ᤖᤥᤔᤡ 10 - LIFOTNT

¹ ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤀᤡᤱᤃᤠ᤹ᤃ ᤀᤡᤛᤪᤠᤀᤡᤗᤡᤜᤠ᤹ ᤋᤠᤱᤔᤧᤛᤧ᤺ᤵᤗ ᤑᤠ᤹ᤀᤠᤱ ᤛᤡᤰᤗᤢᤱᤔᤥᤏᤢᤀᤣ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤋᤢᤘᤠ ᤆᤥᤃᤢᤱᤗᤥ॥

² ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡᤱᤘᤠ᤹ ᤋᤠᤔᤠ ᤂᤢᤏᤡ᤹ ᤛᤡᤰ ᤛᤶ ᤑᤠ᤹ᤀᤠᤱ ᤐᤠ᤺ᤳᤋᤢᤱ. ᤁᤖ ᤀᤠᤰᤂᤣᤀᤠᤱ ᤁᤢᤏᤡᤱᤘᤠ᤹ ᤋᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤴᤏᤡᤛᤢᤴᤗᤥ॥

³ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤁᤧᤍᤠᤒᤠ ᤛᤠᤶᤕᤥᤒᤠᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤀᤠᤒᤠᤅᤣ ᤛᤠᤶᤕᤥᤒᤠ ᤐᤥᤱᤔᤠ ᤋᤶᤛᤡᤱ ᤔᤧᤈᤥᤃᤢ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤒᤠ ᤐᤥᤱᤔᤠ ᤗᤠᤶᤔᤡᤴ ᤔᤧᤏᤠ᤹ᤖᤢᤖᤥ॥

⁴ ᤂᤪᤡᤛ᤻ᤋᤧᤸᤗᤧᤀᤣ ᤛᤠᤶᤕᤥᤌᤡᤶᤔᤡᤸᤗᤧ ᤐᤠ᤺ᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤁᤧᤳᤋᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤏᤛᤠᤴ ᤁᤧᤈᤥ᤺ᤰᤐᤠ ᤁᤧᤖᤧᤰ ᤛᤠᤶᤕᤥᤒᤠ ᤔᤧᤒᤥᤱᤗᤥ॥

ᤁᤧᤖᤧᤰᤗᤧ ᤗᤠᤃᤡ ᤛᤧᤴᤗᤵ

⁵ ᤔᤥᤛᤠ᤺ᤸᤗᤧ ᤛᤠᤶᤕᤥᤌᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠᤀᤠᤱ ᤛᤠᤶᤕᤥᤒᤠ ᤐᤥᤱᤔᤠ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤐᤥᤎᤰ ᤆᤥᤃᤢᤀᤠᤱ ᤘᤠ᤹. “ᤛᤠᤶᤕᤥᤌᤡᤶᤔᤡᤴ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤏᤠᤴ ᤒᤠ ᤂᤧᤴᤗᤠᤶᤒᤠᤀᤣ ᤜᤡᤱᤗᤥ॥”

⁶ ᤁᤖ ᤏᤛᤠᤴ ᤆᤥ᤺ᤰᤔᤠᤀᤠᤱ ᤁᤧᤍᤠᤒᤠ ᤛᤠᤶᤕᤥᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “‘ᤜᤠᤳ ᤌᤥ ᤛᤠᤱᤃᤪᤠᤶᤐᤣᤍᤠᤱᤅᤥ ᤐᤣ᤺ᤰᤐᤠᤒᤣ᥅’ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤧᤴᤏᤧ᤹” (ᤂᤧᤴ ᤑᤠ᤹ᤀᤡᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱ ᤀᤠᤏᤡ᤹ᤀᤥ ᤕᤢ᤺ᤳᤇᤧ ᤂᤪᤡᤛ᤻ᤋᤧᤴ ᤕᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤕᤢ᤺ᤵᤔᤠ ᤐᤥᤱ).

