ᤛᤢᤑᤥ 21 - LIFOTNTᤁᤠᤰ ᤐᤠ᤺ᤴᤜᤠ᤹ ᤁᤢᤛᤱ ᤐᤥᤱ 1 ᤜᤧᤰᤁᤩᤠᤱ ᤀᤡᤱᤃᤠ᤹ ᤁᤢᤛᤱ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤁᤢᤛᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤡᤛᤢᤱᤛᤡᤱ. ᤌᤣᤀᤠᤱᤓᤧᤸᤗᤧ ᤋᤃᤡᤒᤠ ᤛᤠᤱᤃᤪᤠᤶᤐᤣᤍᤠᤱ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤗᤧᤰᤋᤧ ᤐᤣᤀᤠᤱ ᤋᤢᤶᤒᤥᤍᤡᤱ ᤘᤖ᤺ᤱᤅᤡᤴᤏᤠᤱ ᤔᤧᤏᤧᤛ᤻ᤛᤧᤴᤗᤥ॥ 2 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣ ᤕᤧᤰᤕᤰ. ᤁᤢᤛᤱ ᤕᤖᤢᤛᤗᤧᤶᤔᤡᤴ. ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤱᤃᤪᤠᤶᤐᤣᤍᤠᤱᤏᤢ ᤕᤧᤖ ᤐᤳᤇᤧᤒᤠ ᤏᤡᤛᤢᤱ॥ ᤂᤧᤱᤃ ᤏᤠᤗᤡᤛᤠᤱᤅᤡᤴ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤑᤠ᤹ᤀᤠᤱ ᤏᤢᤒ᤻ ᤏᤢᤒᤠ ᤘᤠ᤺ᤳᤋᤡ ᤏᤢ ᤆᤠᤱᤜᤠ᤹ᤖᤧ ᤕᤠᤖᤡᤵ ᤆᤥ᤺ᤰᤔᤏᤠᤔᤠ ᤛᤡᤛᤠᤔᤣ᤺ᤳ ᤁᤢᤀᤡᤛᤡᤰ ᤆᤥᤃᤧᤖᤥ॥ 3 ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤀᤥᤗᤠᤶ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤒᤠ ᤂᤧᤵᤛᤢᤱᤗᤥ. “ᤀᤠᤸᤗ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤘᤠ᤹ᤔᤠ ᤋᤧᤴᤏᤡᤱᤃ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤏᤢ ᤛᤥᤖᤡᤰ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤱᤜᤠ᤹ᤏᤢ ᤘᤠ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤁᤢᤛᤣᤛᤣ ᤕᤠᤵᤔᤡ ᤔᤧᤒᤥᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤠᤒᤠᤅᤣ ᤂᤧᤱᤜᤠ᤹ᤏᤢ ᤘᤠ᤹ᤀᤠᤱ ᤂᤢᤏᤧ᤹ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤗᤥ॥ 