ᤛᤢᤑᤥ 7 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵ ᤁᤧᤃᤵᤐᤠ ᤔᤏᤠᤜᤠ᤹

¹ ᤁᤴ ᤀᤣᤃᤠᤱ ᤀᤡᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤁᤧᤕᤧᤵᤐᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤠᤶᤒᤣ᤺ᤰᤔᤥ. ᤘᤖ᤺ᤱᤅᤥ. ᤛᤡᤱᤒᤢᤱᤜᤠ᤹ᤀᤥ ᤛᤢᤖᤡᤳ ᤁᤣᤈᤱ ᤔᤧᤜᤢᤏᤧᤴᤗ ᤑᤠ᤹ᤀᤠᤱ ᤗᤡᤛᤡ ᤐᤡᤛᤠᤱᤗᤠᤶ ᤛᤢᤖᤡᤳ ᤁᤣᤈᤱᤅᤡᤴ ᤔᤧᤎᤣ᤺ᤰᤋᤢᤒᤠ ᤏᤡᤛᤢᤱ॥

² ᤜᤧᤰᤁᤩᤠᤱ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤣ᤺ᤵᤛᤠᤵ ᤁᤧᤒᤱᤒᤠ ᤘᤣ᤹ᤛᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤠᤅᤧᤒᤠ ᤏᤡᤛᤢᤱ॥ ᤂᤧᤸᤗᤧ ᤂᤧᤴ ᤂᤠᤶᤒᤣ᤺ᤰᤔᤠᤴ ᤏᤢ ᤘᤖ᤺ᤱᤅᤡᤴ ᤑᤧᤳᤗᤠ᤺ᤶᤔᤠ ᤕᤢᤰ ᤁᤧᤄᤥᤒᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤳᤋᤢᤛᤡ.

³ “ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ᤖᤧ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤠᤏᤡᤃᤣ ᤀᤣ᤺ᤵᤛᤠᤵ ᤔᤧᤴᤕᤢᤰᤁᤣ ᤌᤠᤖᤡᤰ ᤂᤡᤏᤡ᤹ ᤂᤠᤶᤒᤣ᤺ᤰᤔᤠᤴ. ᤘᤖ᤺ᤱᤅᤡᤴ. ᤛᤡᤱᤒᤢᤱᤜᤠ᤹ ᤌᤣᤀᤠᤱ ᤑᤧᤳᤔᤧᤗᤠ᤺ᤴᤍᤧᤶᤔᤡᤴᤏᤧ᤹ᤀᤥ॥”

⁴ ᤜᤧᤰᤁᤩᤠᤱ ᤂᤢᤏᤡ᤹ ᤋᤥᤘᤠᤒᤠᤀᤥ ᤀᤣ᤺ᤵᤛᤠᤵ ᤔᤧᤕᤢᤰᤋᤢᤛᤡᤒᤠᤜᤠ᤹ ᤔᤧᤏᤡᤖᤢᤛᤡᤒᤠ ᤂᤧᤵᤛᤢᤱ॥ ᤁᤠᤰ ᤀᤡᤛᤪᤠᤀᤡᤗᤒᤠ ᤛᤢᤘᤠᤱᤜᤠ᤹ᤖᤥᤗᤠᤶ ᤗᤠᤅᤧᤴᤇᤡᤱᤎᤡᤰᤁᤠᤱ ᤜᤧᤴᤇᤡᤱ ᤗᤡ-ᤗᤡ (᥇.᥊᥊.᥆᥆᥆) ᤔᤧᤘᤕᤧᤖᤥ—

⁵ ᤕᤜᤢᤍᤠ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤖᤢᤒᤣᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤃᤠᤍ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆).

⁶ ᤀᤠᤛᤣᤖ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤏᤠᤵᤋᤠᤗᤡ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤔᤏᤛ᤻ᤛᤣ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆).

⁷ ᤛᤡᤔᤡᤕᤥᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤗᤧᤒᤡ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤀᤡᤛ᤻ᤛᤠᤁᤠᤖ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆).

⁸ ᤈᤒᤢᤗᤢᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤕᤢᤛᤢᤑ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆). ᤜᤧᤰᤁᤩᤠᤱ ᤒᤧᤴᤈᤠᤔᤡᤏ ᤛᤢᤘᤠᤱᤗᤠᤶ ᤜᤧᤴᤇᤡᤱ ᤌᤡᤰ-ᤏᤧᤳ (᥇᥈.᥆᥆᥆)॥

ᤑᤍᤠᤱᤒᤠ ᤋᤣᤳ ᤁᤧᤈᤠᤱᤒᤠ ᤔᤏᤠᤗᤢᤵ

⁹ ᤁᤴ ᤀᤣᤃᤠᤱ ᤂᤧᤵᤔᤥ ᤀᤠᤳᤋᤠᤳᤋᤠᤴᤏᤣ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠ ᤔᤏᤠᤜᤠ᤹. ᤁᤧᤖᤧᤰ ᤗᤠᤈᤣ᤹ᤜᤠ᤹. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹ᤗᤠᤶ. ᤜᤠᤱᤕᤢᤰᤏᤠᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤁᤒᤪᤡᤱ ᤔᤧᤕᤧᤒᤧᤒᤠ ᤏᤡᤛᤢᤱᤛᤡᤱ॥ ᤂᤧᤱᤜᤠ᤹ᤖᤧ ᤑᤍᤠᤱᤒᤠ ᤋᤣᤳ ᤔᤧᤈᤠᤰᤂᤢᤀᤠᤱ ᤂᤢᤏᤡ᤹ ᤜᤢᤰᤁᤥ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤥᤖᤠᤰᤜᤠ᤹ ᤔᤧᤒᤰᤂᤢᤀᤠᤱ ᤔᤧᤕᤧᤒᤧ॥

¹⁰ ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧ. “ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤂᤢᤴᤇᤡ᤹ ᤔᤏᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤢᤰᤛᤠᤶ ᤁᤳᤇᤢ᤹ᤖᤥ॥”

¹¹ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤴ. ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤂᤢᤏᤡ᤹ ᤁᤒᤪᤡᤱ ᤁᤧᤖᤧᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤀᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥᤴ ᤔᤧᤓᤴᤇᤡᤱᤗ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣᤗ᤹ᤖᤡᤰ ᤛᤧᤘᤠ ᤔᤧᤈᤥᤃᤢᤖᤥ.

¹² “ᤀᤠᤔᤧᤴ᥄ ᤏᤠᤖᤠ ᤑᤥᤔᤠᤴ. ᤔᤡᤔᤡᤍᤡᤱᤅᤡᤴ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤀᤡᤴ. ᤏᤥᤃᤧᤴᤏᤡᤴ. ᤀᤡᤱᤎᤠᤱᤅᤡᤴ. ᤔᤢᤰᤛᤠᤶᤔᤡᤴ ᤏᤢ ᤌᤢᤶᤔᤡᤴ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤏᤣᤖᤥ॥ ᤀᤠᤔᤧᤴ᥄”

¹³ ᤜᤧᤰᤁᤩᤠᤱ ᤋᤢᤶᤗᤠᤶᤗᤥᤒᤠᤎᤡᤰᤗᤧ ᤀᤡᤱᤃᤠ᤹ ᤀᤰᤂᤣᤗ᤹ᤖᤡᤰ ᤛᤣ᤺ᤴᤍᤥᤛᤠᤱ “ᤁᤴ ᤑ᤺ᤍᤠᤱᤒᤠ ᤋᤣᤳ ᤁᤧᤈᤠᤱᤒᤠᤜᤠ᤹ ᤜᤠ᤺ᤳᤇᤡᤒᤣ᥅ ᤜᤧᤰᤁᤩᤠᤱ ᤀᤠᤳᤋᤥᤗᤠᤶ ᤔᤧᤍᤩᤧᤒᤠᤒᤣ᥅”

