ᤛᤢᤑᤥ 17 - LIFOTNT

ᤔᤧᤴᤇᤢᤔᤠ᤹ ᤏᤢ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ

¹ ᤜᤧᤰᤁᤩᤠᤱ ᤂᤥᤷᤕᤠᤜᤠ᤹ ᤁᤧᤃᤵᤐᤠ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ᤀᤥ ᤌᤡᤰᤐᤠ ᤑᤧᤖᤧᤀᤠᤱ ᤀᤰᤂᤣ ᤔᤧᤳᤋᤠᤱ. “ᤑᤧᤖᤧ᤹. ᤀᤡᤱᤃᤠ᤹ ᤂᤧᤏᤧ᤹ ᤂᤧᤴ ᤁᤢᤀᤡᤱ ᤁᤢᤏᤠᤶ ᤁᤧᤛᤧᤔᤠ ᤁᤧᤳᤏᤡᤔᤠᤸᤗᤧ ᤂᤥᤔᤠ ᤁᤧᤒᤥᤱᤒᤠ ᤂᤢᤶᤍᤡᤱᤅᤡᤴ ᤀᤥᤛᤣ᤺ᤴᤎᤠᤰᤏᤧ᤹ᤖᤥ॥ ᤂᤧᤴ ᤁᤧᤳᤏᤡᤔᤠᤴ ᤕᤖᤡᤰ ᤆᤫᤠ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤁᤧᤏᤧᤒᤠ ᤕᤶᤒᤠ ᤕᤧᤰᤕᤰᤁᤡᤴᤗᤥ॥

² ᤂᤧᤴ ᤁᤧᤳᤏᤡᤔᤠᤴᤏᤢᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤖᤧ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤘᤠ᤹ᤒᤠ ᤁᤠᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤡᤈᤱᤘᤠ᤺ᤸᤗᤧ ᤔᤕᤢᤛᤡᤒᤠ ᤜᤧᤰᤁᤣ ᤂᤢᤏᤧ᤹ ᤁᤢᤓᤧᤴ ᤕᤠ᤺ᤶᤒᤰᤁᤡᤸᤗᤧ ᤔᤕᤢᤛᤡᤀᤠᤱ ᤔᤧᤘᤠ᤹ᤖᤥ॥”

³ ᤜᤧᤰᤁᤩᤠᤱ ᤀᤡᤱᤃᤠ᤹ ᤛᤣᤛᤣᤔᤠᤱᤅᤡᤸᤗᤧ ᤌᤢᤰᤋᤠᤱᤅᤠᤱ ᤔᤠᤱᤗᤠᤀᤡᤱᤒᤠᤸᤗᤧ ᤀᤣ᤺ᤰᤛᤠᤍᤧᤴᤏᤥ ᤐᤰᤂᤠᤱ ᤋᤣ᤹ᤖᤠᤱᤗᤥ॥ ᤜᤧᤰᤁᤩᤠᤱ ᤂᤧᤵᤔᤥ ᤏᤢᤛᤡ ᤁᤢᤎᤧᤃᤣᤰ ᤁᤧᤒᤵᤐᤠ ᤏᤢ ᤌᤡᤒᤥᤱ ᤁᤢᤍᤠᤱ ᤁᤧᤕᤢᤱᤒᤠ ᤜᤧ᤺ᤳᤁᤧᤗ᤹ᤒᤠ ᤌᤰᤛᤠ ᤛᤶᤍᤠᤱ ᤔᤧᤴᤇᤢᤔᤠ᤹ᤎᤡᤰ ᤕᤢᤅᤧᤒᤠ ᤏᤡᤛᤢᤱ॥ ᤂᤧᤴ ᤌᤰᤛᤠ᤺ᤸᤗᤧ ᤁᤢᤎᤰ ᤁᤢᤗᤧᤶ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤆᤧ᤹ᤕᤠ ᤔᤡᤱᤜᤠ᤹ ᤛᤠᤵᤋᤧᤀᤠᤱ ᤐᤳᤇᤧ॥

⁴ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤢᤔᤠ᤹ᤀᤡᤱᤃ ᤐᤖᤠᤴᤗᤠ ᤏᤢ ᤜᤧ᤺ᤳᤁᤧᤗ᤹ᤒᤠ ᤆᤠᤱ ᤆᤠᤰᤛᤡᤱᤅᤠᤱ ᤛᤠᤶᤔᤩᤠᤱ. ᤔᤢᤎᤡᤱᤗᤢᤱ ᤏᤢ ᤋᤧᤰᤛᤣ᤺ᤰᤗᤢᤱᤜᤠ᤹ ᤘᤠ᤺ᤳᤇᤡᤱ ᤆᤥ᤺ᤰᤛᤡᤱᤅᤠᤱ ᤘᤕᤧᤖᤥ॥ ᤂᤧᤸᤗᤧ ᤁᤢᤜᤢᤰᤁᤥ ᤛᤡᤰᤁᤧᤗᤧ᤺ᤱᤒᤠ ᤏᤢ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤁᤢᤓᤧᤴ ᤕᤠ᤺ᤶᤒᤰᤜᤠ᤹ᤖᤧ ᤁᤧᤍᤡᤶᤒᤠ ᤛᤠᤶᤔᤩᤠᤱ ᤂᤥᤷᤕᤠᤴ ᤐᤰᤂᤢᤀᤠᤱ ᤘᤕᤧᤖᤥ॥

⁵ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤍᤥ᤹ᤘᤠᤒᤥᤃ ᤁᤢᤒᤣ ᤁᤢᤛᤡᤱ ᤏᤡ᤺ᤵᤔᤧᤴᤍᤧᤵᤔᤏᤠᤒᤠ ᤔᤡᤱᤎᤡᤰ ᤛᤠᤵᤋᤧᤀᤠᤱ ᤐᤳᤇᤧᤖᤥ— “ᤐᤕᤶ ᤕᤶᤒᤠ ᤕᤧᤰᤕᤰ ᤒᤣᤒᤡᤗᤥᤏ. ᤁᤧᤳᤏᤡᤔᤠᤜᤠ᤹ᤖᤧ ᤂᤢᤏᤡ᤹ ᤔᤠ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤛᤡᤰᤁᤧᤗᤧ᤺ᤱᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤏᤡ᤹ ᤔᤠᤖᤥ॥”

⁶ ᤜᤧᤰᤁᤩᤠᤱ ᤀᤡᤱᤃᤠ᤹ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤀᤥᤔᤧᤳᤋᤢᤱᤅᤡᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤔᤏᤠᤜᤠ᤹ ᤏᤢ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤖᤢᤔᤣᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤸᤗᤧ ᤔᤕᤢᤀᤠᤱ ᤘᤕᤧᤒᤠ ᤏᤡᤛᤢᤱᤅᤠᤱ ᤛᤠ᤹ᤖᤡᤰ ᤀᤠᤏᤡᤱᤘᤠ᤹ ᤔᤕᤧᤖᤥ॥

⁷ ᤁᤖ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤰᤂᤣ ᤔᤧᤳᤋᤠᤱ. “ᤌᤣᤀᤠᤱ ᤁᤧᤏᤡᤱᤘᤠ᤹ ᤔᤠ᤺ᤒᤠᤒᤣ᥅ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤏᤢ ᤏᤢᤛᤡ ᤁᤢᤎᤧᤃᤣᤰ ᤁᤧᤒᤵᤐᤠ ᤜᤧᤰᤁᤩᤠᤱ ᤌᤡᤒᤥᤱ ᤁᤢᤍᤠᤱ ᤁᤧᤕᤢᤱᤒᤠ ᤌᤰᤛᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤒᤠ ᤛᤡᤒᤡ᤹ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤔᤧᤳᤏᤧ᤹ᤖᤥ॥

⁸ ᤂᤧᤴ ᤁᤧᤏᤡᤛᤢᤒᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤱᤃ ᤁᤢᤜᤡᤱᤘᤧᤳ ᤘᤕᤧ. ᤁᤖ ᤂᤧᤴ ᤀᤠᤸᤗᤥ ᤜᤥᤵᤗᤥ॥ ᤂᤧᤱᤃ ᤕᤠᤶᤔᤥ ᤁᤢᤍᤪᤥ᤺ᤶ ᤔᤣ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤗᤠᤶ ᤌᤠᤱᤅᤠᤱ ᤔᤧᤴᤏᤢᤵᤔᤏᤠᤒᤠ ᤔᤧᤰᤔᤠᤀᤥ ᤐᤣ᤺ᤰᤗᤥ॥ ᤜᤧᤰᤁᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤜᤡᤱᤔᤴᤗᤧᤴ ᤛᤠᤵᤐᤴᤏᤥ ᤂᤢᤏᤡ᤹ ᤔᤡᤱ ᤔᤧᤶᤒᤵᤔᤏᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤁᤴ ᤁᤧᤛᤡᤒᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤏᤡᤛᤢᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤠᤖᤥ॥

⁹ “ᤜᤧᤰᤁᤩᤠᤱ ᤁᤴ ᤐᤠ᤺ᤴᤜᤠ᤹ ᤁᤢᤛᤡᤱ ᤏᤡ᤺ᤵᤔᤠ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ ᤆᤠᤜᤠᤒᤠ ᤆᤥᤰᤗᤥ॥ ᤂᤧᤴ ᤏᤢᤛᤡ ᤌᤧᤃᤣᤰᤐᤠᤜᤠ᤹ᤃ ᤂᤧᤴ ᤔᤧᤴᤇᤢᤔᤠ᤹ᤀᤡᤴ ᤕᤢᤱᤒᤠ ᤏᤢᤛᤡ ᤁᤥ᤺ᤰᤔᤠᤜᤠ᤹ᤖᤥ॥

¹⁰ ᤂᤧᤴ ᤏᤢᤛᤡ ᤌᤧᤃᤣᤰᤐᤠᤜᤠ᤹ᤃ ᤏᤢᤛᤡ ᤜᤠᤱᤛᤡᤀᤠᤱᤗᤥ॥ ᤅᤠᤛᤡ ᤜᤠᤱᤜᤠ᤹ᤃ ᤀᤠᤛᤣ᤺ᤴᤇᤠ ᤔᤧᤛᤩᤧ ᤔᤧᤒᤣᤖᤥ. ᤋᤢᤰᤛᤡᤃᤣᤰᤐᤠᤸᤗᤧ ᤀᤠᤸᤗᤥ ᤜᤠᤱ ᤆᤥᤃᤢ᤹ ᤜᤧᤰᤁᤩᤠᤱ ᤏᤢᤛᤡᤃᤣᤰᤐᤠᤱᤃ ᤋᤠᤔᤠᤀᤣ ᤘᤠ᤹ᤖᤥ॥ ᤁᤖ ᤂᤧᤴ ᤋᤠᤀᤠᤱ ᤛᤵᤑᤠᤖᤰ ᤜᤠᤱ ᤆᤥᤃᤢ᤹ᤖᤥ॥

¹¹ ᤂᤧᤴ ᤋᤃᤡ ᤁᤢᤜᤡᤱᤘᤧᤳ ᤁᤧᤘᤠ᤹ᤒᤠ ᤁᤖ ᤀᤠᤸᤗᤥ ᤁᤧᤜᤥᤵᤐᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤕᤧᤳᤇᤡᤃᤣᤰᤐᤠ ᤜᤠᤱᤗᤥ॥ ᤂᤧᤴ ᤘᤣ᤹ᤛᤔᤠ ᤏᤢᤛᤡ ᤜᤠᤱᤜᤠ᤹ ᤜᤧᤰᤋᤱᤒᤠ ᤆᤥᤰᤗᤥ. ᤜᤧᤰᤁᤩᤠᤱ ᤂᤧᤴᤏᤠᤱ ᤔᤧᤰᤗᤥ॥

¹² “ᤂᤧᤴ ᤁᤧᤏᤡᤛᤢᤒᤠ ᤌᤡᤒᤥᤱ ᤁᤢᤍᤠᤱᤜᤠ᤹ᤃ ᤌᤡᤒᤥᤱ ᤜᤠᤱᤛᤡᤖᤥ॥ ᤂᤧᤱᤜᤠ᤹ᤖᤧᤃ ᤀᤠᤸᤗ ᤌᤠᤖᤡᤰ ᤜᤠᤱᤆᤥ᤺ᤰᤔᤠ ᤕᤢᤰ ᤔᤧᤱᤄᤥᤀᤣ ᤔᤧᤘᤠ᤹ᤖᤥ. ᤁᤖ ᤂᤧᤱᤜᤠ᤹ᤖᤧ ᤌᤰᤛᤠ᤺ᤴᤏᤢ ᤛᤥᤖᤡᤰ ᤛᤵᤑᤠᤖᤰ ᤜᤠᤱᤆᤥ᤺ᤰᤔᤠ ᤕᤢᤰ ᤔᤧᤄᤥᤛᤢ᤹ᤖᤥ॥

¹³ ᤂᤧᤱᤜᤠ᤹ᤖᤧᤃ ᤌᤡᤰᤜᤢᤵ ᤔᤧᤒᤥᤱᤅᤠᤱ ᤂᤢᤏᤡ᤹ ᤔᤢᤰᤛᤠᤶ ᤏᤢ ᤕᤢᤰᤁᤡᤴ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤔᤧᤒᤡᤖᤢ᤹ᤖᤥ॥

¹⁴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤸᤗᤢᤰᤛᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤱ ᤔᤧᤈᤥᤃᤢ᤹. ᤁᤖ ᤔᤧᤸᤗᤢᤰᤛᤠ᤺ᤸᤗᤧ. ᤂᤢᤏᤧ᤹ ᤀᤢ᤺ᤳᤋᤢᤛᤡᤒᤠ ᤛᤣᤃᤢᤛᤡᤒᤠ ᤏᤛᤠ᤺ᤴᤛᤠᤒᤠᤜᤠ᤹ᤏᤢ ᤛᤥᤖᤡᤰ. ᤂᤧᤱᤜᤠ᤹ ᤏᤠ᤺ᤴᤍᤢᤛᤡ᤹ᤖᤥ. ᤌᤣᤀᤠᤱᤓᤧᤸᤗᤧ ᤔᤧᤸᤗᤢᤰᤛᤠ᤺ᤱᤃ ᤍᤠᤱᤒᤠᤜᤠ᤹ᤖᤧ ᤂᤢᤏᤡ᤹ ᤍᤠᤱᤒᤠ ᤏᤢ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤜᤠᤱᤗᤥ॥”

¹⁵ ᤜᤧᤰᤁᤩᤠᤱ ᤂᤧᤴ ᤔᤠᤱᤗᤠᤀᤡᤱᤒᤠᤸᤗᤧ ᤀᤡᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤂᤧᤏᤧ᤹ ᤁᤧᤏᤡᤛᤢᤒᤠ ᤂᤧᤴ ᤁᤢᤀᤡᤱ ᤁᤢᤏᤠᤶ ᤁᤧᤛᤧᤔᤠ ᤁᤧᤳᤏᤡᤔᤠᤴ ᤕᤢᤱᤒᤠ ᤆᤫᤠ᤺ᤳᤜᤠ᤹ᤃ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹. ᤗᤠᤈᤣ᤹ᤜᤠ᤹ ᤏᤢ ᤐᤠ᤺ᤴᤍᤠᤱᤛᤡᤖᤥ॥

¹⁶ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤛᤢᤒᤠ ᤂᤧᤴ ᤜᤧ᤺ᤳᤁᤧᤗ᤹ᤒᤠ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤏᤢ ᤌᤡᤒᤥᤱ ᤋᤠᤱᤜᤠ᤹ᤖᤧ ᤂᤧᤴ ᤁᤧᤳᤏᤡᤔᤠᤴ ᤔᤧᤈᤡ᤺ᤳᤋᤢᤀᤠᤱ ᤂᤧᤸᤗᤧ ᤁᤳᤋᤢᤒᤠ ᤁᤠᤰ ᤐᤠ᤺ᤴᤜᤠ᤹ ᤔᤧᤏᤠᤵᤋᤢᤀᤠᤱ ᤂᤧᤴ ᤗᤧᤰᤆᤠᤒᤧᤎᤡ᤺ᤰ ᤔᤧᤈᤥᤃᤢ᤹ᤖᤥ॥ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤏᤧᤰᤛᤠᤴ ᤔᤧᤈᤀᤠᤱ ᤁᤧᤏᤶᤒᤠᤴ ᤔᤡ ᤔᤧᤎᤡᤰᤂᤢ᤹ᤖᤥ॥

¹⁷ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤒᤠ᤺ᤴᤜᤠ᤹ ᤔᤧᤱᤃᤧᤳᤋᤣ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡ᤺ᤳᤋᤢᤒᤠ ᤁᤢᤏᤡᤱᤘᤠ᤹ ᤜᤧᤰᤁᤣᤀᤣ ᤂᤧᤴ ᤌᤡᤒᤥᤱ ᤜᤠᤱᤜᤠ᤹ ᤆᤥᤰ ᤐᤠᤱᤄᤢᤛᤡ᤹. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ᤃ ᤌᤡᤰᤜᤢᤵ ᤔᤧᤒᤥᤱᤅᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠᤴ ᤂᤢᤏᤡ᤹ ᤜᤠᤱᤆᤥ᤺ᤰᤔᤠ ᤕᤢᤰᤁᤡᤴ ᤔᤧᤒᤡᤖᤢ᤹ᤖᤥ॥

¹⁸ ᤂᤧᤏᤧ᤹ ᤁᤧᤏᤡᤛᤢᤒᤠ ᤂᤧᤴ ᤔᤧᤴᤇᤢᤔᤠ᤹ᤀᤡᤱᤃ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤜᤠᤱᤜᤠ᤹ ᤛᤶᤍᤠᤱ ᤕᤢᤰ ᤁᤧᤈᤥ᤺ᤰᤔᤠ ᤐᤕᤶ ᤕᤶᤒᤠ ᤕᤧᤰᤕᤰᤁᤡᤴᤗᤥ॥”