ᤛᤢᤑᤥ 19 - LIFOTNT

ᤒᤣᤒᤡᤗᤥᤏᤧᤴ ᤔᤧᤃᤧᤒᤠᤀᤥ ᤛᤠᤱᤃᤪᤠᤶᤐᤣᤍᤠᤱᤅᤥᤒᤠ ᤛ᤺ᤵᤔᤠᤴ

¹ ᤂᤧᤴ ᤀᤣᤃᤠᤱ ᤛᤠᤱᤃᤪᤠᤶᤐᤣᤍᤠᤱᤅᤥ ᤕᤖᤡᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤔᤧᤀ᤺ᤰᤋᤧᤒᤠ ᤜᤧᤰᤁᤣ ᤂᤧᤵᤛᤢᤱᤗᤥ. “ᤜᤠᤸᤗᤧᤗᤢᤕᤠ᥄ ᤛᤧᤴᤗᤵ. ᤔᤡᤔᤡᤍᤡᤱ ᤏᤢ ᤔᤢᤰᤛᤠᤶᤔᤡᤱᤃ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧᤴᤗᤥ.

² ᤌᤣᤀᤠᤱᤓᤧᤸᤗᤧ ᤁᤢᤄᤠᤛᤧᤴᤏᤡᤱᤃ ᤛᤧᤰᤂᤠᤒᤠ ᤏᤢ ᤏᤢᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤕᤠᤶᤒᤥ᤺ᤵᤔᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤁᤧᤈᤡ᤺ᤶᤔᤠ ᤂᤧᤴ ᤐᤕᤶ ᤕᤶᤔᤠ ᤁᤧᤳᤏᤡᤔᤠᤴ ᤂᤢᤶᤍᤡᤱ ᤐᤡᤖᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤂᤧᤸᤗᤧ ᤛᤧᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤘᤠ᤹ᤖᤥ॥”

³ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤜᤠᤸᤗᤧᤗᤢᤕᤠ᥄ ᤂᤧᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤔᤡ᤺ᤰᤂᤢ᤹ᤀᤡᤱᤃ ᤛᤍᤠᤍᤡᤱ ᤌᤠ᤺ᤱ ᤐᤣ᤺ᤰᤗᤥ॥”

⁴ ᤜᤧᤰᤁᤩᤠᤱ ᤏᤧᤳ-ᤗᤡ (᥈᥊) ᤋᤢᤶ ᤗᤠᤶᤗᤥᤒᤠᤜᤠ᤹ᤏᤢ ᤗᤡᤛᤡ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤜᤠᤱᤕᤢᤰᤏᤠᤀᤥ ᤁᤧᤕᤢᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤛᤠᤶᤒᤥᤴ ᤔᤧᤓᤴᤇᤡᤱᤗ ᤛᤧᤘᤠ ᤔᤧᤈᤥᤃᤢᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤠᤶᤔᤥ ᤔᤧᤀ᤺ᤰᤋᤧ. “ᤀᤠᤔᤧᤴ. ᤜᤠᤸᤗᤧᤗᤢᤕᤠ᥄”

ᤔᤧᤸᤗᤢᤰᤛᤠ᤺ᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶ ᤛᤠᤓᤠᤱᤈᤠ

⁵ ᤜᤧᤰᤁᤩᤠᤱ ᤜᤠᤱᤕᤢᤰᤏᤠᤗᤠᤶ ᤀᤰᤋᤱᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ. “ᤁᤠᤰ ᤆᤢᤰᤐᤠᤗᤠᤶ ᤕᤶᤒᤠ ᤌᤠᤖᤡᤰ ᤂᤢᤏᤧ᤹ᤏᤢ ᤁᤧᤃᤡᤒᤠ ᤁᤢᤛᤧᤘᤠᤖᤥᤒᤠᤛᤣ. ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄”

⁶ ᤜᤧᤰᤁᤩᤠᤱ ᤀᤡᤱᤃᤠ᤹ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤀᤡᤰᤗᤠ ᤜᤧᤰᤋᤱᤒᤠ ᤀᤡᤰᤗᤠᤴ ᤂᤧᤵᤛᤢᤱ॥ ᤂᤧᤱᤃ ᤐᤕᤶ ᤕᤶᤒᤠ ᤆᤫᤠ᤺ᤳ ᤛ᤺ᤰᤋᤧᤒᤠ ᤁᤢᤀᤡᤛᤡᤰ ᤏᤢ ᤂᤧᤖᤧᤱᤄᤢᤖᤢᤱ ᤗ᤹ᤖᤧᤖ ᤗᤥ᤺ᤰᤂᤢᤀᤠᤱ ᤀᤰᤂᤣᤗ᤹ᤖᤡᤰ ᤀ᤺ᤰᤋᤧ. “ᤜᤠᤸᤗᤧᤗᤢᤕᤠ᥄ ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤱ ᤆᤥᤃᤢ᤹ᤖᤥ॥

⁷ ᤀᤠᤸᤗ ᤀᤠᤏᤡ᤹ ᤛᤠ᤹ᤖᤡᤰᤁᤣ ᤛ᤺ᤳᤋᤡ. ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱ ᤐᤡᤖᤢᤶᤗᤥ. ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤛᤠ᤺ᤸᤗᤧ ᤋᤧᤴᤎᤠᤶᤃᤧᤴ ᤁᤢᤔᤣ᤺ᤰᤂᤡᤶᤔᤡᤴ ᤋᤩᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤁᤢᤛᤡᤛᤠᤔᤣ᤺ᤳᤋᤡᤴ ᤀᤠᤒᤠᤅᤣ ᤕᤠᤖᤡᤵ ᤐᤥ᤺ᤰᤂᤧᤀᤠᤱ ᤘᤠ᤹ᤖᤥ॥

⁸ ᤛᤡᤛᤠᤔᤣ᤺ᤳᤋᤡᤱᤃ ᤑᤃᤧᤗ᤹ᤒᤠ ᤁᤧᤀᤥ᤺ᤵᤐᤠ ᤏᤢᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱ ᤆᤠᤱᤔᤠ ᤔᤧᤒᤡᤖᤢᤀᤠᤱ ᤘᤠ᤹॥” (ᤏᤢᤒᤠ ᤏᤠᤀᤡᤏᤠᤛᤢ᤺ᤳ ᤆᤠᤱᤅᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤗᤥ॥)

⁹ ᤜᤧᤰᤁᤩᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤔᤧᤳᤋᤠᤱ. “ᤁᤴ ᤐᤠ᤺ᤴᤏᤡᤴ ᤛᤠᤵᤋᤧ᤹—ᤔᤧᤸᤗᤢᤰᤛᤠ᤺ᤸᤗᤧ ᤁᤢᤔᤣ᤺ᤰᤂᤡᤶ ᤛᤠᤓᤠᤱᤈᤠᤀᤥ ᤔᤧᤀᤢ᤺ᤳᤋᤢᤛᤡᤒᤠᤜᤠ᤹ ᤔᤢ᤹ᤀᤡᤛᤠᤒᤠᤛᤡᤖᤥ॥” ᤂᤧᤸᤗᤧ ᤕᤠᤶᤔᤥ ᤀᤡᤱᤃᤠ᤹ ᤔᤧᤳᤋᤠᤱ. “ᤁᤱᤜᤠ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤧᤰᤂᤠ ᤁᤢᤒᤠ᤺ᤴᤈᤠᤰᤛᤡᤖᤥ॥”

¹⁰ ᤜᤧᤰᤁᤩᤠᤱ ᤀᤡᤱᤃᤠ᤹ᤃ ᤂᤢᤏᤧ᤹ ᤛᤧᤘᤠ ᤆᤥ᤺ᤰᤔᤠ ᤑᤠ᤹ᤀᤠᤱ ᤁᤢᤗᤠᤱᤅᤥ ᤛᤠᤶᤒᤥᤴ ᤑᤴᤇᤡᤱᤅᤠᤱ. ᤁᤖ ᤂᤧᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤜᤧᤰᤁᤣ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ᥄ ᤀᤡᤱᤃᤠ᤹ᤃ ᤂᤧᤏᤧ᤹ ᤏᤢ ᤁᤧᤶᤓᤢ᤹ ᤁᤧᤴᤛᤠ᤹ᤛᤡ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤧᤘᤠᤖᤥᤒᤠ ᤏᤢ ᤕᤧᤛᤢᤴ ᤋᤥ᤺ᤴᤍᤡ ᤁᤧᤒᤡᤒᤠᤀᤠᤖᤰᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤣ ᤛᤧᤘᤠ ᤆᤥᤃᤧ᤹᥄” ᤌᤣᤀᤠᤱᤓᤧᤸᤗᤧ ᤕᤧᤛᤢᤖᤧ ᤆᤥᤃᤢᤒᤠ ᤐᤠ᤺ᤳᤋᤢᤒᤠ ᤛᤧᤰᤂᤠ ᤐᤠ᤺ᤴᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤜᤠᤱᤜᤠᤱ ᤔᤧᤳᤋᤢᤛᤡ᤹ᤖᤥ॥

ᤁᤢᤓᤖᤠ ᤀᤴᤃᤧᤕᤢᤰᤐᤠ

¹¹ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤅᤡᤴ ᤜᤖᤧᤒᤠ ᤏᤡᤛᤢᤱ. ᤜᤧᤰᤁᤩᤠᤱ ᤂᤧᤵᤔᤥ ᤑᤍᤠᤱᤒᤠ ᤀᤴᤎᤡᤰ ᤘᤕᤧ॥ ᤂᤧᤴ ᤛᤶᤍᤠᤱ ᤁᤧᤕᤢᤱᤒᤠᤸᤗᤧ ᤁᤢᤔᤡᤱᤅᤡᤴ “ᤏᤛᤠ᤺ᤴᤛᤠᤒᤠ” ᤏᤢ “ᤛᤧᤰᤂᤠ” ᤔᤧᤔᤧᤳᤋᤢᤖᤥ॥ ᤂᤢᤏᤧ᤹ᤃ ᤏᤢᤖᤡᤰᤁᤠᤱ ᤂᤠᤛᤧᤴ ᤆᤥᤃᤢ᤹ ᤜᤧᤰᤁᤩᤠᤱ ᤌᤱ ᤆᤥᤃᤢ᤹ᤖᤥ॥

¹² ᤂᤢᤏᤧ᤹ ᤁᤢᤔᤡᤰᤜᤠ᤹ᤃ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤆᤥᤃᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤎᤧᤃᤣ᤺ᤰᤐᤥ ᤕᤖᤡᤰ ᤋᤡᤆ᤺ᤜᤠ᤹ ᤔᤧᤒᤳᤇᤧ॥ ᤂᤢᤏᤧ᤹ ᤏᤠᤛᤡᤱᤃᤧᤴ ᤁᤢᤎᤰᤁᤥ ᤁᤢᤔᤡᤱ ᤛᤠᤵᤋᤧᤀᤠᤱ ᤐᤳᤇᤧ॥ ᤂᤧᤸᤗᤧ ᤁᤢᤒᤣ᤺ᤱᤃ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤴᤇᤢᤰᤋᤢᤴ. ᤁᤖ ᤂᤢᤏᤧ᤹ᤖᤰ ᤁᤢᤛᤡᤱ ᤏᤡ᤺ᤳᤋᤢᤖᤥ॥

¹³ ᤂᤢᤏᤧ᤹ᤃ ᤔᤠᤰᤂᤡ᤹ᤀᤥ ᤏᤡ᤺ᤶᤔᤏᤠᤒᤠ ᤋᤣᤳ ᤆᤠᤰᤂᤢᤀᤠᤱ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤱᤅᤡᤱᤃ “ᤏᤡᤱᤘᤠ᤹ᤑᤢ ᤐᤠ᤺ᤴᤈᤠᤰᤗᤥ॥”

¹⁴ ᤜᤧᤰᤁᤩᤠᤱ ᤑ᤺ᤃᤧᤗ᤹ᤒᤠ ᤏᤢ ᤛᤣᤛᤣᤒᤠ ᤏᤠᤀᤡᤏᤠᤛᤢ᤺ᤳ ᤋᤣᤳ ᤁᤧᤈᤠᤱᤒᤠ ᤛᤠᤱᤃᤪᤠᤶᤐᤣᤍᤠᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤑᤃᤧᤗ᤹ᤒᤠ ᤀᤴᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤂᤢᤏᤧ᤹ ᤔᤧᤍᤡᤶᤍᤢᤖᤥ॥

¹⁵ ᤂᤢᤏᤧ᤹ ᤁᤢᤔᤢᤖᤠᤀᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤠ᤺ᤶᤔᤠᤛᤡ ᤑᤠ᤹ᤀᤠᤱ ᤂᤠᤃᤧᤛᤢᤰᤐᤠ ᤋᤠᤓᤣᤴ ᤗ᤺ᤴᤍᤧᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤑᤧᤴᤈᤣ᤹ ᤋᤰᤁᤠ᤺ᤳᤋᤡᤸᤗᤧ ᤕᤢᤰ ᤆᤥᤃᤢᤛᤡ᤹ᤖᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤆᤧᤸᤗᤧᤰᤛᤣ᤹ ᤀᤣ᤺ᤶᤔᤠᤍᤧᤴᤏᤥ ᤗᤠᤱᤅᤡᤸᤗᤧ ᤆᤧᤸᤗᤧᤰᤛᤣ᤹ᤀᤡᤴ ᤛ᤹ᤔᤏᤠᤒᤠ ᤜᤧᤰᤁᤣ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧ ᤁᤢᤏᤡᤱᤔᤡᤜᤠ᤹ ᤛ᤹ᤖᤢᤛᤡᤖᤥ॥

¹⁶ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤍᤣ᤺ᤳᤋᤥ ᤏᤢ ᤁᤢᤛᤧᤒᤱᤒᤥ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱ ᤏᤢ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤗ᤹ᤖᤡᤰ ᤛᤠᤵᤋᤧᤀᤠᤱ ᤐᤳᤇᤧ॥

¹⁷ ᤜᤧᤰᤁᤩᤠᤱ ᤀᤡᤱᤃᤠ᤹ ᤔᤠᤱᤗᤠᤀᤡᤱᤒᤠᤎᤡᤰ ᤏᤠᤶᤔᤥ ᤕᤧᤒᤧᤒᤠ ᤏᤡᤛᤢᤱ. ᤂᤧᤸᤗᤧ ᤋᤠᤱᤛᤠᤰᤐᤥ ᤁᤧᤒᤧᤒᤠᤖ ᤁᤧᤘᤠ᤹ᤒᤠ ᤁᤠᤰ ᤁᤡᤍᤠᤒᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤀᤰᤂᤣ ᤔᤧᤳᤋᤢᤛᤡ. “ᤂᤡᤏᤡ᤹ ᤋᤩᤧᤶᤔᤧ᤹ᤀᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤠᤖᤡᤵ ᤆᤥᤃᤢᤒᤠ ᤐᤕᤶ ᤕᤶᤒᤠ ᤛᤠᤓᤠᤱᤈᤠᤀᤥ ᤆᤢᤵᤛᤧᤶᤔᤧ᤹ᤀᤥ॥

¹⁸ ᤜᤠᤱᤜᤠ᤹. ᤌᤰᤋᤢᤶᤒᤠᤜᤠ᤹. ᤌᤰᤛᤢᤒᤠᤜᤠ᤹. ᤜᤧᤰᤁᤩᤠᤱ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹. ᤜᤧᤰᤁᤩᤠᤱ ᤕᤥ᤺ᤰᤐᤠ ᤏᤢ ᤆᤥ᤺ᤰᤕᤢᤶᤓᤥᤒᤠᤜᤠ᤹. ᤆᤢᤰᤐᤠ ᤏᤢ ᤕᤶᤒᤠᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠᤴ ᤆᤠᤛᤧ ᤋᤩᤧᤶᤔᤧ᤹ᤀᤥ॥”

¹⁹ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤜᤧᤰᤁᤩᤠᤱ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤌᤱ ᤆᤥ᤺ᤰᤛᤧ ᤀᤴ ᤁᤧᤕᤢᤰᤐᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤧᤈᤢᤵᤛᤧᤒᤠ ᤏᤡᤛᤢᤱᤛᤡᤱᤗᤥ॥

²⁰ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤏᤢ ᤂᤢᤏᤧ᤹ ᤁᤢᤍᤃᤡ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤂᤧᤴ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤔᤧᤍᤧᤶᤛᤢᤛᤡᤖᤥ॥ ᤂᤧᤸᤗᤧ ᤔᤢᤰᤛᤠᤶᤖᤧ ᤁᤢᤎᤡᤶᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ᤖᤧ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠᤴ ᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ ᤀᤡᤱᤗᤧᤰᤋᤢᤛᤡᤀᤠᤱ ᤘᤕᤧᤖᤥ॥ ᤂᤧᤱᤜᤠ᤹ ᤏᤧᤵᤔᤠᤱ ᤁᤢᤜᤡᤱᤘᤧᤳᤋᤣ ᤁᤠᤴᤎᤠᤰ ᤁᤧᤍᤡ᤺ᤵᤐᤠ ᤔᤡᤖᤠ᤺ᤰ ᤗᤢᤶᤒᤠ᤺ᤳᤋᤥ ᤗᤠᤵᤔᤧᤓᤢᤛᤢᤛᤡᤖᤥ॥

²¹ ᤜᤧᤰᤁᤩᤠᤱ ᤀᤴ ᤁᤧᤕᤢᤰᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤁᤧᤗ᤺ᤶᤒᤠ ᤋᤠᤓᤣᤗᤠᤶ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤰᤛᤢᤒᤠᤜᤠ᤹ ᤔᤧᤛᤩᤧᤀᤠᤱ ᤁᤠᤰ ᤁᤡᤌᤜᤠ᤹ᤖᤧ ᤂᤢᤏᤡ᤹ ᤏᤧᤰᤛᤠᤴ ᤂᤠᤄᤠ ᤔᤧᤈᤖᤥ॥