ᤛᤢᤑᤥ 20 - LIFOTNT

᥇᥆᥆᥆ ᤋᤱᤒᤣ ᤌᤠᤖᤡᤰᤐᤠ ᤜᤠᤱᤈᤢᤶ

¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤠᤱᤗᤠᤀᤡᤱᤒᤠᤎᤡᤰ ᤕᤧᤖ ᤐᤳᤇᤧᤒᤠ ᤏᤡᤛᤢᤱ॥ ᤂᤧᤸᤗᤧ ᤁᤢᤜᤢᤰᤁᤥ ᤂᤧᤴ ᤁᤢᤍᤪᤥ᤺ᤶ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤒᤠ ᤋᤡᤔᤡᤰᤁᤡᤴ ᤏᤢ ᤐᤕᤶ ᤕᤶᤒᤠ ᤑᤧᤴᤌᤰᤁᤪᤱᤅᤡᤴ ᤁᤳᤋᤢᤖᤥ॥

² ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤴ ᤋᤧᤶᤛᤢᤀᤠᤱ ᤋᤱᤒᤣ ᤜᤧᤴᤇᤡᤱ (᥇.᥆᥆᥆) ᤌᤠᤖᤡᤰ ᤂᤧᤴᤏᤡᤴ ᤀᤡᤄᤣ᤺ᤰᤂᤢᤖᤥ॥ ᤂᤧᤴ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤱᤃ ᤀᤢᤴᤇᤥ᤺ᤴᤒᤠ ᤀᤛᤣ᤺ᤰ. ᤔᤠᤑᤧᤴᤛᤠᤶ ᤀᤡᤃᤪ ᤛᤤᤋᤠ᤺ᤴᤏᤠᤱ ᤔᤧᤔᤧᤳᤋᤢᤖᤥ॥

³ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤔᤠᤑᤧᤴᤛᤠᤶᤔᤡᤴ ᤁᤢᤍᤪᤥ᤺ᤶ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢ ᤁᤣ᤺ᤳᤋᤢ. ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ ᤌᤡᤰ (᥇.᥆᥆᥆) ᤌᤠᤖᤡᤰ ᤀᤠᤳᤋᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤠᤱ ᤀᤡᤱᤗᤧᤰ ᤔᤧᤵᤔᤠ ᤔᤧᤛᤢᤰᤋᤢᤴᤇᤡᤴᤗ ᤑᤠ᤹ᤀᤠᤱ ᤂᤧᤸᤗᤧ ᤁᤢᤛᤢ᤺ᤵᤏᤠ᤺ᤴ ᤛᤢᤒᤢᤀᤠᤱ ᤀᤣ᤺ᤵᤛᤠᤵ ᤗᤰᤋᤢᤖᤥ॥ ᤂᤧᤴ ᤀᤣᤃᤠᤱ ᤛᤵᤑᤠᤖᤧ ᤗᤠᤃᤡ ᤂᤧᤴ ᤗᤧᤵᤔᤠᤀᤣ ᤐᤥᤱᤗᤥ॥

⁴ ᤜᤧᤰᤁᤩᤠᤱ ᤀᤡᤱᤃᤠ᤹ ᤜᤠᤱᤕᤢᤰᤏᤠᤜᤠ᤹ ᤏᤡᤛᤢᤱᤛᤡᤱ॥ ᤂᤧᤵᤔᤥ ᤂᤠᤛᤧᤴ ᤗᤥ᤺ᤶᤔᤠ ᤕᤢᤰ ᤁᤧᤄᤥᤒᤠᤜᤠ᤹ ᤔᤧᤕᤢᤅᤧ॥ ᤜᤧᤰᤁᤩᤠᤱ ᤕᤧᤛᤢ ᤂᤪᤡᤛ᤻ᤋᤖᤧ ᤀᤥᤛᤣ᤺ᤴᤍᤠᤱ ᤆᤥᤃᤢᤒᤠ ᤛᤧᤰᤂᤠᤴ ᤏᤢ ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤁᤡᤴ ᤀᤡᤱᤓᤴ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤡ᤹ ᤌᤧᤃᤣᤰᤐᤠ ᤔᤧᤄᤰᤋᤢ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤂᤢᤏᤡ᤹ ᤕᤠᤶᤛᤠᤶᤜᤠ᤹ ᤏᤡᤛᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤏᤢ ᤁᤢᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤴᤈᤥᤃᤢᤴ ᤜᤧᤰᤁᤩᤠᤱ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴᤏᤠᤱ ᤂᤢᤏᤡ᤹ ᤋᤥᤘᤠᤒᤥ ᤀᤡᤃᤪ ᤜᤢᤰᤁᤥ ᤔᤧᤴᤍᤠ᤺ᤰᤋᤢᤴᤏᤠᤱ ᤘᤕᤧᤖᤥ॥ ᤂᤧᤱᤜᤠ᤹ᤃ ᤛᤡᤔᤧᤴᤗᤠᤶ ᤕᤠᤶᤔᤥ ᤔᤧᤜᤡᤅᤧᤀᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥᤃᤢᤖᤥ॥

⁵ (ᤘᤣ᤹ ᤁᤧᤛᤡᤒᤠᤜᤠ᤹ᤃ ᤋᤱᤒᤣ ᤜᤧᤴᤇᤡᤱ ᤔᤧᤸᤗᤧᤰᤁᤣ ᤌᤠᤖᤡᤰ ᤔᤧᤴᤜᤡᤅᤧᤴᤗᤥ॥) ᤁᤱᤃ ᤌᤡᤰᤛᤡᤃᤣᤰᤐᤠ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤠᤴᤗᤥ॥

⁶ ᤌᤡᤰᤛᤡᤃᤣᤰᤐᤠ ᤛᤡᤔᤧᤴᤗᤠᤶ ᤕᤠᤶᤔᤥ ᤜᤡᤱᤔᤴ ᤁᤧᤄᤥᤒᤠᤜᤠ᤹ᤃ ᤔᤢ᤹ᤀᤡᤛᤠᤒᤠᤛᤡ ᤏᤢ ᤛᤣᤛᤣᤒᤠᤛᤡᤖᤥ॥ ᤂᤧᤱᤜᤠ᤹ ᤏᤡᤛᤡᤃᤣᤰᤐᤠ ᤛᤡᤔᤧᤸᤗᤧ ᤌᤣᤀᤠᤱ ᤔᤧᤵᤔᤠ ᤔᤧᤛᤢᤰᤋᤢᤛᤡᤴ. ᤁᤖ ᤂᤧᤱᤜᤠ᤹ ᤏᤡᤱᤘᤠ᤹ᤑᤢᤔᤠᤱ ᤏᤢ ᤂᤪᤡᤛ᤻ᤋᤖᤧ ᤁᤢᤏᤡᤱᤘᤠ᤹ᤑᤢᤛᤠᤶᤒᤠ ᤔᤧᤒᤥᤅᤠᤱ ᤂᤪᤡᤛ᤻ᤋᤧᤴᤏᤢ ᤋᤱᤒᤣ ᤜᤧᤴᤇᤡᤱ ᤌᤠᤖᤡᤰ ᤜᤠᤱ ᤔᤧᤈᤥᤰᤗᤥ॥

ᤔᤠᤑᤧᤴᤛᤠᤶᤔᤡᤴ ᤜᤠᤖᤡ ᤋᤠ᤹᤺

⁷ ᤜᤧᤰᤁᤩᤠᤱ ᤋᤱᤒᤣ ᤜᤧᤴᤇᤡᤱ ᤁᤧᤳᤆᤢ᤺ᤳᤋᤠᤱ ᤔᤠᤑᤧᤴᤛᤠᤶᤔᤡᤴ ᤛᤠᤰᤋᤧᤒᤠ ᤋᤧᤴᤏᤥᤗᤠᤶ ᤗᤧᤳᤗᤥ॥

⁸ ᤜᤧᤰᤁᤩᤠᤱ ᤂᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤗᤴ ᤌᤠᤱᤅᤠᤱ ᤁᤠᤰ ᤐᤡᤛᤠᤱᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹—“ᤃᤥᤃ” ᤏᤢ “ᤔᤠᤃᤥᤃ” ᤔᤧᤵᤔᤏᤠᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹—ᤀᤡᤱᤗᤧᤰᤋᤢᤛᤡᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤰᤗᤧᤱᤘᤠᤀᤥ ᤌᤱ ᤆᤥ᤺ᤰᤔᤠᤖᤧ ᤗᤠᤃᤡ ᤛᤢᤵᤛᤢᤛᤡᤖᤥ॥ ᤂᤧᤱᤜᤠ᤹ᤃ ᤀᤠᤳᤋᤠᤳᤋᤠᤴᤏᤣ ᤕᤧ᤺ᤱᤄᤠ ᤁᤢᤀᤡᤛᤡᤰ ᤏᤡ᤺ᤵᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤔᤧᤈᤥᤰᤗᤥ॥

⁹ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠ ᤂᤠᤶᤒᤣ᤺ᤰᤔᤠᤴ ᤛᤡᤍᤧᤵ ᤔᤧᤍᤧᤵᤋᤢᤖ ᤔᤧᤒᤣᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤔᤡ᤺ᤶᤈᤡ ᤔᤧᤳᤋᤢᤒᤠ ᤕᤧᤰᤕᤰᤁᤡᤴ ᤔᤧᤃᤒᤢᤖᤥ॥ ᤁᤖ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤡᤖᤠ᤺ᤰ ᤌᤩᤧᤀᤠᤱ ᤂᤧᤱᤜᤠ᤹ ᤗᤠᤒᤢ ᤛᤧᤖᤢᤛᤡᤖᤥ॥

