ᤛᤢᤑᤥ 16 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤰᤁᤡᤸᤗᤧᤴ ᤏᤢᤛᤡ ᤂᤥᤷᤕᤠᤜᤠ᤹

¹ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢ ᤔᤠᤱᤜᤡᤶᤔᤥᤗᤠᤶ ᤁᤧᤗ᤺ᤶᤒᤠ ᤕᤶᤒᤠ ᤀᤡᤰᤗᤠ᤺ᤸᤗᤧ ᤂᤧᤴ ᤏᤢᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤀᤰᤂᤣᤗ᤹ᤖᤡᤰ ᤔᤧᤳᤋᤢᤛᤡᤖ ᤕᤠᤃᤧᤒᤠ ᤂᤧᤵᤛᤢᤱ. “ᤐᤣᤃᤧᤶᤔᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤰᤁᤧᤴᤏᤡᤸᤗᤧᤴ ᤏᤢᤛᤡ ᤂᤥᤷᤕᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤢᤰᤂᤧᤶᤔᤧ᤹ᤀᤥ॥”

² ᤜᤧᤰᤁᤩᤠᤱ ᤌᤡᤰᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤴ ᤐᤣᤀᤠᤱ ᤁᤢᤄᤥᤷᤕᤠᤴ ᤂᤠᤶᤒᤣ᤺ᤰᤔᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤀᤡᤒᤢᤃᤧᤴ ᤁᤢᤔᤡᤰᤛᤣ᤺ᤴᤏᤡᤴ ᤁᤧᤗᤰᤐᤠ ᤏᤢ ᤁᤢᤏᤠᤘᤠᤀᤡᤳᤗᤠᤴ ᤛᤣᤛᤣ ᤔᤠᤱᤃᤧᤄ᤺ᤒᤠᤜᤠ᤹ ᤕᤠᤶᤃᤧᤛᤡᤱᤒᤠ ᤏᤢ ᤛᤠ᤹ᤖᤡᤰ ᤁᤧᤍᤢᤰᤐᤠ ᤕᤠᤱᤄᤣ᤺ᤰᤁᤡᤸᤗᤧ ᤂᤢᤏᤡ᤹ ᤌᤰᤁᤡᤴ ᤛᤡᤍᤧᤵ ᤋᤧᤵᤋᤢᤖ ᤗ᤺ᤴᤍᤧᤖᤥ॥

³ ᤜᤧᤰᤁᤩᤠᤱ ᤏᤡᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤘᤖ᤺ᤱᤅᤥ ᤜᤢᤰᤂᤢ. ᤜᤧᤰᤁᤩᤠᤱ ᤂᤧᤴ ᤘᤖ᤺ᤱᤅᤡᤱᤃ ᤁᤧᤛᤡᤒᤠ ᤔᤏᤠ᤺ᤸᤗᤧ ᤁᤢᤔᤠᤰᤂᤡ᤹ᤀᤡᤴ ᤜᤧᤰᤁᤣ ᤗᤧᤱᤛᤡᤱ ᤐᤣᤖᤥ॥ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤁᤧᤕᤠᤰᤐᤠ ᤁᤠᤰ ᤁᤢᤜᤡᤱᤘᤧᤳ ᤐᤠᤌᤢᤱᤛᤠᤜᤠ᤹ ᤔᤧᤛᤩᤧᤖᤥ॥

⁴ ᤜᤧᤰᤁᤩᤠᤱ ᤛᤢᤶᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤕᤱᤄᤱ ᤏᤢ ᤘᤠᤒᤢᤴᤜᤠ᤹ᤀᤥ ᤜᤢᤰᤂᤢᤀᤠᤱ ᤂᤧᤱᤜᤠ᤹ ᤔᤠᤰᤂᤡ᤹ ᤐᤥ᤺ᤰᤂᤧ ᤐᤣᤖᤥ॥

⁵ ᤜᤧᤰᤁᤩᤠᤱ ᤆᤫᤠ᤺ᤳ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤀᤰᤂᤣ ᤔᤧᤳᤋᤢᤒᤠ ᤀᤡᤱᤃᤠ᤹ ᤂᤧᤵᤛᤢᤱ. “ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤛᤣᤛᤣ ᤁᤧᤘᤕᤧ ᤜᤧᤰᤁᤩᤠᤱ ᤀᤠᤸᤗᤥᤀᤠᤱ ᤛᤣᤛᤣ ᤁᤧᤘᤠ᤹ᤖᤥ॥ ᤁᤴ ᤔᤡᤴᤍᤣ᤹ᤜᤠ᤹ ᤁᤧᤒᤠᤱᤄᤢᤀᤠᤱ ᤂᤠᤛᤧᤴ ᤁᤧᤈᤥᤃᤢᤛᤡᤸᤗᤧ ᤁᤧᤄᤠᤛᤧᤴᤏᤡᤴ ᤁᤢᤍᤥ᤺ᤵᤔᤠ ᤆᤥᤰᤗᤥ॥