¹⁴ ᤀᤡᤱᤃᤠ᤹ ᤂᤢᤏᤧ᤹ ᤏᤥᤃᤵ ᤐᤡᤖᤢᤱ. “ᤀᤠᤍᤠᤱᤒᤣ. ᤀᤡᤱᤃᤠ᤹ᤃ ᤔᤧᤏᤡᤛᤢᤱᤛᤡᤱᤅᤡᤴᤗᤥ. ᤂᤧᤏᤧ᤹ᤀᤣ ᤁᤧᤏᤡᤛᤢ᤹ᤖᤥ॥” ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤁᤴᤜᤠ᤹ᤃ ᤐᤕᤶ ᤕᤶᤒᤠ ᤏᤡᤱᤄᤢᤶᤗᤠᤶ ᤁᤧᤍᤠᤒᤠᤛᤡᤖᤥ॥ ᤁᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤥ ᤂᤢᤏᤡ᤹ ᤋᤣᤳᤆᤠᤱᤜᤠ᤹ ᤘᤠᤔᤧᤜᤵᤋᤢᤀᤠᤱ ᤑᤍᤠᤱᤒᤠ ᤔᤧᤈᤥᤃᤢᤀᤠᤱ ᤔᤧᤘᤠ᤹ᤖᤥ॥

¹⁵ ᤂᤧᤸᤗᤧᤆᤥᤃᤢᤸᤗᤧᤀᤣ ᤁᤱᤜᤠ᤹ᤃ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤔᤧᤕᤧᤵᤐᤠᤱ ᤛᤧᤴᤍᤡᤰ ᤗᤧᤴᤍᤡᤰ ᤁᤢᤜᤡᤶᤔᤥ ᤛᤧᤘᤠ ᤔᤧᤈᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤂᤢᤏᤡ᤹ᤏᤢ ᤘᤠ᤹ᤀᤠᤱ ᤁᤶᤒᤪᤠᤱ ᤔᤧᤳᤋᤢᤛᤡ᤹ᤖᤥ॥

¹⁶ ᤁᤱᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤧᤳᤗᤠ᤺ᤰᤔᤠ ᤏᤢ ᤀᤠ᤺ᤱᤃᤢᤃᤧᤴ ᤘᤠᤔᤡ᤺ᤰᤔᤠᤸᤗᤧ ᤔᤧᤍᤖᤢᤛᤡᤴᤗᤥ॥ ᤜᤧᤰᤁᤩᤠᤱ ᤏᤠᤶᤛᤠᤱᤅᤡᤸᤗᤧᤀᤠᤱ ᤛᤧ᤺ᤵᤔᤠᤀᤠᤱ ᤔᤧᤛᤧ᤺ᤵᤋᤢᤛᤡᤴ. ᤕᤧᤶᤔᤠᤀᤠᤱ ᤔᤧᤕᤧᤶᤍᤢᤛᤡᤴᤗᤥ॥

¹⁷ ᤌᤣᤀᤠᤱᤓᤧᤸᤗᤧ ᤜᤠᤱᤕᤢᤰᤏᤠ ᤗᤢᤶᤔᤥ ᤁᤧᤘᤠ᤹ᤒᤠ ᤔᤧᤸᤗᤢᤰᤛᤠ᤺ᤸᤗᤧ ᤁᤱᤜᤠ᤹ ᤁᤔᤢᤛᤡ᤹. ᤂᤢᤏᤧ᤹ ᤏᤧᤳᤋᤡᤃᤧᤴ ᤜᤡᤱᤔᤴ ᤁᤧᤒᤡᤒᤠ ᤘᤠᤒᤢᤴᤏᤥ ᤗᤠᤶᤗᤥᤛᤢᤛᤡᤖᤥ॥ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤏᤡ᤹ ᤔᤡᤰᤘᤠᤴ ᤋᤢᤃᤢ ᤐᤡᤖᤢᤛᤡ᤹ᤖᤥ॥”