ᤛᤢᤑᤥ 18 - LIFOTNTᤒᤣᤒᤡᤗᤥᤏ ᤕᤧᤰᤕᤰᤁᤡᤴ ᤔᤧᤰ 1 ᤂᤧᤴ ᤀᤣᤃᤠᤱ ᤀᤡᤱᤃᤠ᤹ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤐᤕᤶ ᤕᤶᤒᤠ ᤕᤢᤰᤛᤠᤒᤠ ᤘᤣ᤹ᤛᤔᤠ ᤔᤠᤱᤗᤠᤀᤡᤱᤒᤠᤎᤡᤰ ᤕᤧ᤺ᤖ ᤐᤳᤇᤧᤒᤠ ᤏᤡᤛᤢᤱᤗᤥ॥ ᤂᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤌᤥ᤹ᤖᤢᤖᤥ॥ 2 ᤜᤧᤰᤁᤩᤠᤱ ᤂᤧᤸᤗᤧ ᤐᤕᤶ ᤕᤶᤒᤠ ᤀᤡᤰᤗᤠᤀᤥ ᤀᤰᤂᤣᤗ᤹ᤖᤡᤰ ᤐᤠ᤺ᤳᤋᤢᤖ ᤀ᤺ᤰᤋᤧᤖᤥ. “ᤒᤣᤒᤡᤗᤥᤏᤡᤴ ᤔᤧᤃᤧᤖᤥ. ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤧᤃᤧᤖᤥ᥄ ᤂᤧᤴ ᤀᤠᤸᤗ ᤗᤣ᤺ᤳᤇᤠᤶ ᤑᤢᤱᤛᤠᤶ ᤏᤢ ᤑᤧᤴᤛᤠᤶᤜᤠ᤹ᤖᤧ ᤂᤢᤏᤡ᤹ ᤘᤠ᤹ᤔᤠ ᤋᤧᤴ ᤐᤥ᤺ᤰᤂᤧᤀᤠᤱ ᤘᤠ᤹॥ ᤂᤧᤵᤔᤥᤃ ᤁᤠᤰ ᤐᤖᤡᤰᤗᤧᤴ ᤛᤡᤰᤁᤧᤗᤧ᤺ᤱᤒᤠ ᤏᤢ ᤀᤠᤛᤢᤳᤌᤥ ᤐᤢᤜᤠ᤹ ᤕᤠᤱᤔᤧᤎᤥ᤺ᤰᤗᤥ॥ 3 ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤁᤧᤘᤠ᤹ᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤢᤕᤠᤶᤒᤥ᤺ᤵᤔᤠ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡ॥ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤂᤧᤴᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ. ᤜᤧᤰᤁᤩᤠᤱ ᤂᤧᤸᤗᤧ ᤕᤠᤶᤍᤠᤍᤠ ᤏᤢ ᤏᤡᤱᤘᤠ᤹ᤋᤠᤍᤠᤒᤠ ᤁᤢᤜᤡᤱᤔᤴᤏᤡᤸᤗᤧ ᤆᤥᤃᤢᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤧᤱᤜᤱᤒᤠᤜᤠ᤹ ᤛᤠ᤹ᤖᤡᤰ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥ᤺ᤰᤂᤧᤖᤥ॥” 