⁷ ᤀᤡᤃᤪ “‘ᤜᤠᤳ ᤕᤥ ᤂᤧᤔᤠᤕᤱᤛᤱᤅᤥ ᤌᤠᤒᤠᤒᤣ᥅’ ᤑᤠ᤹ᤀᤠᤱ ᤁᤧᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤧᤴᤏᤧ᤹” (ᤂᤧᤴ ᤑᤠ᤹ᤀᤡᤴ ᤛᤧᤴᤗᤵᤐᤡᤸᤗᤧᤴ ᤛᤢᤏᤠᤀᤡᤱᤅᤡᤴ ᤀᤠᤏᤡ᤹ᤀᤥ ᤌᤠᤰᤛᤧ ᤂᤪᤡᤛ᤻ᤋᤧᤴ ᤛᤡᤔᤧᤴᤗᤠᤶ ᤌᤥ ᤌᤠᤰᤔᤠ ᤐᤥᤱ)॥

⁸ ᤁᤖ ᤁᤸᤗᤧ ᤌᤣ ᤐᤠ᤺ᤳᤋᤢᤒᤣ᥅ “ᤐᤠ᤺ᤴᤈᤠᤰᤁᤡᤱᤃ ᤁᤧᤒᤣᤛᤠᤱᤅᤣ ᤘᤠ᤹. ᤁᤧᤔᤢᤖᤠᤀᤥ ᤜᤧᤰᤁᤩᤠᤱ ᤁᤧᤛᤡᤰᤗᤢᤱᤔᤥ ᤘᤠ᤹.” ᤂᤧᤱᤃ ᤀᤠᤏᤡᤃᤣ ᤀᤡᤱᤓᤥᤛᤢᤶᤒᤧᤒᤠ ᤂᤪᤡᤛ᤻ᤋᤧᤴ ᤏᤛᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤐᤠ᤺ᤴᤈᤠᤰᤗᤥ—

⁹ ᤂᤧᤏᤧ᤹ ᤁᤧᤔᤢᤖᤠ᤺ᤸᤗᤧ ᤕᤧᤛᤢᤴ ᤏᤣ ᤍᤠᤱᤒᤠᤖᤥ ᤑᤠ᤹ᤀᤠᤱ ᤋᤧᤴᤍᤡᤱ ᤁᤧᤈᤥᤃᤢᤀᤠᤱ ᤁᤧᤛᤡᤰᤗᤢᤱᤔᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤧ᤹ ᤛᤡᤔᤧᤴᤗᤠᤶ ᤁᤢᤜᤡᤱᤘᤧᤳ ᤆᤥᤃᤢ ᤗ᤹ᤖᤡᤰ ᤏᤛᤠᤴ ᤁᤧᤈᤥᤃᤢᤏᤧ ᤑᤠ᤹ᤃᤪ ᤋᤠᤱᤃᤧᤛᤧ᤺ᤵᤗᤥ॥

¹⁰ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤛᤡᤰᤗᤢᤱᤔᤥᤗᤠᤶ ᤏᤛᤠᤴ ᤁᤧᤈᤥᤃᤢᤒᤠᤸᤗᤧ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤧᤒᤥᤱ. ᤜᤧᤰᤁᤩᤠᤱ ᤁᤧᤔᤢᤖᤠ᤺ᤸᤗᤧ ᤋᤧᤴᤍᤡᤱ ᤁᤧᤈᤥᤃᤢᤒᤠᤸᤗᤧ ᤛᤧᤴᤗᤵ ᤁᤧᤄᤥᤛᤢ᤹ᤖᤥ॥

¹¹ ᤛᤠᤶᤕᤥᤛᤠᤵᤗᤠ᤺ᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤂᤢᤏᤧ᤹ ᤛᤶᤍᤠᤱ ᤏᤛᤠᤴ ᤁᤧᤈᤥ᤺ᤰᤐᤠᤱᤃ ᤀᤠᤵᤑᤠᤸᤗᤧᤀᤠᤱ ᤛᤡᤖᤡᤱᤔᤔᤥ ᤔᤧᤎᤠᤏᤧᤴᤗᤥ॥”

¹² ᤕᤜᤢᤍᤡ ᤏᤢ ᤌᤡᤶᤔᤧᤴᤍᤱ ᤛᤢᤘᤠᤱᤗᤢᤶᤔᤥ ᤌᤣᤀᤠᤱ ᤕᤧᤔᤧᤴᤍᤱ ᤐᤠᤴ ᤜᤥᤵᤗᤥ—ᤗᤳᤇᤠ ᤍᤠᤱᤒᤠᤴᤏᤣ ᤁᤧᤖᤧᤰᤗᤧ ᤂᤢᤏᤡ᤹ ᤍᤠᤱᤒᤠᤖᤥ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱ ᤁᤧᤗᤥᤱᤒᤠ ᤁᤧᤖᤧᤰ ᤕᤖᤡᤰ ᤔᤢ᤹ᤀᤡᤛᤠᤶ ᤐᤡᤖᤢᤛᤡ᤹ᤖᤥ॥

