ᤛᤢᤑᤥ 6 - LIFOTNT

ᤌᤡᤰᤛᤡᤃᤣᤰᤐᤠ ᤀᤣ᤺ᤵᤛᤠᤵ

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤏᤢᤛᤡ ᤀᤣ᤺ᤵᤛᤠᤵᤐᤥ ᤌᤡᤰᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡᤛᤢᤱ. ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥ ᤌᤡᤰᤛᤡᤃᤣᤰᤐᤠᤸᤗᤧ ᤋᤠᤱᤛᤠᤰᤐᤧᤴ ᤁᤧᤗᤥᤱᤒᤠ ᤀᤡᤰᤗᤠᤀᤥ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥

² ᤜᤧᤰᤁᤩᤠᤱ ᤑᤍᤠᤱᤒᤠ ᤀᤴᤎᤡᤰ ᤏᤡᤛᤢᤱ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤗᤳᤇᤠ ᤗᤡᤎᤡᤰ ᤁᤳᤋᤢ. ᤜᤧᤰᤁᤩᤠᤱ ᤂᤧᤴ ᤋᤡᤆ᤺ᤎᤡᤰ ᤔᤧᤒᤡᤖᤢᤀᤠᤱ ᤌᤱ ᤁᤧᤏᤠ᤺ᤶᤒᤠ ᤁᤢᤀᤡᤛᤡᤰ ᤁᤠᤰ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤢᤏᤧ᤹ ᤌᤠᤛᤡᤱᤗᤥ॥

ᤏᤡᤛᤡᤃᤣᤰᤐᤠ ᤀᤣ᤺ᤵᤛᤠᤵ

³ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤏᤡᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤛᤡᤃᤣᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥

⁴ ᤜᤧᤰᤁᤩᤠᤱ ᤜᤧ᤺ᤳᤋᤠᤱᤒᤠ ᤘᤣ᤹ᤛᤔᤠ ᤀᤴᤎᤡᤰ ᤗ᤺ᤴᤍᤧ ᤑᤧᤖᤧ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤳᤇᤡᤱᤗ ᤑᤠ᤹ᤀᤠᤱ ᤀᤴ ᤁᤧᤕᤢᤰᤐᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤗᤠᤶ ᤛᤏᤠᤖᤢᤱᤅᤡᤴ ᤂᤧᤵᤔᤠᤍᤣᤔᤠ ᤔᤢᤰᤛᤠᤶ ᤔᤧᤒᤡᤖᤢ॥ ᤜᤧᤰᤁᤩᤠᤱ ᤕᤶᤒᤠ ᤋᤠᤓᤣᤎᤡᤰᤁᤠᤱ ᤂᤧᤴ ᤔᤧᤒᤡᤖᤢ॥

ᤛᤢᤶᤛᤡᤃᤣᤰᤐᤠ ᤀᤣ᤺ᤵᤛᤠᤵ

⁵ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤛᤢᤶᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤛᤢᤶᤛᤡᤃᤣᤰᤐᤠ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥ ᤜᤧᤰᤁᤩᤠᤱ ᤔᤠᤰᤋᤠᤱᤒᤠ ᤀᤴᤎᤡᤰ ᤏᤡᤛᤢᤱ. ᤜᤧᤰᤁᤩᤠᤱ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤜᤢᤰᤁᤥ ᤋᤧᤶᤍᤢᤖᤡᤎᤡᤰ ᤁᤳᤋᤢ॥

⁶ ᤜᤧᤰᤁᤩᤠᤱ ᤂᤧᤵᤔᤥ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤀᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤌᤡᤰᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤌᤡᤰ ᤔᤠᤛᤡ ᤜᤧᤰᤁᤩᤠᤱ ᤌᤡᤰᤕᤧᤴᤒᤠ ᤏᤠᤶᤕᤠᤰ ᤁᤡᤗᤥ ᤛᤢᤶᤛᤡ ᤜ᤺ᤰᤛᤡ᤺ ᤐᤥᤱᤗᤥ॥ ᤁᤖ ᤈᤤᤋᤢᤏ ᤏᤡ᤺ᤱᤃᤣ᤺ᤴ ᤏᤢ ᤆᤧᤸᤗᤧᤰᤛᤣ᤹ ᤌᤡᤴ ᤑᤧᤳᤔᤧᤗᤠ᤺ᤴᤍᤧᤏᤧ᤹ᤀᤥ॥”

ᤗᤡᤛᤡᤃᤣᤰᤐᤠ ᤀᤣ᤺ᤵᤛᤠᤵ

⁷ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤗᤡᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤗᤡᤛᤡᤃᤣᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤸᤗᤧ “ᤑᤧᤖᤧ᤹” ᤐᤠ᤺ᤳᤋᤢᤒᤠ ᤂᤧᤵᤛᤢᤱ॥

