ᤖᤥᤔᤡ 11 - LIFOTNTᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤀᤡᤛᤪᤠᤀᤡᤗᤡᤜᤠ᤹ 1 ᤜᤧᤰᤁᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤛᤣ᤺ᤴᤍᤥᤏᤡᤱ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤏᤠ᤹ᤖᤢᤛᤡᤒᤠᤒᤡ᥅ ᤛᤧᤰᤂᤠᤛᤠᤱ ᤔᤧᤏᤠ᤹ᤖᤢᤛᤡᤴᤗᤥ᥄ ᤌᤣᤀᤠᤱᤓᤧᤸᤗᤧ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤀᤒᤪᤠᤜᤠᤔᤖᤧ ᤁᤢᤔᤢ᤹ᤀᤡᤍᤠᤱᤛᤠ ᤒᤧᤴᤈᤠᤔᤡᤏ ᤛᤢᤘᤠᤱᤛᤔᤠ ᤀᤡᤛᤪᤠᤀᤡᤗᤡᤀᤠᤖᤥ॥ 2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤋᤃᤡᤏᤢᤀᤣ ᤁᤢᤛᤡᤱ ᤏᤡ᤺ᤳᤋᤢᤛᤡᤒᤠ ᤁᤢᤔᤏᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤏᤠ᤹ᤖᤢᤴᤇᤡᤴᤗᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤸᤗᤧ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤒᤠᤴ ᤛᤠᤶᤕᤥᤛᤠᤵᤗᤠᤀᤥ ᤔᤧᤴᤏᤡ᤺ᤳᤋᤣ ᤁᤧᤘᤕᤡ᤹ᤒᤡ᥅ 3 “ᤀᤠᤍᤠᤱᤒᤣ. ᤂᤧᤱᤜᤠ᤹ᤖᤧᤃ ᤁᤧᤒᤠᤱᤄᤢᤛᤡᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤔᤧᤛᤧᤖᤢᤛᤡ. ᤜᤧᤰᤁᤩᤠᤱ ᤁᤧᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤕᤴᤇᤢᤀᤠᤱ ᤘᤠ᤹ᤖᤥ॥ ᤀᤡᤱᤃᤠ᤹ᤖᤰ ᤏᤖᤠᤱᤅᤠᤱ ᤘᤠ᤹ᤀᤠ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤛᤧᤵᤔᤠ ᤔᤧᤃᤥ᤺ᤳᤋᤠᤖ ᤔᤧᤘᤠ᤹ᤖᤥ॥” 4 ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤰᤂᤣᤗ᤹ᤖᤡᤰ ᤏᤥᤃᤵ ᤐᤡᤖᤢᤒᤣ᥅ “ᤀᤡᤱᤃᤠ᤹ᤃ ᤒᤠᤗ ᤛᤠᤶᤔᤠᤱᤅᤡᤴ ᤔᤠᤱᤔᤧᤱᤄ᤺ᤶᤏᤠᤒᤠ ᤜᤧᤴᤇᤡᤱ ᤏᤢᤛᤡ (᥍.᥆᥆᥆) ᤀᤠᤔᤏᤠᤜᤠ᤹ ᤋᤠᤱᤄᤢᤱᤛᤡᤱᤅᤠᤱ ᤘᤠ᤹ᤀᤠᤖᤥ॥” 