⁶ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤏᤢ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤏᤡ᤹ ᤔᤠᤰᤂᤡ᤹ᤀᤡᤴ ᤔᤧᤛᤧᤛᤢᤀᤠᤱ ᤔᤧᤘᤠ᤹ᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤠᤰᤂᤡ᤹ᤀᤡᤴ ᤌᤢᤱᤔᤠ ᤁᤧᤒᤠᤱᤄᤢᤛᤡᤖᤥ॥ ᤂᤧᤱᤃ ᤂᤧᤱᤜᤠ᤹ ᤗᤠ᤹ᤖᤢᤛᤡᤒᤠ ᤂᤢᤶᤍᤡᤱᤅᤡᤴ ᤘᤕᤧᤖᤥ॥”

⁷ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤗᤠᤶ ᤀᤰᤂᤣ ᤁᤧᤗ᤹ᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ. “ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤣ. ᤂᤧᤏᤧ᤹ ᤁᤧᤈᤥᤃᤢᤒᤠ ᤂᤠᤛᤧᤴᤏᤡᤴ ᤛᤧᤰᤂᤠᤒᤠ ᤏᤢ ᤛᤠᤶᤕᤥᤒᤠ ᤆᤥᤰᤗᤥ॥”

⁸ ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤏᤠᤶᤔᤥ ᤜᤢᤰᤂᤢᤀᤠᤱ ᤏᤠᤶᤔᤡᤸᤗᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤡ᤺ᤸᤗᤧ ᤀᤥ᤹ᤔᤠᤛᤡ ᤕᤢᤰ ᤂᤥᤛᤢᤖᤥ॥

⁹ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤏᤠᤶᤔᤡᤸᤗᤧ ᤛᤠ᤹ᤖᤡᤰ ᤀᤥ᤹ᤖᤢᤛᤡᤸᤗᤧ ᤂᤧᤴ ᤔᤡᤴᤍᤣ᤹ᤜᤠ᤹ ᤛᤶᤍᤠᤱ ᤕᤢᤰ ᤁᤧᤃᤵᤐᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴ ᤜᤧᤰᤁᤩᤠᤱ ᤂᤢᤏᤧ᤹ ᤔᤡᤔᤡᤍᤡᤱᤅᤠᤱ ᤔᤧᤶᤒᤡᤖᤢᤴᤗᤥ॥

¹⁰ ᤜᤧᤰᤁᤩᤠᤱ ᤅᤠᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤕᤢᤰᤏᤠ ᤛᤶᤍᤠᤱ ᤜᤢᤰᤂᤢᤖᤥ॥ ᤜᤧᤰᤁᤩᤠᤱ ᤂᤧᤴ ᤁᤡᤵᤔᤠ ᤁᤧᤄᤢᤒᤠ ᤌᤰᤛᤠ᤺ᤸᤗᤧ ᤁᤢᤜᤠᤱᤈᤢᤶᤔᤡᤴ ᤔᤠᤰᤆᤡᤃᤧᤴ ᤂᤠᤍᤠᤶᤔᤠᤸᤗᤧ ᤛᤡᤍᤧᤵ ᤋᤧᤵᤋᤢᤖᤥ॥ ᤜᤧᤰᤁᤩᤠᤱ ᤛᤠ᤹ᤖᤡᤰ ᤋᤢᤰᤂᤣ᤺ᤸᤗᤧ ᤆᤥᤃᤢᤸᤗᤧ ᤂᤧᤵᤔᤥᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤜᤠᤒᤧ ᤔᤧᤓᤡ᤺ᤰᤋᤧᤖᤥ॥

¹¹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤕᤠᤱᤄᤣ᤺ᤰᤜᤠ᤹ ᤛᤠ᤹ᤖᤡᤰ ᤋᤢᤃᤧᤒᤠᤸᤗᤧ ᤆᤥᤃᤢᤸᤗᤧ ᤛᤠᤱᤃᤪᤠᤶᤐᤣᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ॥ ᤀᤠᤸᤗᤛᤠᤱ ᤂᤧᤱᤜᤠ᤹ ᤂᤢᤏᤡ᤹ ᤑᤧᤴᤕᤠ᤺ᤶᤒᤰᤁᤥᤏᤢ ᤔᤧᤴᤜᤡᤴᤍᤧᤴᤗᤥ॥

