ᤛᤢᤑᤥ 8 - LIFOTNT

ᤏᤢᤛᤡᤃᤣᤰᤐᤠ ᤀᤣ᤺ᤵᤛᤠᤵ

¹ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤢᤔᤢᤰ ᤁᤢᤓᤪᤧ᤺ᤱ ᤌᤠᤖᤡᤰ ᤆᤡᤈᤡ ᤕᤧᤶᤕᤧᤶ ᤐᤥ᤺ᤰᤂᤧ॥

² ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤏᤡᤛᤢᤱᤛᤡᤱ॥ ᤂᤧᤱᤜᤠ᤹ ᤏᤢᤛᤡ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤧᤒᤡᤖᤢᤛᤡᤖᤥ॥

³ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤛᤠᤱᤋᤧᤖᤧᤱ ᤁᤧᤒᤱᤒᤠ ᤘᤣ᤹ᤛᤔᤠ ᤔᤠᤱᤗᤠᤀᤡᤱᤒᤠᤴ ᤋᤩᤧᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤕᤧᤶᤛᤡᤱᤗᤥ॥ ᤁᤧᤖᤧᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤴᤏᤢ ᤋᤥ᤺ᤶᤔᤠ ᤑᤠ᤹ᤀᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤡᤒᤠ ᤛᤠᤶᤔᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤛᤠᤱᤛᤡᤱ ᤜᤠ᤺ᤶᤔᤠ ᤑᤠ᤹ᤀᤠᤱ ᤕᤖᤡᤰ ᤛᤠᤱᤛᤡᤱ ᤔᤧᤒᤡᤖᤢᤖᤥ॥

⁴ ᤜᤧᤰᤁᤩᤠᤱ ᤛᤠᤱᤛᤡᤱ ᤔᤡ᤺ᤰᤂᤢ᤺ᤴ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤔᤧᤈᤥᤃᤢᤒᤠ ᤋᤢᤘᤠᤴ ᤛᤥᤖᤡᤰ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥᤗᤠᤶ ᤏᤡᤱᤘᤠ᤹ᤑᤢᤔᤠᤱᤅᤥ ᤌᤠ᤺ᤱ ᤁᤧᤖᤧᤖᤥ॥

⁵ ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤛᤠᤱᤋᤧᤖᤧᤱᤅᤡᤴ ᤕᤠᤱᤛᤡᤱᤅᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤔᤡᤄᤠᤱᤅᤡᤴ ᤛᤠᤱᤋᤧᤖᤧᤱᤅᤥ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤠᤵᤑᤢᤛᤢ ᤌᤠ᤺ᤛᤢᤖᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤜᤧᤰᤁᤩᤠᤱ ᤗᤢᤵᤗᤡ ᤌᤠᤅᤧᤖᤥ॥

ᤋᤃᤡᤛᤔᤠ ᤗᤡᤛᤡ ᤌᤢᤳᤌᤢᤖᤡ᤺ᤵᤐᤠᤜᤠ᤹

⁶ ᤜᤧᤰᤁᤩᤠᤱ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤏᤢᤛᤡ ᤌᤢᤳᤌᤢᤖᤡ᤺ᤵᤐᤠᤜᤠ᤹ ᤔᤢ᤺ᤵᤔᤠ ᤑᤠ᤹ᤀᤠᤱ ᤕᤠᤖᤡᤵ ᤔᤧᤈᤥᤃᤢᤖᤥ॥

⁷ ᤜᤧᤰᤁᤩᤠᤱ ᤌᤡᤰᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤠᤰᤂᤡ᤹ᤏᤢ ᤁᤧᤓᤢᤳᤇᤡᤱᤒᤠ ᤑ᤺ᤴ ᤏᤢ ᤔᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤡᤰᤛᤡᤱᤗ ᤌᤠᤔᤠ ᤜᤣ᤺ᤰᤋᤧᤖᤥ॥ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤛᤡᤱᤒᤢᤱᤜᤠ᤹. ᤜᤧᤰᤁᤩᤠᤱ ᤁᤠᤰ ᤛᤖᤣ᤺ᤳᤁᤩᤠ᤺ᤵᤐᤠ ᤕᤠ᤺ᤴᤜᤠ᤹ ᤔᤡᤍᤡᤃᤧᤒᤣᤖᤥ॥