5 ᤜᤧᤰᤁᤣᤗ᤹ᤖᤡᤰᤁᤣ. ᤁᤴ ᤕᤧᤶᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤸᤗᤧ ᤛᤣᤃᤢᤛᤡᤒᤠ ᤁᤢᤗᤰᤌᤡᤰ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤧᤘᤠ᤹ᤖᤥ॥ 6 ᤜᤧᤰᤁᤩᤠᤱ ᤁᤱᤃ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤗᤠᤶ ᤔᤣ᤺ᤴ. ᤁᤖ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤗᤠᤶ ᤐᤥ᤺ᤰᤂᤧᤒᤠᤖᤥ॥ ᤂᤢᤏᤡ᤹ ᤕᤠ᤺ᤶᤒᤰᤗᤠᤶ ᤐᤥ᤺ᤰᤂᤧᤒᤠᤏᤧ ᤑᤠ᤹ᤃᤪ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤢᤱᤔᤠ᤹ ᤋᤢᤰᤔᤠᤴ ᤌᤣᤏᤠᤎᤣ ᤐᤥ᤺ᤰᤂᤧᤒᤠᤖᤥ॥ 7 ᤂᤧᤴ ᤑᤠ᤹ᤀᤡᤱᤃ ᤌᤧᤔᤠᤒᤣ᥅ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤏᤡᤱᤘᤠ᤹ ᤔᤧᤒᤡᤖᤢᤀᤠᤱ ᤔᤧᤃᤥ᤺ᤳᤋᤢᤒᤠᤴ ᤔᤧᤱᤄᤥᤛᤢᤴᤗᤥ. ᤁᤖ ᤁᤢᤓᤠ ᤔᤧᤛᤣᤃᤧᤒᤠᤜᤠ᤹ᤖᤧᤏᤧ ᤔᤧᤄᤥᤛᤢᤖᤥ॥ ᤘᤣ᤹ᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤏᤡᤱᤘᤠ᤹ ᤁᤧᤎᤢᤱᤒᤠ ᤆᤥᤃᤢ ᤐᤡᤖᤢᤛᤡᤖᤥ॥ 8 ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤐᤳ. “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤁᤢᤎᤏᤠ ᤁᤧᤗᤧᤱᤒᤠ ᤆᤥᤃᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤴ ᤕᤧᤶᤎᤠᤖᤡᤰ ᤂᤧᤱᤜᤠ᤹ᤖᤧ ᤏᤡᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤔᤡᤰᤜᤠ᤹ ᤌᤣ᤺ᤰᤋᤢᤒᤡᤖᤢᤛᤡᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤶᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤢᤏᤡ᤹ ᤏᤧᤰᤂᤥ᤹ᤒᤠᤴ ᤜᤢ᤹ᤖᤢᤒᤡᤛᤡᤀᤠᤱ ᤘᤠ᤹ᤖᤥ॥” 9 ᤍᤠᤀᤢᤍ ᤜᤠᤱᤅᤡᤸᤗᤧ ᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤐᤠ᤺ᤳᤋᤢᤀᤠᤱ ᤐᤳ. “ᤜᤠᤖᤠ᤹ ᤂᤧᤱᤜᤠ᤹ᤖᤧ ᤀᤠᤒᤠᤅᤣ ᤂᤢᤏᤡ᤹ ᤛᤠᤓᤠᤱᤈᤠ᤺ᤸᤗᤧ ᤀᤡᤈᤥᤀᤥ ᤌᤠᤛᤢᤛᤡᤖ. ᤂᤢᤏᤡ᤹ ᤛᤠᤓ᤺ᤱᤈᤠᤴ ᤀᤠᤄᤄᤒᤠ ᤐᤠᤴ ᤏᤢ ᤂᤢᤶᤍᤡᤱ ᤁᤧᤍᤠ᤺ᤵᤐᤠ ᤐᤠᤴ ᤐᤥᤱᤗᤖᤥ॥ 10 ᤂᤧᤱᤜᤠ᤹ᤖᤧ ᤏᤡᤔᤠ ᤔᤧᤴᤇᤢᤰᤋᤢᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤡᤰᤁᤡᤴ ᤂᤠᤍᤠᤵᤋᤢᤖ. ᤜᤧᤰᤁᤩᤠᤱ ᤂᤢᤏᤡ᤹ ᤀᤣ᤺ᤰᤁᤡᤴ ᤛᤍᤠᤍᤡᤱ ᤀᤡᤏᤥᤃᤧᤴ ᤋᤢᤰᤂᤣ᤺ᤸᤗᤧ ᤋᤢ᤺ᤱᤗᤖᤥ॥” 11 ᤜᤧᤰᤁᤣᤏᤧ ᤑᤠ᤹ᤃᤪ ᤀᤡᤱᤃᤠ᤹ ᤐᤠ᤺ᤴᤎᤡᤰ ᤛᤣᤗᤠᤵᤏᤡᤱ. ᤀᤡᤛᤪᤠᤀᤡᤗᤡᤜᤠ᤹ ᤔᤧᤈᤥ᤺ᤴᤍᤧᤸᤗᤧ ᤐᤥ᤺ᤰᤔᤠᤀᤣ ᤔᤧᤴᤇᤢᤰᤔᤏᤠ ᤌᤠᤖᤡᤰ ᤔᤧᤈᤥ᤺ᤴᤍᤧᤒᤡ᥅ ᤛᤧᤰᤂᤠᤛᤠᤱ ᤔᤣ᤺ᤴᤗᤥ᥄ ᤁᤖ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤋᤠᤖ ᤑᤠ᤹ᤀᤠᤱ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥᤀᤣ ᤛᤧᤴᤗᤵᤐᤡᤴ ᤋᤩᤧᤖᤥ॥ 12 ᤁᤖ ᤕᤜᤢᤍᤡᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤏᤠ᤹ᤖᤢᤒᤠᤸᤗᤧ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤀᤥ ᤐᤕᤶ ᤕᤶᤒᤠ ᤔᤢ᤹ᤀᤡᤛᤠᤶ ᤋᤩᤧᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ᤖᤧ ᤛᤧᤴᤗᤵᤐᤡᤴ ᤔᤧᤍᤠ᤺ᤰᤋᤢᤸᤗᤧ ᤀᤠᤸᤗᤛᤠᤱ ᤕᤖᤡᤰ ᤔᤢ᤹ᤀᤡᤛᤠᤶ ᤋᤠᤀᤣᤖᤥ᥄ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤛᤧᤴᤗᤵ ᤔᤧᤄᤥᤛᤢ᤹ 13 ᤀᤡᤱᤃᤠ᤹ ᤛᤧᤰᤂᤠᤀᤣ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤔᤧᤳᤏᤡᤱᤗ ᤐᤳᤋᤠᤖᤥ॥ ᤀᤡᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤥ ᤛᤣ᤺ᤰᤕᤢᤰᤔᤡᤒᤠ ᤐᤥ᤺ᤰᤂᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤔᤠᤱᤛᤧᤘᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤛᤧᤰᤂᤠᤀᤣ ᤀᤠᤛᤢᤰᤛᤢᤰ ᤋᤶᤛᤡᤱ ᤆᤥᤃᤢᤱᤗᤥ॥ 14 ᤜᤧᤰᤁᤣᤗ᤹ᤖᤡᤰ ᤁᤴ ᤀᤠᤔᤠᤱᤛᤣᤘᤠᤗᤠᤶ ᤀᤡᤱᤃᤠ᤹ ᤀᤠᤒᤠᤅᤣ ᤀᤠᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤠᤜᤧᤶᤔᤠᤴ ᤑᤥ᤺ᤰᤂᤢᤱᤅᤠᤱ ᤂᤧᤱᤜᤠ᤹ᤀᤥ ᤁᤢᤓᤠ ᤋᤠᤱᤛᤧ᤺ᤵᤔᤠ ᤛᤢᤰᤋᤢᤱᤛᤡᤱᤗ ᤁᤧᤗ᤹ᤒᤠ ᤏᤡᤱᤛᤠᤱ ᤆᤥᤃᤢᤱᤗᤥ॥ 15 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤏᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤘᤣ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤴ ᤏᤠᤍᤱ ᤐᤥᤱᤏᤧ ᤑᤠ᤹ᤃᤪ ᤕᤜᤢᤍᤡᤜᤠ᤹ ᤂᤪᤡᤛ᤻ᤋᤧᤴ ᤏᤛᤠᤴ ᤔᤧᤈᤥᤃᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤶᤔᤥ ᤋᤧᤴᤍᤡᤱ ᤆᤥᤃᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤛᤡᤔᤧᤴᤗᤠᤶ ᤜᤡᤱᤔᤴ ᤔᤧᤄᤥᤛᤢᤒᤠ ᤜᤧᤰᤁᤣᤀᤣ ᤐᤥᤱᤗᤥ᥄ 16 ᤏᤡᤱᤘᤠ᤹ᤑᤢᤔᤠᤱᤅᤥ ᤋᤥ᤺ᤶᤔᤏᤠᤒᤠ ᤌᤡᤰᤛᤡᤃᤣᤰᤐᤠ ᤗᤰᤁᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤁᤧᤏᤶᤒᤠ ᤁᤧᤖᤧᤰ ᤗᤰᤁᤡᤴᤏᤠᤱ ᤛᤣᤛᤣ ᤆᤥᤰᤗᤥ॥ ᤛᤡᤱ ᤛᤠ᤺ᤵᤐᤡᤴ ᤛᤣᤛᤣ ᤆᤥ᤺ᤰᤏᤧ ᤑᤠ᤹ᤃᤪ ᤛᤡᤱᤒᤥᤖᤠ᤺ᤰᤜᤠ᤹ᤀᤠᤱ ᤛᤣᤛᤣ ᤔᤧᤒᤥᤱᤗᤥ॥ 17 ᤁᤢᤓᤠ ᤕᤜᤢᤍᤡᤜᤠ᤹ᤃ ᤏᤢᤒᤠ ᤈᤤᤋᤢᤏ ᤛᤡᤱᤒᤢᤱᤗᤠᤶ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠᤰ ᤁᤢᤀᤡᤛᤡᤰ ᤔᤧᤈᤥᤰ॥ ᤜᤧᤰᤁᤩᤠᤱ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤋᤠᤶᤓᤢᤱ ᤈᤤᤋᤢᤏ ᤛᤡᤱᤒᤥᤖᤠᤰ ᤜᤧᤰᤁᤣ ᤁᤧᤈᤥᤃᤡᤛᤠᤱ ᤏᤢᤒᤠ ᤈᤤᤋᤢᤏ ᤛᤡᤱᤒᤢᤱᤔᤥᤗᤠᤶ ᤌᤢᤶ ᤏᤢ ᤜᤡᤱᤔᤴ ᤂᤥᤔᤠ ᤑᤠ᤹ᤀᤠᤱ ᤂᤢᤏᤡ᤹ ᤗᤧᤰᤘᤠ ᤂᤡᤏᤡ᤹ ᤁᤧᤈᤰᤁᤠᤛᤡᤀᤠᤱ ᤁᤧᤘᤕᤡ᤹ᤖᤥ॥ 18 ᤂᤧᤴ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤢᤒᤠ ᤛᤡᤱᤒᤥᤖᤠ᤺ᤰᤜᤠ᤹ᤏᤢ᤺ᤸᤗᤧ ᤀᤠᤏᤡᤃᤣ ᤏᤢᤒᤠ ᤆᤥᤃᤡᤃᤧ ᤑᤠ᤹ᤀᤠᤱ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤶᤏᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤢᤛᤠ᤺ᤵᤐᤡᤴ ᤁᤧᤴᤎᤖᤢᤶᤔᤡᤴ. ᤁᤖ ᤁᤢᤛᤠ᤺ᤵᤐᤡᤸᤗᤧᤏᤧ ᤂᤡᤏᤡ᤹ ᤁᤧᤎᤖᤡᤀᤠᤱ ᤘᤠ᤹ ᤁᤧᤗ᤹ᤒᤠᤴ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ॥ 19 ᤁᤖ. ᤀᤠᤏᤡᤃᤣ ᤂᤧᤴ ᤛᤡᤱᤒᤢᤱᤔᤥ ᤆᤰᤛᤡᤱᤔᤠ ᤑᤠ᤹ᤀᤠᤱ ᤂᤧᤴ ᤛᤡᤱᤒᤥᤖᤠ᤺ᤰᤜᤠ᤹ ᤔᤧᤈᤧᤵᤋᤢᤀᤠᤱ ᤗᤠᤵᤔᤧᤓᤢᤛᤧᤖᤥ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶᤒᤡᤗᤠ॥ 20 ᤛᤧᤰᤂᤠᤀᤣᤖᤥ. ᤁᤖ ᤕᤜᤢᤍᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤛᤠᤴ ᤔᤧᤴᤈᤥᤃᤢᤴᤏᤠᤱᤅᤣ ᤛᤡᤱᤒᤥᤖᤠ᤺ᤰᤁᤡᤴ ᤆᤧᤵᤔᤠᤀᤠᤱ ᤗᤠᤵᤑᤢᤔᤏᤠᤒᤠ ᤁᤢᤀᤡᤛᤡᤰ ᤗᤠᤵᤔᤧᤓᤢᤛᤧᤒᤠᤖᤥ॥ ᤂᤡᤏᤡ᤹ ᤏᤛᤠᤴ ᤁᤧᤈᤥᤃᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤵᤔᤥ ᤁᤧᤘᤕᤡ᤹ᤖᤥ॥ ᤜᤧᤰᤁᤣ᤺ᤸᤗᤧ ᤀᤠᤱᤍᤡᤱ ᤔᤧᤗ᤹ᤖᤧᤶᤔᤡᤴᤏᤧ᤹ᤀᤥ. ᤁᤖ ᤂᤧᤴ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤀᤡ᤺ᤳᤋᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤡᤖᤧᤶᤔᤧ᤹ᤀᤥ॥ 21 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠᤒᤠ ᤐᤥᤖᤠ᤺ᤰᤜᤠ᤹ᤀᤣ ᤔᤧᤍᤠᤱᤄᤢᤴᤇᤡᤴᤏᤡᤸᤗᤧ ᤂᤡᤏᤡ᤹ᤀᤠᤱ ᤁᤧᤴᤍᤠᤱᤄᤡᤴᤗᤥ॥ 22 ᤀᤰᤂᤣᤗ᤹ᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤗᤢᤱᤔᤠ᤹ ᤋᤢᤰᤔᤠᤸᤗᤧ ᤁᤢᤎᤡᤶ ᤏᤢ ᤁᤧᤈᤡ᤺ᤵᤐᤠ ᤆᤥᤰ ᤑᤠ᤹ᤀᤠᤱ ᤏᤢᤖᤡᤰᤁᤠᤱ ᤏᤡᤱᤘᤠ᤹ ᤐᤡᤖᤧᤶᤔᤧ᤹ᤀᤥ॥ ᤏᤛᤠᤴ ᤁᤧᤗᤧᤵᤐᤠᤜᤠ᤹ ᤁᤧᤖᤧᤰ ᤂᤢᤏᤧ᤹ ᤁᤧᤛᤠᤰᤐᤠ ᤂᤢᤶᤍᤡᤱ ᤐᤡᤖᤢᤛᤡ᤹. ᤁᤖ ᤂᤡᤏᤡ᤹ ᤁᤢᤗᤢᤱᤃᤢᤶᤔᤥ ᤆᤰᤔᤧᤸᤗ᤹ᤀᤣ ᤁᤧᤘᤕᤡ᤹ᤏᤧ ᤑᤠ᤹ᤃᤪ ᤗᤢᤱᤔᤠ᤹ ᤁᤧᤍᤢᤰᤋᤡ᤹ᤖᤥ॥ ᤔᤣ᤺ᤴᤏᤣ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤁᤧᤈᤧᤵᤋᤡᤀᤠᤱ ᤗᤠᤵᤁᤧᤓᤢᤛᤡ᤹ᤖᤥ॥ 23 ᤜᤧᤰᤁᤣᤗ᤹ᤖᤡᤰᤁᤣ ᤕᤜᤢᤍᤡᤜᤠ᤹ᤖᤧ ᤏᤛᤠᤴ ᤔᤧᤈᤥᤃᤢᤀᤠᤱ ᤔᤧᤏᤢ᤺ᤱᤏᤧ ᤑᤠ᤹ᤃᤪ ᤂᤢᤏᤧ᤹ ᤕᤠᤶᤔᤥ ᤂᤧᤱᤜᤠ᤹ ᤛᤡᤱᤒᤢᤱᤔᤥ ᤆᤰᤋᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤋᤃᤡ ᤔᤧᤒᤳᤇᤧᤒᤠ ᤋᤧᤴᤏᤥ ᤆᤰᤔᤠ ᤔᤢᤰᤛᤠᤶ ᤁᤳᤋᤢ᤹ᤖᤥ॥ 24 ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤋᤠᤶᤓᤢᤱ ᤈᤤᤋᤢᤏ ᤐᤥᤖᤠᤰ ᤜᤧᤰᤋᤱᤒᤠ ᤁᤧᤈᤥᤃᤡ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤏᤢᤒᤠ ᤈᤤᤋᤢᤏ ᤒᤢᤱᤔᤥ ᤁᤧᤈᤰᤁᤠᤛᤡᤏᤧ ᤑᤠ᤹ᤃᤪ ᤂᤢᤏᤧ᤹ ᤀᤠᤒᤠᤅᤣ ᤁᤢᤈᤧᤰ ᤁᤢᤒᤥᤖᤠᤰᤜᤠ᤹ ᤀᤠᤒᤠᤅᤣ ᤁᤢᤒᤢᤱᤔᤥᤀᤣ ᤆᤰᤋᤢᤛᤡᤸᤗᤧ ᤀᤠᤰᤂᤩᤠᤰ ᤁᤢᤛᤡᤰ ᤛᤶᤗ ᤆᤰᤋᤢᤛᤡᤒᤡᤗᤠ॥ ᤀᤡᤛᤪᤠᤀᤡᤗᤡᤜᤠ᤹ ᤕᤠᤶᤔᤥ ᤏᤡᤱᤘᤠ᤹ᤑᤢᤔᤠᤱᤅᤥ ᤔᤧᤏᤢ᤺ᤱ 25 ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤂᤡᤏᤡ᤹ ᤀᤠᤱᤍᤡᤱ ᤁᤧᤴᤗ᤹ᤖᤡᤴᤗ ᤑᤠ᤹ᤀᤠᤱ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤴ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤘᤠ᤹ᤖᤥ॥ ᤁᤴ ᤛᤡᤒᤡ᤹ᤃᤧᤴ ᤐᤠ᤺ᤴᤏᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤛᤣᤰ ᤁᤢᤀᤡᤛᤡᤰ ᤏᤛᤠᤴ ᤆᤥ᤺ᤰᤔᤠ ᤁᤧᤒᤥᤱᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤖᤧ ᤏᤛᤠᤴ ᤆᤥ᤺ᤰᤔᤠ ᤔᤧᤴᤇᤢ᤺ᤳᤋᤣ ᤌᤠᤖᤡᤰ ᤕᤖᤡᤰ ᤕᤜᤢᤍᤡᤜᤠ᤹ ᤂᤢᤏᤡ᤹ ᤏᤡᤱᤘᤠ᤹ ᤔᤧᤴᤏᤢ᤺ᤱᤔᤏᤠᤒᤠ ᤔᤧᤒᤥᤱᤗᤥ॥ 26 ᤜᤧᤰᤁᤩᤠᤱ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤛᤧ᤺ᤵᤗᤥ॥ ᤛᤠᤶᤕᤥᤛᤠᤵᤗᤠᤀᤥ ᤀᤰᤂᤣ ᤛᤠᤵᤋᤧᤀᤠᤱ ᤐᤳ. “ᤛᤧᤴᤗᤵᤍᤠᤱᤒᤠᤴ ᤕᤖᤢᤛᤗᤧᤔᤗᤠᤶ ᤋᤠᤖᤥ. ᤂᤢᤏᤧ᤹ᤀᤣ ᤀᤡᤛᤪᤠᤀᤡᤗᤡᤜᤠ᤹ ᤗᤠᤕᤥᤗᤠᤶ ᤏᤢ᤺ᤰᤋᤢᤛᤡ᤹॥ 27 ᤜᤧᤰᤁᤩᤠᤱ. ᤀᤡᤱᤃᤠ᤹ ᤂᤢᤴᤇᤡ ᤗᤠᤕᤥᤜᤠ᤹ ᤂᤧᤳᤋᤢᤱ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤂᤧᤱᤜᤠ᤹ᤏᤢ ᤆᤥᤃᤢᤱᤒᤠ ᤀᤠᤔᤠᤱᤜᤢᤵᤐᤡᤴ ᤁᤧᤳᤋᤢᤱᤗᤥ” ᤗ᤹ᤖᤡᤰ ᤕᤠᤶᤔᤥ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥ 28 ᤕᤜᤢᤍᤡᤜᤠ᤹ ᤛᤢᤏᤠᤀᤡᤱᤅᤡᤸᤗᤧ ᤁᤢᤏᤡᤱᤔᤡᤛᤡᤖᤥ. ᤁᤖ ᤂᤡᤏᤡ᤹ ᤗᤠᤃᤡᤃ ᤁᤴ ᤏᤢᤒᤠᤀᤣ ᤐᤥ᤺ᤰᤂᤧᤖᤥ॥ ᤜᤧᤰᤁᤣᤛᤠᤱ ᤀᤒᤪᤠᤜᤠᤔ. ᤀᤡᤛᤜᤠᤁ. ᤕᤠᤁᤢᤒᤧᤴᤏᤢ ᤆᤥᤃᤢᤒᤠ ᤔᤠᤱᤜᤧᤰᤁᤡᤸᤗᤧ ᤆᤥᤃᤢᤸᤗᤧ ᤀᤠᤸᤗᤛᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥ 29 ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤠᤒᤡᤒᤠ ᤐᤷᤎᤠ᤺ᤶᤜᤠ᤹ ᤏᤢ ᤀᤢ᤺ᤳᤇᤡᤱᤔᤠᤴ ᤕᤠᤱᤏᤠ ᤔᤧᤏᤢ᤺ᤰᤋᤢᤴ॥ 30 ᤌᤣᤀᤠᤱᤓᤧᤸᤗᤧ ᤌᤡᤰ ᤕᤧᤶᤔᤥ ᤂᤡᤏᤡ᤹ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤁᤧᤈᤥᤃᤡ᤹. ᤁᤖ ᤕᤜᤢᤍᤡᤜᤠ᤹ ᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤒᤠᤸᤗᤧ ᤂᤢᤏᤧ᤹ ᤁᤢᤗᤢᤱᤃᤢᤶᤔᤡᤴ ᤀᤠᤸᤗᤥ ᤂᤡᤏᤡ᤹ ᤁᤧᤄᤥᤛᤢᤶᤔᤠᤱ ᤁᤧᤘᤕᤡ᤹ᤖᤥ॥ 31 ᤜᤧᤰᤁᤣᤗ᤹ᤖᤡᤰᤁᤣ ᤂᤧᤱᤜᤠ᤹ ᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹. ᤜᤧᤰᤁᤣ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤁᤧᤍᤢᤰᤋᤡᤒᤠ ᤁᤢᤀᤡᤛᤡ᤺ᤰᤁᤣ ᤂᤢᤏᤧ᤹ ᤂᤧᤱᤜᤠ᤹ ᤕᤠᤶᤔᤥ ᤗᤢᤱᤔᤠ᤹ ᤋᤢᤰᤋᤢᤛᤡ᤹ᤖᤥ॥ 32 ᤁᤠᤰ ᤔᤏᤠᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤔᤧᤴᤀᤡ᤺ᤵᤔᤏᤠᤒᤠ ᤔᤧᤴᤏᤠ᤺ᤵᤔᤏᤠᤒᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤂᤧᤱᤜᤠ᤹ ᤛᤠᤰᤐᤠ ᤁᤧᤎᤠᤒᤠᤜᤠ᤹ ᤜᤧᤰᤁᤣ ᤔᤧᤳᤋᤢᤛᤡᤖᤥ॥ ᤁᤖ ᤂᤧᤱᤜᤠ᤹ ᤗᤢᤱᤔᤠ᤹ ᤋᤢᤰᤔᤠᤛᤡ ᤑᤠ᤹ᤀᤠᤱ ᤜᤧᤰᤁᤣ ᤆᤥᤃᤢᤒᤠᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤱᤛᤥ ᤀᤡᤱᤎᤠᤱ 33 ᤀᤠᤰᤁᤥ ᤜᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤢᤶ ᤏᤡᤱᤘᤠ᤹ᤀᤡᤴ ᤏᤢ ᤁᤢᤏᤧᤜᤡᤏᤡᤱᤘᤠ᤹ᤀᤡᤴ ᤀᤠᤰᤂᤧᤴ ᤀᤡᤔᤧᤸᤗᤢᤱᤒᤠ ᤏᤢ ᤏᤡᤱᤘᤠ᤹ ᤁᤧᤔᤠᤒᤠᤒᤣ᥄ ᤂᤢᤏᤧ᤹ ᤁᤢᤄᤠᤛᤧᤴᤏᤡᤴ ᤏᤢ ᤁᤢᤗᤠᤶᤔᤡᤴ ᤁᤢᤛᤡᤱ ᤏᤡ᤺ᤵᤔᤠᤀᤣ ᤛᤢᤰᤔᤧᤍᤧᤳᤋᤡᤴᤗᤥ᥄ 34 “ᤍᤠᤱᤒᤠᤸᤗᤧ ᤁᤢᤏᤡᤱᤘᤠ᤹ᤀᤡᤴ ᤜᤠ᤺ᤳᤗᤧ ᤏᤡᤛᤢᤀᤠᤱ ᤘᤠ᤹ᤒᤣ᥅ ᤜᤧᤰᤁᤩᤠᤱ ᤜᤠᤳ ᤂᤢᤏᤧ᤹ ᤛᤢᤈᤠ ᤁᤧᤒᤡᤒᤠ ᤐᤥ᤺ᤰᤂᤧᤀᤠᤱ ᤘᤠ᤹ᤒᤣ᥅” 35 ᤀᤡᤃᤪ “ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤱᤏᤠ ᤏᤢ᤺ᤰᤔᤠ ᤁᤧᤒᤥᤱᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤂᤢᤏᤧ᤹ ᤐᤡᤖᤢᤀᤠᤱ ᤘᤠ᤹ᤒᤣ᥅” 36 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤗᤠᤶᤒᤠ ᤁᤠᤰ ᤐᤠ᤺ᤴᤜᤠ᤹ᤃ ᤋᤠ᤹᤺. ᤂᤢᤏᤧ᤹ ᤁᤢᤔᤢᤰᤛᤠᤶᤔᤡᤸᤗᤧ ᤁᤠᤰ ᤐᤠ᤺ᤴᤜᤠ᤹ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤠᤰ ᤐᤥ᤺ᤰᤂᤧᤒᤠ ᤐᤠ᤺ᤴᤜᤠ᤹ ᤂᤢᤏᤧ᤹ ᤁᤢᤗᤠᤃᤡᤀᤣ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥ ᤛᤍᤠᤍᤡᤱ ᤛᤍᤠᤍᤡᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱ ᤐᤥᤱᤗᤖᤥ᥄ ᤀᤠᤔᤧᤴ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.