4 ᤂᤢᤏᤧ᤹ ᤁᤧᤖᤧᤰᤗᤧ ᤂᤢᤏᤡ᤹ ᤔᤡᤰᤁᤥᤗᤠᤶ ᤔᤡᤰᤘᤠᤴ ᤋᤢᤃᤢ ᤐᤡᤖᤢᤛᤡ᤹॥ ᤀᤠᤳᤋᤡᤴᤏᤠᤱ ᤕᤠᤶᤔᤥ ᤔᤧᤴᤇᤡᤏᤧᤴ. ᤔᤧᤖᤡᤱ ᤔᤧᤴᤎᤰᤏᤧᤴ. ᤔᤧᤴᤜᤠ᤺ᤵᤏᤧᤴ. ᤔᤧᤴᤍᤢᤰᤏᤧᤴ ᤔᤧᤴᤕ᤹ᤏᤧᤴ. ᤌᤣᤀᤠᤱᤓᤧᤸᤗᤧ ᤋᤃᤡᤒᤠ ᤐᤠ᤺ᤴᤜᤠ᤹ᤃ ᤗᤧᤰᤋᤧᤒᤣᤖᤥ॥” 5 ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠᤸᤗᤧ ᤀᤰᤂᤣ ᤐᤠ᤺ᤳᤋᤢ. “ᤀᤥᤔᤧᤳᤋᤧ᤹. ᤁᤠᤰ ᤐᤠ᤺ᤴᤜᤠ᤹ ᤀᤡᤱᤃᤠ᤹ ᤁᤢᤛᤱ ᤆᤥᤃᤢᤱᤗ ᤐᤳᤋᤠᤖᤥ॥” ᤜᤧᤰᤁᤩᤠᤱ ᤀᤰᤂᤣᤀᤠᤱ ᤔᤧᤳᤋᤠᤱ. “ᤁᤴ ᤐᤠ᤺ᤴᤜᤠ᤹ ᤛᤠᤵᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤴ ᤐᤠ᤺ᤴᤜᤠ᤹ᤃ ᤏᤛᤠᤴ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤏᤢ ᤛᤧᤰᤂᤠᤒᤠ ᤆᤥᤰᤗᤥ॥” 6 ᤜᤧᤰᤁᤩᤠᤱ ᤂᤢᤏᤧ᤹ ᤀᤰᤂᤣ ᤔᤧᤳᤋᤠᤱ. “ᤁᤠᤰ ᤐᤥ᤺ᤰᤂᤧ ᤆᤢᤖᤧᤖᤥ᥄ ᤀᤸᤑᤠ ᤏᤢ ᤀᤥᤔᤣᤃᤠ ᤀᤡᤱᤃᤠ᤹ᤀᤣᤖᤥ. ᤋᤥᤗᤡᤱᤛᤥᤔᤢ ᤏᤢ ᤁᤢᤏᤢᤵᤔᤠᤴ ᤀᤡᤱᤃᤠ᤹ᤀᤣᤖᤥ॥ ᤜᤠᤳ ᤀᤠ᤺ᤱᤃᤢᤃᤧᤴ ᤘᤠᤔᤡ᤺ᤰᤔᤠᤸᤗᤧ ᤋᤖᤢ᤹. ᤂᤧᤴ ᤀᤡᤱᤃᤠ᤹ ᤁᤢᤔᤧᤸᤗᤢᤱ ᤔᤣ᤺ᤴᤏᤣᤀᤣ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤁᤧᤒᤡᤒᤠ ᤆᤫᤠ᤺ᤳᤋᤡᤸᤗᤧ ᤘᤠᤒᤢᤴᤗᤠᤶ ᤌᤢᤱᤔᤠ ᤐᤡᤖᤢᤱᤗᤥ॥ 7 ᤜᤠ᤺ᤳᤗᤧ ᤏᤠ᤺ᤴᤍᤢ᤹. ᤂᤧᤸᤗᤧ ᤁᤴ ᤁᤠᤰ ᤔᤢ᤹ᤀᤡᤛᤠᤶᤜᤠ᤹ ᤂᤥᤛᤢ᤹ᤖᤥ॥ ᤀᤡᤱᤃᤠ᤹ ᤂᤧᤸᤗᤧ ᤁᤢᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠᤀᤠᤱ ᤂᤧᤴ ᤀᤡᤱᤃᤠ᤹ ᤀᤠᤒᤢᤃᤧᤴ ᤀᤠᤛ᤻ᤛᤠ ᤐᤥᤱᤗᤥ॥ 