¹³ ᤌᤣᤀᤠᤱᤓᤧᤸᤗᤧ “ᤍᤠᤱᤒᤠᤸᤗᤧ ᤁᤢᤔᤡᤱ ᤁᤧᤗᤥᤱᤒᤠ ᤁᤧᤖᤧᤰᤗᤧ ᤛᤧᤴᤗᤵ ᤔᤧᤄᤥᤛᤢ᤹॥”

¹⁴ ᤁᤖ ᤂᤧᤱᤜᤠ᤹ᤖᤧ ᤏᤛᤠ᤺ᤴᤏᤣ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤀᤡᤸᤗᤧ ᤀᤠᤰᤂᤣᤀᤠᤱ ᤂᤢᤏᤧ᤹ ᤁᤢᤔᤡᤱᤅᤡᤴ ᤔᤧᤗᤥ᤺ᤰᤂᤢᤒᤣ᥅ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤕᤠ᤺ᤶᤒᤣᤀᤥ ᤂᤧᤶᤔᤤ ᤔᤧᤱᤄᤧᤶᤔᤣ ᤔᤧᤘᤠ᤹ᤀᤡᤸᤗᤧ ᤀᤠᤰᤂᤣᤀᤠᤱ ᤏᤛᤠᤴ ᤆᤥ᤺ᤰᤔᤠ ᤔᤧᤛᤢᤰᤋᤢ᤹ᤒᤣ᥅ ᤜᤧᤰᤁᤩᤠᤱ ᤀᤡᤱᤓᤴ ᤁᤧᤛᤧᤒᤠ ᤔᤏᤠᤀᤣ ᤔᤣ᤺ᤴᤏᤣ ᤀᤠᤰᤂᤣᤗ᤹ᤖᤡᤰ ᤔᤧᤄᤧᤵᤛᤢᤒᤠᤒᤣ᥅

¹⁵ ᤜᤧᤰᤁᤩᤠᤱ ᤜᤠ᤺ᤳᤋᤠᤱ ᤔᤧᤶᤒᤠᤱᤅᤣ ᤀᤠᤰᤂᤣᤀᤠᤱ ᤂᤧᤱᤜᤠ᤹ᤖᤧ ᤀᤡᤱᤓᤴ ᤔᤧᤈᤥᤃᤢ᤹ᤒᤣ᥅ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳ. “ᤛᤢᤏᤠᤀᤡᤱ ᤀᤡᤱᤓᤴ ᤁᤧᤈᤥᤰᤐᤧᤴ ᤋᤠ᤺ᤸᤗᤧ ᤀᤠᤰᤂᤧᤴ ᤏᤢᤒᤠ ᤐᤥᤱᤒᤣ᥄”

¹⁶ ᤁᤖ ᤁᤧᤖᤧᤰᤗᤧ ᤛᤢᤏᤠᤀᤡᤱᤅᤡᤴ ᤔᤧᤴᤍᤠ᤺ᤰᤋᤢᤴᤗᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢ᤹. “ᤀᤠᤍᤠᤱᤒᤣ. ᤀᤠᤏᤡᤃᤣ ᤀᤡᤱᤓᤥᤛᤢᤶᤒᤧᤒᤠ ᤐᤠ᤺ᤴᤏᤡᤴ ᤜᤠ᤺ᤳᤗᤧ ᤏᤛᤠᤴ ᤆᤥᤃᤢᤀᤠᤱ ᤘᤠ᤹ᤒᤣ᥅”

¹⁷ ᤜᤧᤰᤁᤣᤗ᤹ᤖᤡᤰ ᤏᤛᤠ᤺ᤴᤏᤡᤱᤃ ᤂᤧᤶᤔᤏᤠᤒᤠᤗᤠᤶᤒᤠ ᤋᤠᤖᤥ. ᤜᤧᤰᤁᤩᤠᤱ ᤂᤧᤴ ᤂᤧᤶᤔᤏᤠᤒᤠᤱᤃ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤣᤀᤥᤒᤠ ᤐᤠ᤺ᤴᤈᤠᤰᤗᤠᤶ ᤋᤠᤖᤥ॥