4 ᤜᤧᤰᤁᤩᤠᤱ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤘᤣ᤹ ᤀᤡᤰᤗᤠᤎᤡᤰ ᤂᤧᤵᤛᤢᤱᤗᤥ. “ᤀᤠᤕᤠᤵᤔᤡᤛᤣ. ᤂᤧᤴ ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧᤶᤔᤧ᤹ᤀᤥ᥄ ᤂᤧᤴ ᤕᤧᤰᤕᤰᤁᤥᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤜᤧᤰᤁᤣ ᤗᤠᤕᤥ ᤔᤧᤈᤥᤃᤧᤶᤔᤡᤴᤏᤧ᤹ᤀᤥ. ᤔᤣ᤺ᤴᤏᤣ ᤑᤠ᤹ᤃᤪ ᤂᤡᤏᤡ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤄᤥᤛᤢᤒᤠ ᤂᤢᤶᤍᤡᤱᤅᤡᤴ ᤁᤧᤄᤥᤛᤢᤶᤗᤥ. 5 ᤌᤣᤀᤠᤱᤓᤧᤸᤗᤧ ᤁᤢᤗᤠᤕᤥ᤺ᤱᤃ ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤗᤢᤶᤛᤡᤱᤅᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤸᤗᤧ ᤁᤠᤰ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ ᤀᤡᤋᤢᤀᤠᤱ ᤘᤠ᤹ᤖᤥ॥ 6 ᤂᤧᤱᤃ ᤀᤠᤰᤂᤣ ᤔᤧᤵᤔᤠ ᤗᤠ᤹ᤖᤢ᤹. ᤒᤠ ᤜᤧᤰᤁᤣᤀᤣ ᤔᤧᤳᤋᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤁᤠᤰ ᤁᤢᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠᤴ ᤏᤡᤗᤧᤱ ᤌᤠᤖᤡᤰ ᤏᤢ᤺ᤰᤋᤧᤶᤐᤡᤖᤧᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤂᤢᤏᤧ᤹ ᤘᤣ᤹ᤜᤠ᤹ᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤢᤒᤠ ᤂᤥᤷᤕᤠᤀᤥᤒᤠ ᤋᤢᤰᤂᤣ᤺ᤸᤗᤧ ᤁᤢᤗᤧᤰᤘᤠ ᤏᤡᤗᤧᤱ ᤌᤠᤖᤡᤰ ᤁᤢᤄᤥᤷᤕᤠᤀᤥ ᤕᤥ᤹ᤖᤧᤶ ᤐᤡᤖᤧᤶᤔᤧ᤹ᤀᤥ॥ 7 ᤂᤧᤴ ᤕᤠᤶᤍᤠᤍᤠ ᤏᤡᤱᤘᤠ᤹ᤋᤠᤍᤠᤒᤠ ᤏᤢ ᤛᤢᤰᤂᤣᤘᤠᤀᤥ ᤘᤕᤧᤒᤠ ᤕᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤧᤶᤔᤧ᤹ᤀᤠᤱ ᤔᤧᤖᤡᤱ ᤌᤰᤗ ᤕᤠ᤺ᤴᤍᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤂᤧᤸᤗᤧ. ‘ᤀᤡᤱᤃᤠ᤹ᤃ ᤐᤕᤶ ᤕᤶᤔᤠ ᤜᤠᤱᤔᤠᤀᤠᤖᤥ. ᤀᤡᤱᤃᤠ᤹ᤃ ᤔᤣᤔᤣᤍᤢᤔᤠ ᤔᤧ᤺ᤴᤏᤠᤖᤥ. ᤀᤡᤱᤃᤠ᤹ᤃ ᤀᤠᤵᤑᤠᤸᤗᤧᤀᤠᤱ ᤔᤧᤖᤡᤱ ᤔᤧᤎᤰᤁᤠᤴᤗᤥ ᤑᤠ᤹ᤀᤠᤱ ᤜᤧᤴᤇᤡᤱᤅᤠᤱ ᤘᤠ᤹ᤖᤥ॥ 8 ᤂᤧᤸᤗᤧᤆᤥᤃᤢᤸᤗᤧ ᤌᤡᤰ ᤕᤧᤴᤏᤥᤀᤣ ᤂᤧᤸᤗᤥ ᤛᤡᤔᤧᤴ. ᤔᤧᤖᤡᤱ ᤌᤰᤔᤧᤴ. ᤜᤧᤰᤁᤩᤠᤱ ᤛᤠᤰᤘᤠ᤺ᤸᤗᤧᤴ ᤔᤡᤴᤍᤣ᤹ᤀᤡᤴ ᤋᤠ᤺ᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤂᤢᤶᤍᤡᤱ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤱᤃ ᤔᤢᤰᤛᤠᤶᤍᤠᤱᤒᤠ ᤆᤥᤰᤗᤥ॥’” 9 ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰᤁᤡᤴ ᤔᤡᤍᤡᤰᤁᤠᤱ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤴ ᤂᤢᤏᤧ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤢ ᤕᤠᤶᤍᤠᤍᤠ ᤘᤠ᤹ᤔᤠᤀᤥ ᤆᤢᤶ ᤁᤧᤔᤧᤵᤐᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ᤖᤧ ᤔᤧᤏᤡᤛᤢ᤹ᤀᤠᤱ ᤔᤧᤜᤠ᤺ᤵᤗ ᤔᤧᤖᤡᤱ ᤔᤧᤎᤰᤗᤥ॥ 10 ᤂᤧᤱᤜᤠ᤹ ᤂᤧᤸᤗᤧ ᤁᤢᤍᤢᤰᤂᤣ᤺ᤴᤏᤢ ᤔᤧᤃᤡ. ᤜᤧᤰᤁᤩᤠᤱ ᤔᤠ᤺ᤱᤄᤠ ᤔᤧᤕᤧᤵᤐᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤁᤧᤎᤢᤶᤒᤠ ᤏᤢ ᤐᤕᤶ ᤕᤶᤒᤠ ᤒᤣᤒᤡᤗᤥᤏ ᤕᤧᤰᤕᤰᤁᤣ. ᤛᤵᤑᤠᤖᤧᤛᤠ ᤁᤧᤄᤢᤶᤍᤡᤱᤅᤡᤴ ᤋᤩᤧᤀᤠᤱ ᤘᤠ᤹ᤖᤥ᥄” 11 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤧᤱᤜᤱᤒᤠᤜᤠ᤹ ᤔᤧᤜᤠ᤺ᤵᤗ ᤔᤧᤖᤡᤱ ᤔᤧᤎᤰᤗᤥ. ᤌᤣᤀᤠᤱᤓᤧᤸᤗᤧ ᤂᤢᤏᤡ᤹ ᤆᤡᤃᤰᤘᤠᤜᤠ᤹ ᤕᤠᤶᤔᤥ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤴᤀᤡᤅᤢᤴᤗᤥ॥ 12 ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤢᤏᤡ᤹ ᤛᤠᤶᤔᤩᤠᤱ. ᤕᤢᤵᤐᤠ. ᤔᤢᤎᤡᤱᤗᤢᤱ. ᤋᤧᤰᤛᤣ᤺ᤰ. ᤜᤧᤰᤁᤩᤠᤱ ᤏᤢ᤺ᤒ᤻ᤏᤢᤒᤠ ᤏᤠᤀᤡᤏᤠᤛᤢ᤺ᤳ. ᤐᤖᤠᤴᤗᤠ ᤏᤢ ᤜᤧ᤺ᤳᤁᤧᤗ᤹ᤒᤠ ᤋᤣᤳᤜᤠ᤹. ᤀᤛᤣ᤺ᤰᤂᤡ ᤋᤣᤳ. ᤜᤧᤰᤁᤩᤠᤱ ᤁᤠᤰ ᤐᤖᤡᤰᤗᤧᤴ ᤁᤢᤏᤠᤶ ᤁᤧᤏᤢ᤹ᤒᤠ ᤛᤡᤱᤜᤠ᤹. ᤜᤧᤰᤁᤩᤠᤱ ᤋᤰᤔᤡᤒᤠᤸᤗᤧ ᤁᤢᤃᤣᤱ. ᤀᤡᤔᤧᤸᤗᤢᤱᤒᤠ ᤛᤡᤱᤜᤠ᤹ᤗᤠᤶ. ᤌᤳᤏᤠᤔᤠᤜᤠ᤹ᤗᤠᤔ. ᤑᤧᤴᤈᤣ᤹ᤗᤠᤔ ᤏᤢ ᤘᤠᤗᤧᤱᤗᤢᤱᤗᤠᤶ ᤆᤥ᤺ᤰᤔᤏᤠᤒᤠ ᤁᤠᤰ ᤐᤖᤡᤰᤗᤧᤴ ᤆᤡᤃᤰᤘᤠᤜᤠ᤹. 