8 ᤁᤖ ᤁᤡᤛᤪᤢᤰᤐᤠᤜᤠ᤹. ᤏᤛᤠᤴ ᤔᤧᤴᤈᤥ᤺ᤰᤔᤏᤠᤒᤠᤜᤠ᤹. ᤑᤧᤰᤁᤧᤗᤠ᤹ᤒᤠᤜᤠ᤹. ᤔᤏᤠ ᤁᤧᤛᤧᤵᤐᤠᤜᤠ᤹. ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹. ᤑᤧᤴᤛᤠᤶ ᤔᤢᤴᤎᤢᤶ ᤁᤧᤏᤠ᤺ᤵᤐᤠᤜᤠ᤹. ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤘᤠ᤹ᤔᤠᤍᤧᤱᤃ ᤁᤠᤴᤎᤠᤰ ᤏᤢ ᤔᤡ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤗᤢᤶᤒᤠ᤺ᤳᤋᤥ ᤐᤥᤱᤗᤥ॥ ᤂᤧᤱᤃ ᤏᤡᤛᤡᤃᤣᤰᤐᤠ ᤛᤡᤔᤧᤴᤗᤥ॥” ᤁᤢᤛᤱ ᤕᤖᤢᤛᤗᤧᤔ 9 ᤜᤧᤰᤁᤩᤠᤱ ᤁᤢᤏᤢᤵᤔᤥᤒᤠ ᤏᤢᤛᤡ ᤔᤡᤴᤍᤣ᤹ᤜᤠ᤹ᤖᤧᤴ ᤏᤢᤛᤡ ᤂᤥᤷᤕᤠ ᤁᤧᤒᤱᤒᤠ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤀᤥ ᤌᤡᤰᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤑᤧᤖᤧ᤹. ᤀᤡᤱᤃᤠ᤹ ᤔᤧᤸᤗᤢᤰᤛᤠ᤺ᤸᤗᤧ ᤔᤧᤸᤗᤡᤱᤃᤧᤴ ᤁᤢᤔᤣᤳ ᤁᤧᤒᤥᤱᤔᤠ ᤛᤡᤛᤠᤔᤣ᤺ᤳᤋᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥” 10 ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤐᤕᤶ ᤕᤶᤒᤠ ᤁᤣ᤺ᤶᤒᤠ ᤁᤥ᤺ᤰᤔᤠ ᤛᤶᤍᤠᤱ ᤐᤰᤂᤠᤱ ᤋᤣ᤹ᤖᤠᤱᤅᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶ ᤛᤠᤱᤃᤪᤠᤶᤐᤣᤍᤠᤱᤏᤢ ᤕᤧᤖ ᤐᤳᤇᤧᤒᤠ ᤛᤣᤛᤣ ᤕᤧᤰᤕᤰ ᤕᤖᤢᤛᤗᤧᤶᤔᤡᤴ ᤀᤥᤛᤣ᤺ᤴᤎᤠᤰᤋᤠᤱᤗᤥ॥ 11 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤧᤴ ᤁᤢᤎᤡᤶ ᤆᤥᤃᤧ. ᤜᤧᤰᤁᤩᤠᤱ ᤔᤠᤱᤗᤢᤱ ᤏᤢ ᤛᤧᤖᤢᤶᤗᤢᤱ ᤁᤢᤀᤡᤛᤡ᤺ᤰᤐᤠ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱ ᤜᤧᤰᤁᤣ ᤛᤧᤸᤗᤧᤱ ᤁᤧᤗᤧᤰᤐᤠ ᤆᤥᤃᤧᤖᤥ॥ 12 ᤜᤧᤰᤁᤩᤠᤱ ᤂᤧ᤹ᤕᤥ ᤌᤡᤰ-ᤏᤧᤳ ᤋᤠ᤺ᤰᤜᤴᤜᤠ᤹ ᤁᤧᤒᤵᤐᤠ ᤕᤶᤒᤠ ᤁᤣ᤺ᤶᤒᤠ ᤗᤢᤱᤎᤠᤰ ᤕᤧᤒᤧᤖᤥ॥ ᤂᤧᤴ ᤋᤠ᤺ᤰᤜᤴᤜᤠ᤹ᤀᤥ ᤌᤡᤰ-ᤏᤧᤳ ᤔᤠᤱᤗᤠᤀᤡᤱᤒᤠᤜᤠ᤹ ᤔᤧᤕᤧᤒᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤋᤠ᤺ᤰᤜᤴᤜᤠ᤹ᤀᤥ ᤀᤡᤛᤪᤠᤀᤡᤗᤖᤧᤴ ᤌᤡᤰ-ᤏᤧᤳ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤔᤧᤛᤠᤵᤋᤢᤀᤠᤱ ᤐᤳᤇᤧ॥ 13 ᤜᤧᤰᤁᤩᤠᤱ ᤏᤠᤶᤃᤧᤴ ᤗᤧᤵᤔᤠᤱ ᤛᤢᤶᤛᤡ. ᤏᤠᤶᤎᤠ ᤗᤧᤵᤔᤠᤱ ᤛᤢᤶᤛᤡ. ᤌᤠᤱᤃᤧᤳ ᤗᤧᤵᤔᤠᤱ ᤛᤢᤶᤛᤡ. ᤜᤧᤰᤁᤩᤠᤱ ᤗᤠᤱᤃᤧᤳ ᤗᤧᤵᤔᤠᤱ ᤛᤢᤶᤛᤡ ᤋᤠ᤺ᤰᤜᤴᤜᤠ᤹ ᤔᤧᤒᤳᤇᤧᤖᤥ॥ 14 ᤂᤧᤴ ᤕᤧᤰᤕᤰᤁᤥᤒᤠ ᤗᤢᤱᤎᤠᤰᤁᤡᤸᤗᤧ ᤌᤡᤰ-ᤏᤧᤳ ᤁᤢᤏᤧ᤺ᤶᤓᤥ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤴ ᤛᤶᤍᤠᤱ ᤔᤧᤸᤗᤢᤰᤛᤠ᤺ᤸᤗᤧ ᤌᤡᤰ-ᤏᤧᤳ ᤁᤢᤛᤣ᤺ᤰᤕᤢᤰᤔᤡᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤐᤳᤇᤧᤖᤥ॥ 15 ᤀᤡᤱᤃᤠ᤹ᤏᤢ ᤁᤧᤒᤠ᤺ᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤜᤢᤰᤁᤥ ᤕᤧᤰᤕᤰᤁᤡᤴ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤋᤠ᤺ᤰᤜᤴᤜᤠ᤹ ᤏᤢ ᤗᤢᤱᤎᤠᤰᤜᤠ᤹ ᤛᤡ᤺ᤰᤔᤠ ᤑᤠ᤹ᤀᤠᤱ ᤛᤠᤶᤔᤩᤠᤱᤅᤡᤸᤗᤧᤴ ᤁᤢᤛᤡ᤺ᤰᤔᤠ ᤋᤰᤁᤠ᤺ᤳᤋᤡᤴ ᤁᤳᤋᤢᤖᤥ॥ 16 ᤂᤧᤴ ᤕᤧᤰᤕᤰᤁᤡᤱᤃ ᤗᤡᤛᤡ ᤁᤢᤛᤢᤰᤐᤠ ᤁᤧᤒᤵᤐᤠ ᤆᤥᤃᤧᤖᤥ॥ ᤂᤧᤸᤗᤧ ᤁᤢᤗᤠᤶᤋᤡ᤺ᤴ ᤏᤢ ᤁᤢᤓᤧᤖᤧ᤺ᤱᤃ ᤁᤢᤍᤱᤒᤠ ᤆᤥᤃᤧᤖᤥ॥ ᤂᤧᤴ ᤁᤢᤛᤡ᤺ᤰᤔᤠᤸᤗᤧ ᤛᤡ᤺ᤰᤋᤢᤸᤗᤧ ᤂᤧᤱᤃ ᤜᤧᤴᤇᤡᤱ ᤏᤧᤳᤇᤡᤀᤠᤱ ᤁᤡᤵ ᤗᤡᤛᤡ (᥈.᥊᥆᥆) ᤁᤡᤗᤥᤔᤡᤋᤖ ᤏᤧᤛ᤻ᤛᤧᤖᤥ॥ ᤂᤧᤸᤗᤧ ᤁᤢᤗᤠᤶᤋᤡ. ᤁᤢᤓᤧᤖᤧ ᤏᤢ ᤁᤢᤗᤡᤱᤃᤧᤴᤏᤡᤴᤏᤠᤱ ᤁᤢᤍᤱᤒᤠ ᤆᤥᤃᤧᤖᤥ॥ 