⁸ ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤶᤍᤠᤱᤒᤠ ᤀᤴᤏᤡᤴ ᤂᤧᤵᤔᤥ ᤏᤡᤛᤢᤱᤗᤥ॥ ᤂᤧᤴ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤡᤱᤃ “ᤛᤡᤔᤧᤴ” ᤘᤕᤧ॥ ᤜᤧᤰᤁᤩᤠᤱ ᤂᤧᤔᤠᤕᤱᤛᤱᤅᤥᤒᤠ ᤁᤧᤛᤡᤒᤠᤜᤠ᤹ᤖᤧ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤗᤰ ᤗᤡᤛᤡᤀᤥ ᤁᤢᤗᤰ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤌᤱ. ᤛᤠᤰ. ᤋᤢᤰᤔᤠ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ᤗᤠᤶ ᤛᤧᤵᤔᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ ᤕᤢᤰ ᤔᤧᤒᤡᤖᤢᤛᤡᤖᤥ॥

ᤅᤠᤛᤡᤃᤣᤰᤐᤠ ᤀᤣ᤺ᤵᤛᤠᤵ

⁹ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤅᤠᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤸᤗᤧ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤏᤢ ᤕᤧᤛᤢᤖᤧ ᤁᤢᤕᤠ᤺ᤶᤒᤣᤀᤥ ᤔᤧᤒᤠ᤺ᤳᤋᤢᤒᤠ ᤐᤠ᤺ᤴᤏᤥ ᤏᤛᤠ᤺ᤴᤛᤠᤒᤠ ᤔᤧᤈᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤔᤧᤛᤧᤖᤢᤛᤡᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤀᤡᤱᤃᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤡᤃᤠᤱ ᤏᤡᤛᤢᤱᤛᤡᤱᤗᤥ॥

¹⁰ ᤂᤧᤱᤜᤠ᤹ ᤀᤰᤂᤣᤗ᤹ᤖᤡᤰ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ. “ᤛᤣᤛᤣ ᤏᤢ ᤛᤧᤰᤂᤠᤒᤠ ᤔᤢᤰᤛᤠᤶᤍᤠᤱᤒᤠᤀᤣ. ᤂᤧᤏᤧ᤹ ᤕᤠᤵᤔᤡ ᤁᤧᤛᤧᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤵᤑᤠᤸᤗᤧ ᤂᤠᤛᤧᤴ ᤁᤧᤗᤥ᤺ᤴᤍᤢᤛᤡᤀᤠᤱ ᤂᤢᤶᤍᤡᤱ ᤁᤧᤒᤡᤖᤢᤛᤡᤒᤠᤒᤣ᥅”

¹¹ ᤂᤧᤱᤜᤠ᤹ ᤁᤠᤰ ᤑᤍᤠᤱᤒᤠ ᤋᤣᤳ ᤔᤧᤒᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤜᤧᤰᤁᤣᤀᤣ ᤛᤧᤵᤔᤠ ᤁᤧᤒᤥᤱᤒᤠ ᤘᤣ᤹ ᤛᤧᤘᤠᤖᤥᤒᤠᤜᤠ᤹ ᤜᤧᤰᤁᤩᤠᤱ ᤑᤢ᤹ᤏᤢᤛᤠ᤹ ᤏᤧ᤹ᤏᤢᤛᤠ᤹ᤜᤠ᤹ ᤔᤧᤴᤇᤧᤳᤇᤡᤱᤅᤣ ᤌᤠᤖᤡᤰ ᤜᤠᤱᤄᤧᤶᤔᤧ᤹ ᤑᤠ᤹ᤀᤠᤱ ᤔᤧᤔᤧᤳᤋᤢᤛᤡᤖᤥ॥

ᤋᤢᤰᤛᤡᤃᤣᤰᤐᤠ ᤀᤣ᤺ᤵᤛᤠᤵ

¹² ᤀᤠᤸᤗ ᤔᤧᤸᤗᤢᤰᤛᤠ᤺ᤸᤗᤧ ᤋᤢᤰᤛᤡᤃᤣᤰᤐᤠ ᤀᤣ᤺ᤵᤛᤠᤵᤐᤡᤴ ᤑᤠ᤺ᤰᤂᤢᤒᤠ ᤏᤡᤛᤢᤱ॥ ᤜᤧᤰᤁᤩᤠᤱ ᤐᤕᤶ ᤕᤶᤒᤠ ᤗᤢᤵᤗᤡ ᤌᤠᤅᤧ. ᤏᤠᤶᤔᤡᤴᤏᤠᤱ ᤔᤠᤰᤌᤰᤋᤧᤀᤠᤱ ᤔᤠᤰᤋᤠᤱᤒᤠ ᤐᤥ᤺ᤰᤂᤧ. ᤗᤠᤒᤠᤴᤏᤠᤱ ᤔᤠᤰᤂᤡ᤹ ᤁᤢᤀᤡᤛᤡᤰ ᤜᤧ᤺ᤳᤋᤠᤱᤒᤠ ᤐᤥ᤺ᤰᤂᤧ ᤐᤣ.

¹³ ᤜᤧᤰᤁᤩᤠᤱ ᤐ᤺ᤳᤇᤣ᤹ᤒᤢᤱᤔᤠᤴ ᤛᤢᤖᤡᤳᤔᤠᤸᤗᤧ ᤛᤠ᤹ᤖᤡᤰ ᤘᤠ᤺ᤴᤍᤢᤸᤗᤧ ᤔᤧᤴᤍᤢᤶᤔᤏᤠᤒᤠ ᤐ᤺ᤳᤇᤣ᤹ᤜᤠ᤹ ᤔᤰᤌᤠᤒᤠ ᤁᤢᤀᤡᤛᤡᤰ ᤕᤖᤡᤰ ᤂᤣ᤺ᤶᤛᤡᤰᤐᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤋᤠᤱᤛᤠᤰᤐᤥᤗᤠᤶ ᤔᤰᤔᤧᤎᤩᤧᤖᤥ॥

¹⁴ ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴᤏᤠᤱ ᤛᤠᤵᤁᤡᤳᤋᤡᤴ ᤁᤢᤀᤡᤛᤡᤰ ᤁᤡᤳᤇᤡᤱᤅᤠᤱ ᤆᤳᤇᤡᤱ ᤐᤣᤖᤥ॥ ᤁᤠᤰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤘᤠᤃᤵᤂᤠᤶᤜᤠ᤹ ᤔᤧᤄᤧᤳᤇᤡᤱ ᤔᤧᤒᤣᤖᤥ॥

¹⁵ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹. ᤜᤠᤱᤕᤢᤰᤐᤠᤜᤠ᤹. ᤌᤰᤗᤡᤜᤠᤱᤜᤠ᤹. ᤕᤠᤱᤛᤠᤁᤢᤴᤎᤣᤛᤠᤒᤠᤜᤠ᤹. ᤁᤧᤎᤢᤶᤒᤠ ᤔᤢᤰᤁᤧᤃᤢᤒᤠᤜᤠ᤹. ᤜᤧᤰᤁᤩᤠᤱ ᤁᤠᤰ ᤕᤥ᤺ᤰᤐᤠᤜᤠ᤹ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹ ᤁᤧᤖᤧᤰ ᤁᤥ᤺ᤰᤔᤠᤀᤥᤒᤠ ᤑᤢᤰᤁᤢᤜᤠ᤹ ᤏᤢ ᤕᤠᤰᤁᤣ᤺ᤰᤜᤠ᤹ᤀᤥ ᤔᤧᤈᤡᤱᤛᤡᤱᤗᤥ॥

¹⁶ ᤂᤧᤱᤜᤠ᤹ᤖᤧ ᤁᤥ᤺ᤰᤔᤠᤜᤠ᤹ ᤏᤢ ᤗᤢᤱᤜᤠ᤹ ᤀᤰᤂᤣ ᤔᤧᤔᤧᤳᤋᤢᤖᤥ. “ᤀᤠᤏᤡᤃᤣ ᤛᤶᤍᤠᤱ ᤔᤰᤌᤩᤧ᤹ᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤛᤡᤰᤁᤧᤴᤗᤠᤶᤒᤠ ᤕᤠᤵᤔᤡ ᤀᤠᤎᤣ᤺ᤰᤋᤧ᤹ ᤀᤠᤈᤡᤰᤂᤧ᤹ᤀᤥ᥄

¹⁷ ᤌᤣᤀᤠᤱᤓᤧᤸᤗᤧ ᤁᤵᤔᤥ ᤂᤢᤴᤇᤡ᤹ ᤁᤡᤵᤔᤠ ᤁᤧᤄᤢᤒᤠ ᤛᤡᤰ ᤐᤥ᤺ᤰᤔᤠᤸᤗᤧᤴ ᤕᤶᤒᤠ ᤕᤧᤴ ᤋᤩᤧᤀᤠᤱ ᤘᤠ᤹॥ ᤜᤠ᤺ᤳᤗᤧ ᤂᤧᤴ ᤌ᤺ᤵᤔᤠ ᤛᤢᤰᤋᤢᤒᤣ᥅”