13 ᤜᤧᤰᤁᤩᤠᤱ ᤏᤠᤶᤛᤡᤱ ᤜᤰ. ᤔᤠᤖᤢᤰᤜᤠ᤹. ᤁᤢᤏᤠᤶ ᤁᤧᤏᤢ᤹ᤒᤠ ᤛᤠᤱᤛᤡᤱ. ᤔᤢᤷᤖ. ᤐᤠᤱᤒ᤺ᤳ ᤑᤢᤱᤔᤠ. ᤆᤧᤸᤗᤧᤰᤛᤣ᤹ ᤌᤡ. ᤈᤤᤋᤢᤏ ᤏᤡ᤺ᤱᤃᤣ᤺ᤴ. ᤑᤣ᤹ᤖᤢᤶ. ᤛᤡ᤺. ᤜᤧᤰᤁᤩᤠᤱ ᤐᤡᤳ ᤛᤠ᤺ᤱᤘᤧᤳ. ᤔᤧᤸᤗᤢᤰᤜᤠ᤹. ᤀᤴᤜᤠ᤹. ᤀᤴᤗᤠᤜᤠ᤹. ᤜᤧᤰᤁᤩᤠᤱ ᤕᤥ᤺ᤰᤐᤠ ᤕᤥ᤺ᤰᤔᤠᤜᤠ᤹ ᤏᤢ ᤌᤱᤅᤥ ᤔᤧᤏᤠᤵᤋᤢᤛᤡᤒᤠ ᤔᤏᤠᤜᤠ᤹ᤀᤠᤱ ᤔᤧᤴᤀᤡᤅᤢᤴᤇᤡᤴᤗᤥ॥ 14 ᤗᤧᤱᤜᤱᤒᤠᤜᤠ᤹ᤖᤧ ᤂᤢᤏᤧ᤹ ᤀᤰᤂᤣ ᤔᤧᤔᤧᤳᤋᤢ᤹ᤖᤥ. “ᤂᤧᤏᤧ᤹ ᤁᤠᤰ ᤀᤠᤒᤠᤅᤣ ᤁᤵᤔᤠ ᤏᤡᤱᤘᤠ᤹ ᤁᤧᤈᤥᤃᤢᤒᤠ ᤏᤢᤒ᤻ ᤏᤢᤒᤠ ᤆᤡᤃᤰᤘᤠᤜᤠ᤹ ᤁᤠᤰ ᤔᤧᤔᤕᤧ ᤔᤧᤒᤣᤖᤥ॥ ᤜᤧᤰᤁᤩᤠᤱ ᤁᤧᤕᤠᤱᤛᤠᤁᤢᤴᤎᤣ ᤏᤢ ᤁᤧᤄᤧᤶᤛᤡᤱᤔᤠᤜᤠ᤹ᤀᤠᤱ ᤔᤕᤧᤒᤣᤖᤥ॥ ᤂᤧᤱᤜᤠ᤹ᤃ ᤂᤧᤏᤧ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤧᤱᤄᤥᤛᤢᤴᤗᤥ॥” 15 ᤂᤧᤴ ᤕᤧᤰᤕᤰᤁᤥ ᤗᤧᤱᤜᤱ ᤆᤥ᤺ᤰᤛᤧ ᤁᤧᤍᤠᤒᤠᤀᤠᤱ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤒᤥᤱᤒᤠ ᤗᤧᤱᤜᤱᤒᤠᤜᤠ᤹ᤃ ᤔᤠ᤺ᤱᤄᤠᤀᤣ ᤔᤧᤕᤧᤵᤗᤥ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤂᤧᤸᤗᤧ ᤁᤢᤍᤢᤰᤂᤣ᤺ᤴᤏᤢ ᤛᤠ᤹ᤖᤡᤰ ᤔᤧᤃᤡᤖᤥ॥ ᤂᤧᤱᤜᤠ᤹ ᤔᤧᤜᤠ᤺ᤵᤗ ᤔᤧᤖᤡᤱ ᤌᤰᤏᤢ 16 ᤀᤰᤂᤣ ᤔᤧᤗ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤱᤃ ᤏᤢ᤺ᤒ᤻ᤏᤢᤒᤠ ᤏᤠᤀᤡᤏᤠᤛᤢ᤺ᤳ. ᤐᤖᤠᤴᤗᤠ ᤏᤢ ᤜᤧ᤺ᤳᤁᤧᤗ᤹ᤒᤠ ᤋᤣᤳᤑᤢᤱᤜᤠ᤹ ᤆᤠᤰᤛᤡᤱᤅᤠᤱ ᤛᤠᤶᤔᤩᤠᤱᤜᤠ᤹. ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱᤜᤠ᤹ ᤜᤧᤰᤁᤩᤠᤱ ᤋᤧᤰᤛᤣ᤺ᤰᤁᤡᤸᤗᤧᤴ ᤘᤠ᤺ᤳᤋᤡᤜᤠ᤹ ᤁᤧᤘᤠ᤺ᤵᤔᤠ ᤔᤧᤴᤇᤢᤔᤠ᤹ᤀᤡᤴ ᤁᤢᤀᤡᤛᤡᤰ ᤛᤠ᤹ᤖᤡᤰ ᤏᤢᤒᤠ ᤆᤥᤃᤧᤖᤥ॥ 