¹⁸ ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤛᤧᤰᤂᤠᤀᤣ ᤔᤧᤱᤄᤧᤶᤔᤣ ᤔᤧᤘᤠ᤹ᤒᤡ᥅ ᤛᤧᤰᤂᤠᤀᤣ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤘᤠ᤹ᤖᤥ॥ ᤌᤣᤀᤠᤱᤓᤧᤸᤗᤧ. ᤁᤴ ᤛᤢᤏᤠᤀᤡᤱ ᤁᤧᤛᤧᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤱᤄᤱᤅᤡᤴ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤛᤧᤖᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤋᤧᤴᤏᤥ ᤛᤧᤖᤧᤀᤠᤱ ᤘᤠ᤹ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤛᤠᤵᤋᤧᤀᤠᤱ ᤐᤳᤗᤥ॥

¹⁹ ᤀᤡᤱᤃᤠ᤹ ᤕᤠᤶᤔᤥ ᤛᤣ᤺ᤴᤍᤥᤏᤡᤱ. ᤛᤧᤰᤂᤠᤀᤣ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤢᤏᤠᤀᤡᤱᤅᤡᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤶᤒᤡ᥅ ᤂᤧᤱᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢᤀᤣᤖᤥ. ᤌᤣᤀᤠᤱᤓᤧᤸᤗᤧ ᤔᤥᤛᤠᤖᤧ ᤁᤢᤕᤧᤶᤔᤥᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤘᤕᤧ. “ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤔᤢ᤹ᤀᤡᤛᤠᤶ ᤐᤡᤖᤢᤱᤛᤡᤱᤅᤠᤱ ᤂᤡᤏᤡ᤹ ᤏᤠᤜᤧᤴᤗ ᤆᤥᤃᤢᤱᤗᤥ. ᤂᤠᤛᤡᤱ ᤔᤧᤴᤏᤡ᤺ᤵᤔᤏᤠᤒᤠ ᤛᤢᤘᤠᤱᤜᤠ᤹ᤗᤠᤶ ᤂᤡᤏᤡ᤹ ᤛᤡᤰᤐᤥ᤺ᤰᤗ ᤕᤠ᤺ᤴᤍᤢᤱᤗᤥ॥”

²⁰ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤕᤛᤤᤕᤠ᤺ᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤀᤠ᤺ᤴᤇᤡᤱᤅᤠᤱ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖᤥ. “ᤀᤡᤱᤃᤠ᤹ ᤕᤠᤵᤔᤡ ᤔᤧᤱᤃᤥ᤺ᤵᤔᤏᤠᤒᤠᤜᤠ᤹ᤖᤧ ᤔᤧᤄᤥᤛᤠᤱᤗᤥ. ᤀᤠᤳᤋᤡᤴᤜᤠ᤹ᤖᤧ ᤀᤡᤱᤃᤠ᤹ ᤛᤣ᤺ᤴᤔᤧᤴᤍᤥᤛᤠᤱᤅᤡᤴ ᤂᤧᤱᤜᤠ᤹ᤀᤥ ᤀᤡᤱᤃᤠ᤹ ᤀᤠᤒᤠᤅᤣ ᤌᤠ᤺ᤴᤇᤡᤱᤅᤠᤀᤠᤱ ᤘᤠ᤹ᤀᤠᤖᤥ॥”

²¹ ᤁᤖ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤕᤠ᤺ᤶᤒᤣᤀᤥ ᤀᤰᤂᤣ ᤐᤠ᤺ᤳᤋᤢ᤹. “ᤏᤠᤶᤎᤠᤎᤠ ᤂᤧᤴ ᤀᤠᤎᤡᤱᤃᤠᤏᤡᤜᤠ᤹ ᤏᤢ ᤀᤠᤒᤠᤴ ᤔᤧᤱᤄᤧᤶᤔᤏᤠᤒᤠᤜᤠ᤹ ᤋᤠ᤺ᤰᤔᤠᤛᤡ ᤑᤠ᤹ᤀᤠᤱ ᤀᤠᤜᤢᤰᤜᤠ᤹ ᤛᤴᤇᤢᤱᤅᤠᤱ ᤘᤠ᤹ᤀᤠᤖᤥ॥”