⁸ ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤔᤡ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤐᤕᤶ ᤕᤶᤒᤠ ᤁᤥ᤺ᤰᤔᤠ ᤜᤧᤰᤋᤱᤒᤠᤴ ᤘᤖ᤺ᤱᤅᤥ ᤗᤠᤵᤑᤢᤛᤡᤱᤗᤥ॥ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤖ᤺ᤱᤅᤡᤴ ᤔᤠᤰᤂᤡ᤹ ᤐᤥ᤺ᤰᤂᤧ ᤐᤣᤖᤥ॥

⁹ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤖ᤺ᤱᤅᤥ ᤁᤧᤕᤠᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤛᤩᤧ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤘᤠᤗᤠᤎᤠᤜᤠ᤹ᤀᤠᤱ ᤔᤧᤕᤖᤧ ᤔᤧᤒᤣᤖᤥ॥

¹⁰ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤋᤠᤱᤛᤠᤰᤐᤥᤗᤠᤶ ᤕᤶᤒᤠ ᤂᤣ᤺ᤶᤛᤡᤰᤐᤠᤴ ᤁᤧᤍᤡ᤺ᤵᤐᤠ ᤋᤡᤕᤠᤗᤥ ᤁᤢᤀᤡᤛᤡᤰ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤕᤱᤄᤱ ᤏᤢ ᤘᤠᤒᤢᤴᤜᤠ᤹ᤀᤥ ᤔᤰᤌᤩᤧᤖᤥ॥

¹¹ ᤂᤧᤴ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤔᤡᤱᤃ “ᤐᤄᤡ᤺ᤰ ᤁᤧᤄᤡ᤺ᤰᤐᤠ” ᤘᤕᤧ॥ ᤂᤧᤸᤗᤧ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤆᤫᤠ᤺ᤳᤋᤡᤴ ᤁᤧᤄᤡ᤺ᤰᤐᤠ ᤆᤥᤃᤢ. ᤜᤧᤰᤁᤩᤠᤱ ᤂᤧᤴ ᤆᤫᤠ᤺ᤳᤋᤡᤴ ᤔᤧᤎᤢᤅᤢᤀᤠᤱ ᤕᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤩᤧᤖᤥ॥

¹² ᤀᤠᤸᤗ ᤗᤡᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤏᤠᤶ. ᤗᤠᤒᤠ. ᤏᤢ ᤂᤣ᤺ᤶᤛᤡᤰᤐᤠᤜᤠ᤹ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤕᤠᤱᤄᤢᤀᤠᤱ ᤂᤧᤱᤜᤠ᤹ᤖᤧ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤀᤥ᤺ᤳᤋᤡ᤺ᤴ ᤔᤕᤧᤖᤥ॥ ᤜᤧᤰᤁᤩᤠᤱ ᤗᤧᤴᤍᤡᤰ ᤏᤢ ᤛᤧᤴᤍᤡᤰᤗᤧᤴᤏᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤛᤢᤰᤘᤠ ᤌᤡᤰ ᤂᤠᤍᤠᤔᤧᤖᤥ॥

¹³ ᤜᤧᤰᤁᤩᤠᤱ ᤀᤡᤱᤃᤠ᤹ ᤌᤠ᤺ᤱ ᤀᤥᤔᤧᤳᤋᤢᤱᤅᤡᤸᤗᤧ ᤋᤠᤱᤛᤠᤰᤐᤥ ᤁᤧᤒᤧᤒᤠᤖ ᤁᤧᤒᤵᤐᤠ ᤔᤢᤕᤠᤎᤡᤰ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧᤒᤠ ᤂᤧᤵᤛᤢᤱᤗᤥ. “ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠᤜᤠ᤹ᤀᤥ ᤋᤢᤰᤂᤣ. ᤋᤢᤰᤂᤣ. ᤋᤢᤰᤂᤣᤖᤥ. ᤌᤣᤀᤠᤱᤓᤧᤸᤗᤧ ᤀᤠᤸᤗ ᤘᤣ᤹ᤛᤔᤠ ᤛᤢᤶᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤌᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤵᤔᤠ ᤕᤧᤶ ᤋᤩᤧᤀᤠᤱ ᤘᤠ᤹ᤖᤥ॥”