17 ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤂᤧᤴ ᤗᤢᤱᤎᤠᤰᤁᤡᤴ ᤛᤡ᤺ᤰᤋᤢ. ᤜᤧᤰᤁᤣ᤺ᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤥᤃᤵ ᤔᤧᤈᤥᤃᤢᤒᤠ ᤁᤢᤛᤡ᤺ᤰᤔᤠᤴ ᤁᤢᤀᤡᤛᤡᤰ ᤂᤧᤴ ᤁᤡᤵᤌᤡᤰᤁᤠᤱ ᤗᤡ-ᤗᤡ (᥇᥊᥊) ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥ 18 ᤂᤧᤴ ᤗᤢᤱᤎᤠᤰᤁᤡᤱᤃ ᤔᤠᤱᤗᤢᤱᤗᤧᤴ ᤔᤧᤈᤥᤃᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤕᤧᤰᤕᤰᤁᤡᤱᤃ ᤏᤢᤒᤠ ᤛᤠᤶᤔᤩᤠᤱ ᤛᤧᤸᤗᤧᤱᤄᤥ ᤁᤢᤀᤡᤛᤡᤰ ᤁᤧᤗᤧᤰᤐᤠ ᤆᤥᤃᤧᤖᤥ॥ 19 ᤗᤢᤱᤎᤠᤰᤁᤡᤸᤗᤧ ᤁᤢᤏᤧ᤺ᤶᤓᤥᤀᤥᤃ ᤕᤖᤡᤰ ᤐᤖᤡᤰᤗᤧᤴ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤔᤧᤓᤳᤇᤢᤀᤠᤱ ᤐᤳᤇᤧ॥ ᤌᤡᤰᤛᤡᤃᤣ᤺ᤰᤐᤧᤴ ᤛᤧᤖᤢᤶᤗᤢᤱ. ᤏᤡᤛᤡᤃᤣ᤺ᤰᤐᤧᤴ ᤁᤢᤓᤡᤱᤗᤢᤱ. ᤛᤢᤶᤛᤡᤃᤣ᤺ᤰᤐᤧᤴ ᤁᤢᤜᤧ᤺ᤳᤗᤢᤱ. ᤗᤡᤛᤡᤃᤣ᤺ᤰᤐᤧᤴ ᤗᤢᤱᤛᤣ᤺ᤰᤁᤢᤶ. 20 ᤅᤠᤛᤡᤃᤣ᤺ᤰᤐᤧᤴ ᤔᤢᤎᤡᤱᤗᤢᤱ. ᤋᤢᤰᤛᤡᤃᤣ᤺ᤰᤐᤧᤴ ᤗᤢᤱᤛᤧᤖᤢᤶᤒᤠ. ᤏᤢᤛᤡᤃᤣ᤺ᤰᤐᤧᤴ ᤀᤶᤗᤧᤱᤗᤢᤱ. ᤕᤧᤳᤇᤡᤃᤣ᤺ᤰᤐᤧᤴ ᤗᤢᤱᤔᤡᤱ. ᤑᤠᤱᤛᤡᤃᤣ᤺ᤰᤐᤧᤴ ᤁᤢᤖᤡᤱᤗᤢᤱ. ᤌᤡᤒᤥᤱ ᤛᤡᤃᤣ᤺ᤰᤐᤧᤴ ᤁᤢᤜᤡ᤺ᤰᤗᤢᤱ. ᤌᤡᤰᤌᤡᤰ ᤛᤡᤃᤣ᤺ᤰᤐᤧᤴ ᤑᤢ᤺ᤳᤋᤠᤱᤗᤢᤱ. ᤜᤧᤰᤁᤩᤠᤱ ᤌᤡᤰ-ᤏᤧᤳ ᤛᤡᤃᤣ᤺ᤰᤐᤧᤴ ᤜᤧ᤺ᤰᤁᤱᤗᤢᤱᤅᤡᤸᤗᤧᤴ ᤔᤧᤈᤥᤃᤢᤀᤠᤱ ᤘᤕᤧᤖᤥ॥ 21 ᤂᤧᤵᤔᤥ ᤌᤡᤰ-ᤏᤧᤳ ᤋᤠ᤺ᤰᤜᤴᤜᤠ᤹ᤃ ᤌᤡᤰ-ᤏᤧᤳ ᤋᤧᤰᤛᤣ᤺ᤰᤗᤧᤴ ᤘᤕᤧ—ᤗᤳᤇᤠ ᤋᤠ᤺ᤰᤜᤴᤏᤡᤴ ᤗᤳᤇᤠ ᤋᤧᤰᤛᤣ᤺ᤰᤁᤡᤸᤗᤧ ᤆᤥᤃᤧᤀᤠᤱ ᤘᤕᤧ॥ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤔᤠᤖᤠᤶᤔᤡᤱᤃ ᤛᤧᤸᤗᤧᤱᤄᤥ ᤁᤢᤀᤡᤛᤡᤰ ᤁᤧᤗᤧᤰᤐᤠ ᤏᤢᤒᤠ ᤛᤠᤶᤔᤩᤠᤱᤅᤡᤸᤗᤧᤴ ᤆᤥᤃᤧᤖᤥ॥ 22 ᤀᤡᤱᤃᤠ᤹ ᤂᤧᤴ ᤕᤧᤰᤕᤰ ᤛᤡᤃᤠᤱ ᤔᤠᤱᤜᤡᤶᤔᤡᤴ ᤔᤧᤴᤏᤡᤒᤠᤴᤗᤥ. ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤏᤢ ᤔᤧᤸᤗᤢᤰᤛᤠ᤺ᤴᤏᤣ ᤂᤧᤴ ᤕᤧᤰᤕᤰᤁᤥᤒᤠ ᤔᤠᤱᤜᤡᤶᤗᤥ॥ 23 ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤁᤧᤎᤥ᤹ᤒᤠ ᤏᤠᤶ ᤏᤢ ᤗᤠᤒᤠ ᤌᤣᤀᤠᤱ ᤆᤠᤜᤠᤒᤠ ᤔᤧᤈᤥᤃᤧᤴᤗᤥ. ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧᤀᤣ ᤂᤧᤴ ᤕᤧᤰᤕᤰᤁᤡᤴ ᤌᤥ᤹ᤖᤢᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤛᤣᤔᤡ᤺ᤱᤃ ᤔᤧᤸᤗᤢᤰᤛᤠ᤺ᤴᤏᤣᤖᤥ॥ 24 ᤜᤧᤰᤁᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤌᤥ᤹ᤖᤢᤒᤠ ᤀᤥ᤺ᤳᤋᤡᤀᤥ ᤔᤧᤘᤠ᤹ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤅᤡᤴ ᤂᤧᤵᤔᤥ ᤔᤧᤍᤠᤖᤢ᤹॥ 25 ᤂᤧᤴ ᤕᤧᤰᤕᤰᤁᤡᤸᤗᤧᤴ ᤋᤠ᤺ᤰᤜᤴᤏᤡᤱᤃ ᤀᤠᤵᤑᤠᤸᤗᤧᤀᤠᤱ ᤔᤧᤛᤢᤵᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥ ᤛᤧᤴᤍᤡᤰ ᤜᤥᤵᤗᤥ॥ 26 ᤜᤧᤰᤁᤩᤠᤱ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤡᤱᤛᤥ ᤀᤡᤱᤎᤠᤱᤅᤡᤴ ᤏᤢ ᤂᤢᤏᤡ᤹ ᤔᤡᤔᤡᤍᤡᤱᤅᤡᤴ ᤂᤧᤴ ᤕᤧᤰᤕᤰᤁᤥ ᤔᤧᤍᤠᤖᤢ᤹॥ 27 ᤂᤧᤵᤔᤥᤃ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤜᤡᤱᤔᤴᤏᤡᤸᤗᤧᤴ ᤛᤠᤵᤐᤴᤏᤥ ᤔᤡᤱ ᤛᤠᤵᤋᤧᤀᤠᤱ ᤁᤧᤒᤵᤐᤠᤜᤠ᤹ᤖᤰ ᤔᤧᤗᤠ᤺ᤳᤗᤥ॥ ᤁᤖ ᤀᤠᤛᤢᤳᤌᤥ ᤐᤠᤴ ᤏᤢ ᤛᤡᤰᤁᤧᤗᤧ᤺ᤱᤒᤠ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤢ ᤀᤡᤱᤗᤧᤰ ᤁᤧᤒᤠ᤺ᤵᤐᤠᤜᤠ᤹ ᤀᤠᤳᤋᤡᤴᤏᤠᤱ ᤂᤧᤴ ᤕᤧᤰᤕᤰᤁᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.