17 ᤛᤵᤑᤠᤖᤧᤛᤠ ᤁᤠᤰ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤂᤧᤸᤗᤧ ᤔᤠᤛᤢᤍᤣ᤺ᤛᤢᤖᤥ᥄” ᤁᤠᤰ ᤘᤠᤗᤠᤎᤠ ᤍᤠᤱᤒᤠᤜᤠ᤹. ᤘᤠᤗᤠᤶᤍᤡ᤺ᤰᤐᤠᤜᤠ᤹. ᤘᤠᤗᤠᤎᤠ ᤆᤠ᤺ᤰᤐᤠᤜᤠ᤹ ᤏᤢ ᤘᤖ᤺ᤱᤅᤥ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤁᤧᤈᤠᤒᤠᤜᤠ᤹ ᤔᤠ᤺ᤱᤄᤠ ᤔᤧᤕᤧᤵᤐᤠᤱ 18 ᤂᤧᤱᤜᤠ᤹ᤖᤧ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴ ᤔᤡᤍᤡᤃᤧᤀᤠᤱ ᤁᤧᤗ᤺ᤶᤒᤠ ᤔᤡ᤺ᤰᤂᤢ᤹ᤀᤡᤴ ᤔᤧᤏᤡᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤀ᤺ᤰ. “ᤁᤴ ᤐᤕᤶ ᤕᤶᤒᤠ ᤕᤧᤰᤕᤰ ᤜᤧᤰᤋᤱᤒᤠ ᤕᤧᤰᤕᤰᤁᤡᤱᤃ ᤀᤠᤳᤋᤡᤴᤏᤠᤱ ᤜᤥ᤺ᤵᤋᤧᤖᤥ᥄” 19 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤠᤶᤜᤡ᤺ᤰᤁᤡᤴ ᤂᤢᤏᤡ᤹ ᤌᤧᤃᤣᤰ ᤛᤶᤍᤠᤱ ᤔᤧᤈᤢ᤺ᤳᤇᤡᤱᤅᤠᤱ ᤔᤧᤜᤠ᤺ᤵᤗ. ᤔᤧᤓᤡ᤺ᤰᤗ. ᤔᤧᤖᤡᤱ ᤌᤰᤏᤢ ᤀᤰᤂᤣ ᤔᤧᤒᤠ᤺ᤳᤋᤢ᤹ᤖᤥ. “ᤀᤠᤕᤠᤰᤁᤥ. ᤀᤠᤕᤠᤰᤁᤥ᥄ ᤁᤴ ᤐᤕᤶ ᤕᤶᤒᤠ ᤕᤧᤰᤕᤰᤁᤥᤃ. ᤕᤖᤡᤰ ᤘᤠᤗᤠᤎᤠ ᤍᤠᤱᤒᤠᤜᤠ᤹ᤖᤧ ᤂᤧᤸᤗᤧ ᤁᤢᤕᤠᤱᤛᤠᤁᤢᤴᤎᤣᤗᤠᤶ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥ᤺ᤰᤂᤧᤖᤥ॥ ᤁᤖ ᤛᤵᤑᤠᤖᤧᤛᤠ ᤂᤧᤴ ᤕᤧᤰᤕᤰᤁᤡᤴ ᤁᤠᤰ ᤔᤧᤃᤧᤖᤥ॥ 20 ᤛᤠᤱᤃᤪᤠᤶᤐᤣᤍᤠᤱᤅᤥ ᤁᤧᤘᤠ᤹ᤒᤠᤛᤣ. ᤂᤧᤴ ᤔᤧᤃᤧᤒᤠᤀᤥ ᤛ᤺ᤳᤋᤧᤶᤔᤧ᤹ᤀᤥ᥄ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹. ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤜᤧᤰᤁᤩᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤛᤣ. ᤛ᤺ᤳᤋᤧᤶᤔᤧ᤹ᤀᤥ᥄ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤄᤢᤶ ᤁᤧᤔᤧᤳᤋᤡᤒᤠᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤧᤴ ᤂᤢᤶᤍᤡᤱ ᤐᤡᤖᤢᤀᤠᤱ ᤘᤠ᤹ᤖᤥ॥” 