᤧᤈᤡ᤺ᤳᤋᤢᤴᤗ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤋᤠ᤺ᤰᤋᤢᤀᤠᤱ ᤘᤠ᤹ᤖᤥ॥ 4 ᤘᤣ᤹ᤀᤡᤸᤗᤧ ᤁᤧᤛᤧᤘᤠᤖᤥᤒᤠᤴ ᤂᤠᤛᤧᤴ ᤁᤧᤗᤥ᤺ᤶᤒᤠ ᤂᤧᤏᤧ᤹ ᤜᤠ᤺ᤳᤏᤧᤒᤣ᥅ ᤁᤢᤴᤍᤠᤱᤒᤠᤸᤗᤧᤀᤣ ᤁᤢᤛᤧᤘᤠᤖᤥᤒᤧᤸᤗᤧ ᤏᤢᤒᤠ ᤐᤠᤴ ᤆᤥᤃᤢᤖ ᤘᤠ᤹ᤒᤡ ᤔᤣ᤺ᤶᤒᤡ ᤑᤠ᤹ᤀᤠᤱ ᤂᤠᤛᤧᤴ ᤆᤥᤃᤢ᤹ᤖᤥ॥ ᤍᤠᤱᤒᤠᤸᤗᤧᤀᤣ ᤁᤧᤛᤧᤘᤠᤖᤥᤒᤠᤴ ᤏᤢᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤢᤓᤠ᤹ ᤐᤡᤖᤢᤖᤥ. ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤂᤧᤴ ᤁᤢᤓᤠ᤹ ᤐᤡᤔᤠ ᤔᤢᤰᤛᤠᤶ ᤁᤳᤋᤢ᤹ᤖᤥ॥ 5 ᤌᤡᤰ ᤏᤛᤠᤏᤡᤒᤠᤸᤗᤧ ᤌᤡᤰ ᤕᤧᤴᤏᤡᤴ ᤘᤣ᤹ᤛᤔᤠ ᤕᤧᤴᤏᤡᤴᤏᤢ᤺ᤸᤗᤧᤀᤠᤱ ᤛᤣᤛᤣᤒᤠ ᤆᤥᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹. ᤁᤖ ᤘᤣ᤹ᤛᤔᤠ ᤔᤏᤠ᤺ᤸᤗᤧ ᤁᤠᤰ ᤕᤧᤴᤜᤠ᤹ ᤗᤳᤌᤡᤰᤁᤧ ᤔᤧᤈᤥᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹ᤖᤥ॥ ᤜᤧᤰᤁᤣ᤺ᤸᤗᤧ ᤁᤴ ᤐᤠ᤺ᤴᤏᤥ ᤁᤧᤖᤧᤰᤗᤧ ᤀᤠᤒᤠᤅᤣ ᤏᤡᤱᤘᤠ᤹ᤒᤥ ᤏᤡᤛ᤻ᤛᤣ ᤐᤥᤱᤔᤠ ᤐᤥᤱᤗᤥ॥ 6 ᤌᤡᤰ ᤕᤧᤴᤏᤡᤴ ᤘᤣ᤹ᤛᤔᤠ ᤕᤧᤴᤏᤢ᤺ᤸᤗᤧᤀᤠᤱ ᤁᤧᤕᤧᤰᤐᤠ ᤆᤥᤰ ᤗ᤹ᤖᤡᤰ ᤁᤧᤀᤡ᤺ᤵᤐᤠᤸᤗᤧ ᤍᤠᤱᤒᤠᤴ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹॥ ᤛᤠ ᤁᤧᤈᤠᤒᤠᤸᤗᤧ ᤍᤠᤱᤒᤠᤴ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ᤹ᤖᤥ॥ ᤛᤠ ᤔᤧᤴᤈᤠ᤺ᤶᤏᤠᤒᤠᤸᤗᤧ ᤍᤠᤱᤒᤠᤴ ᤀᤡᤱᤎᤠᤱ ᤐᤡᤔᤠᤖᤧ ᤗᤠᤃᤡ ᤜᤧᤰᤁᤣ ᤆᤥᤃᤢ᤹. ᤜᤧᤰᤁᤩᤠᤱ ᤂᤧᤸᤗᤧᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢ᤹ᤖᤥ॥ 7 ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ ᤀᤠᤜᤡᤱᤛᤠᤱ ᤀᤠᤛ᤻ᤛᤡᤛᤠᤱ ᤀᤠᤏᤡ᤹ ᤀᤠᤒᤠᤅᤣ ᤗᤠᤃᤡ ᤀᤠᤴᤜᤡᤱᤏᤧᤴᤗᤥ॥ 8 ᤂᤧᤸᤗᤧᤆᤥᤃᤢᤸᤗᤧ ᤀᤠᤏᤡ᤹ ᤀᤠᤜᤡᤱᤛᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤀᤠᤜᤡᤱ. ᤀᤠᤛ᤻ᤛᤡᤛᤠᤱ ᤍᤠᤱᤒᤠᤸᤗᤧ ᤁᤢᤗᤠᤃᤡ ᤀᤠᤛᤡᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤜᤡᤱᤛᤠᤱ ᤀᤠᤛ᤻ᤛᤡᤛᤠᤱ ᤀᤠᤏᤡ᤹ᤃ ᤍᤠᤱᤒᤠᤸᤗᤧᤴᤏᤣᤖᤥ॥ 9 ᤒᤠ ᤁᤸᤗᤧᤆᤥᤃᤢᤸᤗᤧ. ᤂᤪᤡᤛ᤻ᤋᤧᤴ ᤛᤩᤧ ᤜᤧᤰᤁᤩᤠᤱ ᤁᤢᤛᤡᤘᤧᤳ ᤏᤢ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤐᤥᤱᤛᤧ ᤂᤢᤏᤧ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥ᤺ᤰᤂᤧᤖᤥ॥ 10 ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤌᤣᤀᤠᤱ ᤘᤣ᤹ ᤏᤛᤠᤏᤡᤒᤠᤜᤠ᤹ ᤂᤠᤛᤧᤴ ᤁᤧᤗᤥ᤺ᤴᤍᤢᤶᤛᤡᤶᤒᤠᤒᤣ᥅ ᤌᤣᤀᤠᤱ ᤘᤣ᤹ ᤏᤛᤠᤏᤡᤒᤠᤜᤠ᤹ ᤜᤡᤏᤠ᤺ᤶ ᤁᤧᤔᤧᤳᤋᤢᤶᤛᤡᤶᤒᤠᤒᤣ᥅ ᤀᤠᤏᤡ᤹ᤃ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤠᤛᤧᤴ ᤕᤢᤰᤏᤠ᤺ᤸᤗᤧ ᤁᤢᤍᤃᤡ ᤕᤧᤵᤔᤠᤀᤣ ᤐᤥᤱᤗᤥ॥ 11 ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳ. “ᤛᤧᤰᤂᤠᤀᤣ ᤔᤠᤱᤜᤧᤰᤛᤡᤱᤅᤠ. ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤡᤱᤃᤠ᤹ ᤀᤠᤍᤃᤡ ᤌᤢᤱᤒᤥᤜᤈ᤹ ᤔᤧᤗᤣ᤺ᤳᤋᤢᤀᤠᤱ ᤛᤠᤶᤒᤥᤴ ᤔᤧᤓᤴᤇᤡᤱ. ᤜᤧᤰᤁᤩᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤋᤧᤴᤍᤡᤱ ᤔᤧᤈᤥ᤺ᤰᤁᤠ ᤗ᤹ᤖᤡᤰ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹ᤖᤥ॥” 12 ᤜᤧᤰᤁᤣ᤺ᤸᤗᤧ ᤀᤠᤏᤡ᤹ ᤁᤧᤖᤧᤰᤗᤧ ᤀᤠᤈᤥᤃᤢᤶᤒᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤏᤡ᤹ ᤀᤠᤒᤠᤅᤣ ᤆᤧᤰᤔᤠ ᤐᤥᤱᤗᤥ॥ ᤘᤣ᤹ᤜᤠ᤹ ᤗᤠᤕᤥᤀᤥ ᤌᤠᤔᤠᤛᤡ ᤔᤣ᤺ᤴ 13 ᤂᤧᤸᤗᤧᤆᤥᤃᤢᤸᤗᤧ ᤘᤣ᤹ᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡ ᤗᤧᤖᤢᤶᤗᤥ॥ ᤂᤧᤸᤗᤧ ᤁᤢᤗᤧᤰᤘᤠ ᤘᤣ᤹ ᤏᤛᤠᤏᤡᤒᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤔᤥ ᤀᤠᤄᤄᤒᤠ ᤐᤠᤴ ᤀᤡᤃᤪ ᤗᤠᤕᤥᤀᤥ ᤁᤧᤎᤠᤒᤠ ᤐᤠᤴ ᤏᤧᤛ᤻ᤛᤢᤶ ᤔᤣ᤺ᤴ ᤁᤧᤗ᤹ᤒᤠ ᤏᤡᤛ᤻ᤛᤣ ᤆᤥᤃᤢᤶᤗᤥ॥ 14 ᤍᤠᤱᤒᤠ ᤕᤧᤛᤢᤖᤧ ᤁᤢᤕᤢᤰᤗᤠᤶ ᤀᤡᤱᤃᤠ᤹ᤃ ᤀᤠᤳᤋᤡᤴ ᤁᤢᤈᤠ᤺ᤴᤏᤠᤱ ᤀᤠᤈᤡ᤺ᤴᤈᤡ᤺ᤶᤒᤠ ᤔᤧᤈᤥᤰᤏᤧᤴ ᤑᤠ᤹ᤀᤠᤱ ᤀᤠᤏᤡᤱᤘᤠ᤹ᤀᤥ ᤏᤡᤛ᤻ᤛᤣ ᤘᤠ᤹ᤀᤠ. ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤓᤠ ᤁᤢᤈᤠᤜᤠ᤹ ᤀᤠᤈᤡ᤺ᤴᤈᤡ᤺ᤶᤒᤠ ᤆᤥᤰ ᤑᤠ᤹ᤀᤠᤱ ᤀᤡ᤺ᤳᤋᤢ᤹. ᤂᤧᤱᤃ ᤂᤢᤏᤧ᤹ ᤁᤢᤗᤠᤃᤡ ᤀᤠᤈᤡ᤺ᤴᤈᤡ᤺ᤶᤒᤠᤀᤣ ᤐᤥᤱᤗᤥ॥ 15 ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤆᤵᤆᤡ ᤁᤧᤈᤥ᤺ᤰᤐᤠ ᤆᤥᤃᤢ᤹ᤏᤧ ᤑᤠ᤹ᤃᤪ ᤂᤧᤏᤧ᤹ ᤘᤣ᤹ᤜᤠ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤔᤧᤒᤥᤱᤏᤧᤸᤗᤥ॥ ᤂᤧᤏᤧ᤹ ᤁᤧᤈᤒᤠ ᤁᤢᤈᤠ᤺ᤸᤗᤧ ᤘᤣ᤹ ᤏᤛᤠᤏᤡᤒᤠᤴ ᤑᤧᤳᤔᤧᤗᤠ᤺ᤴᤍᤢᤴᤗᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤁᤢᤗᤠᤃᤡ ᤂᤪᤡᤛ᤻ᤋᤧᤴ ᤛᤩᤧᤀᤠᤱ ᤘᤠ᤹ᤖᤥ॥ 16 ᤂᤧᤏᤧ᤹ ᤆᤠᤔᤠ ᤏᤢ᤹ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤖᤧ ᤘᤣ᤹ᤜᤠ᤹ᤖᤧ ᤂᤢᤏᤡ᤹ ᤏᤛᤠ᤺ᤴᤏᤡᤴ ᤑᤧᤳᤗᤠ᤺ᤴᤍᤢᤀᤠᤱ ᤂᤪᤡᤛ᤻ᤋᤖᤧ ᤁᤢᤈᤠ᤺ᤳᤌᤡ ᤔᤧᤒᤣ᤺ᤰᤏᤧᤴᤗᤖᤥ॥ 17 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢ ᤜᤠᤱᤈᤢᤶᤔᤡᤴ ᤆᤠᤔᤠ ᤏᤢ ᤌᤢᤱᤔᤠᤖᤧ ᤁᤢᤕᤠ᤺ᤶᤒᤣᤀᤥ ᤔᤣ᤺ᤴ. ᤁᤖ ᤛᤠᤶᤕᤥᤏᤡᤔᤠ. ᤛᤏᤠᤖᤢᤱ ᤏᤢ ᤛᤣᤛᤣᤔᤠᤱᤅᤡᤸᤗᤧ ᤀᤠᤒᤡᤒᤠ ᤛ᤺ᤵᤔᤠᤸᤗᤧ ᤁᤢᤕᤠ᤺ᤶᤒᤣᤀᤥᤏᤧᤖᤥ॥ 18 ᤀᤰᤂᤣᤗ᤹ᤖᤡᤰ ᤂᤪᤡᤛ᤻ᤋᤧᤴ ᤛᤧᤘᤠ ᤁᤧᤈᤥ᤺ᤰᤐᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠ᤺ᤛᤢ᤹. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧᤀᤠᤱ ᤂᤧᤴ ᤔᤏᤠᤴ ᤁᤢᤏᤠᤖᤠ ᤔᤧᤓᤥᤛᤢᤖ ᤋᤧᤴᤍᤡᤱ ᤔᤧᤈᤥᤃᤢ᤹ᤖᤥ॥ 19 ᤂᤧᤸᤗᤧᤆᤥᤃᤢᤸᤗᤧ ᤀᤠᤳᤋᤡᤴ ᤐᤠ᤺ᤴᤏᤡᤸᤗᤧ ᤛᤏᤠᤖᤢᤱ ᤋᤠᤖᤢ᤹. ᤜᤧᤰᤁᤩᤠᤱ ᤏᤛᤠᤏᤡᤒᤠ ᤗᤢᤶᤔᤥ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤐᤠᤴ ᤆᤥᤃᤢ᤹. ᤒᤠ ᤂᤧᤴᤏᤣ ᤆᤥ᤺ᤰᤔᤠ ᤛᤠ᤹ᤖᤡᤰ ᤋᤶᤛᤡᤱ ᤆᤥᤃᤢᤶᤗᤥ॥ 20 ᤆᤠᤔᤠ ᤌᤢᤱᤔᤠᤖᤧᤗᤠᤃᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤁᤡᤴ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹॥ ᤁᤠᤰ ᤁᤢᤈᤠ ᤁᤢᤎᤡᤜᤠ᤹ ᤛᤢᤳᤌᤥ ᤏᤢ ᤛᤣᤛᤣ ᤆᤥᤰ. ᤁᤖ ᤔᤏᤠ ᤁᤧᤄᤒᤠ ᤁᤢᤈᤠ ᤆᤠᤔᤠᤃ ᤏᤢᤒᤠ ᤔᤧᤒᤥᤱᤏᤧᤸᤗᤥ॥ 21 ᤘᤣ᤹ ᤏᤛᤠᤏᤡᤒᤠᤜᤠ᤹ ᤗᤠᤕᤥᤀᤥ ᤁᤧᤎᤠᤒᤠ ᤁᤢᤈᤠ ᤁᤢᤎᤡ ᤔᤧᤴᤈᤠᤔᤠ ᤜᤧᤰᤁᤩᤠᤱ ᤗᤠᤕᤥᤀᤥ ᤁᤧᤎᤠᤒᤠ ᤕᤠ᤺ᤶᤒᤰ ᤔᤧᤴᤈᤥ᤺ᤰᤔᤠᤀᤣ ᤏᤢᤒᤠ ᤐᤥᤱᤗᤥ॥ 22 ᤁᤴ ᤆᤠᤔᤠ ᤌᤢᤱᤔᤠ ᤐᤠ᤺ᤴᤏᤥ ᤀᤠᤰᤋᤱᤒᤠ ᤏᤛᤠᤴ ᤁᤧᤃᤳᤋᤢ᤹ ᤂᤧᤴ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤧᤏᤧ᤹ ᤁᤧᤗᤢᤶᤔᤥ ᤘᤠ᤹ᤖ॥ ᤀᤠᤳᤋᤡᤴ ᤔᤏᤠ᤺ᤸᤗᤧ ᤆᤠᤔᤠ ᤌᤢᤱᤔᤠ ᤏᤢ᤹ ᤗ᤹ᤖᤡᤰ ᤀᤡ᤺ᤳᤋᤢᤒᤠ ᤐᤠ᤺ᤴᤏᤡᤴ ᤆᤵᤆᤡ ᤔᤧᤈᤥᤃᤢᤴ ᤂᤧᤴᤏᤣ ᤔᤢ᤹ᤀᤡᤛᤠᤒᤠᤖᤥ॥ 23 ᤁᤖ ᤆᤵᤆᤡ ᤆᤥ᤺ᤰᤁᤡ ᤁᤧᤈᤠᤒᤠᤴ ᤀᤠᤒᤠᤅᤣ ᤗᤠᤕᤥᤀᤥ ᤌᤠ᤺ᤖᤥ. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤑᤣ᤺ᤴᤍᤢᤱ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡᤋᤢᤖ ᤆ᤹᤺॥ ᤏᤛᤠ᤺ᤴᤗᤠᤶᤒᤠ ᤔᤧᤶᤒᤥᤱᤔᤏᤠᤒᤠ ᤁᤠᤰ ᤐᤠ᤺ᤴᤜᤠ᤹ ᤗᤠᤕᤥᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.