¹⁰ ᤜᤧᤰᤁᤩᤠᤱ ᤂᤢᤏᤡ᤹ ᤀᤡᤱᤗᤧᤰ ᤁᤧᤔᤧᤵᤐᤠ ᤔᤠᤑᤧᤴᤛᤠᤶᤔᤡᤴ ᤔᤡᤖᤠ᤺ᤰ ᤏᤢ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤢᤖᤥ॥ ᤂᤧᤵᤔᤥᤃ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴᤏᤠᤱ ᤋᤃᤡᤛᤠ ᤗᤠᤵᤔᤧᤓᤢᤛᤢᤛᤡᤀᤠᤱ ᤕᤠᤃᤧᤳᤇᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤃ ᤛᤧᤴᤍᤡᤰ ᤗᤧᤴᤍᤡᤰ ᤛᤍᤠᤍᤡᤱ ᤂᤧᤵᤔᤥ ᤋᤢᤰᤂᤣ ᤔᤧᤈᤠᤖᤥ॥

ᤁᤢᤏᤢᤵᤔᤠ ᤂᤠᤛᤧᤴ

¹¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤐᤕᤶ ᤕᤶᤒᤠ ᤑᤃᤧᤗ᤹ᤒᤠ ᤜᤠᤱᤕᤢᤰᤏᤠᤴ ᤏᤢ ᤂᤧᤵᤔᤥ ᤁᤧᤕᤢᤱᤒᤠᤴ ᤏᤡᤛᤢᤱᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤏᤢ ᤋᤖ᤺ᤱᤍᤡᤱ ᤋᤠᤱᤛᤠᤰᤐᤧᤴ ᤂᤢᤏᤧ᤹ ᤁᤢᤍᤃᤡᤗᤠᤶ ᤂᤧᤳᤏᤧᤳᤇᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤏᤡᤔᤧᤍᤧᤳᤋᤧᤳᤇᤡᤴᤗᤥ॥

¹² ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤶᤒᤠ ᤆᤢᤰᤐᤠ ᤁᤠᤰ ᤁᤧᤛᤡᤒᤠᤜᤠ᤹ ᤂᤧᤴ ᤜᤠᤱᤕᤢᤰᤏᤠ ᤋᤃᤡ ᤔᤧᤕᤧᤒᤧᤒᤠ ᤏᤡᤛᤢᤱᤛᤡᤱ. ᤜᤧᤰᤁᤩᤠᤱ ᤂᤧᤵᤔᤥ ᤛᤠᤵᤐᤴᤜᤠ᤹ ᤔᤧᤜᤴᤍᤧ॥ ᤂᤧᤵᤔᤥ ᤘᤣ᤹ ᤛᤠᤵᤐᤴᤎᤡᤰᤁᤠᤱ ᤜᤴᤍᤧ॥ ᤂᤧᤱᤃ ᤜᤡᤱᤔᤴᤗᤧᤴ ᤛᤠᤵᤐᤴᤗᤥ॥ ᤜᤧᤰᤁᤩᤠᤱ ᤂᤧᤴ ᤛᤠᤵᤐᤴᤜᤠ᤹ᤀᤥ ᤛᤠᤵᤋᤧᤀᤠᤱ ᤐᤳᤇᤧᤒᤠ ᤁᤧᤛᤡᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤢᤏᤡ᤹ ᤂᤠᤛᤧᤴ ᤐᤥ᤺ᤰᤂᤧᤖᤥ॥

¹³ ᤜᤧᤰᤁᤩᤠᤱ ᤘᤖ᤺ᤱᤅᤡᤸᤗᤧᤀᤠᤱ ᤂᤧᤵᤔᤥ ᤁᤧᤕᤠᤰᤐᤠ ᤁᤧᤛᤡᤒᤠᤜᤠ᤹ ᤏᤢ᤺ᤰᤋᤢᤛᤡᤖᤥ॥ ᤛᤡᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤸᤗᤧᤀᤠᤱ ᤂᤢᤴᤇᤡ᤹ᤀᤥ ᤁᤧᤘᤠ᤹ᤒᤠ ᤁᤧᤛᤡᤒᤠᤜᤠ᤹ ᤏᤢ᤺ᤰᤋᤧᤳᤇᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤏᤡ᤹ ᤕᤠ᤺ᤶᤒᤰ ᤁᤢᤀᤡᤛᤡᤰ ᤁᤧᤖᤧᤰᤗᤧᤴ ᤂᤠᤛᤧᤴ ᤐᤥ᤺ᤰᤂᤧᤖᤥ॥

¹⁴ ᤜᤧᤰᤁᤩᤠᤱ ᤛᤡᤔᤧᤴ ᤏᤢ ᤂᤧᤔᤠᤕᤱᤛᤱᤅᤡᤴ ᤔᤡᤖᤠᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤑᤢᤛᤧᤳᤇᤡᤖᤥ॥ ᤁᤴ ᤔᤡᤖᤠᤰ ᤗᤢᤶᤒᤠ᤺ᤳᤋᤡᤱᤃ ᤏᤡᤛᤡᤃᤣᤰᤐᤠ ᤛᤡᤔᤧᤴᤗᤥ॥

¹⁵ ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤂᤢᤴᤇᤡ᤹ ᤔᤡᤱ ᤔᤧᤶᤒᤵᤔᤏᤠᤒᤠᤜᤠ᤹ ᤁᤧᤖᤧᤰ ᤔᤡᤖᤠᤰ ᤁᤧᤍᤡ᤺ᤵᤐᤠ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢᤛᤧᤖᤥ॥