ᤛᤢᤑᤥ 4 - LIFOTNT

ᤛᤠᤱᤃᤪᤠᤶᤐᤣᤍᤠᤱᤒᤠ ᤜᤠᤱᤕᤢᤰᤏᤠ᤺ᤸᤗᤧᤴ ᤛᤢᤑᤥ

¹ ᤁᤴ ᤀᤣᤃᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤥ ᤗᤠᤶᤎᤣ᤺ᤵᤐᤧᤴ ᤜᤸᤗᤧᤰ ᤜᤖᤧᤀᤠᤱ ᤐᤳᤇᤧᤒᤠ ᤏᤡᤛᤢᤱᤗᤥ॥ ᤜᤧᤰᤁᤩᤠᤱ ᤋᤃᤡ ᤂᤧᤵᤛᤢᤱᤒᤠ ᤌᤢᤳᤌᤢᤖᤡ᤺ᤵᤐᤠᤸᤗᤧ ᤁᤢᤀᤡᤰᤗᤠ ᤁᤢᤀᤡᤛᤡᤰ ᤕᤠᤶᤔᤥ ᤀᤰᤂᤣᤗ᤹ᤖᤡᤰ ᤀᤡᤱᤃᤠ᤹ᤏᤢ ᤐᤠᤖᤧᤖᤥ. “ᤁᤳᤌᤥ ᤌᤠᤅᤧ᤹ᤀᤥ. ᤀᤠᤸᤗ ᤀᤡᤱᤃᤠ᤹ ᤋᤠ᤺ᤴᤍᤡ ᤁᤧᤒᤥᤱᤒᤠ ᤐᤠ᤺ᤴᤜᤠ᤹ ᤀᤥ᤺ᤴᤎᤠᤰᤏᤧ᤹ᤖᤥ॥”

² ᤂᤡᤔᤥ ᤛᤣᤛᤣᤔᤠᤱᤅᤡᤸᤗᤧ ᤀᤡᤱᤃᤠ᤹ ᤌᤢᤰᤋᤠᤱ. ᤜᤧᤰᤁᤩᤠᤱ ᤀᤡᤱᤃᤠ᤹ ᤀᤠᤍᤃᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤎᤡᤰ ᤏᤡᤛᤢᤱ.

³ ᤂᤧᤵᤔᤥ ᤁᤧᤕᤢᤱᤒᤠᤸᤗᤧ ᤁᤢᤏᤠᤖᤠ᤺ᤱᤃ ᤁᤧᤀᤥ᤺ᤵᤐᤠ ᤔᤠᤱᤗᤢᤱ ᤏᤢ ᤁᤢᤜᤧ᤺ᤳᤗᤢᤱ. ᤀᤡᤔᤧᤸᤗᤢᤱᤒᤠ ᤗᤢᤱ ᤁᤢᤀᤡᤛᤡᤰ ᤀᤥ᤺ᤳᤋᤧᤖᤥ॥ ᤜᤧᤰᤁᤩᤠᤱ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ ᤗᤢᤱᤛᤣ᤺ᤰᤁᤢᤶ ᤔᤠᤱᤗᤢᤱ ᤜᤧᤰᤁᤣ ᤁᤧᤗᤧᤰᤐᤠ ᤏᤠᤶᤎᤡᤱᤃᤥ ᤐᤳᤇᤧ॥

⁴ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ ᤏᤧᤳ-ᤗᤡ (᥈᥊) ᤘᤣ᤹ ᤜᤠᤱᤕᤢᤰᤏᤠᤜᤠ᤹ ᤔᤧᤕᤢᤅᤧ ᤜᤧᤰᤁᤩᤠᤱ ᤂᤧᤵᤔᤥ ᤑᤃᤧᤗ᤹ᤒᤠ ᤋᤣᤳ ᤁᤧᤈᤠᤱᤒᤠ ᤛᤠᤶᤔᤩᤠᤱ ᤋᤡᤆ᤺ ᤁᤧᤄᤢ᤺ᤱᤒᤠ ᤏᤧᤳ-ᤗᤡ ᤋᤢᤶᤗᤠᤶᤗᤥᤒᤠᤜᤠ᤹ ᤔᤧᤕᤢᤅᤧᤖᤥ॥

⁵ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤗᤠᤶ ᤛᤠ᤺ᤶᤓᤣ ᤗᤧᤰᤋᤧ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤂᤧᤖᤧᤱᤄᤢᤖᤢᤱ ᤗ᤹ᤖᤡᤰ ᤋᤠᤱᤛᤠᤱ ᤁᤧᤗᤥᤱᤒᤠ ᤀᤡᤰᤗᤠᤜᤠ᤹ ᤗ᤺ᤴᤍᤧᤖᤥ॥ ᤂᤧᤵᤔᤥ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤏᤢᤛᤡ ᤛᤣᤔᤡᤜᤠ᤹ ᤔᤧᤍᤡᤖᤧᤖ ᤔᤧᤕᤢᤅᤧ॥ ᤂᤧᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤢᤛᤡ ᤁᤢᤛᤣᤛᤣᤔᤠᤱᤛᤡᤖᤥ॥

⁶ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤛᤡᤛᤠ ᤜᤧᤰᤋᤱᤒᤠ ᤘᤜ᤺ᤱ ᤏᤧᤛ᤻ᤛᤧᤖᤥ॥ ᤂᤧᤱᤃ ᤔᤠᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤆᤥᤃᤧ॥ ᤜᤧᤰᤁᤩᤠᤱ ᤁᤢᤗᤢᤶᤔᤥ. ᤜᤠᤱᤕᤢᤰᤏᤠ᤺ᤸᤗᤧ ᤁᤢᤄᤡᤖᤡ. ᤀᤣᤃᤠᤱ ᤋᤃᤠᤱ ᤁᤠᤰ ᤐᤡᤛᤠᤱ ᤔᤡᤰ ᤀᤡᤛ᤻ᤛᤣ᤺ᤱ ᤁᤧᤒᤵᤐᤠ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤕᤧᤒᤧᤖᤥ॥

⁷ ᤌᤡᤰᤛᤡᤃᤣᤰᤐᤠ ᤁᤢᤜᤡᤱᤘᤧᤳ ᤐᤠᤌᤢᤱᤛᤠ᤺ᤱᤃ ᤌᤡᤖᤡᤱᤒᤠᤴ ᤜᤧᤰᤁᤣ ᤗ᤹ᤖᤧ॥ ᤏᤡᤛᤡᤃᤣ᤺ᤰᤐᤧᤴ ᤐᤡᤳ ᤜᤧᤰᤁᤣ ᤗ᤹ᤖᤧ॥ ᤛᤢᤶᤛᤡᤃᤣᤰᤐᤠᤸᤗᤧ ᤁᤢᤏᤠᤖᤠᤴ ᤔᤧᤴᤇᤠᤶ ᤕᤠᤵᤔᤡ ᤏᤠᤖᤠ ᤜᤧᤰᤁᤣ ᤗ᤹ᤖᤧ॥ ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠᤱᤃ ᤁᤧᤒᤧᤒᤠᤖ ᤁᤧᤒᤵᤐᤠ ᤔᤢᤕᤠ ᤜᤧᤰᤋᤱᤒᤠ ᤆᤥᤃᤧᤖᤥ॥

⁸ ᤂᤧᤴ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤥ ᤋᤢᤰᤛᤡ ᤗᤠᤵᤜᤠ᤹ ᤔᤧᤒᤳᤇᤧ. ᤜᤧᤰᤁᤩᤠᤱ ᤂᤢᤏᤡ᤹ ᤏᤠᤛᤡᤱᤃᤧᤴ ᤌᤰᤁᤡᤴ ᤏᤢ ᤗᤠᤵᤐᤡᤸᤗᤧ ᤁᤢᤎᤡᤶ ᤁᤠᤰ ᤐᤡᤛᤠᤱ ᤔᤡᤰ ᤀᤡᤛ᤻ᤛᤣ᤺ᤱ ᤐᤳᤇᤧᤖᤥ॥ ᤂᤧᤱᤜᤠ᤹ ᤛᤧᤴᤍᤡᤰ ᤗᤧᤴᤍᤡᤰ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤛᤠᤶᤔᤧᤗᤥ᤹᤺. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤣᤛᤣ. ᤛᤣᤛᤣ. ᤛᤣᤛᤣᤒᤠ ᤆᤥᤰᤗᤥ॥ ᤂᤢᤏᤧ᤹ ᤀᤢᤏᤠᤜᤢᤖᤡᤀᤥ ᤘᤕᤧ. ᤀᤠᤸᤗᤥᤀᤠᤱ ᤘᤠ᤹. ᤜᤧᤰᤁᤩᤠᤱ ᤋᤠ᤺ᤴᤍᤡᤀᤠᤱ ᤋᤠᤖᤥ॥”

⁹ ᤂᤧᤴ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ᤖᤧ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤔᤡᤔᤡᤍᤡᤱ. ᤔᤡᤱᤛᤥ ᤀᤡᤱᤎᤠᤱ. ᤏᤢ ᤏᤥᤃᤧᤴᤖᤧᤴ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤸᤗᤧ

¹⁰ ᤂᤧᤴ ᤏᤧᤳ-ᤗᤡ (᥈᥊) ᤋᤢᤶᤗᤠᤶᤗᤥᤒᤠᤜᤠ᤹ᤖᤧ ᤛᤠᤶᤒᤥᤴ ᤔᤧᤓᤴᤇᤡᤱᤗ ᤛᤍᤠᤍᤡᤱ ᤏᤢ ᤛᤍᤠᤍᤡᤱ ᤁᤧᤘᤠ᤹ᤒᤠᤀᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤴ ᤛᤧᤘᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤋᤡᤆ᤺ᤴ ᤜᤠᤱᤕᤢᤰᤏᤠ᤺ᤸᤗᤧ ᤁᤢᤍᤃᤠᤱ ᤔᤧᤏᤧᤛ᤻ᤛᤢᤖ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ.

¹¹ “ᤂᤧᤏᤧ᤹ᤃ ᤀᤠᤏᤡᤃᤣ ᤍᤠᤱᤒᤠ ᤏᤢ ᤏᤡᤱᤘᤠ᤹ᤑᤢᤔᤠᤱᤏᤧ᤹ᤖᤥ॥ ᤂᤧᤏᤧ᤹ᤃ ᤔᤡᤔᤡᤍᤡᤱ ᤏᤢ ᤔᤡᤱᤛᤥ ᤀᤡᤱᤎᤠᤱ ᤜᤧᤰᤁᤩᤠᤱ ᤔᤢᤰᤛᤠᤶᤖᤧᤴ ᤏᤠᤖᤠ ᤑᤥᤛᤢᤶᤒᤧᤒᤠ ᤀᤠᤏᤡᤃᤣ ᤛᤣᤘᤠᤃᤧᤴ ᤛᤠᤶᤗᤥᤴ ᤋᤠ᤺ᤰᤔᤠ ᤛᤢᤶᤒᤥᤎᤠᤛᤠᤒᤠ ᤁᤧᤈᤥ᤺ᤰᤗᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤃ ᤁᤠᤰ ᤐᤠ᤺ᤴᤜᤠ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤈᤥᤃᤢ. ᤜᤧᤰᤁᤩᤠᤱ ᤛᤡᤰᤁᤢᤶᤍᤡᤱ ᤁᤧᤏᤡᤱᤘᤠ᤹ᤗᤠᤶ ᤂᤧᤱᤜᤠ᤹ ᤔᤧᤒᤥ᤺ᤰᤂᤧ. ᤜᤧᤰᤁᤩᤠᤱ ᤜᤡᤱᤔᤴ ᤁᤧᤒᤡᤖᤢᤛᤡᤀᤠᤱ ᤘᤠ᤹ᤖᤥ॥”