¹² ᤜᤧᤰᤁᤩᤠᤱ ᤋᤢᤰᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤖ᤺ᤱᤅᤥ ᤜᤢᤰᤂᤢᤀᤠᤱ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤴ ᤆᤒᤧᤒᤣᤖᤥ. ᤜᤧᤰᤁᤩᤠᤱ ᤏᤠᤶᤃᤧᤴ ᤐᤡᤛᤠᤱᤗᤠᤶ ᤌᤱ ᤆᤥ᤺ᤰᤛᤧ ᤜᤠᤱᤜᤠ᤹ᤖᤧ ᤂᤢᤏᤡ᤹ ᤔᤠᤖᤠᤶᤔᤡᤴ ᤕᤠᤖᤡᤵ ᤐᤥ᤺ᤰᤂᤧᤖᤥ॥

¹³ ᤜᤧᤰᤁᤩᤠᤱ ᤂᤧᤵᤔᤥ ᤜᤴᤍᤃᤣ᤺ᤰᤃᤧᤴ ᤘᤠᤛᤣᤖᤡ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ. ᤌᤰᤛᤠ᤺ᤸᤗᤧ ᤁᤢᤔᤢᤖᤠᤀᤥᤗᤠᤶ ᤜᤧᤰᤁᤩᤠᤱ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤔᤢᤖᤠᤀᤥᤗᤠᤶ ᤛᤢᤶᤛᤡ ᤐᤍ᤺ᤰ ᤜᤧᤰᤋᤱᤒᤠ ᤀᤠᤈᤡ᤺ᤴᤈᤡ᤺ᤶᤒᤠ ᤑᤧᤴᤛᤠᤶᤜᤠ᤹ ᤔᤧᤗ᤺ᤴᤍᤧᤒᤠ ᤏᤡᤛᤢᤱᤛᤡᤱᤗᤥ॥

¹⁴ ᤂᤧᤱᤜᤠ᤹ᤃ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤑᤧᤴᤛᤠᤶᤛᤡᤖᤥ॥ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤜᤠᤱᤜᤠ᤹ᤀᤥ ᤔᤧᤒᤣ᤺ᤰᤁᤠᤱ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤕᤶ ᤕᤶᤒᤠ ᤁᤢᤕᤧᤴᤏᤥ ᤌᤱ ᤆᤥ᤺ᤰᤛᤧ ᤂᤧᤱᤜᤠ᤹ ᤔᤧᤛᤢᤵᤛᤢ ᤔᤧᤍᤠᤖᤢᤛᤡ᤹॥

¹⁵ ᤍᤠᤱᤒᤠᤸᤗᤧ ᤐᤠ᤺ᤳᤋᤢ᤹. “ᤏᤢᤖᤡᤰᤁᤠᤱ ᤂᤧᤵᤛᤧᤶᤔᤧ᤹ᤀᤥ᥄ ᤀᤡᤱᤃᤠ᤹ᤃ ᤁᤧᤄᤢ᤺ᤵᤐᤠ ᤁᤢᤀᤡᤛᤡᤰ ᤛᤫᤠ᤺ᤳᤋᤠᤱ ᤋᤠᤀᤠᤖᤥ॥ ᤜᤠᤳ ᤔᤧᤴᤀᤡᤶᤔᤣ ᤛᤡᤱᤛᤡᤱ ᤘᤠ᤹ᤀᤠᤱ ᤁᤢᤍᤣ᤺ᤳ ᤆᤠᤱᤜᤠ᤹ ᤂᤢᤏᤧ᤹ᤏᤢ ᤁᤳᤋᤢ ᤂᤧᤱᤃ ᤔᤢ᤹ᤀᤡᤛᤠᤒᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤗᤧᤰᤆᤠᤒᤧᤎᤡ᤺ᤰ ᤗᤠᤱᤄᤣ᤺ᤰᤔᤠᤀᤠᤱ ᤛᤡᤖᤡᤱᤔᤔᤥ ᤌᤠᤔᤠ ᤔᤧᤒᤥᤱᤏᤧᤸᤗᤥ॥”

¹⁶ ᤜᤧᤰᤁᤩᤠᤱ ᤜᤡᤒᤪᤢ ᤐᤠ᤺ᤴᤍᤠᤱᤅᤥ “ᤀᤠᤖᤔᤠᤃᤧᤍ᤻ᤍᤥᤏ” ᤔᤧᤵᤔᤏᤠᤒᤠ ᤋᤧᤴᤏᤥ ᤂᤧᤴ ᤑᤧᤴᤛᤠᤶᤜᤠ᤹ᤖᤧ ᤁᤠᤰ ᤜᤠᤱᤜᤠ᤹ ᤔᤧᤛᤢᤵᤛᤢᤛᤡ᤹॥

¹⁷ ᤜᤧᤰᤁᤩᤠᤱ ᤏᤢᤛᤡᤃᤣᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤄᤥᤷᤕᤠᤴ ᤛᤢᤖᤡᤳ ᤁᤣᤈᤱᤅᤥ ᤜᤢᤰᤂᤢᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶᤔᤥᤒᤠ ᤜᤠᤱᤕᤢᤰᤏᤠᤗᤠᤶ ᤀᤠᤸᤗ ᤆᤢᤖᤧᤖᤥ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤋᤩᤧᤖᤥ॥

¹⁸ ᤜᤧᤰᤁᤩᤠᤱ ᤂᤧᤵᤔᤥ ᤛᤠ᤺ᤶᤓᤣ ᤗᤧᤰᤋᤧ. ᤋᤠᤱᤛᤠᤰᤐᤧᤴ ᤂᤧᤖᤧᤱᤄᤢᤖᤢᤱ ᤗ᤹ᤖᤡᤰ ᤗᤥ᤺ᤰᤂᤢ. ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤗᤢᤵᤗᤡ ᤌᤠᤅᤧᤖᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧᤴ ᤏᤠᤘᤠᤃᤧᤴ ᤆᤀᤡ᤺ᤳ ᤏᤧᤛ᤻ᤛᤧᤀᤠᤱᤎᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤀᤰᤋᤱᤒᤠ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤗᤢᤵᤗᤡ ᤌᤠᤅᤧᤒᤠᤃ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤔᤧᤘᤕᤧᤖᤥ॥

¹⁹ ᤜᤧᤰᤁᤩᤠᤱ ᤂᤧᤴ ᤐᤕᤶ ᤕᤶᤒᤠ ᤕᤧᤰᤕᤰ ᤒᤣᤒᤡᤗᤥᤏᤡᤴ ᤂᤧᤸᤗᤧᤰ ᤐ᤺ᤰᤂᤧᤖ ᤛᤢᤶᤛᤡ ᤗᤰᤁᤥ ᤜᤠᤛᤡᤱᤗᤥ. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤗᤠᤈᤣ᤹ᤒᤠ ᤕᤧᤰᤕᤰᤜᤠ᤹ ᤌᤩ᤺ᤱ ᤐᤥ᤺ᤰᤂᤧᤖᤥ॥ ᤒᤣᤒᤡᤗᤥᤏᤖᤧ ᤁᤠᤰ ᤁᤢᤗᤠᤕᤥᤜᤠ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤋᤢᤀᤠᤱ ᤁᤡᤵᤔᤠ ᤁᤧᤄᤢᤒᤠ ᤁᤢᤛᤠᤰᤁᤧᤴᤏᤡᤸᤗᤧ ᤁᤧᤍᤡᤶᤒᤠ ᤂᤥᤷᤕᤠᤗᤠᤶ ᤂᤧᤴ ᤌᤢᤱᤔᤠ ᤐᤠᤱᤄᤢᤖᤥ॥

²⁰ ᤗᤢᤵᤗᤡ ᤌᤠᤅᤧᤒᤠᤸᤗᤧ ᤆᤥᤃᤢᤸᤗᤧ ᤁᤠᤰ ᤘᤠᤃᤵᤗᤠᤈᤣ᤹ᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤔᤧᤔᤕᤧ ᤔᤧᤒᤣᤖᤥ॥

²¹ ᤜᤧᤰᤁᤩᤠᤱ ᤔᤧᤴᤇᤠᤶ ᤕᤠᤵᤔᤡ ᤛᤶᤍᤠᤱ ᤋᤠᤱᤛᤠᤰᤐᤥᤗᤠᤶ ᤕᤶᤒᤕᤶᤒᤠ ᤑ᤺ᤴ ᤌᤩᤧᤖᤥ॥ ᤂᤧᤴ ᤑ᤺ᤴᤏᤡᤱᤃ ᤗᤡᤒᤥᤱ (᥊᥆) ᤗᤡᤒᤥᤱ ᤁᤡᤗᤥ ᤌᤠᤖᤡᤰ ᤁᤧᤗᤡ᤺ᤵᤐᤠ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤂᤧᤴ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧᤃ ᤁᤴ ᤑ᤺ᤴᤏᤡᤸᤗᤧᤴ ᤔᤡᤴᤍᤣ᤹ᤀᤡᤸᤗᤧ ᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤛᤠᤱᤃᤪᤠ ᤔᤧᤔᤧᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤔᤡᤴᤍᤣ᤹ᤀᤡᤱᤃ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤆᤥᤃᤧᤖᤥ॥