ᤛᤢᤑᤥ 5 - LIFOTNT

ᤛᤠᤵᤁᤡᤳᤋᤡᤴ ᤏᤢ ᤔᤧᤸᤗᤢᤰᤛᤠᤴ

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥ ᤀᤣᤃᤠᤱ ᤋᤃᤠᤱ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤛᤠᤵᤁᤡᤳᤋᤡᤴ ᤁᤳᤋᤢᤒᤠ ᤏᤡᤛᤢᤱ॥ ᤂᤧᤴ ᤛᤠᤵᤁᤡᤳᤋᤡᤴ ᤔᤧᤛᤢᤒᤢᤀᤠᤱ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤔᤧᤕᤢᤰᤋᤢᤀᤠᤱ ᤐᤳᤇᤧᤖᤥ॥

² ᤜᤧᤰᤁᤩᤠᤱ ᤂᤧᤵᤔᤥ ᤔᤢᤰᤛᤠᤶᤛᤠᤒᤠ ᤔᤠᤱᤗᤠᤀᤡᤱᤒᤠᤴ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠᤖᤧᤒᤠ ᤀᤡᤱᤃᤠ᤹ ᤏᤡᤛᤢᤱ. “ᤁᤴ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤁᤧᤛᤢᤰᤐᤠ ᤏᤢ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤁᤧᤛᤢᤰᤐᤠ ᤜᤠᤳ ᤘᤠ᤹ᤒᤣ᥅”

³ ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱᤅᤠᤱ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱ ᤀᤥᤔᤧᤵᤔᤠ ᤁᤧᤛᤢᤰᤐᤠ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ॥

⁴ ᤜᤧᤰᤁᤣ᤺ᤸᤗᤧ ᤀᤡᤱᤃᤠ᤹ ᤛᤠ᤹ᤖᤡᤰ ᤜᤠᤒᤠᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤛᤠᤵᤁᤡᤳᤋᤡᤴ ᤁᤧᤓᤠ᤺ᤱᤒᤠᤀᤠᤱ ᤛᤡᤃᤠᤱᤒᤠ ᤐᤠ᤺ᤴᤏᤡᤴ ᤏᤡ᤺ᤵᤔᤠ ᤁᤧᤛᤢᤰᤐᤠ ᤛᤢᤶᤒᤥᤎᤠᤛᤠᤒᤠ ᤀᤠᤳᤋᤡᤴᤏᤠᤱ ᤂᤥᤔᤠ ᤛᤢᤰᤔᤧᤍᤧᤳᤋᤧᤴᤗᤥ॥

⁵ ᤜᤧᤰᤁᤩᤠᤱ ᤋᤢᤶᤗᤠᤶᤗᤥᤒᤠᤎᤡᤰᤗᤧ ᤀᤡᤱᤃᤠ᤹ ᤔᤧᤳᤋᤠᤱ. “ᤔᤧᤜᤠᤒᤧᤏᤧ᤹ᤀᤥ᥄ ᤀᤥᤔᤧᤳᤋᤧ᤹. ᤕᤜᤢᤍᤠ ᤛᤢᤘᤠᤱᤒᤠ ᤌᤡᤖᤡᤱᤒᤠ ᤍᤠᤀᤢᤍ ᤜᤠᤱᤅᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠ᤺ᤸᤗᤧ ᤁᤴ ᤏᤢᤛᤡ ᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤜᤧᤰᤁᤩᤠᤱ ᤛᤠᤵᤁᤡᤳᤋᤡᤴ ᤑᤠ᤺ᤱᤔᤠ ᤛᤢᤰᤋᤢ᤹ᤖᤥ॥”

⁶ ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤒᤣᤛᤠᤱ. ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤗᤢᤶᤔᤥ. ᤔᤧᤸᤗᤢᤰᤛᤠ᤺ᤴ ᤕᤧᤒᤧᤒᤠ ᤏᤡᤛᤢᤱ॥ ᤂᤧᤴ ᤛᤡᤍᤢᤱᤈᤓᤠ ᤆᤥ᤺ᤰᤔᤏᤠᤒᤠ ᤁᤢᤀᤡᤛᤡᤰ ᤆᤥᤃᤧᤖᤥ॥ ᤂᤧᤸᤗᤧ ᤏᤢᤛᤡ ᤁᤢᤍᤠᤱᤜᤠ᤹ ᤕᤢᤅᤧ ᤜᤧᤰᤁᤩᤠᤱ ᤏᤢᤛᤡ ᤁᤢᤔᤡᤰᤜᤠ᤹ ᤔᤧᤒᤳᤇᤧᤖᤥ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤠᤰ ᤐᤡᤛᤠᤱ ᤐᤠᤱᤄᤢᤛᤡᤒᤠ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥

⁷ ᤜᤧᤰᤁᤩᤠᤱ ᤔᤧᤸᤗᤢᤰᤛᤠᤴ ᤋᤩᤧᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤁᤢᤈᤢᤵᤛᤠᤱ ᤜᤢᤰᤁᤥᤗᤠᤶ ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱ॥

⁸ ᤂᤧᤴ ᤛᤠᤵᤁᤡᤳᤋᤡᤴ ᤕᤠᤱᤛᤡᤱᤅᤡᤸᤗᤧ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤏᤢ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤃᤡ ᤛᤠᤶᤒᤥᤴ ᤔᤧᤓᤴᤇᤡᤱ॥ ᤂᤧᤴ ᤁᤧᤖᤧᤰᤗᤧ ᤂᤢᤏᤡ᤹ ᤜᤢᤰᤁᤥ ᤛᤠᤖᤠᤱᤃᤡ ᤜᤧᤰᤋᤱᤒᤠ ᤔᤢᤰᤗᤠ ᤏᤢ ᤛᤠᤱᤛᤡᤱᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠᤜᤠ᤹ ᤔᤧᤃᤳᤋᤢ॥ ᤂᤧᤴ ᤛᤠᤱᤛᤡᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤕᤠᤵᤔᤡᤜᤠ᤹ᤖᤧ ᤂᤢᤏᤡ᤹ ᤋᤢᤘᤠᤖᤥ॥

⁹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤰᤂᤣᤗ᤹ᤖᤡᤰ ᤁᤢᤛᤱ ᤛᤠᤶᤗᤥᤎᤡᤰ ᤛᤠᤶᤔᤧᤔᤧᤳᤋᤢᤖᤥ. “ᤂᤧᤏᤧ᤹ᤃ ᤛᤠᤵᤁᤡᤳᤋᤡᤴ ᤐᤱᤔᤠᤀᤠᤱ ᤂᤧᤵᤔᤥ ᤁᤧᤒᤵᤐᤠ ᤁᤢᤀᤣ᤺ᤵᤛᤠᤵᤜᤠ᤹ ᤀᤱᤔᤠ ᤛᤢᤶᤒᤥᤎᤠᤛᤠᤒᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤁᤧᤶᤛᤧᤖᤧ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤗᤠᤃᤡ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤁᤧᤖᤧᤰ ᤐᤠ᤺ᤴᤍᤠᤱᤜᤠ᤹. ᤜᤧᤰᤁᤩᤠᤱ ᤁᤧᤖᤧᤰ ᤗᤠᤈᤣᤜᤠ᤹ᤗᤠᤶ ᤔᤏᤠᤜᤠ᤹ ᤂᤧᤏᤧ᤹ ᤁᤧᤔᤠᤰᤂᤡ᤹ᤀᤡᤸᤗᤧ ᤁᤧᤎᤧ᤹ᤖᤢᤛᤡᤖᤥ.

¹⁰ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤗᤳᤇᤠ ᤁᤢᤜᤠᤱᤈᤢᤶᤔᤥ ᤁᤢᤛᤧᤘᤠ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠ ᤁᤧᤈᤥᤃᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤱ ᤔᤧᤈᤥᤃᤢ᤹ᤖᤥ॥”

¹¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠᤴ ᤂᤧᤵᤛᤢᤱᤅᤠᤱ ᤀᤥᤔᤧᤳᤋᤢᤱᤛᤡᤱᤅᤡᤸᤗᤧ ᤂᤧᤵᤔᤥ ᤜᤠᤱᤕᤢᤰᤏᤠᤴ ᤏᤢ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤧᤰᤁᤩᤠᤱ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤂᤡᤖᤡ ᤀᤠᤳᤋᤠᤳᤋᤠᤴᤏᤣ ᤕᤖᤡᤰ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤒᤠ ᤏᤡᤛᤢᤱ॥

¹² ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤖᤥ. “ᤂᤧᤴ ᤔᤧᤛᤧᤖᤢᤒᤠ ᤔᤧᤸᤗᤢᤰᤛᤠ᤺ᤴ. ᤔᤢᤰᤛᤠᤶ ᤏᤢ ᤕᤠᤱᤛᤠᤁᤢᤴᤎᤣ. ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤏᤢ ᤌᤢᤶ. ᤔᤡᤱᤛᤥ ᤀᤡᤱᤎᤠᤱ. ᤔᤡᤔᤡᤍᤡᤱ. ᤏᤢ ᤏᤠᤖᤠᤑᤥᤔᤠ ᤛᤢᤶᤒᤥᤎᤠᤛᤠᤒᤠ ᤆᤥᤰᤗᤥ᥄”

¹³ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤒᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱᤒᤠ. ᤜᤧᤰᤁᤩᤠᤱ ᤘᤖ᤺ᤱᤅᤥᤒᤠ ᤁᤧᤖᤧᤰ ᤐᤠᤌᤢᤱᤛᤠᤜᤠ᤹ ᤀᤰᤂᤣᤗ᤹ᤖᤡᤰ ᤛᤠᤶᤔᤧᤗᤥᤖᤧᤒᤠ ᤂᤧᤵᤛᤢᤱᤗᤥ. “ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤏᤢ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤏᤠᤖᤠ ᤑᤥᤔᤠᤴ. ᤔᤡᤱᤛᤥ ᤀᤡᤱᤎᤠᤱ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶ ᤛᤍᤠᤍᤡᤱ ᤛᤍᤠᤍᤡᤱ ᤐᤥᤱᤗᤖᤥ᥄”

¹⁴ ᤜᤧᤰᤁᤩᤠᤱ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ “ᤀᤠᤔᤧᤴ” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤛᤠᤶᤒᤥᤴ ᤔᤧᤓᤴᤇᤡᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠᤴ ᤛᤧᤘᤠ ᤔᤧᤈᤥᤃᤢᤛᤡᤖᤥ॥