21 ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤔᤠᤱᤗᤠᤀᤡᤱᤒᤠᤎᤡᤰᤗᤧ ᤐᤕᤶ ᤕᤶᤒᤠ ᤗᤢᤱᤛᤢᤶ ᤜᤧᤰᤋᤱᤒᤠ ᤗᤢᤱᤎᤡᤰ ᤐᤰᤂᤢᤀᤠᤱ ᤕᤥ ᤘᤖ᤺ᤱᤅᤥ ᤗᤠᤵᤑᤢᤛᤢ ᤌᤠᤛᤢᤖ ᤀᤰᤂᤣ ᤐᤠ᤺ᤳᤋᤢᤖᤥ. “ᤐᤕᤶ ᤕᤶᤒᤠ ᤕᤧᤰᤕᤰ ᤒᤧᤒᤡᤗᤥᤏᤡᤴᤏᤠᤱ ᤒᤠ ᤀᤰᤂᤣᤗ᤹ᤖᤡᤰᤁᤣ ᤗᤠᤵᤑᤢᤖᤥ. ᤜᤧᤰᤁᤩᤠᤱ ᤂᤧᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤏᤡᤔᤧᤎᤠ᤺ᤵᤏᤧᤴᤗᤥ॥ 22 ᤜᤧᤰᤁᤩᤠᤱ ᤛᤠᤖᤠᤱᤃᤡ. ᤔᤧᤵᤑᤪᤠᤔᤠ ᤏᤢ ᤌᤢᤳᤋᤢᤖᤡ᤺ᤵᤐᤠ ᤔᤢᤰᤐᤠ ᤀᤡᤰᤗᤠᤴ ᤜᤧᤰᤁᤩᤠᤱ ᤛᤠᤶᤃᤧᤗᤥᤒᤠᤜᤠ᤹ᤖᤧ ᤂᤢᤏᤡ᤹ ᤛᤠᤶᤗᤥᤜᤠ᤹ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶᤔᤧᤍᤧᤳᤏᤧᤴᤗᤥ॥ ᤜᤧᤰᤁᤩᤠᤱ ᤁᤠᤰ ᤐᤖᤡᤰᤐᤠ ᤛᤠᤵᤆᤥ᤺ᤰᤃᤧᤶᤒᤠᤜᤠ᤹ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤥᤔᤧᤴᤍᤧᤳᤏᤧᤴᤗᤥ॥ ᤕᤠᤶᤔᤥ ᤗᤢᤱᤛᤢᤶ ᤕᤢ᤺ᤵᤔᤏᤠᤒᤠᤀᤠᤱ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶᤔᤧᤍᤧᤳᤏᤧᤴᤗᤥ॥ 23 ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤛᤣᤔᤡ ᤔᤧᤀᤥ᤺ᤳᤏᤧᤴᤗᤥ. ᤜᤧᤰᤁᤩᤠᤱ ᤛᤡᤛᤠᤔᤣ᤺ᤳ ᤏᤢ ᤏᤠᤗᤡᤛᤠᤱᤅᤡᤸᤗᤧ ᤂᤢᤴᤇᤡ᤹ ᤀᤡᤰᤗᤠ᤺ᤴᤏᤠᤱ ᤂᤧᤏᤧ᤹ᤀᤥ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶᤔᤧᤍᤧᤳᤏᤧᤴᤗᤥ॥ ᤂᤧᤏᤧ᤹ ᤁᤧᤗᤧᤱᤜᤱᤒᤠᤜᤠ᤹ᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤢᤰᤛᤠᤶᤛᤠᤒᤠ ᤏᤢ ᤁᤧᤀᤡᤱᤒᤠ ᤁᤧᤎᤢᤶᤒᤠᤜᤠ᤹ ᤔᤧᤘᤕᤧ. ᤜᤧᤰᤁᤩᤠᤱ ᤂᤧᤏᤧ᤹ ᤑᤧᤴᤛᤠᤶ ᤔᤢᤴᤎᤢᤶᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤡᤱᤃᤧᤗᤧᤰᤋᤢᤛᤡᤖᤥ॥ 24 ᤒᤣᤒᤡᤗᤥᤏᤣ. ᤂᤧᤏᤧ᤹ ᤁᤧᤔᤠᤖᤠᤶᤜᤠ᤹ᤀᤥᤀᤣ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤛᤧᤵᤔᤏᤠᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤴ ᤛᤧᤖᤧᤀᤠᤱ ᤘᤕᤧᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.